طلبات نوتة - الصفحة 5

**عادل صموئيل** · #1 07/07/2009, 22h31

اقدم لكم نوتة جبار لأنها انطلبت عدة مرات بإلحاح وانا مقدرتش اكتب منها سوى المقدمة والمذهب والكوبليه الاول
والأغنية دى مشكلتها واعتقد انكم شفتم فيلم معبود الجماهير ان المخرج لما كلم الموجى عشان يعمل اللحن كان المطلوب انه يعمل لحن صعب جدا فيه اقصى استعراض عضلات تلحينا وغناء وتوزيع لن قصة الفيلم ان عبد الحليم حب يثبت ذاته انه مطرب كبير مش الممثل الصغير اللى رفضته شادية لأنها ممثلة كبيرة
وانا اللحن ده عمرى ماحاولت اعزفه مع انى عزفت الحان اصعب منه كتير لأن اولا فى المقدمة تعتمد على الإبهار بصولو الايقاع وغناء عبد الحليم فيه ابهار غنائى وبعدين التوزيع ما ينفعش تعزفه آلة واحد محتاج اوركسترا اتمنى اللى كتبته يؤدى الغرض
مع اطيب تحياتى

**عادل صموئيل** · #2 07/07/2009, 19h48

اقتباس:

المشاركة الأصلية كتبت بواسطة وائل

استاذنا الفاضل الاخ عادل
الف شكر على اخلاقك وذوقك الراقي انك رديت عليا
رغم مشاغلك الكتيرة الا انك مبتبخلش علينا بوقتك الغالي وبترد علينا كلنا وبتلبي لنا جميع طلباتنا--- وده شي الشكر قليل جدا في حقك يا غالي
ولا نملك الا ان ندعي لك بالصحة والعافية لانك بتسعدنا ربنا يخليك لينا يا كبيرنا

الأخ العزيز وائل
اقدم لك نوتة حكاية العمر كله واشكرك على كلامك الجميل وان شاء الله الباقى فى القريب وانا آسف للتأخير لأنى مشغول 48 ساعة فى اليوم

**عادل صموئيل** · #3 11/07/2009, 19h25

عزيزى نور الصباح
اولا اشكرك على كلامك الحلو
اقدم لك نوتة هل هلال العيد
وملحوظة انا بعد ما اخلص نوتة وانزلها بكون بجهز نوت تانية يعنى طبعاً ده فى الوقت اللى ممكن ادون فيه لأنى مش متفرغ للتدوين طول النهار يعنى فى اوقات معينة حسب وقت الفراغ وهناك ايضاً حاجة لازم تتفهموها ان فيه بعض الحان ببتدى اكتب بعدين بزهق منها واركنها وممكن اكملها فى ايام تانية بس المهم انك فى اى وقت لو فتحت الجهاز بتاعى حتلاقى كذا نوتة ما زالو تحت الكتابة
ومع مراعاة ان فيه اعضاء تانيين بيطلبوا كذا طلب مرة واحدة وانا بحاول اقدم لهم جزء من طلباتهم واكملها بعدين حسب استطاعتى
هنا انا اقدم النوتة دى ولأول مرة اقدم لكم التسجيل بتاعها وهى لنور الهدى وهى لحن لطيف جدا وسهل وخفيف واهدية لأحبائى مدرسى الموسيقى الأعضاء بالمنتدى واهديها للأخوات جوليانا وايمان ومحبوبة وهى جميلة لما تتعمل فى مدرسة واقول لكم على سر ان فى كل وزارة التربية والتعليم فى كل الجمهورية ما حدش عملها قبل كده ( وانتم طبعاً عارفين انى بعرف دبة النملة من اسكندرية لأسوان , والتميز ده مهم جدا انك تؤدى لحن ماحدش عمله قبل كده فى المدارس يعنى جميل لأن الناس المعنيين بالأمر واللى بيقيموا شغلك وهم الموجهين والموجهين الأوائل وموجهين العموم بالمديريات والمستشارة بيبقوا سعداء جداً لما يسمعوا لحن مش متداول 1000 مرة ومستهلك فى جميع المدارس وده بيرفع اسهم المدرس اللى بيقدمه وطبعاً تميز تانى لما تقدموا فى الحفلات المدرسية الحان مش متداولة
مع اطيب تحياتى

