طلبات نوتة أ / عادل صموئيل الجزء الثانى

[عمرو الهنداوي]

أستاذ عادل حضرتك كنت دونت زمان أغنية يامسافر وحدك وحدث خطأ غير مقصود في دليل المقام في الجزء البياتي هى المفروض نغمة اللا تكون ربع تون بس هى مكتوبة مرة اللا ومرة المي ومرة المفروض تكون بيمول لكنها مكتوبة ربع تون فهل لو لسه عند حضرتك الملف الاصلى أنه ممكن نصلحها

ولو الملف مش موجود خلاص ولا يهم

اخى العزيز
هو فعلا زى ما انت بتقول اصل هى بتبقى كلها بيمول والربع تون انا بحط عليها شرطة مع السرعة انا غلطت وحطيت الشرطة على المى بدل ال لا مالهاش حل دلوقتى غير انك تصلحها بالقلم معلش لو طبعتها اصل لازم الاقى ملف الانكور كنت عملتها فى ثانية بس انا مدونها من زمان الله اعلم ملف الانكور فين .. المشكلة انا لو حد ينبهنى على الحاجات الصغيرة دى فى حدود شهر مثلا من لما اكتبها بتبقى الملفات الانكور لسه تحت ايدى لكن لما بيمر وقت طويل واكون شلت كام نسخة ويندوز وبحط الملفات فى اماكن مش بعرف اوصل لها وللعلم كل ما احاول اجمع النوت فى مكان واحد مع مرور الوقت وشوف بكتب كام نوتة فى الشهر برضو لازم يتبعتروا محتاج طقم سكرتارية .. يعنى حد بيغهم ( ودى صعبة طبعا ) يدخل على الجهاز درايف درايف ويفليه ويجمع كل النوت اللى متبعترة فيه وشغلانة
مع اطيب تحياتى بس طبعا كويس انك فاهم

[muhamadibra]

المشاركة الأصلية كتبت بواسطة muhamadibra

شكرا جزيلا للمايسترو - انه اتجاه جديد في تدويناتك - وفقك الله دائما - وزادك علما وكرما - اغنية عبد الوهاب طول عمري عايش لوحدي --- لو المزاج رايق اذا سمحت لي
د محمد ابراهيم

اخى العزيز اشكرك
اغنية طول عمرى عايش لوحدى اتكلمنا فيها من قبل .. ما ينفعش تتكتب ولا حد يغنيها غير عبد الوهاب بالطريقة اللى نذهل فى التسجيل الاول زمان السبب .. انها اختراع يعنى لا هى على ميزان ولا هى على ادليب
مع اطيب تحياتى عادل صموئيل

اشكرك كثيرا يا مايسترو - ولم اتابع التعليق السابق علي اغنية طول عمري عايش لوحدي - وهي مبدعة فعلا - وحزين لانها غير قابلة للتدوين واكيد غير قابلة لعزف الهواه امثالي --- جزاك الله كل خير لما تمتعنا به
د محمد ابراهيم

اخى العزيز
هى طبعا ما ينفعش تتعزف كعزف فقط اصلا يعنى انت هاوى ,, وانا محترف بس انا عمرى ما افكر اعزفها لن عشان تتنفذ الاغنية دى بالذات لازم واحد يغنيها مش يعزفها واحد شاطر زى صفوان بهلوان مثلا حافظ عبد الوهاب اوى ويقولها ع العود ويبقى دور الفرقة معاها سنيدة لأن مالهاش دور اصلا .. انا نفسى تفهموا الاغانى اللى بتسمعوها بتنقسم الى كذا فصيلة .. يعنى دى ما ينفعش لاتتكتب ولا تتعزف تتغنى فقط او يستحسن تتسمع فقط لن برضو ماحدش حيقولها زى عبد الوهاب
مع اطيب تحياتى عادل صموئيل

[عادل صموئيل]

احبائى
اقدم لكم من اغانى فريد الاطرش القديمة

بتسألينى عن حالى
انا قعدت اشوف فى الاغانى المطلوبة من زمان وما كتبتهاش اخترتها بس هى اغنية مش حلوة اوى يعنى دون مستوى فريد الاطرش طبعا ... وبعدين من اخطر المشاكل فيها طريقة التسجيل اللى كانت فى الثلاثينيات و اوائل الاربعينيات
والطريقة كانت التسجيل للأسطوانات الحجارى ال 78 لفة لأن الاسطوانة كانت وجهين كل وجه 3 دقائق .. وكان المطرب بيسجل كل وجه لوحده على اسطوانة شمع فى الاول وكانت وقتها مكلفة جدا .. ولو غلط او اى حد غلط بيقفوا ويعيدوا م الاول بس طبعا بعد ما يرموا قرص الشمع ويحطوا واحد جديد .. وهنا كان لابد ان المطرب مايستهلكش اقراص كتير شمع عشان المنتج ما يتخربش بيتو يعنى .. كانت النتيجة ان لو المطرب وقع فى الوحدة او غلط غلطة صغيرة بيعدوها وتطلع كده .. دى على فكرة ملحوظة اوى فى تسجيلات الزمن ده .. وكان المطرب عشان يحاول يتفادى المشكلة دى انو بيعمل بروفات كتير اوى بحيث يبقى هو والفرقة حافظين بدرجة لاتسمح بالسهو ولا الخطأ يعنى فى اللحن ده ( طبعا كان مفيش نوت ) الكوبليه 3 زى الكوبليه واحد لما الفرقة رجعوا تحس انهم نسيوا الراست يعنى طالع حاجة مشبوهة كده وبعدين صلحوا شوية لما عادوا الجملة وطبعا ما قدروش يغيروا قرص الشمع وفضلت كده ... لكن المستوى ارتفع واتحسن اوى لما ظهر التسجيل على الشرائط ثم المونتاج يعنى المطرب زى عبد الوهاب عشان يقتنع انو غنى كوبليه لازم يغنيه عشر مرات والشرائط مش مكلفة يعنى بيتمسح ويسجل تانى
مع اطيب تحياتى

