والأغنية دى انا اعتبرها اصعب اغانى ام كلثوم على الإطلاق لأن عبد الوهاب كان وصل مع ام كلثوم الى مرحلة انه ممكن يطور زى ماهو عايز من غير اى اعتراض شديد منها
اول شىء كان عبد الوهاب ملك المقدمات الموسيقية بلامنازع او هو الاذى كانت له الريادة فى ان كل الملحنين والجمهور صاروا يفضلوا المقدمة الموسيقية الطويلة
اول شىء المقدمة من مقام االعجم على النواة بعد الإفتتاحية نجد الايقاع رومبا ولكن كعادة عبد الوهاب ان يخترع تركيبة خلطة سرية من آلات ( تختلف كل مرة ) تعمل تركيبة هنا جعلتك تحس انك راكب عربية حنطور وجوز الخيل ماشى يتدلع برشاقة , ثم صولو مشترك بين الجيتار والأكورديون والمعلوم ان عبد الوهاب هو كان اول من جمع آلتين معا فى صولو , ولكن هنا فى هذا اللحن ترى جبروت عبد الوهاب فى انه عمل صولو الجيتار مع الاكرديون فى عدة اشكال مختلفة معظمها مناطق غير مستعملة من قبل فى الاكورديون يعنى اوكتافات عالية ومناطق غير مستغلة فى الآلتين وطبعا تعتبر مفاجئات وبالذات مع ام كلثوم المتحفظة جدا
ونسمع ل احمد الحفناوى اثنين صولو كمان من الروائع وهنا كان المرحوم محمد عبده صالح توفى واصبح الحفناوى قائد الفرقة وكان من عادة عبد الوهاب ان يستغل الامكانيات الموجودة ( يعنى ايام امل حياتى كان يوجد عازف بونجز اسمه وصفى حليم وللعلم ابوه كان صاحب المرحوم ابويا وهو كان اسمه حلمى حليم وكان من فطاحل اساتذة اللغة الإنجليزبة وكانت ازورهم مع ابويا وكانوا ساكنين فى فيلا فى حلوان ايام طفولتى ) وتجدوا ان عبد الوهاب جعل للبونجز وجودا كبيرا فى الاغنية وبالذات المقدمة , وهنا استغل عبد الوهاب اقصى امكانيات الجيتار والأكورديون .
وناتى للكوبليله الاول نجده صبا وعلى مقام السى ناتوريل وهذا اعجاز لأن هذا المقام وعلى هذه الدرجة صعب جدا على الكمان والتى تمثل 80% من فرقة ام كلثوم ولكن عبد الوهاب تحدى والتحدى الاروع هو استغلال عازف الكمان العبقرى فى عمل صولو على هذا المقام يعنى العازف ممكن يعزفه فى وسط فرقة يعنى انا اكمل زميل يعنى نونس بعض لكن ان تعزف صولو على مقام الصبا على السى ناتورال هذا اعجاز ولكن كان الحفناوى العبقرة يعزف تبك المناطق المحظورة بطلاقة وطبعا عبد الوهاب لم يترك الفرضة ووضع به بصمة على جبين التاريخ
وناتى للكوبليه الثانى فى مقام النهاوند
ونفاجأ ويفاجأ الجمهور بصولو للجيتار ترك فيه عبد الوهاب المرحوم عمر خورشيد يستعرض مهارته فى الجيتار بطريقة ابهرت الجمهور وطبعا عمر خورشيد ايضا لم ولن يتكرر
ونلاحظ فى المقدمة الكروماتيك الرائع والسيكونس ( اى التتابع ) والذى يوقعك فى شراك خداعية حيث ان التتابع بيكون مسلسل عادة يعنى مثلا لاصول فا فى التتابع تنزل او تطلع درجة وتعمل نفس المقاس
ولكن عبد الوهاب ماعندوش عادة دى يعنى حتى جملة الاكورديون والجيتار عامل فى آخرها سكتات كل مرة تتملى بشىء مختلف
