نوت متنوعة - الصفحة 17

**عادل صموئيل** · #**161** 03/02/2010, 10h54

ااحبائى
فى يوم ذكرى ام كلثوم اقدم لكم من احلى روائعها
اروح لمين
كاملة
مع اطيب تحياتى

**عادل صموئيل** · #**162** 04/02/2010, 10h08

احبائى
اقدم لكم بناء على طلب الاخت العزيزة ياسمين الشام
مقدمة ومذهب
هذه ليلتى
هنا انا عملت شىء اعتقد انه شىء فى تحدى صعوبة كتابة الموسيقى العربية
المقدمة الاولى هى ادليب انا كتبتها على ميزان ( طبعا مع عدم الاخلال بسلامة اللحن ) وهنا درس مهم احب اقوله ان اى انسان بيكتب نوتة لازم يلاحظ الامكانيات التى فى اللحن وهنا فى هذه الافتتاحية انا لما دققت فيها حسيت انها ادليب لكن ممكن تتكتب على ميزان طبعا للتسهيل على القارئين
اضاً الإضافة انا دونت صولو الجيتار وملحوظ ان النوتة التى ارفقتوها لم يكتب الصولو واكتفى بكلمة تقاسيم جيتار ولكنها صولو وليست تقاسيم ولابد من كتابتها
ايضا فى الجملة الاخيرة من المقدمة والتى بها صولو الجيتار هى جملة تتكرر مرتين مختلفتين وانا الحمد لله كتبت الجملتين لحرصى على تدوين كل حرف فى الاغنية
الأخت ياسمين طلبت المقدمة ولكن انا كمان كتبت لكم المذهب
مع اطيب تحياتى

**عاصم المنشاوى** · #**163** 05/02/2010, 05h50

الاصدقاء / وائل و حسام
آدى نوتة "الحب اللى كان"
كالعادة ناقلهالكم من كتاب تدوين الأستاذ محمد رجب
طبعا استاذنا العظيم عادل صمويل هو برضو الاصل واذا قال ذيع حنذيع
حبيت بس اخف الضغط عليه...لأن احنا مابنشبعشى
وزى ماهو قال التدوين عايز روقان بال ومعايشة اللحن
بالتالى خدوا دى تصبيرة الى ان : اما سيادته يجيز النوتة مع التعليق على اخطائها او الانتظار.
طبغا الاغنية تلحين المدهش دائما بليغ حمدى...ليه بقول مدهش لانه الملحن الوحيد فى تاريخ مصر اللى كتب كلمات اغانبه ....بتلاقى الظاهرة دى فى الشام ودول كتير لكن مش فى مصر...الحب اللى كان كلمات والحان ابن النيل بليغ حمدى
عزيزى عاصم
اشكرك لأنك قدمت النوتة دى بالذات
عليها الحاح كبير من كل الاعضاء انا من كذا شهر ابتديت اكتب فيها لكن جيت عند الجزء بتاع ( حبيبى كان هنا مالى الدنيا عليا ) ميادة الحنوى بتكسر الايقاع مش عارف ليه وكل ماتعيد الكوبليهات كلها بتغلط نفس الغلطة الظاهر هى حافظاها كده ( وانا بالذات عشان اهم شىء عندى الدقة الفوق المتناهية ما ريحنيش اللحن ) واعتقد والله اعلم انها سجلت الاغنية دى ايام ماكان بليغ متواجد فى فرنسا يعنى حد غيره تولى انتاج اللحن بس الحد ده ما كانش عنده الامانة الفنية مع الاسف انه ينفذ اللحن فى عدم تواجد بليغ يعنى انا اللحن تنفيذه مش عاجبنى يعنى انا طبعا تعاملت مع صديقى العزيز بليغ سنوات طويلة واول شىء ( مع انى ماعزفتش اللحن ده لأنه اتعمل على فرقة غير الفرقة الماسية ) اول شىء حسيته لما سمعت اللحن ان بليغ ماكانش موجود فى انتاج واخراج اللحن لأن انا طبعاً ليا نظرة غيركم بحكم التجارب العملية انا حسيت اللحن لحن بليغ بس مش متنفذ بروح بليغ
والكلمة دى ( روح بليغ أو روح الملحن معناها كبير يعنى كل لحن انا اول مرة بشوفه بيبقى شكل لكن فى البروفات الملحن بيغير ويحذف اجزاء ويضيف يعنى اللحن بيبقى شكل تانى هنا حسيت اللحن خام يعنى زى مابليغ طلعه اول مرة ) وحسيت الاورج واكل الجو اكتر من اللازم , المهم انا كنت بتردد كتير اكتب اللحن ده واشكرك الف شكر انك ريحتنى منه
وذيع ياعم على ضمانتى وليك عندى دستة جاتوه
وماتنساش انا قلت اى نوتة لو مش حاتضيف مش حاتخسر يعنى مثلا اسألأ روحك وهذه ليلتى انا حسيت ان لازم اكتبهم تانى لكن فيه نوت ممكن تمشى يعنى
مع اطيب تحياتى عادل صموئيل