[wahidfarid]

شكرا آستاذ عادل على نوتة بتسأليني بحبك ليه و احب بس آذكرك إنو لسه فيه أغاني لفريد آفضل من دي لم تدون بعد


اخى العزيز انا عارف يعنى فريد لو اكتر من 400 اغنية قول منهم 375 اغنية تعتبر من الروائع
مع اطيب تحياتى عادل صموئيل

[مساعد محمد]

استاذ عادل الف شكر
اقدر احصل عندك نوت موسيقيه عربيه مكتوبه للبيانو لليد اليمين والشمال

اخى العزيز مع الاسف لأ لأن النوتات اللى انا بنزلها دى مش موجودة عندى اصلا يعنى انا بدونها حسب طلبات الاخوة الاعضاء وبعدين انا عازف كمان يعنى شغلتى اللحن الاساسى زى كل النوت اللى انا مدونها .. اما انوت اللى فيها يمين وشمال لازم المدون يكون عازف بيانو جامد جدا ومدون فى نفس الوقت عشان يركب اصوات حلوة متناسقة لاتفسد اللحن .. والموضوع ده ناقص جدا جدا لسبب ان معظم اغانينا الشرقية فيها مقامات شرقية ( وطبعا الكلام على البيانو القديم التقليدى مش الاورج ) فابلطبع اللى كانوا بيعزفوا بيانو اصلا مش بيعزفوا اكتر من 5% من الاغانى الشرقية ,, الحاجة التانية انك لازم تبحث فى محلات الموسيسقى اللى مازالت موجود فى الدول العربية عن كتب فيها نوتات لأغانى عربية بس صعب حتى تلاقى لأن عندنا مصر ام الموسيقى كل المحلات دى قفلت وغيرت نشاطها ... اما عازفى الاورج لما بيعملوا يد شمال على عزفهم بيبقى سماعى بس لازم يكون خبير يحط ايه مع ايه لن ممكن تطلع نشاز جدا .. وللعلم هم دلوقتىكلهم بيعزفوا يد يمين فقط وبيخلوا الاورج يعمل لهم النغمات المصاحبة
مع اطيب تحياتى عادل صموئيل
؟

[muhamadibra]

ممنونين جدا للمايسترو - خاصة لتحليلاته الممتعة - والتي احرص جدا علي قراءتها واهتم بها - لانها خلاصة تجارب وخبرات - واشبهها بغذاء الملكات الذي لا يمكن مقارنته بشئ اخر ---
د محمد ابراهيم

[علي ثلاثة]

الأستاذ الفاضل
عادل صموئيل
الشكر الجزيل على تدوين هذه الأغنية القديمة

بتسأليني عن حالي وانت السبب في اللي جرى لي

أما بتسأليني بحبك ليه
فهي للمطرب الكبير
محمد عبد المطلب

واعتقد أن أحداهما تستدعي الأخرى في الذهن
لتشابه مطلعهما

فالشكر الجزيل على هذا العطاء الحاتمي
خصوصا إذا كانت المدونة
لأغاني زمان والتي حازت إعجابنا وتقديرنا

ويسعدني جدا
أيها الأستاذ الفاضل
أن تقدم ولو بإيجاز شديد
شرحا للإيقاع الذي استعمله فريد
في الجزء الثاني
فهل هو مستعمل في موسيقانا العربية
أم هل هو غربي تم توظيفه.
فأنت أهل لتوضيح هذا
وشكرا جزيلا جزيلا

اخى العزيز
انا بالطبع مش خبير اوى ف الايقاع طالما الاخ العزيز محمد الآلاتى مش موجود لكن الايقاع هنا هو غربى اصلا وهو نوع من الرومبا .. يعنى احنا عندنا الملحنين العمالقة كان بيجيب الايقاع الغربى بس ممكن يضيف لو شىء بيمصره يعنى من باب التلوين .. ودده حرص عليه عبد الوهاب بالذات لأنك مثلا يعنى لو استعملت الفالس زى ما بيستعملوه فى اوربا دوم تاك تاك وثابت على كده لو استعملته فى اغنية تانية حايبقى الاغنيتين شبه بعض .. لكن كانوا بيلعبوا فيه يعنى يعملوه مثلا دوم تكتك تاك او دوم تتتكتك تك يعنى اشكال كتير لأن اهم حاجة عندهم ان تطلع كل لازمة مش شبه لازمة ف لحن تانى
مع اطيب تحياتى عادل صموئيل

[youssf kassimi]

السلام عليكم أستاذ،
ممكن لو سمحت نوتة خير البرية لفيروز.