ولأول مرة عموما وعند ام كلثوم نجد عبد الوهاب يعمل التعبير الموسيقى يعنى البيانو والفورتى ( يعنى الضعيف والقوى ) والكريشندو يعنى التدرج من صوت خافت الى صوت قوى
انا هنا قلت القليل لأنى لو استرسلت فى هذا اللحن بالذات مش حانروح النهاردة
طبعا اكتر شىء تعبنى ان اغانى ام كلثوم كانت بتتحفظ سماعى يعنى ماكانش عبد الوهاب ولا كل الملحنين عاملين حسابهم ان حاييجى يوم وتتكتب نوتة ولذا تلاقى اللحن فيه حاجات كتير بتحتاج تحايل فى الكتابة
0 زى الكلام اللى انا عامله فى كوبليه الصبا وممكن ما يعجبش الأكادميين ) ولكن مالهاش طريقة تتكتب غير كده وإلا ماحدش حايعرف يقراها
عموما انا اشكر ربنا انه وفقنى فى تدوين هذا اللحن الذى اعتبره اصعب لحن لأم كلثوم وانا افتخر انى عملته اسهل من السهولة واتمنى ان تستفيدوا منه
مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 01/12/2010 الساعة 12h01
اولا اشكركم على حسن استقبالكم لتدويناتى المتواضعة
واقدم لكم تحفة ام كلثوم وبليغ حمدى
فات الميعاد
كاملة فى 13 صفحة
لأنى لاحظت انكم طلبتوها كثيرا واعتذر عن التأخير
فى هذه الأغنية ظهرت آلة جديدة ودخلت فرقة ام كلثوم مع ان ام كلثوم كانت متحفظة جدا على هذا الموضوع اولا لأنها كانت تخشى من التطوير الذى ممكن يغير طابعها المتميز وثانيا لأنها كانت تعرف ان التطوير الغير مقنن من اخطر اضراره هو تضييع هوية الموسيقى الشرقية
من المواقف الطريفة ان بليغ حمدى عندما طلب من سمير سرور الذ هاب لحضور اول بروفة فى منزل ام كلثوم وذهب سمير واول انطباع يحس به اى عازف او ملحن عندما يدخل منزل ام كلثوم لأول مرة شعور الفأر المذعور وهو داخل المصيدة , ذهب وجلس فى قاعة البروفات ودخلت ام كلثوم مبكرة جدا كعادتها وفوجئت بشخص غريب معه شنطة مستطيلة غريبة الشكل عليها وقالت له مين حضرتك قال لها انا عازف الساكس قالت له ويطلع اي الساكس ده ,
وكانت ولكن مع حرصام كلثوم على ان الساكس يصبح كرشة ملح فقط فى اللحن ولا يؤثر على نكهة فرقتها
واترككم مع النوتة
مع اطيب تحياتى
واقدم لكم بالمناسبة احدث صورة لى
واخترتها لأن السيارة التى فى الصورة موديل 1940 وهى تشبه سيارة الموسيقار الكبير صديقى رياض السنباطى يعنى كانت هذه السيارة اشتراها على الزيرو سنة 1940 بمبلغ 180 جنيه مصرى واستمر يركبها طول عمره والغريب ان تلك السيارة إلى آخر لحظة كانت جديدة وبحالة المصنع يعنى كان من ضمن خواص فنانى الزمن الجميل المحافظة على كل شىء يستعملونه
التعديل الأخير تم بواسطة : عادل صموئيل بتاريخ 12/06/2011 الساعة 00h57
احبائى
اقدم لكم نوتة
تصدق ولا احلف لك لطلال مداح
اهديها للأخ العزيز نجيب مراد
يعنى انا من زمان كاكتبتش نوت سعودى وربنا يستر وتعجبكم
هنا عايز اقول درس مهم جداً واحب يستفيد منه الجميع
