تحليلات سيادة الرئيس ـ أبو على

[سيادة الرئيس]

الله الله يا عم العاشق على الإختيارات

فكرتني بالشوية دول بتوع عم الأبنودي

أما بعد ... فوصلنا خطابك شمّينا فيه ريحة الأحباب ربنا ما يوري حد غياب

يا مسافر وحدك

و كلام في سرك أخوك في الغربه لوحده و ما تعرفش أد إيه الغنوه دي بتأثر في معاميع عواطف أحشاء بطين قلبي الأيمن و الأوسط و الأيسر و الأعلى و كل بطيناته علاوه على الشريان التاجي

و بعد العواطف و الزي منه نرجع لموضوع الغنوه و طبعا الكلام بتاعها مش محتاج كلام

المقام الأساسي

نهاوند كردي

المقدمه الموسيقية فيها ذكاء وهابي في تأكيد ( تيمه ) و تخيلي أنه بدأ الغناء بشكل خفي من أول نوته من المقدمه الموسيقية و يحاول في ( غنائه الخفي ) أنه يكرر ( يا مسافر وحدك ) و يخليك تنطقها قبل ما هو يغنيها

يقوم قايل التيمه على أساس المقام ( جوابه ) و بعدين على ( خمسته الهابطه ) و بعدين يرجع يقولها على أساس المقام تحت بس يكمل الجمله ( وفايتني ) و كل ده حضرته لسه ماغناش ( أكرر إن ده تخيلي )

و تكمل المقدمه بهذا التحضير عشان يشرح موضوعه غنائا و في نفس المقام ( نهاوند كردي ) و بنفس طريقة المقدمه ( أساس جواب - خمسه هابطه - أساس تحت ) و ده بيدي إحساس النداء على إللي مسافر وحده

و في آخر نداء متكرر ( يا مسافر وحدك ) بيركز بالكاف على تالتة المقام وده بيدي إحساس بعدم الركوز و يقوم مزوده فيروح بيك في ( وفايتني ) و يركز على ( الصول ) عشان يزود عدم الركوز و التوتر المطلوب عشان بعد كده يريح ودنك في طلبه و سؤاله ( ليه تبعد عني و تهجرني )

و بعدين ترجع المقدمه مره تانيه و في نفس المقام

ودعني

برضه خمسه و ركوز نصفي

من غير مايسلم

بيعمل قفزه و هابيه ( صول : مي بيمول ) تشرح قد إيه موضوع من غير ما يسلم واجعه يا حبة عيني

و كفايه قلبي أنا مسلم

نغمات متتاليه تشعرك بإنكساره و تسليم قلبه
لا و ابن اللئيمه ما يسكتش يقوم مغزل تغزيله ( بياتيه ) في الإعاده

دي عنيّه دموعها بتتكلم

في ( سكوانس ) متتابع عشان يرجعك لندائه و ترجيه

يا مسافر وحدك و فايتني ليه تبعد عني و تهجرني

OXOXO

ياحضرات المستمعين الموضوع حا يخش في شرح مواجع و إنتظار على نار شوق و حاجات من دي و بتاع و كده

يبقي لازم كراسي عشان نقعد و نفهم إيه موضوع الراجل ده

و راح جايب أحلى كرسي في الأغنيه و مقعدها على واحده كبيره

بياتي النوا

و يروح من أول مزيكة الكوبليه مقعد حضرتك على تحويل جميل و مش جنس بس لا ده المقام بكل قواته و جنسيه الأصلي و الفرعي يعني من فوقه لتحته

و بطريقة التسليم القديم المتكرر يبدأ يشرح موضوع الإنتظار و الحجات من دي و بتاع و كده

و لما يخلص لوع الإنتظار و الحجات من دي و بتاع و كده

و من أول ما ينطق

بس

يرجع بينا للنهاوند عشان يعيد ندائه

يا مسافر وحدك و فايتني ليه تبعد عني و تهجرني

((( ربنا ما يوري حد غياب )))

[سيادة الرئيس]

آه آه جيت ع الجرح يا عمي

حفل : بيت الدين 2002
الأغنية الأولى بعد المقدمة الموسيقية ( إفتتاحية بيت الدين )
جميع الأعمال تأليف و تلحين و توزيع الفذ : زياد رحباني

المقام كما ذكرت : نهاوند من درجة رى ( سلم ري مينور ) مرفوع الحساس ( الصغير بتاع فا ميجور )

و ما أجمل بداية الغناء ( قفزه مسافة سادسه ) في ( لا إنت حبيبي ) بثبات ( فيروزي )