**عادل صموئيل** · #4 13/07/2009, 22h35

اقدم لأعضاء المنتدى وبناء على طلب الأخ العزيز وائل نوتة

موعود

كاملة وطبعاً لكن ان تحسوا بمدى المجهود الذى بذلته فى كتابة هذا اللحن ( 11 صفحة ) والمهم ان تستفيدوا منها حتى احس بثمرة مجهودى وقد راعيت كالعادة ان ابسطها بحيث ان يستفيد منها الجميه
تنبيه : هذا اللحن يعتمد على إختلاف السرعة بين الجمل يعنى انا كتبت سرعات تقريبية واحنا ايام الفرقة الماسية عمرنا ما كتبوا لنا سرعات ولكن كان المايسترو فى البروفات او حليم فى الحفلات بيشاور السرعات المطلوبة وطبعاً احنا حفظناها من كتر البروفات
واقول للأخ وائل وصلتنى رسالتك وفى لحن ودارت الأيام انا حنزل لكم حزء جزء حتى لا تملوا من الإنتظار الطويل
مع اطيب تحياتى

**جوليانا** · #5 14/07/2009, 16h08

السلام عليكم ورحمه الله وبركاته

استاذى العزيز الفاضل /عادل صموئيل
الساده الافاضل اعضاء منتدنا الحبيب
الاخ الفاضل نور الصباح لقد قرات فى احدى مشاركاتك سؤال عن تلاميذ وتلاميذات استاذنا الكبير عادلاننا لم نشارك فتره اذا كنت فهمت صح فهذا يدل على الروح السائده فى منتدنا وهى الحب والعطاء والاحترام فشكرا لك وليس هذا غريبا لاننا جميعا
تعلمنا هذا من استاذنا العظيم من حبيب الملايين استاذى ومعلمى عادل صموئيل
فانا افخر دائما انه قبلنى لاتعلم منه
استاذى الفاضل اشكرك انك لاتنسى ابدا تزويدا بالنصائح المفيده والمهمه فى عملنا لم تنسى رغم متاعبك ان تذكرنا وتذكرنا بان اغنيه هل هلال العيد لم تتعمل قنل كده
انا ببقى عايزه اعبر اكثر بس بصراحه طول عمرى ضعيفه فى ماده التعبير لكن ارجو ان يكون وصلك ما نكن لك من احترام وتقدير وحب واشكركم
سوف ارفق لحضرتك اغنيه الفنانه شاديه

**عادل صموئيل** · #6 16/07/2009, 21h10

اقتباس:

المشاركة الأصلية كتبت بواسطة جوليانا

السلام عليكم ورحمه الله وبركاته

استاذنا ومعلمنا الكبير /عادل صموئيل
حضرتك عامل ايه ان شاء الله تكون بخير واحسن حال
انا درست فى كليتى اربع سنوات ولكنى لم اجد من يبسط لنا الامور ويعلمنا كما تتفضل حضرتك عندمايسال احد اى سوال فاجد شرحا وافيا مستصاغا يفهمه بسرعه ياريت حضرتك كنت درستلنا اكيد كنا هنبقى احسن من كده بكتير
المعلمومات قيمه جدا وبتتشرح بكل سهوله ربنا يبارك لنا فيك ويجزيك خيرا ان شاء الله
واشكرك كثيرا على مجهودك فى اغنيه موعود دائما تجعل من الصعب سهل فهذه مهاره لم نجدها الا عند حضرتك
ودائما شكراااااااااا

الأخت العزيزة جوليانا
اقدم لكى اغنيتن من طلباتك مصر اليوم ف عيد وصوت بلادى وقد دونتها كاملة بالمقدمة الموسيقية
وردا على كلامك الجميل المشكلة ان فى مصر وفى كثير من الدول لا يتفهمون معنى كلمة التعليم وهذه الكلمة معناها كبير جدا , يعنى عندنا فى مصر لو طالب حصل على الثانوية العامة ونقيم مستواه نجد مستواه خامسة ابتدائى لا تالتة ثانوى لأن المدرس اصبح يدخل الحصة ويلقى عليهم الدرس ويخرج ولا يضع فى اعتباره كمية الفهم الذى فهموه للدرس ومن المفيد له ان لايفهمون ليأخذوا دروس خصوصية , ولكن كلمة تعليم بمعناها الفعلى هى ما افعله يعنى من يسألنى سؤال اجتهد فى محاولة عرض الموضوع كله يعنى انتى لو سألتينى سؤال هذا السؤال عادة يكون جزء من موضوع ولو رددت على سؤالك فقط لن تفهمى شيئا ولكن لو شرحت لك الموضوع من اوله عندما آتى للجزء الذى يحوى إجابة سؤالك ستكونين فهمتى وإستوعبتى الموضوع كله , وانا انسان غلبان ولا انتحل اى صفة ... ولكن التعليم الصحيح هو ما افعله

