طلبات نوتة أ / عادل صموئيل الجزء الثانى

[السنباطيي]

الزملاء الكرام
الاستاذ الكبير
عادل صموئيل
تحية طيبةلكم جميعا
والسلام عليكم
لي سؤال بصراحة مش عارف ابداه ازاي هو في موضوع قراءة النوته
دلوقتي انا عارف ان قراءة النوته علي طريقة الصولفاج .. يعني دو رري ميييييي ..
ددو ريمي
حسب زمن الحرف الموسيقي ( النوار ) واجازاءة ..والبلانش واضعافها .. ودة انا فاهمة كويس . واقدر اقراء النوته من خلاله وبطريقة جيدة .. لاني قبل ما اتعلم العود قراءت كتير في الموضوع دة والمنتدي هنا في معلومات كتيرة عن الصولفاج
. وقراءت نوت مختلفة وكنت اتدرب علي ذلك .
وخصوصا اني حافظ الاغاني عن ظهر قلب . وحتي لما حبيت اعزف سماعيات ولونجات بستعين بحد عازفها قبلي . زي العازف الجميل وائل
وسؤالي طيب انا لو حبيت اعزف حاجة مسمعتهاش قبل كدة . ازاي حعرف الايقاع .
يعني مثلا ياستاذ عادل لما حضرتك بتحفظ توته جديدة لعبد الحليم مالفها بليغ حمدي مثلا . طبعا بتاخد نسخة من النوته . وتحفظها
حضرتك بتعرف الزمن من خلال العلامة و بتقولها بطريقة الصولفاج
.. بس حضرتك بتعرف الايقاع ونوعةازاي ..
يمكن انا مش عارف اسئل سؤالي بس متهيالي ان حضرتكم فهمتم انا بقصد اية
شكرا لكم جميعا
واتمني اني اجد الاجابة علي سؤالي
او الطريقة الصحيحة للي عاوز اسئلة
وازي اعرف موضوع الايقاع
اخوك احمد سعد
اخى العزيز انا فهمت تقريبا انت عايز تقول ايه ومن حسن حظك انى كنت بالليل بشتغل مع العمالقة والصبح كنت مدرس موسيقى بتعامل مع تلاميذ وطلبة من الصفر ومدرسين موسيقى كتير منهم بيفك الخط بصعوبة من قلة التدريب ... انت مشكلتك انك لما تمسك نوتة تكون حافظ اللحن او عارفة بتحس انها بتمشى معاك لكن لما تمسك لحن عمرك ماسمعتو تحسو محجر مش عايز يطلع او انك مش مستوعب اللى بيحصل ( حاجة زى كده )
طالما قدامك نوتة من اى نوع انت بتتعامل مع النوتة كوحدة قدامك مش مهم تعرفها او ماتعرفهاش الكلام ده لما تطلع لحن وعايز تعزفو بإبداع يستحسن انك تكون حافظه وتعتمد على الاذن اكتر من النوتة
الموسيقى عبارة عن لغة زى اللغة العربية او الانجليزية
لكن بتختلف ان دول بيتقروا وحروفهم كذا وكذا لكن الموسيقى بتتقرى وتتعزف لكن حروفها بتتكون من حاجتين يعنى نغمة وايقاع
الايقاع ده حاجة النغمة بلبسها او بتتشكل بيها
يعنى مثلا لما دو تبقى روند تبقى دو و و و
لما تبقى بلانش تبقى دو و
لما تبقى نوار تبقى دو
المهم انك الاهم تبقى مذاكر العلامات الايقاعية فىى تمارين ايقاعية على حدة اكتر
يعنى تمرين فيه كل العلامات والايقاعات وتخبطو بالقلم
بحيث ان اللحن عبارة عن تتابع للأيقاعات دى وهى واخدة النغمات
طيب لو لحن انت ماسمعتوش تعمل ايه
سيبك م العود الاول امسك النوتة
اقرا الايقاع ويستحسن بطريقة تا و تتى وتافاتى فى وهكذا
تفهم الايقاع كويس اقراه بالنغمات بعدين ابتدى اعزفو
امسك النوت المتواضعة بتاعتى اللحن اللى ماتعرفوش اختار اى لحن منهم يكون شكلو سهل وحرب وانا معاك طبعا وكلنا معاك
على فكرة شوف لو فى البلد اللى انت فيها محلات موسيقى اشترى كتاب صولفيج بدائى لأن فيه ازاى التدرج فى النوتة من الصفر فى النغمة والايقاع
مع اطيب تحياتى عادل صموئيل