الحفل ده كله بدعه من كل جوانبه

أوركسترا
أعمال
توزيع
تسجيل
قيادة

و

فيروز

[سيادة الرئيس]

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

بنغنّي لجل الناس الناس - - ف إمبابه و لا ف أبو العباس
لكل حاره إيدين تنباس - - مدام بتبني و لا دّمّـرش
مرمر زماني زماني مرمرش

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

لابوس إيدين دبّاح العجل - - و ابوس إيدين مِن يكسي الرجل
و أبوس إيدين بياعة الفجل - - بتبيع ثمار و لا تستثمرش
مرمر زماني زماني مرمرش

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

يا خلق هوه خليكوا شاهدين - - قريبي ف الدنيا و ف الدين
واخد نصيبي من الفدادين - - وسّـكت له لكن ماطمرش
مرمر زماني زماني مرمرش

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

مكتوب لغيري يقـُشّ الزاد - - و ليه يا طيري أعيش مِنكاد
قالي المثل قرّشك صياد - - و ابن الغلابه ما بيزمّرش
مرمر زماني زماني مرمرش

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

زعلان يا باشا زعلان ليه - - عشان غلطنا و قولنا يا بيه
طربوش جنابك يا اختي عليه - - لمّا بسرعه رجعت له مارش
مرمر زماني زماني مرمرش

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

إسمعها كلمه من المنقوش - - على كل ساقيه و كل شاكوش
إن كنت ناوي على حلّق حوش - - أموت و عرقي ما يُستعمرش
مرمر زماني زماني مرمرش

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

الله الله الله يا عم جمال

يعني فاروق كان قصاد ست كوبليهات و مطلوب منه إن المستمع ما يزهقش من اللحن صحيح الكلام زي العسل بس لو كل الكوبليهات زي بعض ( لحنا ) بصراحه حا يتحقق الزهق ( المقامي )

خلينا الأول في مقام الأغنية الأساسي

مقام حجازكار

نفس طبقة التسجيل

و قبل ما أسيبه ( الحجازكار ) ألوكلوك شويه عنه

السيد حجاز كار لو إتغيرت درجة ركوزه بنفس أبعاده حا ينتج مقام بإسم جديد كالتالي
من صول أسفل دو الوسطى ( يكاه ) مقام : شد عربان
من لا أسفل دو الوسطى ( عشيران ) مقام : سوزيدل
من رى اعلى دو الوسطى ( دوكاه ) مقام : شاهناز

السيد فاروق بدأ موضوعه من الحجاز كار المقدمة و مقطع

مرمر زماني زماني زماني زماني مرمرش
حاسب يا سيدي يا سيدي يا سيدي ماتتأمرش

علي يقول و الكورال يرد بنفس اللحن و بعدين يدخل في أول كوبليه

بنغنّي لجل الناس الناس - - ف إمبابه و لا ف أبو العباس
لكل حاره إيدين تنباس - - مدام بتبني و لا دّمّـرش
مرمر زماني زماني مرمرش

كله في الحجازكار ما هو آه لازم أسلطن جنابك عشان لو حولت لازم تحس

يرجع الكورال و في نفس المقام

و بعد ما ينتهوا يدخل ( عبدالله ) بكولته معلناً عن التحويل الأول و ترد عليه الفرقة بنفس اللحن

من الدرجة الرابعه لسلم مقام الأغنيه يروح بينا لجنس جديد

جنس راست على درجة فا ( جهاركاه )

عشان يدوقك الراست و على

لابوس إيدين دبّاح العجل - - و ابوس إيدين مِن يكسي الرجل

و يقول الكورال ما قاله

و يرجع يقول هوه تاني و بعدين يرجع ع الحجازكار من

و أبوس إيدين بياعة الفجل - - بتبيع ثمار و لا تستثمرش

مستريحه للكورال عشان يعيد

و لما يخلص الكورال يقوم داخل رياض بعوده و من أساس المقام و يروح بينا لجنس جديد عشان تدوق كوبليه بطعم جديد

جنس صبا على درجة دو ( راست )

عشان يصبّيك شويه على

يا خلق هوه خليكوا شاهدين - - قريبي ف الدنيا و ف الدين

و يرد الكورال زي ما قال و يرجعنا تاني حجازكار من

واخد نصيبي من الفدادين - - وسّـكت له لكن ماطمرش
مرمر زماني زماني مرمرش

و يسلمها للكورال

المرة دي رجع تاني لأول لازمه في حجازكار عشان يكون الكوبليه ده بالكامل و بنفس لحن الكوبليه الأول كله في حجازكار

