الأدباتى - محدود الدخل

**حمدى شبانة** · #1 04/11/2009, 16h54

فاكرين شخصية الأدباتى - والأدباتى يلقى أشعاره ناقداً للسلبيات فى حياتنا واَخر من قدم هذه الاشعار فى الإذاعة كان المنلوجست ( العربى سلطان ) فى اذاعة الشعب ( الله يرحمها ) 00 لذا فكرت أن أقوم بكتابة بعض الأشعار على طريقة الأدباتى فإن وجدت صدى سأكون أدباتى المنتدى 00000
--------------------------------------

محدود الدخل
__________
أنا الأديب 000 الأدباتى
وكل دخلى ياخواتى
ميجيبش لعيالى جيلاتى
بالفقر دايماً أنا موعود
الله الله يابدوى دخلى محدود
----------
من يوم 3 ياناس ف الشهر
بشوف نجوم السما ف الضهر
والفقر عندى زى النهر
دايماً مغرقنى و (بيجود )
الله الله يابدوى دخلى محدود
-----------
ودخلى محدود ومحدد
بسببه عايش متهدد
ديونى كل ماتسدد
ألاقى غيرها ديون بتعود
الله الله يابدوى دخلى محدود
-----------

**ملحن مصري** · #2 04/11/2009, 21h59

أنا متفق معاك في الفكره بس اللي مش متفق معاك فيه هو الروح الموجوده في الموضوع
يعني هقولك موقف حصل معاي ويارب أقدر أوصلك اللي أنا عاوز أقوله
كنت مره في برنامج مع الملحن أ / أشرف السركي وهو كان كمذيع في قناه فضائيه وبعدين في البرنامج سمعته بعض الرباعيات لجاهين غير طبعا اللي عملها سيد مكاوي يعني رؤيتي الخاصه
وبعدها لقيته بعد البرنامج قاللي جمله مهمه جداا
قاللي : جاهين في الفتره دي كان مكسور كحال البلد يعني الناس مكسورين نفسيا وماينفعش أنا أزيدهم وأضغط وأأكد علي الإنكسار
وإني أفضل من كده إني أقدم كلمات سواء في الرباعيات أو غيرها ماتعبرش عن كسرتنا وأرفع الروح المعنويه حتي وإحنا في عز الإنكسار
عارف ليه شرحتلك ده لأن وأنا بقرأ كلماتك لقيتك بتفكّرني بحالنا وأنا بحاول أهرب منه عشان أقدر أواجهه وأفكر في إيه اللي أعمله عشان أتخطي المحنه ومش محتاج أفتكر ولا أعيش في إنكسار وخصوصا إن الفنان رساله ومش لازم أكون سبب في الإنكسار بل علي العكس إن أرفع الروح المعنويه يعني زي الكتور مايقدرش يقولك إنك حالتك ميؤس منها

وأتمنالك التوفيق ومايكونش كلامي دمه تقيل
يارب أكون قدرت أشرحلك وجهة نظري

**حمدى شبانة** · #3 04/11/2009, 22h40

أستاذى الفاضل / ملحن مصرى000 هل تقصد أن شخصية الآدباتى انقرضت بتغير الزمن ؟ أم تقصد أننى عرضت الموضوع
دون أن أضع الحل 00 على كل أشكرك جداً جداً على الرد 00 وأنا قصدت فقط إحياء أحد فنون الزجل كاد أن ينقرض 00 يعنى مجرد تجربة لاأكثر00 ومرة أخرى لك شكرى 00

**ملحن مصري** · #4 04/11/2009, 23h25

أولا أنا أحييك علي إحياء فن إنقرض أنا أقصد الروح التي تتملك الموضوع وفيه تتحدث عن الظروف الإقتصاديه والإجتماعيه التي نمر بها وكل ماأقصده أن نأخذ الناس لمنطقه التفاؤل لا لتذكيرهم بواقع مرير

**على عبداللاه** · #5 05/11/2009, 16h49

والله فكره جميله
ولو حتى ماليها الحزن فى المره دى
المره الجيه هتكون فرح
واللى بعدها سخريه
واللى بعدها نقد
وإلخ ..
الله ينور عليك يا عم الأدباتى