أعمال من تنفيذ الفنان محمد الآلاتي - الصفحة 18

**M O H A M E D** · #1 21/09/2008, 00h40

جميل جداً جداً يا أستاذ محمد

ألف ألف شكر على هذا الإبداع

:good: :good:

**ALY ELHELALY** · #2 21/09/2008, 01h04

جميل يا أستاذ محمد
وكل سنة وأنتم طيبين
وربنا يجعله عام سعيد ملئ بالإبداع
ويسعدنى أن أقدم بضع كلمات إهداء لمنتدانا الجميل

مرت سنة
وأتنين وأدى تالت سنة
هلت علينا

وفى الغُنىَ وأحلى كلام
ويا الطرب
عشنا أرتوينا

فيك يا سماعى كل ما نتمنى فيك
فيك أحلى أنغام شفتها الله عليك

بإيدين ولادك كل يوم بتزيد حلاوة
لك مكان جوه قلوبنا وليك غلاوة
والله غالى يا سماعى
والله غالى
وأحلى صحبة فى لياليك ألتقينا
ربنا يخليك ياغالى ويحفظك
من عيون الحاسدين
وكمان عنينا

**د أنس البن** · #3 21/09/2008, 07h56

عظمه على عظمه على عظمه
يا آلالاتى يا فنان يا ذوق

**الألآتى** · #4 30/09/2008, 18h09

إخوانى الأعزاء

بناءً على رغبة الأستاذ غازى الضبع ( أبو فارس )

إليكم اللازمة الموسيقية للكوبليه الأخير من أغنية ليلة حب غناء أم كلثوم .. ومن ألحان محمد عبد الوهاب ..

وفى الحقيقة لقد كانت تمثل لى هذه اللازمة علامة إستفهام كبيرة قبل أن أحترف أو أدرس الموسيقى ..

فلقد إستخدم عبد الوهاب فى بداية اللازمة .. ميزان إيقاعى 9 /8 .. وبالطبع هذا الميزان غريب وغير مألوف ..

وليست المشكلة فى الميزان نفسه .. لكن عبد الوهاب أراد أن يكمل اللازمة بميزان أخر .. هو الميزان الرباعى ..

وهنا كانت المشكلة .. كيف سيخرج من الميزان الأول ( 9 / 4 ) وهو ميزان فردى .. إلى الميزان الرباعى .. وهو ميزان ثنائى .. بالتأكيد لو خرج مباشراً .. كان سيحدث فجوة .. لأن هناك ضلع ناقص فى الإنتقالة ..

وبما أن عبد الوهاب ملحن خبير وصنايعى .. فعمد إلى الجيتار .. وأعطاه هذه المهمة .. فنجد أن الجيتار عزف حرفاً واحداً يساوى ضلعاً واحداً من المازورة .. وهذا الحرف المعزوف كان خارج الإيقاعان .. أى همزة وصل ليكمل الضلع الناقص .. وبذلك تخطى المشكلة .. التى صنعها بنفسه بالتأكيد .. فهو صنع المشكلة وصنع الحل .. ليبين لنا مقدرته الفذة على تلحين أى شئ وبأى شكل .. وليعطينا درساً فى كيفية وضع الخطط اللحنية .. وفى النهاية حصلنا وسمعنا لازمة جميلة تُحسب لعبد الوهاب ..

والغريب أن هذه النقلة إستنفرت أذن الأستاذ غازى وشدت إنتباهه .. وهو لم يدرس الموسيقى .. دليل على أن عبد الوهاب لم يعطى الدرس للموسيقيين فحسب ولكنه يعطيه للمستمع والمتذوق الذى لم يدرس الموسيقى ..

فشكراً للأستاذ غازى وشكراً لعبد الوهاب ..

إسمعوا وإستمتعوا ..

التنفيذ للعبد لله ..

**غازي الضبع** · #5 30/09/2008, 18h33

أستاذنا المايسترو الكبير / أبو حسام
والله زي ما يكون قلبي حاسس
أنا واقف على باب منزلي ولابس وجاهز للنزول ( للصياعة ) في ليلة العيـد
وفجأة حاجة كده قالتلي أبص بصة سريعة على سماعي قبل ما أنزل
وإذا بي أجد هذه المقطوعة الرائعة لأستاذنا عبد الوهاب
أولا .. ألف شكر على إهدائها لي ، وعلى شرحك الجميع المعهود عنك يا عم محمد يا جميـل
وإن شاء الله لما أرجع ( الفجر وعليك خير ) يبقى لي عودة في التحدث عن هذه الدرة من درر الأستاذ عبد الوهاب ..
سلام مؤقتاً ..

