طلبات نوتة - الصفحة 3

**عادل صموئيل** · #1 03/06/2009, 19h54

اقتباس:

المشاركة الأصلية كتبت بواسطة جوليانا

السلام عليكم ورحمة الله وبركاته استاذتى الكرام اولا احب ان اشيد بمجهودكم العبقرى الذى لم اجده الا فى هذا الصرح العطيم واشكر بالخصوص استاذى الذى كنت فعلا اود ان اكو ن واحدة من تلاميذه وهو الاستاذ عادل صموئيل انا لاقيت فعلا فى هذا المنتدى كنوز موسيقيه لن توجد الا فى هذا الصرح وهى النوت الموسيقية التى لا تقد ر بثمن ولكن فى مشكله بتقابلنى وهى لن النوت الى معروضه مصغره لا تكون عند الطبع ظاهره يعنى النوت اللى مش بتقى على برنامج pdf صعب الاستفاده منها وهى فعلا كنوز يعنى عشان لانتعب اللى يقوموا على هذا العمل الشاق انا اسفه لان كلامى غير مرتب ارجو ان تاخذوا بملاحظتى لان النوت بالسبه لى شئ اساسى فى حياتى وشكرا

الأخت العزيزة جوليانا
مرفق نوتة لجل النبى اللى طلبتيها
طبعا يشرفنى ان تكونى تلميذتى , المشكلة انا احدثكم فيها والكلام طبعاً موجه للجميع
طبعاً انتى حسيتى بالنوت اللى انا بدونها ازاى شكلها جميل وازاى تصلح للطباعة وده طبعاً بيرجع لإستخدام برامج التدوين الموسيقى , والجدير بالذكر ان هذه البرامج لم تكن موجودة قبل 7 سنوات مما جعل كل النوت السابقة على هذا العصر تكون مكتوبة يخط اليد , وانا طبعا وانا اعد النوتة بعمل حسابى انها تكون قابلة للطبعاة وبحجمها الطبيعى
اما نوت خط اليد لم بتنزل المنتدى بتختلف فى حجمها ودرجة ووضوحها وصلاحيتها للطباعة على الشخص اللى بينزلها يعنى ممكن يكون مش خبير فى العملية او ممكن يكون حجم النوتة صغير جدا اصلا واى محاولة لتكبيرها بتقلل جودتها اكتر
فيه كمان مشكلة انا اعتبرها خطيرة بالنسبة لغير المحترفين ان النوت احيانا بيكون كاتبها شخص محترف مستواه عالى بيكتبها بطريقة صعبة على غير المحترفين ودى انا اعتبرها مشكلة خطيرة لأن النوتة بتبقى بالنسبة للمبتدىء او الهاوى عبارة عن طلاسم صعبة ما يعرفش يقراها وممكنتعقده وتخليه يترك الموسيقى
فيه كمان مشكلة برضه خطيرة فى كتابة النوتة بخط اليد ان اللى بيكتب بالقلم الرصاص وبالذات لما يكون شاطر قوى يعنى بيكتب بسرعة عالية , السرعة بتخلى خطه غير مقروء واحنا فى الفرقة الماسية كنا بنحل المشكلة دى بأننا بندى النوتة لواحد نساخ شغلته انه بينسخ النوتة اللى بالرصاص بيكتبها بالريشة والحبر الشينى بخط جميل جدا ونصورها بعد كده ومن اهم ميزات النساخ ده انه كان خبير فى خطوط الأساتذة اللى ماحدش يعرف يقراها دى
عموما انا اتمنى انك تنزلى برنامج انكور اللى انا منزله فى قسم الدروس والنوت الصغيرة الخط دى تحاولى انتى تكتبيها بنفسك عليه , وانا تحت امرك لو لقيتى نوتة هنا وعجبتك وكان فيها مشاكل بالنسبة ليكى نزليها ليا هنا وانا احاول احل لك المشكلة مع اطيب تحياتى

**عادل صموئيل** · #2 05/06/2009, 20h25

اقتباس:

المشاركة الأصلية كتبت بواسطة احمد سنايم

اخى الحبيب واستاذى مايسترو عادل صموئيل يا ريت نوتة قلبى دليلى الفالس الرائع للقصبجى ربنا يخليك لنا يا مايسترو ما نتحرمش منك ابدا شكرا الف الف شكر

عزيزى احمد سنايم
اقدم لك طلبك
وانا لما بتأخر فى الرد بيكون عندى ظروف قهرية
مع اطيب تحياتى وارجو ان يستفيد منها اكبر قدر من اعضاء المنتدى فقد راعيت فى التدوين اقصى درجات السهولة مع اقصى درجات الدقة

**عادل صموئيل** · #3 06/06/2009, 16h34

اقتباس:

المشاركة الأصلية كتبت بواسطة armendo

عزيزى الأستاذ عادل صموئيل
صباح الخير والسعادة واشكرك كثيرا على اهتمامك واللة يكون فى عونك قبل الأمتحان شغل ومذاكرة وبعد الأمتحان شغل وتلبية طلبات حبايبك فى المنتدى انت بتنام كام ساعة فى اليوم؟
مع حبى وتقديرى
اخوك ارمندو

