السمسميه وشعبيات البحر الأحمر - الصفحة 3

**hero4islam** · #1 08/04/2017, 12h50

رووووووووووووووووووووووووووووووائع
تحياتى لمجهوداتكم

**azizan** · #2 06/10/2017, 23h02

في منتصف السبعينات زارت الكويت فرقة إسمها الأسمرانية بمصاحبة السمسمية
وأدت اغاني ورقصات على مسرح سينما الأندلس الشهير
ارفق لكم الاغاني التي أدتها هذه الفرقة

**حسن كشك** · #3 07/05/2007, 00h46

معزوفة سمسمية هديه منى لك يا اخونا Elazf
وممكن تلاقيها Mp3 فى الموضوع بتاع تاريخ اله السمسمية فى مدن القناه فى نفس القسم ده

**elazf** · #4 25/05/2007, 13h46

يالخيزرانه

تبحيرة صبحية العيد
+ ليه الحبايب عابوا فينا يا زمان

**elazf** · #5 25/05/2007, 14h21

أعمل لك صاحب للزمان

من اشهر الاغنيات على السمسمية فى منطقة البحر الاحمر أغنيه أعمل لك صاحب للزمان ...
اسمع العم أحمد جمعه وحربي حسين ومعاهم محمد حسين على السمسمية و قعدة حظ فى الغردقة
دي بعض الكوبليهات من الاغنيه :
اول قوللي وما بادي يا مسلم صلي على الهادي
اول قوللي وتفنيني قبل الزمان ما يفنيني
بمسي على محبيني
واعمل لك صاحب للزمان

ياللي سريرك بوصه اتنين .... حيرني اطلعله منين
و الغبي خد مقلبين
اعمل لك صاحب للزمان
يا سرير بنت الشبعان .. نصبوه فى الاوضه قدام
ركبته وضرب لي سلام

يا سرير بنت الفقري ... نصبوه فى الاوضه قبلي
ركبته وكسر رجلي
أصلها فقريه

ياللي بيتك ع القرنه ... لفينا البلد ودرنا
ولا حد يعذرنا

ولد ابويا البكري .. وبدلع على فقري
يبعد يروح من مكري

قاعدين على كوبري اسنا ... خبطنا الهوي ونعسنا
واللي شبكنا يخلصنا

بين الجيزة والزمالك .. طالب بوسه ومش مالك
حب يودي المهالك

عسكري وانا عبادي ... ارمي العصا والعب بأيدي
ميلي عليا واتسندي

**elazf** · #6 25/05/2007, 14h38

وحياة المحنٌه

وحياة المحنٌه بتشديد النون .. ومعناها وحياة الحنيه اللي بيننا
أداء حسن عبدالظاهر بمصاحبة الراوي على السمسمية

وحياة المحنه والريده اللي بينا ... بعد عني نار وقرب ليا جنه
وحياة الحب الاول .. الثابت ما يتحول ... بعدك عني نار وقربك ليا جنه
وحياة الغردقويه ... الناس الحظاويه .. أحلي شباب ميه ميه ... شباب السمسمية
علشان خاطر عيونك .. علشان سحرك ولونك .. علشان بسمة سنونك .. قرب ليا سنه
+
تبحيرة
كل ما جيت اقول الاه تسبقني الدموع واقوم ابكي
على غزال هرب مني وهو ملكي
أعامله بالاسيه لم يدور يشكي
يضحك ويلعب امام الناس ولما يختلي لوحده يقعد يبكي

**elazf** · #7 21/07/2007, 07h36

موال يا بحر

يا بحر ياللي كلك موج ازرق
فيك الحديد يعوم وريش النعام يغرق
وحياة من سلط الحاوي على العقرب
من عاشر البيض لا ياكل ولا يشرب

* طيري طيري يا حمامه

* تبحيرة يا نجمة الصبح طلي وارجعي وروحي

**elazf** · #8 05/09/2007, 10h21

تابع . حظ سعود عبدالغني

* تقسيمة سمسميه للفنان : أحمد سليم سباق

* دور يا بنت حساني

يا بنت حساني .. ابوكي وصاني
لاتوزني الفضه إلا بميزاني

يا طالع الوادي .. هاتي لي معاك زادي
ولا جريد أخضر لبنت حساني

* دور يا ولد عذبت روحك

ياولد عذبت روحك يضربوك ماتهنش عليا

* دور احبابنا ياعين

**elazf** · #9 05/09/2007, 10h31

الحنه السوداني

الحنه السوداني وخفة دمه حاجه تاني
ميل عليا وقاللي بحبك يا اسمراني

الحنه تزين الكف وشباب يرقص فى الصف
عريس وعروسه تتزف والعالم سهراني

عريسنا زين العرسان وعروسته قمر الزمان
الحنه من السودان والنقشه اسواني

**حسن كشك** · #10 07/09/2007, 06h06

يا كنج راوى
وانا باستمع الى اغنية يا بنت حسانى
لاحظت ان اسمك حد بيقوله فى الميكروفون هل انت اللى كنت بتعزف على السمسميه
والصوت ده صوت من المكبرات ولا صوت السمسميه نفسها وانت اضفتلها مايك داخلى
وكم وتر السمسميه دى

الملحوظة الثانية
ان المطرب سعود غير اللحن الاساسى للاغنية لانها اسرع من كده فى الرتم
لكن المطرب غناها بلحن اشبه بالالحان الكويتيه خاصة السقفه ما كانتش سويسى
لكن كويتى - كدا بنفقد هويتنا يا راوى والا الاخ سعود مش مصرى

الملحوظة الثالثة
اغانى مرسى بركه متسجله اسرع شويه من الطبيعى مش كدا ولا انا مش واخد بالى
وخاصة اغنية ومنين اجيبه

لكن شكرا على مجهودك الجميل