انا لما الاخ نجيب قال ان عنده تسجيلين للأغنية واحد بصوت طلال والثانى بصوت ايمان البحر درويش قلت له ارفق لى التسجيلين لأن طبعا طلال بيغنيها بنكهة سعودية 100% ( ومع انى شخصيا عزفتها معاه بس ناسيها طبعاً ) وكلمة نكهة سعودية يعنى ايقاعات صعبة جدا ومتداخلة كانت حتاخد وقت طويل لازم اسمعها كتير عشان استوعبها , ولما قال عنده تسجيل بصوت ايمان البحر درويش قلت يمكن ايمان يبسطها شوية يعنى يغنيها بنكهة سعودى على مصرى , ولما سمعت تسجيل ايمان ويا للهول ويا للمصيبة , يعنى مدرسة فى التطور المفسد , يعنى واحد واخد اللحن من اوله لآخره توزيع يعنى اولا اللحن جميل جدا وتفعيلاته صعبة جداً يعنى لما تسمعه يتهيأ لك انه سهل لكن فى التدوين بيبان انه صعب جداً , ولما ييجى واحد ويلطسه توزيع من اوله لآخره هنا اعتدى وتحرش باللحن الاساسى الجميل واللى مش محتاج توزيع بتاتاً , والتطور الخايب ده خلانى اشبهه بمثلين , يعنى واحد اشترى فيللا جميلة بها حديقة غناء رائعة وماعندوش حس تذوق جمالى , مش محتاج الحديقة راح عملها مخزن وجمع فيها كل الاشياء القديمة المستغنى عنها فصارت الحديقة اتغطت بشوية كركيب وضاعت معالمها , او مثل تانى ( معلش انا ابتكر دايما امثلة فى شرحى للتوضيح ) , يعنى انا بشبه التطور الخايب ده بقصة , عندنا فى مصر مدينة اسمها حلوان بينها وبين القاهرة 45 كيلومتر , المدينة دة ربنا جعلها مصحة مصر زمان يعنى طول عمر القاهرة حتى لما تشوف الافلام القديمة قبل الثورة لو واحد مريض الطبيب ينصحه يقضى شهر فى حلوان لأن هواها نقى جدا يساعد على الشفاء العاجل وكانت حلوان مليانة فنادق صغيرة الحجم لهذا الغرض واذكر ان سنة 1954 كانت والدتى مريضة والطبيب نصحنا نروح نقضى فى حلوان اسبوعين , وعندما قامت الثورة كان رجال الثورة مش عجبهمان مصر بلد زراعى من الدرجة الاولى ( كانوا متخيلين ان كلمة بلد زراعى يعنى شتيمة ) وفتحوا فى الصناعة على الآخر , وكان من ضمن خراب التطور الصناعى انهم جم جنب حلوان وعملوا اكبر مصانع اسمنت والحديد والصلب وعشرات المصانع , وتسبب التطور الغير مقنن فى ان حلوان بعد ماكانت مصحة مصر وصلت نسبة التلوث فيها لدرجة يعنى يستحسن تتهجر من السكان , والتوزيع فى اللحن ده عمل كده , يعنى اتمنى ان شباب الموزعين يشوفوا زمان عبد الوهاب كان بيعمل توزيع فى الحانه اد ايه يعنى 90% من الاغانى مش موزعة بتاتاً والباقى التوزيع فى جملة واحدة فقط ليه ؟؟؟؟؟؟؟؟؟؟؟؟؟ لأن موسيقانا الشرقية جميلة اصلا ومش محتاجة توزيع إلا فى جمل قليلة بتكون معمولة اساساً عشان تتوزع يعنى من اهم صفاتها انها تحوى نغمات طويلة حتى على الأقل عشان حلاوة التوزيع تبان مش كده ولا ايه ؟
اخوتى الاحباء
اخوتى الاحباء يسعدنى ان اقدم لكم رائعة من احلى روائع ام كلثوم وعبد الوهاب الوطنية
على باب مصر
ويتميز هذا اللحن انه اللحن الوحيد خلال حياة ام كلثوم الذى انفرجت الستار عن فرقتها الموسيقية وفوجىء الجمهور ان امام الفرقة نوت موسيقية
