المقامات الموسيقية - الصفحة 2

**الألآتى** · #1 02/08/2009, 06h46

الدرس الأول

قبل الدخول فى دروس المقامات .. ينبغى علينا أولاً .. أن نعرف ماذا تعنى كلمة ( مقامات ) ..

وقبل ذلك يجب أيضاً أن نعرف بعض المعلومات التى ستفيدنا فى القادم من الدروس ..

نحن نعرف السلم الموسيقى ( دو ، رى ، مى ، فا ، صول ، لا ، سى ) ..

هى سبعة حروف .. أو سبعة نغمات .. يتكون منها السلم الموسيقى ..

ومن هذا السلم جاءت جميع المقامات .. وكذلك السلالم الغربية .. لأن الموسيقى لغة عالمية ..

ونفس هذه النغمات .. تستعمل فى أى بلد وأى مجتمع ..

صحيح أن أسماء النغمات .. إختلفت من لغة لأخرى .. ولكنها تبقى فى النهاية .. نفس النغمات بغض النظر عن المسميات ..

فالأسماء ( دو ، رى ، مى ) .. أسماء إيطالية ..

لكن هناك أسماء إنجليزية لنفس السلم ( C , D , E , F , G , A , B ) .. ويجب أن نقرأ هذه النغمات من اليسار لليمين .

أما المسميات العربية للسلم الموسيقى .. فحدث ولا حرج .. هيصة وتوهة .. وخيبة قوية ..

فسلم القرار غير سلم الجواب غير السلم الأوسط .. ولنأخذ مثالاً للسلم الأوسط فى الموسيقى العربية ..

( أوج ، حسينى ، نوى ، جهاركاه ، سيكاه ، دوكاه ، راست ) .. وتُقرأ من الشمال لليمين أيضاً .

وفى الحقيقة .. إن النغمات العربية .. هى فى الأصل أسماء فارسية .. والأخوة اللذين يلعبون الطاولة .. سيعرفون بعض هذه المسميات ..

فالدوكاه . تعنى النغمة الثانية .. وتنقسم لكلمتان ( دو ، كاه ) ودو .. تعنى إثنان .. وكاه .. تعنى مقام بالفارسية .. بسيطة ..

وكذلك ( سيكاه ) تعنى النغمة الثالثة .. ( سى ، كاه ) سى .. تعنى الثالثة .. وكاه تعنى مقام .. إيه رأيكم .. حاجه لذيذة خالص .

وقبل أن نتحدث عن المقامات .. من حقنا نعرف يعنى إيه مقام .. إيه الكلمة دى ..

مقام ياجماعة .. يعنى مكان .. يعنى مستقر .. خلصت .. مش شغلانه يعنى . يعنى مثلاً ( فلان إستقر به المقام فى الحته الفلانية )

يعنى إستقر فى هذا المكان .. وليه سموه مقام .. أو مكان ..

لأن كل مقام له مكان معين على السلم الموسيقى .. وله طريق وسكة غير المقامات الأخرى .. علشان كده .. إحنا بنعرف المقامات من إختلاف الأمكنة والطريق الذى تسير فيه نغماته .. حلو الكلام .. حلو ..

ياللا .. ذاكروا الكلام ده كويس وإحفظوه .. علشان إللى جاى .. أتقل وأصعب .

**محمد روز** · #2 26/02/2015, 11h29

ربنا يخليك لينا ياستاذ ومقدرش اقول غير عماااااااااااااااااااار يامصر

**الألآتى** · #3 03/08/2009, 03h22

الدرس الثانى

عرفنا يعنى إيه مقام .. كويس .

عايزين نعرف بقى .. مما يتكون المقام ..

المقام ياجماعة يتكون من ثمانية نغمات تفصل بينهم سبعة مسافات .. أو بطريقة أخرى ..

يتكون من سبعة نغمات زائد جواب النغمة الأولى ..

يعنى ( دو ، سى ، لا ، صول ، فا ، مى ، رى ، دو ) .. ماتنساش تقرا من الشمال لليمين .

وممكن كمان .. نعرف المقام بأنه .. يتكون من إتنين ( تتراكورد ) .. يادى النايبة .. يعنى إيه ( تتراكورد ) ؟

كلمة ( تتراكورد ) تتكون من مقطعين .. تترا .. وتعنى أربعة .. وكورد تعنى تون أو نغمة ..