و يعيد الكورال و ترجعنا كولة عبدالله مره تانيه على الراست و يقول علي و يرجع حجازكار بنفس طريقة كوبليه

لابوس إيدين دباح العجل

و يعيد الكورال عشان مره تانيه يرجعنا عود رياض للصبا و و يقول منه الكوبليه السادس بنفس أسلوب كوبليه

يا خلق هوه خليكوا شاهدين

الراجل قعد يرزع في ست كوبليهات من غير أدنى زهق للمستمع و ده ناتج من التصرفات المقاميه الجميله

يفضل أداء الحجار و طبعا جاء في منتهى البدع و اسمع مساحة صوته إلّي يجري فيها الخيل

مرمر زماني

كلمات : جمال بخيت
ألحان : فاروق الشارنوبي
غناء علي الحجار

[سيادة الرئيس]

الأغنية : بعد الصبر ما طال
المكان : مسرح حديقة الأزبكية
الوصلة : الثالثة
التاريخ : 6-3-1958
كلمات : بيرم التونسي
ألحان : رياض السنباطي
المناسبة : إنتخاب جمال عبد الناصر ( رحمات ربي عليه ) رئيسا للجمهورية العربية المتحدة

معرفش ظروف الأغنية دي ( الفنية ) لكن أقدر أجزم أن البروفات عليها كانت ضعيفه جدا
تخيّل خمس سقطات ( غنائية و نصيّة ) في أغنية واحده

و طبعا أقصد بسقطة ( غنائية ) إنها موسيقية و ( نصيّة ) إنها في الكلمات

لكن زي ما قلت حتى الغلط منها حلو و الدليل إن في بعض المواقف تقابَل السقطة بتصفيق من نار

جمعتهم كلهم في ملف واحد حسب المواقيت التاليه

السقطة الأولى : غنائية الدقيقة 00.16

بتدخل بدري ( بعد الصبر ما طال ) فيكون السبب وقوع الإيقاع ( خروج عن الوحدة الإيقاعية ) يعني الريذم بينقلب
لكن ذكاء الفرقة يمسك الموضوع ليعود الإيقاع لحاله و كأن شئ لم يكن

السقطة الثانية : غنائية الدقيقة 00.49

الكورال بيقول (حققنا الآمال برئاستك يا جمال ) المفروض إن الكورال يعيد مرة تانيه فيحصل إنها ماتستناش الإعاده
و تدخل على الكورال ( الشعب إلّي ) في نفس الوقت الكورال بيقول ( حققنا الآمال ) فيحصل تداخل واضح الخطأ فيه

لكن يقابَل بتصفيق عارم

السقطة الثالثة : غنائية الدقيقة 01.15

( الأخوة كانت وحدتهم أمل الأحباب )

هنا بيحصل تغيير في اللحن و لما تحس بالخطأ تقف عشان الفرقة تردد اللحن السليم في شكل ( لزمه ) و تكمل هى باللحن السليم ( لا و تعمل عربه عليه ) و برضه كأن شئ لم يكن

السقطة الرابعة : نصيّة الدقيقة 02.08

بدل ما تقول : الأخوه كانت وحدتهم
قالت : الوحده كانت وحدتهم

السقطة الخامسة : غنائية الدقيقة 02.43

هنا الست نسيّت اللحن بالكامل فوقفت تستنى المدد اللحني
و كالعاده يظهر الفارس النبيل المنقذ ( عم : سيد سالم )

لكن إسمع نبله في إنقاذ الموقف

ما هللش بنايه و زعق و قال اللحن لكن جاء التذكير في صورة ( تقسيم رقيق ) و كأنه بيهمس في ودنها بيه
عشان هي برضه تبدأ تقول بنفس الهمس

الحب وحده بلغنا الأمل المنشود

أما في الدقيقة 03.46

دي بقى مش سقطة و لا حاجة خالص

الست بتقول ( برئاستك يا جمال ) لكن إيه ده

يا ننوس دلع و رقة جناب حضرة صوتك و هوه بيقولها

حتى الهمزه في ( رئاستك ) دابت منتاش عارفها همزه و ولّا ياء

و أنا حاسس إنها كانت بتقولها و عينها في عين جمال

حتى الغلط منك حلو يا ست

[سيادة الرئيس]

عم بطاطا

عم بطاطا لذيذ و معسل - - عمره ما طاطا لغير الله
لما الدنيا بتقسى يمثل - - إنه خلاص سلّم لأضاه
قال إيه خلاص سلّم لأضاه

