المقامات الموسيقية

**غازي الضبع** · #1 30/07/2009, 16h11

ساعات باحس إن الموضوع بسيط قوي ..
الأغنية دي من مقام كذا ..
وشكراً
..
لأ ..
شكرا مين .. ؟
ده في الحتة الفلانية قلب على مقام كذا .. وبعدين استعمل السلم الفلاني عشان ينقل على المقام العلاني
واستعمل الغماز ، والحساس
ودخل على جنس المقام ، وبعدين الفرع
وابصر إيه ، ومادريك إيه ؟؟؟
وبعدين دخلنا في سكة المقامات الشرقية ، والغربية
والربع تون ، والثلاث اربع تون ...
وإدِّيني يا بني كرد الـ فا
طب اشمعنى كرد الـ فا ، يعني ماينفعش كرد الـ دو
ومعنى كده إن كل مقام هاينبثق منه سبعة مقامات
يعني هل هايبقى فيه منه
كرد دو ، وكرد الـ ري ، كرد الـ مي ،،،،، إلى كرد الـ سي
ويا ريت على كده وبس ..
شوية وتلاقي الحجاز مع البياتي بيعملوا مقام جديد اسمه الترالاملم
والـ نهاوند مع الراست هايجيبوا مقام صغير ويسموه فوزي

إيه يا عم ده ؟؟
مش لاعب

ده الموضوع طلع كبير قوي ومعقد قوي قوي قوي
..
ده غير بقى شوية المقامات اللي تسيح النافوخ ..
إيشي سوزناك ، وإيشي زنجران ، وإيشي سيكا ، وهزام ، وراست ، والـ حسيني والـ صبا والجمال

..
شوية ومانكتـفيش بإسم واحد ..
تخش بقى على راحة الأرواح ، وملبس الأفراح

لا .. لا .. لا

فيها لاخفيها

م الآخر .. أنا عايز أتعلم اللعبة دي
إن شالله نعملها على حلقات ، ودروس ، وواجب ، وتذنيب ، وضرب كمان ( ع الهوا )
...
ويا سلام لو الموضوع مايقتصرش على الأغاني فقط ..
يا ريت كمان نتعلم من قراءات القرآن الكريم

...
ونشوف في النهاية .. هانتعلم أنا وأمثالي ولا لأ ؟
يا ريت أساتذتنا الموسيقيين يتبرعوا لنا بهذه الدروس المجانية ( تحتيها خط أهوه .. عشان ماحدش يتعشم في حاجة

)

**عادل فؤاد رفاعى** · #2 30/07/2009, 16h18

وانا معاك استاذ غازى عاوزين الاساتذة الكبار اللى موجودين فى المنتدى يعلمونا يعنى ايه مقامات علشان الموضوع طلع كبير قوى قوى وفعلا الموسيقى دى طلعت علم وعلم جامد يعنى ياريت يكون درس خصوصى من البداية وبعد كدا الموضوع دا يتثبت عشان يكون مرجع

**الألآتى** · #3 30/07/2009, 18h51

إيه هو ده .. هو مش فيه دروس لعلم النغم موجودة فى المنتدى .. ولا أنا نسيت أحطها .. يمكن نسيت ..

عموماً .. لو عايزين نجيب من الأول .. نجيب .. وماله .. مايضرش ..

والتكرار يعلم .. الشطار .

**غازي الضبع** · #4 30/07/2009, 18h55

لا

فيه فرق

الدروس المحطوطة .. زيها زي الكتاب ..

إنما هنا .. هاتبقى حصص
ونسأل ، ونتسأل
ونجاوب ونغلط ، ويتصحح لنا
..
وهكذا دواليك ( إيه دواليك دي ؟

)

**الألآتى** · #5 30/07/2009, 19h02

وهو كذلك ياغازى ..

سأعمل على تحضير أول درس .. إن شاء الله .

**محمودسعد** · #6 31/07/2009, 00h58

انا معاكم ياريس
خدوني معاكم ؟
طالما فيها علام
انا والله عاوز اتعلم
واستذيد

**unicorn** · #7 31/07/2009, 01h05

حلو يا مايسترو ,
و أنا كمان عايز أفهم اللعبة دى ,
الصراحة من ساعة عم حسن كشك ما ظبط الطبلة على مقام الكرد , و أنا متغاظ
إزاى هو عرف يضرب على الكرد و انا ما عرفتش
معاك يا عم محمد يا قمر , بس وحياة حسام لو تقدر تقرّبلنا الدرس بشئ من المزيكا تبقى عملت فينا جميل مش هاننساه ,
أنا أعرف واحد كمان نفسه يدخل فى الفصل دة , عشان ناوى يلحن مقامات بيرم التونسى
أستاذ سيد المشاعلى هاتلاقوه قاعد فى اول تختة.
فى انتظار أول درس يا أستاذ محمد
شكرا يا غازى على فتح هذا الموضوع الرائع

**وسام اكرم** · #8 02/08/2009, 06h19

اشتغل ياعم محمد و احنا وراك انشاء الله للنهاية
مع تحياتي
وسام

**Islam Eidrisha** · #9 02/08/2009, 10h27

الله ينور عليك يا أبو حسام ويزيدك من نوره
اكتب اسمي عندك واتوصى شوية
وبالراحة وواحدة واحدة الله يخليك
ربنا يزيدك من علمه ومن نعيمه
عايزنا نجلد الكشاكيل لون إيه؟؟

**الألآتى** · #10 02/08/2009, 05h44

إخوانى الأعزاء

نزولاً على رغبة العديد من الأخوة .. راغبى تعلم علم النغم والمقامات ..

وتلبية لرغبتهم الصادقة والحقيقية فى المعرفة ..

قررت أن أبدأ من اليوم بعون الله ... سلسلة جديدة من الدروس التفاعلية لنضع سوياً أيدينا على أسرار هذا العلم ..

والذى قضيت معظم سنوات عمرى فى تعلمه والغوص فى أعماقه .. والبحث عن كل جديد فيه .

وسأراعى بإذن الله .. أن تكون الدروس متسلسلة تسلسلاً طبيعياً .. من البداية حتى الإحتراف .. إن شاء الله .