يعنى كلمة ( تتراكورد ) .. تعنى أربع نغمات

إذن المقام يتكون من إتنين أربع نغمات .. يعنى ثمانى نغمات .

طيب واحد يقول لى .. وليه اللفة الطويلة دى .. ماتقول ثمانى نغمات وتخلصنا .. لازم يعنى إتنين تتراكورد .

أيوه .. لأن كل مقام يختلف عن غيره .. بإختلاف هذا التتراكورد .. وتسمى فى الموسيقى العربية ( جنس المقام )

يعنى لو حطينا جنس نهاوند زائد جنس حجاز .. حاينتج عندنا مقام النهاوند العادى ( الحجازى )

ولو غيرنا الجنس التانى وخليناه جنس كرد .. حاينتج عندنا مقام نهاوند كردى ..

ولو غيرنا الجنس الأول وخليناه راست .. مع الإحتفاظ بالجنس الثانى ( حجاز ) .. حاينتج لنا مقام ( سوزناك )

وهكذا .. فتغير التتراكورد أو الجنس .. يغير المقام ..

وهنا يأتى سؤال ليطرح نفسه .. كيف نعرف المقام ؟

هناك طريقتان لمعرفة المقامات ..

الطريقة الأولى .. معرفة أبعاد كل مقام .. أى معرفة المسافات بين نغمات المقام .. وذلك بقراءتها على المدرج الموسيقى ..

وكل مقام تختلف أبعاده أو مسافاته عن الأخر ..

وعلشان مانلفش وندور .. ممكن نرجع لدروس النوتة الموجودة فى المنتدى .. لنعرف أماكن النغمات على المدرج الموسيقى .. وكذلك المسافات بين نغمات كل مقام ..

الطريقة الثانية .. معرفة المقام عن طريق السمع .. يعنى بودانك ياشاطر ..

لأن لكل مقام وقع معين ومميز فى الأذن .. وهذه لاتأتى إلا بالخبرة .. وسماع الأغانى والموسيقى بكثرة .. ومقارنة مانسمعه مع مانعرفه من المقامات ..

وماتقلقوش .. كل ده حانعرفه بالصوت والصورة .. وحانحاول نستطعم كل مقام فى ودانا ..

ياللا .. ذاكروا الدرس كويس وإهضموه .. علشان نكمل الحكاية .

ملحوظة .. مش عايز حد يسأل سؤال بره الدرس .. علشان ماأبطحش نفسى عليه ..

**غازي الضبع** · #4 03/08/2009, 06h09

اقتباس:

المشاركة الأصلية كتبت بواسطة الألآتى

يتكون من إتنين ( تتراكورد ) ..

هنا عندي سؤال ..
يعني الـ تتراكورد دي .. نصف سلم
يعني مثلا أول أربع نغمات يبقوا تتراكورد ، والأربعة التانيين يبقوا التتراكورد الباقي ..
ولا إيه ؟

اقتباس:

وتسمى فى الموسيقى العربية ( جنس المقام )

يعنى لو حطينا جنس نهاوند زائد جنس حجاز .. حاينتج عندنا مقام النهاوند العادى ( الحجازى )

ولو غيرنا الجنس التانى وخليناه جنس كرد .. حاينتج عندنا مقام نهاوند كردى ..

ولو غيرنا الجنس الأول وخليناه راست .. مع الإحتفاظ بالجنس الثانى ( حجاز ) .. حاينتج لنا مقام ( سوزناك )

وهكذا .. فتغير التتراكورد أو الجنس .. يغير المقام ..

هل نفهم من كده إن جنس المقام هو نصف المقام .. اللي قولنا عليه فوق

وبعدين ايه النطة الجامدة دي يا عم .. الحجاز والسوزناك والراست والنهاوند العادي ( الحجازي ) .....
خضتنا يا عم

**الألآتى** · #5 03/08/2009, 08h37

حاضر ياغازى .. حانقل الدروس هنا .. بس عايز تفاعل علشان أحس إنى عملت لكم حاجة مفيدة ..

اقتباس:

المشاركة الأصلية كتبت بواسطة غازي الضبع

هنا عندي سؤال ..