عزيزى ارمندو
اولا انا اكتر مشكلة عندى هى قلة النوم او بالمعنى الأصح القلق يعنى لو نمت 3 ساعات فى اليوم يبقى نعمة
اقدم لك جزء من لحن سحب رمشه
وللعلم اللحن ده مكنتش اتخيله صعب كده بس فكرت لقيت ان ماحصلش واحد فكر يغنيه او يعزفه تانى بعد محمد قنديل لأن كل الجمل فيه معمولة بطريقة صعبة جدا مش طبيعية وجايز هم عاملينه صعب كده عشان يبقى ممتنع على اى حد غير محمد قنديل ومن اكبر المشاكل ان محمد قنديل مغنيه بمنتهى الاحتراف يعنى من المستحيل كتابته كما هو بيقول يعنى انا حاولت استوعب خلال 24 ساعة الجزء ده وحاولت ابسطه بقدر الإمكان لن محمد قنديل عامل عُرب خفية مش ظاهرة بتخليك كل ما تسمع اللحن تكتشف انك مش هاضم اللى سمعته او ماعرفتش سره
المهم انت لو حاتعزفه او تغنيه مطلوب انك تحفظه من التسجيل حفظ صم عشان تمشى مع النوتة مع خالص تحياتى وبعدين ممكن احاول اكمله بس محتاج وقت يكون مخى فاضى من المشاغل

**عادل صموئيل** · #4 08/06/2009, 19h44

[QUOTE=altaifi;327628]

أستاذ / عادل لازلت في الإنتظار وخذ وقتك ولا يمهك ، أنا منتظر .. وشكراً

[/QUOTE
اخى العزيز
اليك النوتة مع خالص تحياتى

**عمرو الهنداوي** · #5 10/06/2009, 23h28

استاذ عادل انا وجدت النوتة دى لام كلثوم وهى لاغنية بعيد عنك
عاوز اعرف من حضرتك هل النوتة صح ولا لا

كمان الكوبلية الاول بحس انه مش مكتوب صح لما بعزفه بحس انه
ما بنطق الكلام صح

قولى رايك فى النوتة دى

كل الشكر

**عادل صموئيل** · #6 12/06/2009, 10h58

اقتباس:

المشاركة الأصلية كتبت بواسطة نور الصباح

الأستاذالكبير والحبر الجليل والفنان العظيم وشلال الفن المتدفق دائما /
عـــــــــــادل بــــــــــــــاشــــــــــــــــــا صموئيــــــــــــــــــــــــــــــــــــــــــــل
سلام الله عليكم ورحمته وبركاته وبعـــــــــــــــــــــــد :
لقد طال غيابك عنا يا أستاذنا الجليل من يوم الاثنين الموافق 8 / 6 / 2009 لم نلتق بك
ولم نستمع إلى توجيهاتك ومناقشاتك المفيدة وأرائك التى نستنيـــــــر بها دائما
نرجو من اللــــــه - العلى القديـــــــر - أن يكون المانع خيرا (إن شــــــــــــــــــاء اللــــه )
صديقنــــــــــــــا الحبيب الأستاذ /عادل أستحلفك باللــــه ألا تغيب عنا وصدقنى إن الأنتر نت
كله مالوش لازمة من غيرك
ومـــــا زال الانتظــــــــــــــــــــــــــــــــــــــــار مســــــــــــــــــــــــــنمرا
وشكررررررررررررررررررررررررررررررررررررررررررررررر ررررررررررررررا
أخوكم نــــــــــور الصبــــــــــــــــــــــــاح الجمعة 12 / 6 / 2009

عزيزى نور الصباح
اعتذر كثيرا لتأخرى عليكم لمشاكلى الجمة وضيق الوقت
واقدم لك جزء من طلباتك للنوت وخلى بالك انت طالب حاجات كتير عايزة خطة خمسية يعنى الصبر جميل
مع اطيب تحياتى