لما سالت زملائى عن هذا الحدث الغريب من نوعه قالوا ان الحفلة دى كانت فى عيد الثورة تقريبا سنة 1963 وقررت ام كلثوم تغنيها قبل الحفلة بيومين مع انها بتعمل بروفات قبل بشهر ونصف
مش عارف السبب لكن جعلوا استاذى نصر عبد المنصف يدونها وطبعا ما اخدتش اكتر من بروفة واحدة
فى هذا اللحن نلاحظ ان جمال اللحن فى الاغنية الوطنية او النشيد الوطنى مساوى لجمال اللحن العاطفى بمعنى انك لو تحب تسمعع سهرة مع ام كلثوم ممكن تستمع اى عمل يعنى عاطفى او وطنى او دينى وطبعاً بنفتقد ده دلوقتى يعنى من ايام عبد الحليم ماطلعش اى نشيد وطنى او اغنية دينية لها قيمة فنية
اللحن ده غنته ام كلثوم امام الرئيس الراحل جمال عبد الناصر واستغرقت فيه ساعة يعنى كان الجمهور بيعيد المقاطع كذا مرة زى اى حفلة عاطفية وواضح ان عبد الوهاب ده كان تانى عمل له بعد انت عمرى كان عايز ينزل بكل ثقله مع ام كلثوم لأن السنباطى سبقه كتير فى المجال الوطنى معاها يعنى التوزيع والانتقالات اللحنية ومن اهم الملحوظات تلاحظ توزيع غربى عالى قوى جدا تتبعه ام كلثوم بغناء فى مقام شرقى يعنى اعجاز
واترككم مع النوتة واهديها للجميع اولا لكل الاخوة العرب لحن رائع ستستمتعون بعزفه
وللأخوة مدرسى الموسيقى المصريين وليمة رائعة يعنى حتى ممكن تاخدوا منه اجزاءحسب امكانيات مدارسكم
ومع اطيب تحياتى
التعديل الأخير تم بواسطة : عادل صموئيل بتاريخ 15/12/2010 الساعة 19h12
السلام عليكم و رحمة الله
اخواني الكرام
عايز نوتة قلبي ليك ميال للفنانة فيزة أحمد
************************************* الأخ العزيـــــــــــــــــــز الأســـــــــــــــــــــــــــــــتاذ / مش عارف اسمك - هل اللغة العربية ( أم اللغات الحية والميتة ) عجزت عن كتابة اسمك ؟؟؟؟؟؟؟؟؟؟؟؟؟؟؟؟؟؟ أم هى عقدة الخواجة وحب الفرنجــــــــــــــة ؟؟؟؟؟؟؟؟؟؟؟؟؟؟؟؟؟؟؟؟ عموما لا تغضب واعتبره مزاحا وإليكــــــــــــم النوتة الموسيقية ( أنــــــــــــا قلبى إليك ميــــــــال ) وشكررررررررررررررررررررررررررررررررررررررررررررررر رررا أخوكــــــــــــــم ( نور الصباح )
استاذي الغالي عادل بتمنى ان تنوت رائعة السنباطي اشواق فهي من روائع الاغاني الشرقية الخالدة ياريت تضعها في الطابور وتكون مع المقدمة الخرافية- رجاء خاص تكون ( المقدمة ) في مقامها الاصلي وهو العجم-- محتاجها ضروري في اقرب فرصة اخي عادل هذه النسخة مضبوطة بنسبة 99.9999% انا راجعتها حرف حرف وهي ستسهل عليك كثيراااااااا بس عيبها انها مكتوبة بخط سي جدااااا يعني بامكانك ان تنقلها مع مراجعتها على البرنامج الخاص بك وهذا سيسهل عليك ويوفر عليك الجهد والوقت اخوك وائل اخى العزيز وائل ما يكفيش كده ممكن التسجيل ؟ لأن ما ينفعش انقلها ولازم اكتبها تانى وهل انت عايزها من نفس المكان المكتوب ده ؟ مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 25/12/2010 الساعة 10h15
عزيزى وائل