عم بطاطا يقول الراوي - - خبّى الحكمه في توب الحاوي
ينفخ ناره عشان إفطاره - - و بنكتته بيداوي بلاوي

عم بطاطا لذيذ و معسل - - عمره ما طاطا لغير الله
لما الدنيا بتقسى يمثل - - إنه خلاص سلم لأضاه
قال إيه خلاص سلّم لأضاه

عم بطاطا بيمشي في حاله - - علشان رزقه و رزق عياله
غصبّن عنه يقف يتكتّف - - بس بيكيفه يفك حباله

عم بطاطا لذيذ و معسل - - عمره ما طاطا لغير الله
لما الدنيا بتقسي يمثل - - إنه خلاص سلّم لأضاه
قال إيه خلاص سلّم لأضاه

عم بطاطا يزُك الزكّه - - يُعبر سينا و يفتح عكا
و بيصبر ع الجار السو - - خمسين سنه ويقول دول فكه

عم بطاطا لذيذ و معسل

هوه ده الكلام مش تقول لي ( جاكته )

و كده قال الأستاذ جمال بخيت عن المصري

من أحلى ما أنتج هذا الثلاثي الرائع

جمال و فاروق و علي

مجموعة لم الشمل
إنتاج 1991

كلام زي ما قريت و قول إنت

اللحن للملحن الرائع الجاد : فاروق الشرنوبي

المقام : هزام

في شكل شعبي بديع و زاد بدعه المقام المستخدم

مقام يحوي مسافة ( الثلاث أرباع ) مش كده و بس لا ده الركوز عليها

طيب دلوقتي كلام بيخر حلاوة و لحن بينضح طعامه يقوم التنفيذ يزود الحلاوة حلاوتين و الطعامه طعامتين

تعالوا كلنا نسجل في وقت واحد ( ريل تايم ) مافيش تراكات و لا يحزنون و نغلط نعيد من الأول يبقى الإحساس أحلى و الأسلوب ده متبع في إصدارات العتاولة حتى الآن و أذكر منهم سيدة الغناء الغربي ( بربرا سترايسند ) اللهم بس فواصل خشبية بينهم عشان لو فيه ( ميكساج ) يكون أسهل شوية

يبقى الجماعه كلهم مع بعض

و اسمع عود الملحن الراحل الشاب إللي أمتعنا بصوته و هو طفل : رياض الهمشري
و لا كولة : عبدالله

لا و مين كورال

رياض الهمشري و طارق فؤاد و أحمد الحجار و رأفت الحجار

طبعا بعد كل إلي أنا قلته حضرتك متوقع أداء علي

لكن زود الحلاوتين تلت حَلاوات و الطعامتين تلت طَعامات بأدائه للكوبلية الأخير و تبادله فنون القواله بينه و بين الكورال على بيت ( عم بطاطا يزك الزكه - - يعبر سينا و يفتح عكا )

حاجة كده تسمعها بقلبك قبل ودانك

الناتج عمل أمتعني من ساعة ما طلع لغاية النهارده و أقدر أقول عليه و بجد

wow wow wow

عم بطاطا

كلمات : جمال بخيت

ألحان : فاروق الشرنوبي

غناء : علي الحجار

الملف مرفوع بتاريخ الموضوع

هنا

[سيادة الرئيس]

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

طلعت أضج من الجرانين - - كلامها يعج عسل و طحين
و طبعه أمينه و طبعه آمين - - و يوم ما قالت لي الصدق بغش
طلعت أنش نزلت أنش

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

طلعت أهج من الأحزاب - - ساعات بتغني بصوت كداب
جناب النايب أظهر ناب - - و لما مصالحه قالت له يهش
طلعت أنش نزلت أنش

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

طلعت أوج من الهباش - - بيوته بتعلى و ما بنعلاش
و راهن عمرك للأوباش - - و غلّى علّيا الفول و المش
طلعت أنش نزلت أنش

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

طلعت أحج و أقول يا لطيف - - قابلني صاحبنا و قال توظيف
دفعت فلوسي ما حوشت رغيف - - لاقيتني في جردل ميّه بطش
نزلت نزلت نزلت أطش

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

OXOXOXOXO

كل ما قلته عن ( عم بطاطا ) يقال عن ( طلعت أنش )

هى من نفس مجموعة ( لم الشمل )

لكن ميزتها أن فيها زخم طربي ناتج عن تعدد مقامتها رغم بساطتها

المقام الأساسي لها هو : الراست

و كما ترى في أبعاده فهو يحتوي على مسافة الثلاثة أرباع و بشكل ( سمين )