**armendo** · #7 18/07/2009, 19h26

الأخ العزيز ابو برهان تحية طيبة
اهم ما يميز اسلوب الأستاذ عادل صمؤيل هو اعطاءك نوتة بسيطة يستطيع ان يقرأها اى عازف بسهولة تامة ولكنى اشك انة سوف يلبى طلبك قريبا لأن امامة طابور طويل من الطلبات تحتاح الى وقت طويل حتى يلبيها كما ورد فى ردة على احدى المشاركات ولذلك فانا اهديك نوتة قارئة الفنجان كاملة وارجو ان تستقيد منها ان شاء اللة ويا ريت الأستاذ عادل يعيد تدوينها بأسلوبة السهل فى المستقبل القريب ان ساء اللة.
وتقبل تحياتى
ارمندو
عزيزى ارمندو
اشكرك على تعاونك لتخفيف الضغط وللعلم النوتة مكتوبة حلو هى مكتوبة بإحتراف شوية لكن المهم ان الخط واضح يعنى مع شوية تركيز ممكن تتعزف بسهولة وبالذات لما اللى يقراها يكون حافظ الأغنية وبالذات عشان الأدليب

**عادل صموئيل** · #8 01/08/2009, 19h29

يا احبائى اشكرك معلى كلامك الجميل وانا مش قد الكلام ده كله
اقدم لأخى العزيز نور الصباح ( واشكره على الزفة اللى عمل لها لى ) اغنية اختال فوق عيدانك واكبر يازرع الشراقى
واقدم ايضا التسجيل
واهديها لمدرسين الموسيقى احبائى وهى عمل كورال جميل جدا وسهل جدا
واهم شىء انه تقريباً عمر ما حد قدمه فى مدارس قبل كده ولا حظوا انى بركز دايماً على الموضوع ده
يعنى ممكن يتقدم فى الحفلات او كنشيد اختيارى فى اى مسابقة
مع اطيب تحياتى

**عادل صموئيل** · #9 01/08/2009, 22h39

اقتباس:

المشاركة الأصلية كتبت بواسطة حمدي محمد أحمد

أستاذي الفاضل
عادل صموئيل

حمدا لله علي سلامتك
وألف مبروك علي أجتياز أمتحان الكادر

أتمني من الله عز وجل أن يديم عليك الصحه والعافيه ويظل المنتدي دائم التميز بوجودك

أستاذي الفاضل أسمح لي بطلب علي أستحياء أن أتحات لك الظروف والوقت

هل ممكن نوته أغنيه ... قولو لعين الشمس ماتحماشي أحسن حبيبي دا ال صابح ماشي

ولك جزيل الشكر

اخى العزيز حمدى محمد احمد
اقدم لك النوتة بس ليه كلمة على استحياء ؟
انا هنا موجود عشان اخدمكم كلكم وكلمة استحياء دى خلتنى تركت كل اللى ورايا وكتبتها لك
اللحن مقام بياتى