[nader1976]

اوقاتك سعيده استاذنا المبدع

عند محاولتي عزف اغنية تصدق والا احلف لك، توقفت عند جزء معين ولم استطع تجاوزه، ولم يكن من خيار سوى اللجوء لشخصك الكريم طالبا العون والمساعده:

بالصفحة الثانية من النوته، السطر الثامن وعند المازوره رقم 75، يبدأ غناء كوبليه: يقولوا قلوبهم ذابت..، برغم استماعي للاغنية ومرافقتها بالعزف بعد عمل ترانسبوز +1 حيث تطابق النوتة تصوير الاغنية، غير انني فشلت تماما اذ اشعر ان الغناء يرتقي يمينا الى نوتات لم استطع تحديدها.

ايضا اؤيد من طلب نوتة اغنية زمان الصمت فهي اغنية رائعة واتمنى ان تتكرم علينا بها.

ختاما لا بد من القول بأن عبارات الشكر لا تفي شيئا من جهودك الجباره التي تبذلها لتبسيط تدوين النوتات واعدادها واهدائها لنا لنقضي اوقاتا جميله مع الاهل والاصدقاء بين احضان الموسيقى، ولا بد ان هذه الاجواء الحالمه ترسل لشخصك الكريم طاقة ايجابية ممزوجة بمشاعر الرضى والسعاده مقابل ما تمنحه لنا من وقتك الخاص.

الاخ العزيز
اولا اشكرك على كلامك الجميل
بالطبع انا عملى فى زمن الجميل علمنى العطاء بدون مقابل يعنى انا ممكن نوتة صعبة افضل اكتب فيها عشر ايام وانزلها ونا لا اعرف حتوصل لمين يعنى اكيد ماعرفش 99% من اللى حايقروها لن المنتدى عالمى يصل الى كل سكان الارض وانا لا اطلب مقابل سوى ان مجهودى يصل ويستفيد منه اكبر عدد من الناس
اولا مشكلة صدق ولا احلف لك انا حتكلم عن حل المشكلة .. يعنى انا شخصيتى تتكون من عدة شخصيات
يعنى كموسيقار تعاملت مع العمالقة وكمدرس موسيقى تعاملت مع تلاميذ يبدأون من الصفر اما مشكلتك تحتاج جزء من شخصيتى وهى حل المشاكل
اولا انا طبعا مش شايفك عشان اسمع مستواك ايه وثانيا مش شايف النوتة عشان احدد المشكلة يمكن النوتة فيها خطأ او مكتوبة بطريقة صعبة تخليك تقع فى القراءة وثالثا ان الاغانى الخليجية نوعية الموسيقى بتبقى صعبة علينا يعنى التفعيلات والايقاعات لذلك انا كتير تمنيت يبقى معانا فى المنتدى عضو خليجى بيكتب نوتة لأنه حيكون اولا متشبع ومتفهم للون الخليجى الجميل يعنى كمان حافظ الاغانى بحيث اى طلب يكتبها على طول مش زييى انا لسه حقعد استكشف فيها .... انا انصحك انك الاول تعزف الاغانى بالذات اللى انا بكتبها اولا لأنك اكيد بتسمعها من اول ما اتولدت يعنى متعود عليها وبالتدريج لما مستواك يرتفع من كتر التدريب ممكن تعزف الاغانى الخليجية ,,, هى مش اصعب لكن عشان كلنا مش متعودين على النوعية دى
يعنى انا شخصيا عانيت من هذه المشكلة زمان وانا اعزف فى الفرقة الماسية كانت الاغانى المصرية ( الجديدة اللى بنعزفها لأول مرة ) متعودينعليها بحكم الخبرة لكن فجأة اتى الينا المطربين والملحنين الخليجيين بكثافة كبيرة وكان مطربين كتلا منهم مازالوا فى بداية مشوارهم ومنهم محمد عبده وعبادى الجوهر وطلال والرويشد وغيرهم .. لأن الفرقة الماسية كانت اسرع فرقة فى انتاج الاعمال يعنى كان المطرب بييجى مصر معاه عشر الحان يسجلهم على الفرقة الماسية فى اسبوع ويرجع بلده يشتغل بيهم طول العام .. كانت الالحان الخليجية صعبة علينا شوية فى البداية لكن بمرور الوقت تعودنا عليها بفضل موسيقار كبير جدا جدا فى الفرقة الماسية اسمه ميشيل المصرى كان خبير فى الموسيقى الخليجية كان بيستقبل الملحنين ويدون لهم الاغانى
وكل شىء بكتر التدرييب مهما كان صعب بييجى
مع اطيب تحياتى عادل صموئيل