المقدمة الموسيقية و

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

في مقام الراست و بالطبع تحدث ال ( سلطنة ) من مقام الراست بعد مقدمة موسيقية و غناء فردي و رد من المجموعة

ثم مرة أخرى اللازمة الموسيقية و على نفس لحن المقدمة وفي نهايتها تسلم الغناء بتحويل على جنس فرع مقام الراست

طلعت أضج من الجرانين - - كلامها يعج عسل و طحين

( تغيير لا إلى لا نصف بيمول و تغيير سي نصف بيمول إلى سي بيمول ) لينتج مقام من عائلة الراست هو

مقام النيرز

فيه يكون جنس الفرع ( بياتي على النوا )

ثم يعود على جنس الأصل ( مع لمس لا بيمول ) مرة أخرى و يستعرض مقام الراست بجنسيه صعودا و هبوطا

و طبعه أمينه و طبعه آمين - - و يوم ما قالت لي الصدق بغش
طلعت أنش نزلت أنش

ليسلم المجموعة في مقام الراست

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

و تعاد اللزمة من نفس مقام الراست و في نهايتها تمهد ( كولة عبد الله ) لجنس فرع جديد ليبدأ الغناء منه

طلعت أهج من الأحزاب - - ساعات بتغني بصوت كداب

( لا مخفضة نصف و سي طبيعية ) لينتج مقام آخر من عائلة الراست هو

مقام السوزناك

فيه يكون جنس الفرع ( حجاز على النوا )

ثم يعود على جنس الأصل مرة أخرى و يستعرض مقام الراست بجنسيه صعودا و هبوطا

جناب النايب أظهر ناب - - و لما مصالحه قالت له يهش
طلعت أنش نزلت أنش

ليسلم المجموعة في مقام الراست

طلعت أنش نزلت أنش - - لقيت الغش بمليون وش
فتحت وداني سمعت أغاني - - قفلت الراديو و كان بيوش

و تعاد اللزمة مرة أخرى

و يعاد ما ذكرت في الكوبليه الثالث و الرابع
ليكون الثالث ( نيرز ) و الرابع ( سوزناك )
و العودة ( راست )

لتنتهى هذه الوجبة الخفيفة و الدسمة في نفس الوقت

كلمات رائعة و لحن مُطرِب و أداء أطّرب

و لا يغيب ( المضمون )

فهو السبب في كل ما حدث عاليه

(( طبقة التسجيل مي بيمول ))

و يسئل في صعوبة العزف من هذه الطبقة عمنا الآلاتي
فهى ( سكه سوده )

طلعت أنش

كلمات : جمال بخيت
ألحان : فاروق الشرنوبي
غناء : علي الحجار

الملف مرفوع بتاريخ الموضوع

[سيادة الرئيس]

((( علشان أفتي براحتي و ما حدش يعدل عليا )))

بصراحة الفنان الأستاذ : لطفي بو شناق
و سبحان الله لا يطربني إلا عندما يغني بلهجته التونسية

فأنا أراه عندما يغني بلهجة أخرى ( حتى الفصحى ) فإن اللهجة ( تركبه ) فلا أسمع منه إبداعاته كاملة
و هذا يحدث بسبب حرصه على النطق و التبحر في معاني ما يقول مما يدفعه هذا أحيانا إلى ( المغالاة ) حتى أنه في بعض المواضع يذهب إلى الأداء في شكل ( ريستاتيف ) و هو الإلقاء المنغم

و لكنه عندما يغني بلهجته أراه هو الذي ( يركبها ) و يبحر في إبداعاته النغمية

من أبدع ما سمعت كلام و لحن و أداء منه

((( ريتك ما نعرف وين )))

الكلمات للشاعر : علي اللواتي

يطوف بنا وراء محبوبته في أحياء تونس القديمة و أشعر و أنا أسمع أني أشم رائحة أحياء و شوارع ( مصر ) القديمة كما رسمها ( فؤاد حداد ) في موال ( إللي بيعلا بيعلي )

و رغم عرضه لأسماء كثيرة من أحياء تونس القديمة إلا أن موضوعه الأساسي لم يندثر بين عرضه هذا
فطاف بك أحيائها القديمة و عرض حيرته و فرحته في نهاية كلامه

( برادسي برادسو ماشيين )
ذراع في ذراع ( يعني أنجاجيه بعامية مصر )

ريتك ما نعرف وين
لحظة ما بين نومين
في حومة باب الخضرا
و لا في الحجامين
و يمكن صارت ها القصّه
زمان إلّي كانت خصّه
في ربط الحلفاوين