**نور الصباح** · #10 05/08/2009, 21h45

الأخ العزيـــــز والصــــــــــديق المخلص وتوأم الروح والقريب إلى القلب الأستــــــــاذ
عــــــــــــــــــــــــــــــــــــــــــادل بـــــــــــــــاشــــــــــــــــــــــا صموئيــــــــــــــــل
الإخوة الأفاضل والأخوات الفضليات أعضاء وعضوات منتدانا الجميـــــــــــــــــــــــــل
الأخـــــــــــــــــــــــوة الأعزاء مشرفى مملكة سماعى للطرب العربي الأصيـــــــــــــل
سلام الله عليكـــــم جميعا وبعــــــــــــــــد :
اسمــــــــــــــــــــــحوا لى :-
أولا - أتقدم بأصدق التهانى القلبية وأرق الأمانى لأســـــــــــــــــتاذنا وأســـــــتاذ الجيل
عـــــــــــــــــــــــــــادل بـــــــــــــاشـــــــــــــــــــا صموئيــــــــــــــــــــــــــــــــــــل
بمناسبـــــــــة عيد ميلاده الســــــــــــــــــعيد (أعاده الله عليه وعلينا جميعا باليمن والبركات )
وإن شاء الله نحتفل به العام القادم وكل الأعوام وهو فى كامل الصحة والسعادة وراحة البال
والمفروض كنا نعرف من وقت مبكر لكم أنا عرفت بالمصادفة اليوم عشان نجهز التورتة
و الجاتوهات ونعلق الزينات على أبواب وجدران المنتدى
عموما كل عام وهو ونحن وجميع تلاميذه ومحبينه بخير وسعادة وكل سنة وهو طيب
ثانيا - أتقدم إليكم بالاعتذار عن تغيبى عن المنتدى فى الأيام السابقة وذلك لانشغالى مع زوجة
ابننا علاء الدين فقد أهدانا الله العلى الكريم بفيض من عطاياه ( الحفيد الثانى محمــــــــــــــد )
جعله الله قرة عين لى ولوالديه - آمـــــــــــــــــــــــــين -
وإن شاء الله أنتم مدعوون جميعا فى حفل السبوع وعلى رأس القائمة الأستاذ عادل صموئيل )
ثالثا -لى سؤال بسيط هو - هل علامات الرفع والخفض فى الأودليب التى تسبق الصوت لها
تأثير على جميع الأصوات المتشابهة داخل الأودليب ـأم تأثيرها فى الصوت الذى يليها فقط ؟؟؟
رابعا - بمناسبة شهر رمضان المعظم واقتراب العيد فقد وعد الأستاذ بتدوين أغنية بهذه المناسبة
فنرجو أن تكون أغنية الشيخ سيد مكاوى " يابو زعيزع قوم صلى " خامسا- أشكر كل من سأل عنى فى غيبتى عن المنتدى وخاصة الأستاذ الكريم " عمرو الهنداوى "
سادسا - رجاء خاص من الأستاذ تدوين رائعة وردة الجزائرية "ياقلبى يا عصفور "
سابعا - أنا عارف إنى تقلت عليه قوى وتقلت دمى خالص
وشكررررررررررررررررررررررررررررررررررررررررررررررر ررررررررررررررررررا
أخوكـــــــــــم / نور الصباح الأربعاء الموافق 5 / 8 / 2009

عزيزى نور الصباح
اشكرك الف شكر وغيابك لك وحشة فى المنتدى
والف مبروك الحفيد الجديد
اهم شىء علامات التحويل التى تكون فى الدليل انت عارف انها لازم تسرى على كل نغمة فى اللحن يعنى مثلا فا دييز فى الدليل معناها ان كل فا دييز إلا لو عايزينها بيكار بنكتبها والبيكار تسرى على المازورة فقط وتعود دييز
لكن فى الأدليب لاحظ انى بكتب السطر كله مازورة واحدة وطالما السطر كله مازورة واحدة يبقى اى علامة تحويل على اى نغمة بحطها تسرى على نفس االنغمة كل ماتتكرر يعنى لو حطيت مى بيمول مثلاً لو جه 100 مى بعدها فى المازورة بتبقى بيمول ان لم استبدلها بعلامة بيكار او اى علامة اخرى وللعلم سؤالك وجيه
وللعلم ايضاً ان عارف ان كل شيخ وله طريقة يعنى فيه ناس لما بيكتبوا الأدليب بيقسموه موازير ( هى علمياً ما تسماش موازير ولكن ممكن تسميها فواصل ) وليه ماتسماش موازير عشان الموازير لازمتخضع لميزان لكن لما بيقسموها فواصل تلاقى مازورة فيها 7 ومازورة فيها 5 يعنى شىء منتظم وهنا طالما حطوا فواصل يبقى علامة التحويل يخلص تأثيرها مع الفاصل ولازم تتكتب تانى اتمنى تكون المعلومة وصلت
بالنسبة للنوت الجديدة ماشى بس انتظر الطابور الطويل اللى عندى