[علي ثلاثة]

أستاذ عادل
ألف سلام

أعجبني ما أثاره الأخ الكريم
السنباطي

لنفرض أننا نستمع الى قطعة يعزفها
عازف منفرد وبدون مصاحبة رق

فكيف أعرف وزنها

البعض يقول نعد ونحسب كم من السوداءات

فإذا كانت مثلا 24

فقد يكون الوزن رباعيا
ونقسم القطعة إلى 6 حقول

ولكنه قد يكون ثلاثيا
فتقسم القطعة إلى 8 حقول

وقد يكون ثنائيا فتقسم إلى 12 حقلا

فكيف السبيل إلى معرفة الصواب

وشكرا
اخى العزيز

انت سألأت سؤالا عويصا ممكن عشر خبراء يعطوك اجابات مختلفة
لأن انا من وجهة نظرى وكفاحى دائما لحلول مشاكل او اسئلة بحاول افكر واقول رأيى
نبتدى اولا من اللحن الذى بمصاحبة الرق عشان نبقى بناخد طرف الخيط
انت لما بتسمع لو ماتعرفش تعمل إشارات الميزان بيدك يبقى الكلام اصلا على الفاضى
بمعنى اننا اتعودنا عايزن نعرف الميزان انا شخصيا بشاور بيدى فى ال 4/4 بيبقى واضح وال 3/4 بيبقى متميز بطابع الخلاف بالنسبة لى لو عايز ادون اغنية على البداية بمعنى ان فيه جملة موسيقية بتبدأ من الدوم
يعنى من اول المازورة .. وجملة بتبدأ بحرف من خارج المازورة بيسموه فى السوق لافارى
والاكاديميين يسمونه الحقل المتكامل يعنى لو الجملة بادئة بكروش خارج المزورة تلاقى اخر مازورة ناقصة كروش
وفيه جملة بتبدأ بحرف بعد الدوم بسكتة ممكن كروش ممكن نوار ممكن كروش ونوار يعنى حاجات كتير حسب اللحن دى انا شخصيا بحسبها صح ازاى ( عشان ما اكتبش حاجة غلط ) بإشارات الميزان
يعنى بشاور مع نفسى احدد النوعية ايه بالتحديد طبعا لأنك لو كتبت سكتة غلط تلاقى الجملة كلها اختلت
انا آسف للإطالة لكن احب اجاوب السؤال صح
من كلامى السابق فهمنا اهمية اشارات الميزان باليد
لما نيجى لعازف منفرد بدون رق
اخطر حاجة فى العازف انو يكون حلو ولا فاشل هى الوحدة
العازف الشاطر وهو بيعزف انت بتحس بمكان الدوم اتوماتيكيا يعنى تحسو بيضغط على الحرف اللى على الدوم بعدها لو شاورت معاه بإيدك حاتكتشف الميزان بسهولة
اما العازف الفاشل تلاقيه بيسرع ويبطأ وكل الحروف عندو زى بعضها مش بيعطيك ايحاء بالدوم