**عادل صموئيل** · #**164** 05/02/2010, 07h17

احبائى
نظراً للإجماع منكم على طلب اغنية عدى النهار
اقدمها لكم
يعنى حظكم حلو كان مزاجى (صدفة معتدل ) خلال الاربع ساعات الماضية ( مش عارف ليه مش عوايدى اليومين دول ) لأن الاغنية دى اولاعزيزة عليا ثانيا كلها ادليب , والأدليب محتاج هدوء اعصاب وتركيز يعنى تمهيد للإبتكار والابداع
لأنه غير الجملة لما تكون على ايقاع بتبقى محتاجة افهمها واستوعبها واكتبها لكن الادليب بتبقى محتاجة ازاى افهمها واستوعبها 100% بعدين اخلق لها اسلوب اكتبها لأن هنا تفرق ممكن واحد يكتب الجملة الادليب يدمرها
هنا ملحوظة مهمة : قبل ماتحاول تعزف الاغنية دى بالذات عشان كلها ادليب لازم تكون حافظها 100% يعنى بتغنيها فى الحمام لحد ما الجيران يسمعوها ويتوجسوا منك خيفة يحسوا انك عايز تحارب ويعملوا حسابك يعنى لأن الادليب الكتير وانت بتقراه لازم انت تتحكم فيه ما تسيبش الحروف هى اللى تجرك لأن مهما كان اللى بيكتب وكمان ده مين عبد الحليم يعنى مش ممكن يتكتب زى ما بتسمعه ولكنه بيبقى تقريبى .
هنا انا ربنا وفقنى وعملت المقدمة على ميزان مع انها ادليب طبعا دى مدرسة من مدارس الكتابة وهى الجملة اللى ممكن تحتمل تتكتب على ميزان المفضل تتكتب على ميزان لسبب ان بدل لما تكون الاغنية 30 سطر ادليب ننقص عدد اسطر الادليب بقدر الامكان لأن الجملة اللى على ميزان اسهل كتير جدا فى القراءة
مع اطيب تحياتى

**عاصم المنشاوى** · #**165** 05/02/2010, 15h53

الاصدقاء
باعتذر عن ان نوتة الحب اللى كان ناقصة صفحة 3
وجل من لا يسهو
اما استاذنا الجميل عادل بك فأنا طبعت التعليق الجميل
بتاع سيادته لانه كان دمه كان زى العسل واحتفظت بيه فى دوسيه مخصوص
حاكم اصل الجماعة الفنانين دول ياسلام بقى لما الغزالة تبقى رايقة
تديك احلى ابداع
ربنا يخليك لنا ياستاذ.

**عادل صموئيل** · #**166** 07/02/2010, 18h21

احبائى
بمناسبة عيد ميلاد الفنانة الحبيبة شادية
اقدم لكم نوتة
ليالى العمر معدودة
اتمنى ان تحوز رضاكم مع اطيب تحياتى