[منذر44]

الاستاذ العزيز عادل صموئيل
كي لا تتعب بالبحث عن الطلبات القديمة جمعت لك معظم طلبات التدوين من الصفحة 250وحتى
اخر صفحة راجيا ان تستفيد منها وتوفر عناء البحث:

اصبح عندي بندقية صفحة254
تدوين الروائع التالية لأسمهان
1-يا طيور
2-نويت اداري الامي
3-يا ليالي البشر
4-رجعتلك يا حبيبي
5-ايها النائم صفحة256
أغنية للشحرورة صباح اخدوا الريح ص266
لا عيوني غريبة لوديع الصافي ص266
بالك مع مين يا شاغل بالي لعبد الوهاب ص266
فرق ما بينا الزمن لاسمهان266
موعدنا ارضك يا بلدنا ملحم بركات ص267
بني وطني ( علية التونسية ) ص267
نوتة البرواز محمد عبده
عصفورة الشجن للصوت الملائكي فيروز
يا عاشقة الورد لزكي ناصيف ص276
لفيروز (يا حمام يا مروح ص280
سعدون جابر يا أمي ص282
لك أغني ميادة حناوي ص288
أوبريت ما تقولش لحد فريد الاطرش ص291 أنا و اللي بحبو
نجوى لعبد الوهاب ص294
بلاش عتاب لعبد الحليم ص294
اغنية انذار عبد الحليم ص296
عادل امام و استعراض الطلبة ص296

ياهلي عبد الحليم
نوت معزوفات عمر خورشيد (رقصه الفضاء - تقاسيم سنة الفين
اغنيه للشيخ امام وهيه يا مصر قومى وشد ي الحيل
أغنيتى الموسيقار
فريـــــــــــد الأطرش
اســـــــألى الفجــــر والغروب

وحشني كلامك واغنية بشوقك براحتك لمها صبري
اغنية والتقينا التي غنتها عزيزة جلال
اغنية اين حبي التي غناها السنباطي
اسكندرية للشيخ امام
حلولا يا حلولا للشيخ امام
الصبا والجمال لعبد الوهاب
دور يا زمن" من غناء علي الحجار ولحن عمر خيرت
اغنية عاشق يا هوى للفنان وليد توفيق
نوتة أغنية الدنيا سيكارة وكاس لمحمد عبد الوهاب
وردة قبل النهاردة
اغنية "أيام " للمطربة الكبيرة وردة الجزائرية
سلامات سلامات للفنانة نادية مصطفى
"حنين" للموسيقار منـير بشـير
نوتة بلا ولا شي للفنان زياد الرحباني
نوته اغنيه عيناكي للفنان خالد الشيخ
وردة ايامنا عيد
نوتة مليش امل للفنانة ليلى مراد
خمرة الحب اسقينيها لصباح فخري
على راس بســـــــــــــــــــــتان الاشــــــــــــــــتراكية عبد الحليم حافظ
غــــــــــلاب غـــــــــلاب الهـــــــوى غــــــــلاب مها صبري
برضــه حبيبى وما استغناش عنك أبدا مها صبري
أنغام شنطة سفر
أغنية نتالي وهي أغنية مشهورة عندنا في سوريا صفحة335
نوتة نجاة مستغناش عنك
(يا طوبة حمرا) للملحن أحمد اسماعيل.ص344
نوتة صباح عالبساطة البساطة
ساكن قصادى لنجاة
مع اجمل تحياتي

اخى العزيز
اشكرك على مجهودك وانت فعلا وفرت عليا بحث كتير لنى مش بقعد ع الكمبيوتر وقت طويل يعنى الوقت اللى بيضيع فى البحث نقدر نكتب فيه حاجة اكسب لكم طبعا الاغانى دى مش كلها حكتبها فيها اغانى انا بحبها واغانى مش بحبها واغانى ما ينفعش تتكب او مالهاش قيمة تستاهل يعنى .. انا طبعا بحب اكتب الاغنية اللى تفيد اكبر عدد من الاعضاء حتى الاعضاء اللى مش زوار دائمين للصفحة وانا اعرف ميولهم انا بتكلم عن الاعضاء اللى ماعرفهمش وان شاء الله حشتغل فيهم بس فيه اغانى انا لاحظت انى كتبتها زى مثلا غلاب بتاعة مها صبرى بس انا ارجو من الاعضاء ما يطلبوهمش تانى عشان بيملا صفحات كتير على الفاضى وفيه مشكلة معظمهم مالوش ملفات صوتية مع اطيب تحياتى عادل صموئيل

[علي ثلاثة]

الأساذ الفاضل عادل
ألف شكر على الرد
وعلى سرعته