ريتك و فنيت عليك
و قعدت نتبع فيك
يا بنية باب سويقه
خمسه و خميسه عليك
تمنيت و جهك يضحك لي
و شفرك لكحل ينعم لي
مره نتلاقي بيك

ريتك في حلق الواد
و احنا على بعضنا بعاد
ما لقيت كيفاش نوصل لك
و تلهاو بينا لعباد
وقتاش يا مشموم
في خجلتك مضموم
نكمت بيكي الحساد

ريتك في لافايات
تتدرجح بالخانات
يا ليتني ما شوفتك
ناري شعلت و قوات
محلاك في الصبحية
كيف تتبخطر يا بنيّة
الدنيا مشات و جات

نحلم كاينا إثنين
ضعنا ما نعرف وين
يمكن في باب مناره
و لا في العسافين
لكن كنا مع بعضنا
ما ثمّا ما يفرقنا
برادسي برادسو ماشيين

جميع المشار إليه بلون أزرق : أسماء أحياء في تونس القديمة أحدثهم ( لافايات ) بجوار إذاعة تونس

حومه : حارة أو حي
خصّه : نافوره
رباط : مكان واسع
مشموم : صحبة من الأزهار
نكمت : نغيظ
تتدرجح : تتنقل
برادسي برادسو : تعبير فرنسي و هو كما ذكرت عاليه

و إذا تسلل أحد ( التوانسه ) إلى الموضوع و وجد شئ خطأ..... أصلحه و له الثواب

اللحن للمبدع الرائع ( الجازمان ) عازف العود : أنور براهم

يا له من موسيقي محير فعندما تسمع إبداعاته في موسيقى ( الجاز ) و تسمع إبداعاته ( العربية القحة ) و منها هذا العمل تعرف أنه فعلا محير فله القدرة على الإمساك بزمام فنون و نظريات ماذكرت بين الأقواس

و إن شاء الله أسمعكم عبقريته ك ( جاز مان ) فلدي كل أعماله

اللحن في منتهى البساطة و العذوبة و التأثر بالكلمات
جميع الكوبليهات على لحن واحد و كذلك اللزمة الموسيقية
المقام : فرحفزا ( مع رفع الحساس أحيانا )
و يسمى في تونس : محيّر سيكاه

و هو نفس مقام ( النهاوند الكردي ) مصور على درجة صول ( نوا )

الآلات المستخدمة هى آلات التخت التقليدية

أما أداء لطفي فلا يقل روعة عن الكلمات و اللحن

ريتك ما نعرف وين

كلمات : علي اللواتي
ألحان : أنور براهم
غناء : لطفي بوشناق

و من بعد إذن أخي ( سامي )
قمت بإستبدال نسخته بنسخة أفضل بقليل

[سيادة الرئيس]

قال عنه صلاح جاهين

( أنا أشهر منه و هو أشعر مني )

طلعت أدب نزلت أدب
و طالع نازل أئزئز لب

طلعت أدب أدب دبيب
و نزلت أدب سبع سراديب
أنا اخوك الدب مانيش الديب
ومفنجل عيني تقول دا أديب
ولا دا عاشق داب في دباديب
الحلو إلّي بيغطس و يئب
طلعت أدب نزلت أدب

طلعت أدب نزلت أدب
و طالع نازل أئزئز لب

طلعت أدب برجل و إيد
و نزلت أدب و عيشه بتإيد
ريحت رقبتي من التحويد
و عملت صغيّر قلت يا سيِّد
إن كانّك مش شايف لبعيد
إعمل زيي على ضفرك شب
طلعت أدب نزلت أدب

طلعت أدب نزلت أدب
و طالع نازل أئزئز لب

طلعت أدب البط ما بضش
نزلت أدب أخوك ما أبضش
أنا باستعبط و ما بستعبطش
أنا بتلخبط و ما بتلخبطش
أنا صاحب رقه و صاحب تتش
إن زفّر بوئي و لا أسب
طلعت أدب نزلت أدب

طلعت أدب نزلت أدب
و طالع نازل أئزئز لب

طلعت أدب السئف إترج
نزلت أدب البير إعرج
العالم ماله العالم وج
و يا حبيبي كان طعمك فج
إن كنت حبيب أنا برضه مُحب
طلعت أدب نزلت أدب

طلعت أدب نزلت أدب
و طالع نازل أئزئز لب

الله يرحمك يا أستاذ : فؤاد

قافية ( ب و د و ش و ج )
و يرجع تاني للباء بكل سلاسه و حلاوه

و لو قعدت للصبح مش حا اخلص من دي حلاوة كلام

نيجي للحن الأستاذ : سيد مكاوي

أنا أظن إنه إلهامه في هذا اللحن خده من دندنة الأطفال للعبة ( طلعت أدب )