**عادل صموئيل** · #**167** 10/02/2010, 13h57

احبائى
اقدم لكم نوتة
سيرة الحب كاملة
اتمنوا ان تسعدوا بها
هنا ملحوظات مهمة انا فى الافتتاحية الاولى عملتها على ميزان يعنى اكيد انا مركز على الموضوع ده ان الجملة الادليب احيانا ممكن تكون من النوعية التى تصلح للكتابة على ميزان , وطبعاً ناس ممكن تسأل ما معنى نوعية تصلح للكتابة على ميزان , معناها ان الجملة مقسمة بالتساوى او محددة شوية غير الادليب بيبقى منطلق , وطبعا ده انا شىء عامله بالذات لمساعدة الاحباء الهواة والمبتدئين وللعلم اقول لكم سر ان الادليب لو انت مش حافظ اللحن بنسبة 90% على الاقل مش حايطلع مضبوط , يعنى احنا ايام الزمن الجميل لما كانت النوتة توضع امامنا لأول مرة , احنا كنا بنقرأ الجمل اللى على ميزان عادى امر مفروغ منه يعنى المايسترو او قائد الفرقة بيعطينا السرعة , لكن الادليب لازم الملحن يعزفه على العود او يغنيه امامنا كذا مرة والمايسترو يتشبع بالجملة بحيث ان هو بيقودنا واحنا بنقرأ , او لو جملية غنائية المطرب بيبقى حافظها وانا بتابع مع المطرب وعينى ع النوتة يعنى زى ماقلت ان الادليب النوتة بتكون استرشادية , لكن لو انت مش حافظ اللحن تمتم حاتطلع حروفقد لايكون لها معنى
هنا فى اللحن ده ارجو تاخدوا بالكم من الاختلاف فى السرعة يعنى انا طبعا كاتبها مبسطة بأعلى درجة وحتلاقوا ان بين مازورتين السرعة بتتغير فجأة من 140 الى 100 طبعا مع اننا ناخد بالنا من التحويلات المقامية الكتير والمفاجئة ايضاً , وهنا احب اقول ملحوظة ان اللحن ده بيحتاج تجويد فى الغناء او العزف يعنى هو كنغمات سهل جدا اسهل من اى لحن تانى ولكن قوته فى حلاوة الاداء
مع اطيب تحياتى واهديه لأخى العزيز نور الصباح بمناسبة عيد ميلاده واهديه لجميع الاخوة الاحباء فى المنتدى

**عادل صموئيل** · #**168** 11/02/2010, 13h38

احبائى
اقدم لكم نوتة
النيل نجاشى
واهديها للأخ العزيز نور الصباح
كما اهديها لكل عشاق الاغانى الصعبة بل المستحيلة
يعنى هذه النوعية من الاغانى ( اغانى عبد الوهاب القديمة ) تعتبر اصعب الالحان فى التدوين اطلاقا وانا للعلم كتبتها كنوع من التحدى مع نفسى , لأنى متأكد ان اللى ممكن يكتبوا هذه النوعية مش موجودين نهائيا اليومين دول وانا حبيت احس انى لسه شاطر يعنى , وصعوبة هذه النوعية من الألحان انها من مطلع الاربعينيات كان مفيش تدوين موسيقى يعنى كانوا بيحفظوا اللحن من عبد الواب على العود , والمشكلة هنا عبقرية عبد الوهاب الزائدة , يعنى كان بيعمل حاجات فوق مستوى التدوين يعنى مش ممكن حد يقدر يدونها
( وانا قلت لكم قبل كده انه كان كل فترة بيعمل لحن مستحيل حد يقدر يؤدية كاملاً عشان يثبت لنفسه وللناس انه عبد الوهاب المستحيل ) والعملية دى بتخلى التدوين صعب جدا لأنه فى عبقريته بيخرج عن كل قواعد الموازين والمقامات والمشكلة الخطيرة فى التدوين انك لو حبيت تلتزم بالقواعد الاكاديمية للتدوين ممكن عشان تظبط الموازين تغير حاجة فى اللحن ودى طبعا مشكلة المشاكل او كبرى الكبائر , لأن ملايين الناس وبالذات عشاق أو مدمنى عبد الوهاب حافظين اللحن سمعاً زى ماهو , واى تعديل حتى للظبط العلمى ممكن يعمل اختلاف على الاقل الناس ممكن يقولوا انا مدون اللحن وفيه اخطاء
ولكن عشان عادل صموئيل ونابليون كانوا مايعرفوش المستحيل عندى الحل انا دونت اللحن بقدر الامكان بأقصى خبرتى المطلوب عشان تعزفه باكبر قدر من الجودة انك تكون حافظ اللحن من تسجيل عبد الوهاب 100% بعدين تمسك النوتة وتطلع جزء جزء واكيد حاتوصل .
فيه كمان مشكلة خطيرة فى التسجيل ايام الاغنية دى ان كانوا لسه ما اخترعوش شرائط التسجيل وبالتالى المونتاج , كانوا بيسجلوا على الإسطوانات الحجارى القديمة وكان الاسطوانة وجهين كل وجه 3 دقائق تقريبا فكانوا بيقسموا الاغنية نصفين وعند التسجيل كان يتم بأكثر الوسائل بدائية يعنى لازم كل وجه من الاسطوانة يتسجل مرة واحدة بدون توقف ولو حصل اى خطأ فادح ولأنهم كانوا الأول بيسجلوا على قرص شمع وكان غالى الثمن جدا كانوا بيرموا قرص الشمع ويحطوا واحد تانى , والكارثة دى كانت بتخليهم يتغاضوا عن اى غلطة صغيرة فى التسجيل , وتيجى هنا الكارثة دى فى التدوين يعنى عشان اظبط المازورة دى بدون ان اغير فى اللحن اللى الناس حافظينة ممكن افكر فيها كذا ساعة , والمشكلة دى طبعا انتهت مع ظهور التسجيل على الشرائط لأن الغلطات كانت بتتشال فى المونتاج
اتمنى ان تعجبكم النوتة ولكن بشرط ماحدش يستعملها غير لما يكون حافظ اللحن جدا والتسجيل موجود هنا
مع اطيب تحياتى
عشان خاطركم يهون كل التعب والمجهود لأن اكتر شىء يهمنى ان تستفيدوا منى