**عادل صموئيل** · #7 14/06/2009, 18h56

اخى العزيز نور الصباح
اشكرك على كلماتك الجميلة واقدم لك من طلباتك نوتة بطلوا ده واسمعوا ده
وهذا اللحن يحتاج وقفة كبيرة اولها انه لحن صعب جدا وايامه فى اوائل الأربعينيات لم يكونوا يستخدمون النوتة الموسيقية يعنى كانوا بيحفظوا اللحن مع الملحن وعدم استخدام النوتة يعنى بيركبوا الاجزاء على بعضها وهنا تحدث مشاكل عند تدوين النوتة لأن ظبط الكتابة قد يغير جزء او اجزاء من اللحن وهذا شىء ارفضه تماماً لأن اللحن محفوظ وتغيير اى جزء فيه يفسده وهنا تأتى المهرة فى التحايل فى النوتة بحبث تكون مضبوطة من الناحية العلمية وصحيحة جدا عندما تسمع ماتعزف وبدون ضياع او زيادة اى حرف وهنا انا اختلف مع بعض الكاديميين الذين يصروا على القواعد الأكاديمية وقد يختلفون معى فى تدوين المقام او الموازين ولكن تجدون فى تدوينى ما افتخر ان اقول عليه مدرسة عادل صموئيل للتدوبن الموسيى وللعلم انا كتبت هذا اللحن مرتين وفى المرة الثانية راعيت ان يكون اسهل وابسط مايمكن وبإستثناء النغمات الشرقية كتابتى هذه يستطيع قرائتها اى طالب مبتدىء يقرأ النوتة من شهر واحد ولو كتبت اللحن كما يتهيأ لهم لما استطاع احد قراءته سوى المحترفين
هنا اقف وقفة اخرى امام هذا اللحن انتم طبعا تعلمون ان هذا اللحن من فيلم لعبة الست وعندما يطلب المخرج من الملحن لحنا لفيلم لابد ان يجلس معه ويروى له قصة الفيلم بسرعة ويحدد له المطلوب فى ملامح اللحن وهنا كان المنخ فى الأربعينيات يعنى مستوى الألحان كهمسة حائرة ورباعيات الخيام يعنى الألحان مستواها عالى جدا , ولكن هنا طلب المخرج من الملحن ان يكون اللحن هابطاً او لحن ( بيئة بلغة العصر الحالى ) وانظروا اللى هذا اللحن الهابط بلغة الأربعينات وانا اؤكد ان خلال العشرين عاما الماضية لم يظهر لحن فى قوة واحد على مائة من قوة هذا اللحن ولا كمية الطرب التى فيه

**عادل صموئيل** · #8 14/06/2009, 19h14

اقتباس:

المشاركة الأصلية كتبت بواسطة احمد سنايم

رائع كالعادة يا استاذى الحبيب عادل صموائيل تواضع وبساطة العلماء شخصية جميلة معطائة عجبنى جدا كلامك الى الاخ الفلسطينى وكان لازم ارد على هذا الكلام الجميل والمشاعر الرقيقة المرهفة وكالعادة ايضا اطلب نوتة توتة لفريد الاطرش ومش ضرورى الديليفرى يكون سريع هذة المرة على اقل قل من مهلك ربنا يخليك لنا وما نتحرمش ابدا منك شكرا الف الف شكر

عزيزى احمد
اقدم لك نوتة توتة الديليفرى سريع المرة دى لأن فيه الحان انا بكون حافظها وبكتبها من الذاكرة من حسن حظك
فيه ملحوظة مهمة انا هنا كتبت السرعات ودى مش عادتى او على الأصح مش عادتنا فى الموسيقى الشرقية لكن اللحن ده بالذات من اهم ملامحه اختلاف السرعات بين الجمل

**عادل صموئيل** · #9 16/06/2009, 18h52

اقتباس:

المشاركة الأصلية كتبت بواسطة نور الصباح

الأخ العزيز والصديق الوفى والأستاذالكبير والمصباح المنير الأستـــــــــــــــاذ /
عـــــــــــــــــــادل بـــــــــاشــــــــــــــــــــــــــا صموئيـــــــــــــــــــــــــــــل
تحية إعزاز وتقدير وبعـــــــــــــــــــــد :
سلام الله عليكم ورحمته وبركاته وندعو الله العلى القدير أن يمن عليكم بنعمة الأمن
والأمان والطمأنينة والسلام والصحة والسعادة وطول العمر على الدوام
اسمح لى بسؤال بسيط :
- فى الموسيقى الغربية - ما هى درجة الحساس لأى سلم موسيقى وعلى أى أساس تحسب ؟
- أنا فى انتظار النوتات الموسيقية فى شوق ولهفة
- هل إذا ذهبت إلى إدارة عين شمس التعليمية أستطيع مقابلتكم ؟
وإلى أن نلتقى لكم خالص حبى وتقديرى
وشكررررررررررررررررررررررررررررررررررررررررررررررر ررررررررررررا
أخوكــــــم نــــــور الصبــــــــــــــــــــــاح
16 / 6 / 2009 ظهرا

الأخ العزيز نور الصباح
الحساس هو الدرجة السابعة فى اى سلم موسيقى
يعنى لو اخدنا مثلا سلم دو الكبير بيتكون من 7 نغمات والثامنة جواب الاولى
يعنى عد معايا من اليمين ( دو رى مى فا صول لا سى ) اول درجة هى القرار تجدهم 7 درجات درجة سى هى الدرجة السابعة وتسمى حساس لأنها بتحب تركز على درجة الركوز وهى دو الجواب وبينها وبين الاساس نص تون واضح ؟
بالنسبة لإدارة عين شمس التعليمية انا لا اتواجد فيها لأنى امر على المدارس او المراكز الصيفية مرفق نوتة احد طلباتك والباقى انشاء الله قريبا

**يوسف قاسمي جمال** · #10 17/06/2009, 23h23

اقتباس:

المشاركة الأصلية كتبت بواسطة khalil

الرجاء من الأستاذ عادل نوتة معزوف نزهة لسعيد الشرايبي و مع الشكر

أخي خليل تفضل نوتة نزهة لأستاذي سعيد الشرايبي
يوسف قاسمي جمال