اقتباس:
المشاركة الأصلية كتبت بواسطة abuzahda
يا أستاذ أحمد الشوبكي
خادِمُكـُم : أنت و التوحفجي
عنده سؤال من ساعة ماشاف صورة حضرتك
: هو اللي مع حضرتك في الصورة ده ، عم حسن المغنواتي؟
و لا حد تاني ؟ ، من فضلك قولـِّي
و شكراً على تشريفك يا أستاذ أحمد
متمنياً أن أكون عند حسن ظنكم ، فتدوم حظوتي باهتمامكم
|
أستاذنا وشاعرنا الكبير الأستاذ: سيد أبو زهده
يا سيدى ده إحنا اللى خدامينكم وخدامين كل العباقرة والموهوبين اللى زى حضرتك وزى حبيب قلبى وحبيب الملايين عمرو باشا التوحفجى
أما بخصوص الصورة : فهى صورة الأستاذ/ كمال عزمى ( kandis ) وهو طبعاً غنى عن التعريف ، فهو أحد الكبار مؤسسى هذا الصرح العظيم "منتدى سماعى" واللى معاه فى الصورة يبقى السيد الوالد الفنان الشعبى محمد الشوبكى ( يعنى أبويا مش أنا ) ،، أصل أنا بينى وبينك لسة عيل صغنن بتاع 32 سنة بس ،،، ولما حبيت أحط صورة رمزية لقيت إن صورتى هتبيقى ماسخة وباييخة وملهاش طعم فى وسط العظماء والكبار أمثال حضرتك والدكتور أنس وسماعى وسمعجى والتوحفجى والآلاتى والدكتور حس وغيرهم من الأساتذة الكبار ، وما لقيتش إلا الصورة دى أحطها ( مش حلوة بذمتك ؟ ) ،، ( والصورة تم إلتقاطها فى المنزل العامر ، عنوان الكرم ، منزل الدكتور أنس وحرمه الليدى ناهد أثناء اللقاء التاريخى لأعضاء منتدى سماعى مع الأستاذ محمد زمنطر ،،، ولأنى خارج مصر فقد تفضل الدكتور أنس وسيدة المنتدى الأولى أم السماعيين مدام ناهد بدعوة الوالد لحضور اللقاء ( يا بخته ) تلاقيك بتقول يا نهار زى بعضه ومش فايت كل الرغى ده عشان سألته مين اللى فى الصورة؟؟؟ بس كدة أحسن عشان تحرم تسأل ،، وتسيبنا إحنا اللى نسألك ونستمتع بإجاباتك ومشاركاتك وردوك وأشعارك وقصصك
وأسيبك بقى قبل ما تقرر تقفل الكمبيوتر بسببى
آه ،،، نسيت أقولك حاجة بسيطة !! الحاج محمد الشوبكى له موضوع خاص به فى قسم ( الأصالة والمعاصرة فى الغناء الشعبى المصرى ) " بس أخوك مش خبرة وخيبة قوى فى حكاية نقل الروابط ،، يعنى لو حبيت تشرفنا بزيارة الموضوع يمكن تتعب شوية ،،، بس والله هتشوف حاجة حلوة وهتشرفنا وتنورنا وتزيدنا فخراً
تقبل تحياتى يا شاعر يا مخضرم
__________________
** هنا فى سماعى وجدت من أحب و ما أحب و ما سأحب **
((( ولكم منى كل الحب )))
*/*/* أحمـــد الشـــوبكـى */*/*