خطورة الموضوع ده ايه :
احيانا انا عادل صموئيل شخصيا آجى اكتب لحن الاقى مش فاهم الميزان
بحاول امشى بإشارات الميزان مش فاهم فيه حاجة
واكتشف انو 3/4 لكن بطىء شوية يعنى بيديك انطباع انو حاجة تانية
الخلاصة : فيه الحان سهلة فى ثانية تحس انو 3/4 زى الفالس اللى فى مقدمة فاتت جنبنا او موسيقى اغنية الربيع لفريد الاطرش مثلا .. وفيه موازين زى الضروب العربية محتاجة خبرة شوية طبعا
لكن الموضوع ينهار برمته لو مانعرفش اشارات الميزان ودى بتمثل حاجة زى جهاز او عدة القياس يعنى لما نحب نفصل قماش بنقيسو بإيه ؟ او عايزين نقيس مساحة من الارض
اشارات الميزان عندنا هى العدة زى مازورة الخياط او المتر بتاع المهندس

مع اطيب تحياتى عادل صموئيل

[عادل صموئيل]

احبائى
اقدم لكم من روائع ام كلثوم القديمة

حبيبى يسعد اوقاته

اللحن ده اعمل سنة 1943 بيرم التونسى وزكريا احمد
نوعية اللحن ده اولا لأنه صعب جدا يعنى بالطبع تعبت جدا فى تدوينه لكن مايمرش من غير قصة او مقال , انا خلال عملى فى الوسط الفنى كان حرصى الشديد انى اتعلم كل حاجة مش زى ناس كتير همهم الاول كسب المال , كان من زملائى واصدقائى العازفين ناس عواجيز كنت احرص على التكلم معهم واخليهم يحكوا مشوارهم يعنى منهم ناس عزفت فى الزمن ده الاثلاثينيات والاربعينيات وبالطبع العازفين الشاطرين كانوا بيعزفوا مع كل العمالقة يعنى مع ام كلثوم وعبد الوهاب واسمهان وفريد وكلهم ... طبعا الحوار معاهم بيمثل عدة مدارس
لما نرجع للحن الرائع ده اول شىء بيرم التونسى اكبر شاعر فى مصر قال انا اخشى على الفصحى من بيرم , طبعا الكلمة دى لها مضمون خطير يعنى كان الشعر واصل لأعلى مستواه الفنى وكان الشعب بيتذوقه ويفهمه ويحفظه لكن كانت اللهجة العامية او الزجل يعنى كلمات الاغانى بالعامية دون المستوى .. وداخل فيها كلمات من لهجات اخرى .. لكن بيرم عمل مدرسة وهى تنقيح الكلمات والمعانى بحيث وصلت الى درجة عالية من الكمال .. وبالطبع تأثر به كل شعراء العامية والمستوى ارتفع عموما .. لما نرجع لزكريا حنلاقى المقدمة الموسيقية هنا على طريقة الدولاب يعنى الفرقة الموسيقية بتبقى حافظة دولاب جملة فى مقام ما البياتى مثلا .. والملحن اصلا مش بيعمل مقدمة ولكن الفرقة لما اللحن بيكون بياتى بتعمل الدولاب البياتى ولكم يكون راست بدعمل دولاب راست وهكذا ودور الدولاب سلطنة المطرب وتوصيله الى المقام .. وده الشىء اللى ثار عليه عبد الوهاب وابتدا يعمل مقدمة وبعدين المقدمة ارتقى شأنها حتى انها ممكن تبقى مقطوعة موسيقية مستقلة .. وده من ثمار العمالقة ايضا ان كل تجديد بتعمله بيبقى نهج وتطوير تمشى عليه كل المدارس التالية ..