المقام : كرد
طبقة التسجيل : دو

مع ملاحظة أنه في نفس طبقة التسجيل ( دو ) لو كان استخدم جنس الأصل مرة أخرى في الطبقات العالية ففي هذه الحالة يكون المقام ( حجازكاركرد ) كما في ( سماعي طاطيوس )

اللحن من أوله في منتهى البساطة و سهل عم سيد الممتنع واضح من أول نغمه بيقولها

تلت نغمات بيقول عليها المقدمة و بداية الغناء صول و فا و رى

و تتعاد ديما في ( طلعت أدب نزلت أدب )

و في الكوبليهات المتكرره بيروح يجيب سلم المقام من فوقه ( ري جواب )
و ينزل السلم بكامل ترتيبه دون أى قفزه على ( طلعت أدب أدب دبيب و نزلت أدب أربع سراديب )

و ما شابهها في الكوبليهات الأخرى

فيه بساطة أكتر من كده

لكن ما يسكتش و تبان الألمعية و العبقرية بعد كده

( المعترك )

يروح جايب باقي كلام الكوبلية ( مشار إليه بالأحمر ) في نفس واحد بدون أي لازمه و لا حتى رد من الكورس
في إستعراض مقامي غاية في الطرب يخليك تحبس نفسك لآخر الكوبلية لأ و ايه معاهم برضه ( طلعت أدب نزلت أدب )

و على كده لآخر الأغنية

الله يرحمك يا شيخ

نيجي للمؤدي

بصوت الشيخ سيد موجوده هنا

لكن إسماعوها من عمار الشريعي و عوده

التسجيل مأخوذ من سهرة طويلة تحتوي على إبداعات عمارية من كل العصور

و لاحظ كيف يؤدي ما أشرت إليه

أقصد

المعترك

و مساء و صباح الفل

طلعت أدب
كلمات : فؤاد حداد
ألحان : سيد مكاوي
عود و غناء : عمار الشريعي

الرابط مرفوع بنفس تاريخ الموضوع

[سيادة الرئيس]

من حبى فيك يا جارى ـ حوريه حسن

من فيلم : بحبك يا حسن

كلمات الأستاذ : مرسي جميل عزيز
ألحان الأستاذ : محمد الموجي
مقام : نهاوند على درجة ( مي بيمول )

و أروح آكل و أرجع يا محمد يا مؤذي

المقام زي ما قولت إنه نهاوند

ليه نقى السكة دي أقصد ( الطبقة )
أساس النهاوند على دو
بس المسموع من درجة مي بيمول

طبعا ده عشان يبان لمعة صوت حورية و كثرة عُربها

البداية تقسيم بلدي جدا من نفس المقام و زاده شعبية الآلة المستخدمه مش ( أكورديون ) ده ( هارمنيوم )
و واضح جدا من إستخدام النوته و قرارها

له شكل البيانو ( الرأسي ) لكن التكوين الداخلي يشبه الأكورديون و المنفاخ بتاعه بواسطة دواستين في الرجل

أكيد حد افتكره دلوقت من أي مشهد خماره في فيلم و محطوط عليه شمعه مرشوقه في ( جمدانة ) نبيت و العازف في إيده سيجاره

نرجع للأغنية

الأغنية بكاملها تتبع اللون الشعبي القائم على ( روندو )

المقدمة في نفس المقام إلا لمس بسيط ( صول بيكار )

المذهب في نفس المقام و بعدين إعادة المقدمة

بداية كل كوبلية بتروح ( نهاوند مرصع) و ترجع تسلم للكورس نهاوند

و على قاعدة الروندو ترجع بنفس التحويله في الكوبلية التاني

الموال برضه نهاوند و نهاوند مرصع و تقعد فيه كتير و ترجع للنهاوند
بطريقة أقسم أنها في منتهى الصعوبة ( يوم ما تخبط على ببنا )

ليه

في الدرجة الخامسة للنهاوند مرصع الزن على ( سي دوبل بيمول ) كتير لدرجة السلطنه و بعد ما تخلص و تنزل لغاية ( مي بيمول ) وهى أساس المقام ( في التسجيل ) و بكل ثقة و حرفنه تعمل قفزة صعبة بعد كل السلطنة دي يكون أول حرف موسيقي على أول حرف من كلامها هوه ( سي بيمول )
عشان ترجع نهاوند و تخلص الليله عليه