يعني الـ تتراكورد دي .. نصف سلم
يعني مثلا أول أربع نغمات يبقوا تتراكورد ، والأربعة التانيين يبقوا التتراكورد الباقي ..
ولا إيه ؟

التتراكورد ليس نصف سلم .. إنما نصف أوكتاف .. لأن فيه فرق بين السلم والأوكتاف ..

السلم هو سبعة درجات نغمية .. أما الأوكتاف فهو سلم زائد درجة .. يعنى ثمانية درجات ..

ويبقى عندنا الأربع نغمات الأولى من الأوكتاف عبارة عن تتراكورد

والأربعة نغمات الثانية .. تتراكورد تانى ..

اقتباس:

المشاركة الأصلية كتبت بواسطة غازي الضبع

هل نفهم من كده إن جنس المقام هو نصف المقام .. اللي قولنا عليه فوق

الجنس هو نصف المقام فعلاً .. ويعنى أربع درجات نغمية ..

يبقى المقام فيه جنسين .. جنس أصلى وجنس فرعى .. وبتغير هذه الأجناس ينتج لنا المقامات المختلفة

اقتباس:

المشاركة الأصلية كتبت بواسطة غازي الضبع

وبعدين ايه النطة الجامدة دي يا عم .. الحجاز والسوزناك والراست والنهاوند العادي ( الحجازي ) .....
خضتنا يا عم

مافيش نطة ولا حاجة .. دى كانت مجرد أمثلة لتغير الأجناس .. وبعدين حانتكلم على المقامات دى بالتفصيل .. ماتقلقش .

**Islam Eidrisha** · #6 03/08/2009, 08h41

الله ينور يا أستاذ محمد
ونحن بانتظار سماع باقي نماذج المقامات -بعد ما سمعنا نماذج من البياتي- للمقارنة بين المقامات وتلك المقارنة من شأنها تثبيت كل مقام في الأذن وفصله عن غيره من المقامات للقياس عليه فيما هو قادم عند سماع أغنيات لأول مرة.

**غازي الضبع** · #7 03/08/2009, 08h45

سيب حكاية التفاعل دي عليا أنا

**
طيب .. احنا كده فهمنا إن التتراكورد أو جنس المقام هو نصف أوكتاف أو أربع نغمات
بس إنت ما جاوبتنيش
هل هم أول أربع نغمات في المقام
ولا أي أربع نغمات
ولا الأربعة اللي على اليمين ، ولا إللي على الشمال
يعني .. أعرف منين جنس المقام ؟؟

**الألآتى** · #8 03/08/2009, 08h55

اقتباس:

المشاركة الأصلية كتبت بواسطة غازي الضبع

سيب حكاية التفاعل دي عليا أنا

**
طيب .. احنا كده فهمنا إن التتراكورد أو جنس المقام هو نصف أوكتاف أو أربع نغمات
بس إنت ما جاوبتنيش
هل هم أول أربع نغمات في المقام
ولا أي أربع نغمات
ولا الأربعة اللي على اليمين ، ولا إللي على الشمال
يعني .. أعرف منين جنس المقام ؟؟

نقول كمان .. عشان الحبايب ..

بما إننا بنتكلم عن المقامات الشرقية .. خلينا فى الأجناس .. وسيبك من التتراكورد ده .. لأن ده مصطلح غربى ..

ماشى ..

المقام بيتكون من جنسين .. الجنس الأول يسمى الجنس الأصلى أو جنس الجذع .. خلاص .. طيب

وده يبدأ من درجة المقام الأولى .. وتسمى درجة الركوز .. يعنى نعد من بداية سلم المقام .. 1 ، 2 ، 3 ، 4 ..

ده جنس الأصل ..

بعد كده .. نعد من الدرجة الخامسة للمقام .. 1 ، 2 ، 3 ، 4 .. ده جنس الفرع

وصلت ولا لسه ..

**عثمان دلباني** · #9 03/08/2009, 09h51

وهذه نماذج صوتية للكلام اللي سبق الحديث فيه

السلم الموسيقي و نشوف ما المقصود بـ :

الديوان الاول (غليظ ) و الثاني( متوسط) و الثالث (حاد )

**عثمان دلباني** · #10 03/08/2009, 09h56

و هنا نسمع الى :

الجنس الاول : فا ، مي ، ري ، دو

الجنس الثاني : دو ، سي ، لا صول

السلم الموسيقي دو، سي، لا، صول فا، مي، ري، دو