البشر نوعين نوع عنده حاسية فنية بيحس بالجمال ونوع تانى ما احبش اتكلم عنه .. النوع الاول دايما تحس انه بيحن للماضى لأنه كان اجمل .. يعنى انت النهارده سنة 2013 لو فكرت حتلاقى سنة 2010 اجمل .. و1980 اجمل واجمل والحياة كانت اسهل واحسن .. كان الفنانين بيحنوا لأيام الاربعينات بالرغم من عدم وجود كل انواع الرفاهية الحديثة لكن الحياة كانت اجمل بكتير يعنى اقل حاجة مثلا مكانش فيه لاتكييف ولا مرواح ولكن عمرهم ما شعروا بفظاعة الحر زى دلوقتى .. يعنى احنا مثلا فى مصر تكييف السيارة من الكماليات اوى لكن فى الكويت مثلا اللى ماعندوش تكييف ممكن يموت من الحر طيب كانوا بيعملوا ايه زمان ايام لما كانوا بيسافروا بالقوافل .. نرجع للحن كانت طبيعة زكريا احمد انه بيعمل اللحن لكن بيترك فيه مساحة مش اقل من 30% لتجويد ام كلثوم عبد الوهاب والسنباطى مثلا العكس
يعنى لما تحلل انت عمرى مثلا مش حتلاقى اكتر من 1% مساحة ممكن هى تعمل فيها حاجة من عندها .. كانت زمان ام كلثوم لما كانت بصحتها كانت بتغنى 3 وصلات الوصلة الواحدة من ساعة الى ساعة ونصف واحيانا اطول .. تنفيذ الاغانى كان بيبقى فى الحفلة النهاردة لو فيه اغنية جديدة بعكس كل المطربتغنيها فى الوصلة الثانية بتكون غنت فى الوصلة الاولى الاغنية اللى قبلها ( يعنى آخر اغنية عملتها قبل الجديدة ) وفى الوصلة التانية تغنى الجديدة بيكون صوتها بعد غناء ساعة ونصف سلكك وفتح وهى بقت فى اعلى مستوى .. اما فى الوصلة الثالثة كانت اما بتختار اغنية من القدامى او ممكن حد من اصدقائها اللى كانوا بيدخلوا يسلموا عليها بين الوصلة الثانية والثالثة ( طيب ليه مش بين الوصلة الاولى والثانية ) لأنها كانت بتستعد لحن الجديد .. كان ممكن حد عزيز عليها اوى من اصدقائها يطلب اغنية قديمة وتكن من زمان كذا سنة ماعنتهاش او عملت عليها بروفات .. كان هنا بييجى دور فلتة الزمان المرحوم محمد عبده صالح عازف القانون كان حافظ كل حرف غنته بالموسيقى والكلمات ولو تلاحظوا كانت دايما وقفتها بينها وبينه خمسة سم عشان كان بيلقنها الكلام ..
كان عبده صالح اسمو فى الوسط الفنى الديزل يعنى القطار السريه اللى بيمشى مففيش حاجة تقف فى طريقه .. حتى لو الفرقة مش فاكرين الاغنية ( ودى واضحة جدا فى التسجيل الشائع واللى انا كتبت منه الاغنية دى ) انو هو حافظ وادخل زى الغول والفرقة بتقول زيه
المهم ان ام كلثوم فى الوصلة الثالثة بعد ماتكون غنت 3 ساعات قبلها وصوتها اسلك مايكون والمقامات كلها اشتغلت معاها وييجى اللحن لزكريا احمد بتطلع من عندها كل الروئع
اترككم مع النوتة انا طبعا حاولت ابسط اللحن على قد ما اقدر بدون ان تضيع منه حاجة

مع اطيب تحياتى

[عادل صموئيل]