انا استخدمت كل خبرتى فى الكمبيوتر وبمعاونة كل الاجهزة بتاعتى وصلحت لكم شكل النوتة شوية كتير
طالما انت قلت انها جيدة 99% يعنى خسارة انى اضيع وقت اكتبها تانى
شوف كده ؟ اعتقد انها بقت ممكن تكون معقولة فى القراءة
مع اطيب تحياتى عادل صموئيل
اخوتى الأحباء
اولا مع بداية عام جديد اتمنى من كل قلبى ان يكون عام سلام ومحبة على الجميع
وبهذه المناسبة السعيدة اقدم لكم اللقاء المنتظر
يعنى اغنية من اروع الروائع طلبتموها كثيراً واليوم جاءت اللحظة المناسبة واستغرقت منى اسبوعين لإعداداها
اقدم لكم رائعة عبد الوهاب وام كلثوم
او اللقاء الأخير بين عبد الوهاب وام كلثوم
ليلة حب
الأغنية دى اول انطباعى عنها ( وهو انطباع عبد الوهاب شخصيا ) ونفس الإنطباع حسينا بيه فى اغنية قارئة الفنجان
يعنى اسمحوا لى افضفض معاكم شوية وانا عارف ان معظمكم بيحبوا القصص الخفية اللى واراء الأعمال العظيمة , يبدأ كلامى من شعورى هذه اللحظة , يعنى اليوم 31 ديسمبر 2010 و الساعة حوالى 6 مساء بتوقيت القاهرة
الليلة ليلة رأس السنة وكل عام وانتم بخير , اول شعور انتابنى فى هذه اللحظة الفراغ والوحدة , واتذكر سنة 1970 فى نفس اليوم ونفس اللحظة ولمدة اكتر من 20 سنة كنت بستعد عشان سهرة رأس السنة , يعنى البدلة الإسموكن بتأكد انها جاهزة والقميص الأبيض والبابيون , والسيارة جاهزة والكمنجة جاهزة , لأنى خارج اعمل حفلة مع اما عبد الحليم او فريد الأطرش فايزة او وردة او نجاة او محمد عبده او طلال واتذكر عبادى الجوهر واخيراً ميادة الحناوى واسماء كثيرة جداً , واحيانا بيكون فى تلك الليلة خمس فقرات يعنى كنا بنركن سياراتنا فى مكان والفرقة الماسية بيأجروا باص سياحى لسهولة حركة وانتقال الفرقة من مكان لمكان , وتخيل انك تعزف فى حفلة وصلة مع عبد الحليم وتنزل جرى تركب الباص تلحق وصلة فايزة احمد مثلا , ومن صحارى سيتى ( فى اعلى هضبة الاهرام ) إلى سينما قصر النيل وسط القاهرة الى .. والى ... يعنى كنت اروح البيت مش قبل الساعة 7 صباحاً , واليوم كلشىء راح ولا تبقى إلا الذكريات الجميلة ,
وعندما اعود الى ليلة حب زى ماقلت الإنطباع اللى انا حسيت بيه واللى اكيد حسه عبد الوهاب , وهو الإنطباع الذى لم يحسه مطلقاً ابام انت عمرى وانت الحب , الإنطباع ان ده ممكن يكون آخر لحن تغنيه ام كلثوم لعبد الوهاب , يعنى ايام انت عمرى كانت ام كلثوم مازالت فى كامل صحتها ونضجها وكانت بتغنى 3 وصلات كل وصلة ممكن توصل ساعة ونصف , لكن ايام ليلة حب كانت الست وصلت لمرحلة ان ابتدأ الامراض تهددها فى اى وقت وممكن تتعطل عن الغناء , كما وصل عبد الوهاب ايضاً لسن حذر , وعملية اعداد لحن تاانى لأم كلثوم بتستغرق على الأقل 3 سنوات , وممكن حتى لو السنة الجاية كانت الظروف مناسبة لأم كلثوم انها تغنى لحن لملحن تانى , لذلك تفنن عبد الوهاب العبقرى فى وضع كل كل عبقريته فى هذا اللحن , وكعادة عبد الوهاب ان كل لحن