**mandolin** · #6 30/09/2008, 22h11

شكراً ل الأستاذ الألآتى على تسليط الضوء على إيقاع عادةً نسمعه في الموشحات والقوالب الموسيقية وهو إيقاع اقصاق على
ميزان 9 على 8 .
ونذكر في هذه المناسبة أغنية الحب كله التي لحنها بليغ حمدي واستعمل في المقدمة ميزان 13 على 4 او على 8 واستعمل ايقاع دور هندي 7 على 8 في الكوبله الآخير.

**الألآتى** · #7 30/09/2008, 22h27

شكراً لأخى ماندولين على الإضافة والمعلومات ..

هو بالفعل إيقاع أقصاق .. وقد إستخدمه عبد الوهاب بشئ من التصرف .. والأجمل أنه إنتقل للمصمودى الصغير بكل حرفية ..

**عادل صموئيل** · #8 30/09/2008, 22h57

اخى العزيز محمد الآلاتى
اشكرك على هذا العمل الجميل والذى تميز انك جبت الازمة بس مش الكوبليه كله عشان تسلط الضوء على المصائب الموسيقية والبلاوى اتى فيه
اول ماقريت طرحك للموضوع والردود انا وانت عارف انى لى نظرة على اى صورة من زاوية تانية غير اللى بيشوفها حد تانى
انا سرحت بخيالى فى عبد الوهاب واللى انا خبزته وعجنته وعرفت خباياه عارف تخيلت انه لو كان عايش وقرى الكلام اللى كتبتوه والتحليل لأبتسم ابتستمة الدهاء والخبث الموسيقى بتاعته لأن كلامكم الجميل ده حايخليه يحس انه عمل حاجة او وصل للشىء اللى هو عايز يعمله لأنه كان بيحب يعمل الشىء المتميز اللى مش حايعمله حد غيره
يعنى كتير كنا فى البروفات هو عامل لحن جملة 4/4 وينتقل ل جملة 3/4 اى ملحن عادى بيتكل على عازف الايقاع الشاطر اللى بيديك النقلة مضبوطة لكن عبد الوهاب كان بيحب يحط مصيبة فى النقلة ما حدش يتخيلها عشان يبقى عبد الوهاب
انا فى مرة اتخانقت مع موسيقى عمل نقلة كده وقال هو العادى بتاعها كده جننى وجبت له الشريط واقنعته لو عبد الوهاب عمل النقلة عادى كده زى ما الناس بتعملها يبقى مش عبد الوهاب لازم يعمل فيها ولو تكة صغيرة مختلفة
انا شفته كان بيقعد مع عازف ايقاع فطرى يشرب منه ايقاعات غريبة من اللى مش متداولة وبعدين يروح لواحد اكاديمةى يقننها له ويتفهمها اكاديميا تتحط ازاى عشان لما يخرج من ايقاع عادى للإيقاع الغريب ده يعمل نقلة تخلى الموسيقيين يتجننوا وتبقى نقلة متفردة ماحدش يجرؤ يعملها بعد كده
اشكرك الف شكر وفى انتظار المزيد من الاببداع

**الألآتى** · #9 27/12/2008, 19h36

أغنية

وشك حلو عليا

كلمات : عبد الوهاب محمد

ألحان : عبد العظيم محمد

غناء : أحمد سامى

تسمعونها اليوم من تنفيذى المتواضع وصوتى الغير مطرب بالمرة

**أحمد شوبكى** · #10 27/12/2008, 21h03

فنانا العظيم وأستاذنا الكبير موسيقار المنتدى : عمنا / محمد الآلاتى
بسم الله ما شاء الله عليك يا أستاذ ،،، حاجة جميلة جداً وصوت فعلاً غير غير مطرب ( ونفى النفى إثبات )
ربنا ما يحرمنا منك ومن فنك يا عظيم