احبائى
اقدم لكم نشيد

الفدائى الفلسطينى

مع تحية للأخ العزيز اللى طلبه لكن انا اقدر ادون الميلودى فقط يعنى كتابة توزيع الآلات النحاسية دى بتحتاج موزع متخصص فى الآلات النحاسية بلإضافة انو من الصعب جدا انك تقدر تكتب التوزيع من التسجيل ويطلع مضبوط يعنى لازم تكون النوتة الاصلية موجودة بتوزيعاتها عشان يبان حدود كل صوت لكل آلة على حدة لأن الآلات بتعمل اكوردات متداخلة وصعب جدا فى السمع انك تفصل كل صوت وتكتبه
مع اطيب تحياتى

[nader1976]

الاخ العزيز
اولا اشكرك على كلامك الجميل
بالطبع انا عملى فى زمن الجميل علمنى العطاء بدون مقابل يعنى انا ممكن نوتة صعبة افضل اكتب فيها عشر ايام وانزلها ونا لا اعرف حتوصل لمين يعنى اكيد ماعرفش 99% من اللى حايقروها لن المنتدى عالمى يصل الى كل سكان الارض وانا لا اطلب مقابل سوى ان مجهودى يصل ويستفيد منه اكبر عدد من الناس
اولا مشكلة صدق ولا احلف لك انا حتكلم عن حل المشكلة .. يعنى انا شخصيتى تتكون من عدة شخصيات
يعنى كموسيقار تعاملت مع العمالقة وكمدرس موسيقى تعاملت مع تلاميذ يبدأون من الصفر اما مشكلتك تحتاج جزء من شخصيتى وهى حل المشاكل
اولا انا طبعا مش شايفك عشان اسمع مستواك ايه وثانيا مش شايف النوتة عشان احدد المشكلة يمكن النوتة فيها خطأ او مكتوبة بطريقة صعبة تخليك تقع فى القراءة وثالثا ان الاغانى الخليجية نوعية الموسيقى بتبقى صعبة علينا يعنى التفعيلات والايقاعات لذلك انا كتير تمنيت يبقى معانا فى المنتدى عضو خليجى بيكتب نوتة لأنه حيكون اولا متشبع ومتفهم للون الخليجى الجميل يعنى كمان حافظ الاغانى بحيث اى طلب يكتبها على طول مش زييى انا لسه حقعد استكشف فيها .... انا انصحك انك الاول تعزف الاغانى بالذات اللى انا بكتبها اولا لأنك اكيد بتسمعها من اول ما اتولدت يعنى متعود عليها وبالتدريج لما مستواك يرتفع من كتر التدريب ممكن تعزف الاغانى الخليجية ,,, هى مش اصعب لكن عشان كلنا مش متعودين على النوعية دى
يعنى انا شخصيا عانيت من هذه المشكلة زمان وانا اعزف فى الفرقة الماسية كانت الاغانى المصرية ( الجديدة اللى بنعزفها لأول مرة ) متعودينعليها بحكم الخبرة لكن فجأة اتى الينا المطربين والملحنين الخليجيين بكثافة كبيرة وكان مطربين كتلا منهم مازالوا فى بداية مشوارهم ومنهم محمد عبده وعبادى الجوهر وطلال والرويشد وغيرهم .. لأن الفرقة الماسية كانت اسرع فرقة فى انتاج الاعمال يعنى كان المطرب بييجى مصر معاه عشر الحان يسجلهم على الفرقة الماسية فى اسبوع ويرجع بلده يشتغل بيهم طول العام .. كانت الالحان الخليجية صعبة علينا شوية فى البداية لكن بمرور الوقت تعودنا عليها بفضل موسيقار كبير جدا جدا فى الفرقة الماسية اسمه ميشيل المصرى كان خبير فى الموسيقى الخليجية كان بيستقبل الملحنين ويدون لهم الاغانى
وكل شىء بكتر التدرييب مهما كان صعب بييجى
مع اطيب تحياتى عادل صموئيل[/QUOTE]