الله الله الله

بس الست دي عندها كمية تحكم في العُرب مش عادية و الإيحاء النغمي لمعنى الكلمة
و خصوصا في حرف ( الألف و النون ) في ( زمان )
و طبعا خد منها الكورس و قال بنفس الطريقة

تم تعديل معلومة بعد تنويه من الآلاتي
شكرا يا عجوز

في ملاحظه من الألاتي على الخاص رأى أن ركوز تحويل الكوبليهات على أساس المقام ( مي بيمول )

وفعلا كلامه لا يشوبه أي خطأ

فأذا كان الركوز على ( فا ) فهو ( صبا زمزمه ) كما قلت
و لكن عندما لفت إنتباهي للركوز و هو فعلا ليس
على ( فا ) بل على أساس المقام ( مي بيمول ) ففي هذه الحالة يكون ترتيب سلم جنس الأصل و يزيد عليه الدرجه الخامسة هو

( مي بيمول - فا - صول بيمول - لا بيمول - سي دوبل بيمول )

و هذا طبعا لطبقة التسجيل أم أصل المقام فيبدأ من دو ويقاس ما قلت على ذلك

في هذه الحالة و عند الركوز على أساس المقام يكون إسمه

نهاوند مرصع

شكرا للتنويه يا كبير و سأقوم بتعديل هذه الجزئية

لكن كنت أود أن يكون هذا النقاش الممتع علنا
لأني أرى أن هذا هو ما نريد ( نقاشات موسيقية )
فكم سهرنا ( نتقاوح ) هذا مقام ( هزام ) أو ( بياتي شورى ) و الفرق بينهم درجة الركوز فالأول ركوزه مي نص بيمول و الثاني ركوزه رى و بنفس درجاتهما

فما أحلى النقاش في تلك الأمور حتى لو وصلت لعراك فهو في النهاية عراك موسيقي

شكرا مرة ثانية يا آلاتي

[سيادة الرئيس]

محمد عبد الوهاب

في منتهى الخبث الموسيقي يختار مقام برضه في منتهى الخبث الموسيقي

مقام اللامي

التدوين كتبته خصيصا لمنتدانا

من أشهر الألحان التي وضعت في هذا المقام

رائعة الأستاذ : محمود محمد كامل
و طبعا غناء : طلب

تسلم إيدين إللي إشترى

المهم

مقام يحير في ركوز سماعه فلا انت عارف تركز على أساسه و لا انت عارف تركز على رابعته

( كردين في ديل بعض ) الأولاني على مي ( بوسيلك ) و التاني على لا ( حسيني )

يعني بالبلدي سموه ليه درجات ركوز محيره

يحكى أن اللامي أصله يرجع لقبيلة ( بني لام ) العراقية و كانوا يحدوا بيه للأبل

عمك الدكتور عبد الوهاب و في واحده من زياراته للعراق 1932 سمع المطرب
( صالح الكويتي )
طبعا بيقول من اللامي و عنها أكل المقام و بلّع عليه و هضمه و كفى على الخبر ماجور

ليفاجئ السميعه بباكورة إنتاجه من مادة اللامي الجديدة على ودان المحروسة

ياللي زرعتوا البرتقان 1937

يعني خمس سنين و هوه كتمه في قلبه لكن التأثير على المستمع بده مقام أظن لم يكتمل
و أقول لحضرتك.... لا ده هوه اللئيم إللي قال

لما وقع على كلام من الأستاذ حسين السيد 1954 بيقول

قلبي بيقول لي كلام و انت بتقول لي كلام
و عينيه شايفه كلام و الناس بيقولوا كلام
إحترت أصدق مين و إحترت أكدب مين

حيره..... إمسك.... إقفش..... لا و كل الكلام داير على الحيره
يبقى ما فيش أحلى من ملك الحيره المتوج

مقام اللامي

و يطلع علينا ( أقصد عليهم أنا لسه صغير ) بلحن و لا أروع
المقام زود حيرة الكلام حيره وتحس إن حضرتك متلخفن و انت بتسمع
و لسان حال ودان جنابك يقول ( إركز يا ابني أبوس إيدك )

عبد الوهاب قال من درجة دو ( راست )
مااعرفش يمكن الطبقه دي مريحاه ( مع إن البوسيلك مش بعيده )

أو يمكن خبث موسيقي

أنعم به من كلام
و أنعم به من لحن و مقام
و أنعم به من ملحن و مطرب في منتهى الخبث الموسيقي

قلبي بيقول لي كلام
الرابط من داخل المنتدى

و أترك المحاشي الداخليه لعمي الآلاتي و شد حيلك معانا