ممكن تلاقى فيه اسرار ما وردتش قبل كده فى اى لحن , لكن هذه الرة قصد ان تكون المفاجئات اكتر , يعنى لو راجعتم كل اغانى عبد الوهاب لأم كلثوم كان بعد الإفتتاحية الللى بدون ايقاع بيفاجىء الجمهور بإيقاع جديد من ابتكاره , او ايقاع معروف زى الرومبا مثلاً لكن بيبتكر له شكل جديد , يعنى خلطة سحرية كان خلال ال 55 بروفة كل يوم يزودها حتة توابل من آلات لن تتخيلها وفى اماكن غير مطروقة من الآلات يعنى مثلا القانون كان بيخليه يعمل حركة خارج الفرسة , يعنى مش فى منطقة عزف القانون التى هى على شمال الفرسة , ولكن كان بيخلى محمد عبده صالح يعمل الحركة على يمين الفرسة , او يخلى عمر خورشيد يعفق على الجيتار بإيده مقلوبة يدى انطباعات عمرها ما اتسمعت من الجيتار من قبل , عشان ما ارغيش كتير فاجأ عبد الوهاب الجمهور بأن الإيقاع كان واحدة ونص ودخل منها صولو الأكورديون , يعنى الجمهور اتخض لأنه كان مش متوقع ابدأ الإيقاع يدخل كده , المهم بعد ما الجمهور شبع من الجملة الاولى قال لهم خدوا بقى , يعنى شوف كمية النقلات الإيقاعية اللى مانت بيبتديها الجيتار , والمفاجأة صولو الكمان واللى شكله كانه تقسيمة , ولكنه صولو محدد جداً , ولما غنت ام كلثوم استعمل معاها الاورج والجيتار بحدود مقننة جداً عشان ماتفسدش طابع ام كلثوم الأصلى يعنى يضيف لها لمسة جمالية جديدة فقط , ونأتى للكوبليه الأول استعمل ايقاع الفالس , وتسمع الجملة تحس انك بتسمع شتراوس هنا اى واحد اوروبى حايحس بألفة لأن الموسيقى والمقام شبه اللى هو متعود يسمها لكن يفاجأ بصولو الاكورديون والإيقاع اللى مقصود فيه انه يكون مكعبل عشان اى اجنبى بعد ما اتسلطن فى الجملة الأولى يقطع شعره ,
ومن احلى المفاجئات فى الكوبليه الإخير انه استعمل ايقاع الأقصاق ميزان 9/8 والجنان ان هذا الإيقاع شرقى خلى الجيتار يبتديه يعنى ده اعجاز حتى فى الإختيار , وكعادة عبد الوهاب لازم فى كل جزء يعمل الشىء اللى انت مش ممكن تتوقعه عمل للأغنية قفلة بدون العودة للمذهب , طبعاً اللحن لو قعدنا نحلل فيه ولا سنة , لكن انا بتشجيعكم ربنا الهمنى اكتبه وهو اخد 19 صفحة انا راعيت فيها انه يكون اسهل مايمكن , وحطيت فيه كل خبرتى انى ابسط لكم الاجزاء الصعبة , وللعلم اللحن تعبنى جداً فى الكتابة لسبب مهم وانا ذكرته قبل كده شغل ام كلثوم عشان كان مش بيتكتب نوتة وبيتحفظ سماعى كان الملحن وبمساعدة اروع عازفين عرفتهم مصر كان ببقى فيه مشاكل خطيرة فى الكتابة , يعنى اغنية اوقاتى بتحلو مثلا لو غنتها ام كلثوم غير ما اتعملت لوردة لأن مع وردة لازم يكون فيه مراعاة ان ما يكونش مشاكل فى الكتابة , المهم انا اقدم هذه النوتة لهذا اللحن الرائع الى مكتبة الموسيقى العربية وللتتاريخ لأن اعتقد ان مالوش نوتة مكتوبة سابقة وصحيحة 100%
اتمنى من كل قلبى ان تستمتعوا بها والى لقاءات أخرى
مع اطيب تحياتى
رد: طلبات نوتة
العرض المتطور