اشكرك استاذنا الكريم على تلطفك بالرد، وتأكد انني لم اكن لأضيع دقيقة من وقتك بالسؤال لولا ان النوتة من تدوينك وموجودة تحت عنوان اغاني خليجية بقائمة اعمالك.
وافر احترامي وتقديري
اخى العزيز
هو المشكلة ان فيه عدة تسجيلات مختلفة لهذه الاغنية
فى النوتة الكوبليه الاول والثانى فى الصفحة الثالثة ومكتوب عليه غناء ك 1و2 فى مازورة رقم 115 لو انت عامل ترقيم للموازير
مع اطيب تحياتى

[عادل صموئيل]

احبائى
اقدم لكم من تراث ام كلثوم القديم

الورد جميل

الاغنية دى فيها حاجة , يعنى انا بسمعها من اول ما ابتديت اسمع وعزفتها مئات المرات سماعى طبعا , والكل عزفها وغناها لكنلما جيت ادونها بالطبع جبت التسجيل الاصلى المتداول وابتديت اضعه تحت الميكروسكوب عشان التدوين يبقى مضبوط , اكتشفت حاجة خطيرة اننا كنا بنسمعها وخلاص وعزفناها وخلاص , يعنى جايز لأنها اغنية صغيرة وحفظناها مش اغنية كبيرة عايزة تتذاكر ,,, اكتشفت ان فيه حاجات كتير الكل مش واخد بالو منها او تفعيلات لحنية .. حتى التحويلات المقامية لأنها سريعة وبتتغير بسرعة , مش بتلزق شوية عشان نحسها السرعة دى بتخلى الواحد اما يشك فيها او يحسها فى مقام غلط ..وده على فكرة من بعض الملاحظات اللى بتتاخد على النوت القديمة بالذات لما حد بيكتب لهجة بلد تانية . المهم انا هنا كتبت اللحن الاصلى بالحرف ممكن انت لما تعزفوا تلاقى حاجات مختلفة عن اللى انت حافظه ( زى ماحصل لى ) لكن ده الاصلى
طيب ممكن واحد يسأل طيب ما اشهر اغانى ام كلثوم لزكريا انا فى انتظارك وهو صحيح لهم نفس الظروف يعنى اتولدنا بنسمعهم وعزفناهم والكل عزفهم عادى من غير اخطاء
انا اقولك .. المرحلة الزمنية اللى بين الورد جميال والاغنيتين دول حصل تطور فى الغناء كان الغنا ايام الورد جميل عند زكريا احمد على طريقة المشايخ يعنى التجويد اوى اوى ,
وهنا كان لازم الملحن بيترك جزء كبير من اللحن لشطارة المطرب ,, لكن لما الغنا تطور خلال العشر سنوات التالية بقى الغنا بشكل مبسط وهنا كان لازم الملحن يعمل اللحن بحيث يبقى مافيش تصرف كتير للمطرب ...
عيب فترة او طريقة غناء المشايخ ان الغنا كان اصعب وبيحتوى على عرب كتير ,, وعرب مش اى عرب يعنى عرب ملعوبة اوى يعنى كانت العربة مش حلية ايقاعية ولكن كان المطرب ممكن يلمس فيها مقام تانى او اكتر ,, المشكلة ان هنا كان المستمع حسب خبرته يعنى لو عادى بيسمعها حاجة لو ضليع جدا بيسمعها حاجة تانية خالص , المشكلة دى مرت عليا فى الكوبليه الاخير لأن ام كلثوم كانت بتغنى بطريقة المشايخ هنا تلاقى المقام ممكن يلخبط انا كتبتو زى ما حسيتو لو انت حسيت حاجة تانية طبعا اعزف اللى يريحك هى المشكلة فى حرف الفا ..
لو انت سمعت الاغنية دى بصوت زكريا احمد تلاقى بيغير فى الكلام يعنى يحط كلمة وسط الجملة الكلمة دى ممكن حجمها يكون اكتر او اقل3من 3 وحدات فبتكسر الجملة .. بمعنى انك لو حبيت تطول لازم تحط مازورة كاملة حسب الميزان .. يعنى زكريا غناها شوف الزهو يابنى آدم واتعلم كلمة بنى آدم كسرت الميزان .. بين الحبايب تعرف تتكلم كلمة تعرف من عنده لكن مشيت لأنها بحجم المازورة .. يعنى عمل حاجتين حاجة غلط وحاجة صح لكن سبحان الله الاتنين طالعين زى العسل ( طبعا الشيخ زكريا مش اى حد ) ومن المؤكد انو لما غنى اللحن ده وكان مع الفرقة الماسية فى اواخر عمرو انو ما اخترعش الكلمتين دول ساعتها ولكنه اكيد كان متعود يغنيها كده
اترككم مع النوتة اتمنى تعجبكم
مع اطيب تحياتى

