احبائى
اعتذر عن الغياب .. يعنى الظروف اللى بتمر بيها مصر هذه الايام واللى ماحصلتش من ايام الهكسوس .. يعنى انا مذاكر التاريخ كويس كانى كنت موجود .. كل الاعداء اللى اعتدوا على مصر التتار واليهود والانجليز والفرنسيين والرومان .. ماعملوش اللى بيحصل دلوقتى .. والمؤلم ان اللى بيحصل لما يحصل من عدو يبقى مقبول لكن لما يبقى بإيد مصريين باعوا انفسهم للشيطان بيبقى مؤلم اوى .. انا افتكرت ايام المماليك .. يعنى المماليك دول كانوا عبيد بيشتريهم الامراء من كل بلاد الدنيا وكانوا كلهم لما بيترقوا ويبقوا امراء طامعين فى السلطة بس كانوا بيتميزوا انهم مش مصريين يعنى ماعندهمش انتماء لمصر ولا شعور بالمواطمة ,, يعنى ممكن يبيعوا مصر عشان خاطر اى حاجة وده بتشوفه دلوقتى .. زمان كان الاعداء بييجوا من الامام من جبهة قتال لكن اليوم الاعداء من الخلف ومن كل مكان وربنا يحميكى يا مصر .. بس طبعا انا فى اى ظروف لما بغيب لازم اكون بشتغل
واقدم لكم اليوم تحفة ام كلثوم
يا ظالمنى
اللحن ده من اصعب الالحان اللى عملها السنباطى لأم كلثوم .. وبيعتمد على براعة الأداء مش التلحين فقط .. يعنى لما تسمعه تحس ادايه ام كلثوم بتتصرف وبتصدر يعنى بتخرج من الوحدة بس بترجع تانى طبعا , لدرجة انا كنت سامع ابراهيم عفيفى احسن عازف ايقاع فى العالم وهو استاذ كل عمالقة الايقاع اللى جم بعده .. من كتر العبقرية كان ابراهيم عفيفى كتير كان بيترك الدوم ويديها تكوك لحد ما يحس انها حاترجع .. فاكرين الاخ الدكتور بناويست او ملوخيست لو سمع الاغنية دى كان حايقول ام كلثوم مش بتعرف تغنى وبتقع فى الوحدة وعازف الايقاع خايف يعزف الدوم .. زى ماقال عليا مش بعرف اكتب نوتة
ام كلثوم المطربة الوحيدة اللى لو سمعت 7 او 8 حفلات من نفس الاغنية تلاقى فى كل تسجيل عبقرية .. وعايز اقول لكم على سر من اخطر اسرار العبقريات دى ... زمان كانت ام كلثوم بتغنى 3 وصلات كل وصلة مش اقل من ساعة ونص ( طبعا النهاردة اى واحد او واحدة بيغنوا لو غنى نص ساعة بيهنك او بيخلص) ام كلثوم كانت العكس كل ماتغنى اكتر بتتسلطن اكتر وصوتها بيسلك اكتر .. كانت الاغنية اللى بتختارها فى الوصلة التالتة .. هى كانت بتختار اغنية من اتقل عيار ممكن زى الآهات ويا ظالمنى والنوعية دى .. واقصد النوعية اللى بتطلع فيها كل اللى جواها .. بمعنى ان انت عمرى مثلا من نوعة محددة ماتقدرش تلعب فيها كتير ,, لكن نوعية ياظالمنى ممكن تقول 50% من عندها ماقالتوش فى الحفلات السابقة .. طبعا اللحن صعب جدا بس طبعا اتمنى ان كلكم تحاولا فيه وان شاء اله تستفيدوا منها
مع اطيب تحياتى
الرجا فى الردود عدم اقتباس اللى كتبته كلو عشان ماتبقاش الصفحات كتير من غير لزوم
طلبات نوتة أ / عادل صموئيل الجزء الثانى
العرض العادي