**عادل صموئيل** · #**169** 13/02/2010, 22h09

احبائى
بعد طول انتظار وتكرار الطلب على نفس الاغنية
اقدم لكم اخيرا نوتة
حبيبتى من تكون
هنا فيه ملحوظة فيه اجزاء صعبة فى اللحن لكن طبعا النوت الاسهل اللى انا بقدمها لكم اكيد بتفتج المجال انكم تعزفوا نوت اصعب شوية يعنى انا حاولت التبسيط على ما اقدر لكن التبسيط لازم يكون بحيث تسهيل القراءة مع عدم الاخلا باللحن , المقدمة الموسيقية طويلة جدا وتعبتنى بجد لكن انا قدمتها كاملة ما اختصرتش منها , انا بعمل حساب ان ممكن اى انسان يستفيد منها حسب احتيجه يعنى ممكن فرقة محترمة فى اى بلد تعزفها واكون مسرور لو انهم يحسوا انى قدمت لهم كتابة حلوة تريحهم فى العزف ويقتكرونى ( بعدين )
من الملحوظات المهمة فيه فروق سرعات فجائية كتير ناخد بالنا منها ( لأن السرعة مراقبة بالرادار ) وطبعا النصيحة الدائمة نحاول نسمع التسجيل كويس الاول عشان نبقى فاهمين حانعزف ايه
انا طبعا اول ماخلصتها ما قدرتش اصبر للصبح قلت انزلها فوراً يمكن يكون حد سهران ويسعد بها الليلة
مع اطيب تحياتى

**عاصم المنشاوى** · #**170** 17/02/2010, 10h26

الاصدقاء الاعزاء
عارفين أغنية "دندنة" والتى غنتها وردة فى منتصف السبيعينات هى من تأليف الاستاذ /عبد الوهاب محمد وتلحين المدهش /بليغ حمدى
احب اهدى الكلمات الجميلة دى للاستاذ /نور الصباح ليهديها بأسمنا كلنا لعمنا /الرائع عادل صمويل.... وطبعا النوتة بتاعتها ...ودى احدى ابداعاتى فى غشها ونقلها وتصويرها وعمل سكان لها... عشان نغنيها سوا لأستاذنا.
خاصة ان فيها صولو رائع ل ناى محمود عفت -للاسف مش مدون-وتألق لقانون احمد فؤاد حسن يسلطن فيه وردة ايام نضوجها فى الكوبليه التانى.
كالعادة النوتة مش للمبتئدين ولا للمعاقين موسيقيا وعزفيا امثالى خاصة ان فيا قرارات كمانجات عالية قوى...لكن كلماتها حلوة قوى ...واهى تصبيرة لحين عودة الكبير بتاعنا
ياللا نغنى:
انا ...غيرك..؟ ماليش بعدك..؟ مافيش
انا ...مهما أقول بهواك....كل الكلام ...مايكفينيش ...ولا الزمان ...ما يقضينيش

اللحن كله شقاوة وواحدة فرحانة بحبها بتغنيه وهى بتضحك لحد الكوبليه التانى اللى فيه مناجاه على مقام الصبا....ارجوكم تستمتعوا .