[نور الصباح]

احبائى
اقدم لكم من تراث ام كلثوم القديم
الورد جميل
الاغنية دى فيها حاجة , يعنى انا بسمعها من اول ما ابتديت اسمع وعزفتها مئات المرات سماعى طبعا , والكل عزفها وغناها لكنلما جيت ادونها بالطبع جبت التسجيل الاصلى المتداول وابتديت اضعه تحت الميكروسكوب عشان التدوين يبقى مضبوط , اكتشفت حاجة خطيرة اننا كنا بنسمعها وخلاص وعزفناها وخلاص , يعنى جايز لأنها اغنية صغيرة وحفظناها مش اغنية كبيرة عايزة تتذاكر ,,,
SSSSSSSSSSSSSSSSSSSSSSSSSSSSSSSS
ده إنت إللى ورد
و أحلى من الورد
بس أنا زعلان من عدم حضورك حفل الخطوبة
والأميرة سوسن زعــــــــــــــــــــــــــــلانة
وشكرا
نور الصباح

اخى العزيز اشكرك وانا آسف
يعنى بعد الثورة الخروج بقى صعب جدا
يعنى قبل الثورة كان العادى بتاعى اخد عربيتى واورح اى مكان فى مصر فى اى وقت بالليل بالذات
لكن دلوقتى بقت الامور صعبة جدا
الف مبروك للأميرة سوسن
مع اطيب تحياتى عادل صموئيل

[waleed.d]

الأخ العزيـز الفنان الكبير الأســتاذ عـادل
السلام عليكم،
شكراً جزيلا أستاذ عادل على النوت الشيقه التي ترفعها على الموقع...
في الحقيقه طلبت نوتة اغنية ها حبيبي لكاظم الساهر من قبل. واليوم بعزفها سماعي بس بحس انها ناقصه... أرجو من حضرتك تدوينها اذا ممكن ....
ولك الف الف شكر....
وليد

[salhi_haithem]

السلام عليكم ورحمة الله
أستاذ عادل شكرا على تحف أم كلثوم أمتعتني جدا
أخي وليد عندي كتاب كامل لكاظم الساهر سوف أرفعه إنشاء الله قريبا و فيه 44 أغنية
هيثم

اشكرك اخى العزيز هيثم
اولا جزء من الفضل يرجع اليك لأنك كتبت اسماء عدد مهم من اغانى ام كلثوم كنت انا مادونتهاش وانت لفتت نظرى
ومن القائمة دى انا اولا اخترت الاغانى اللى مش متداولة يعنى اللى ما اتدونتش من قبل وابتديت بيهم وان شاء الله اكمل قريبا باقى المحموعة

ممكن كتاب كاظم الساهر ترفعه لكن لى طلب
ممكن يتصور على سكانر وتحوله بى دى اف وتنزله كله مرة واحدة يعنى يكون موضوع واحد
لن المنتدى هنا بيتعامل مع القديم فقط ولأنك نزلتهم اغنية اغنية حايبقوا 44 موضوع او 44 مشاركة ممكن ادارة المنتدى يحذفوهم لأنها حياخدوا حيز كبير
لكن لو نزلتهم فى مشاركة واحدة يعنى الكتااب كله الادارة مش حاتتكلم وثانيا حيكونوا كنز لمحبى كاظم الساهر
يعنى خد وقتهم ورتبهم براحتك ثم نزلهم فى مرة واحدة
مع اطيب تحياتى عادل صموئيل