كل الصحاب راحوا

[poetloveu]

كل الصحاب راحوا
والقلب وجراحه
واقفين على الأعتاب
يائسين يدقوا الباب
من غير أمل يفتح
طاقة حنان تسرح
تشفي حنين محروم
آه يا زمن مهموم
بالظلم والمظلوم
ولا فيك دقيقة حب
ولا لمسة ترعش قلب
ولا حتى همسة لوم
نبض الحياة محموم
مكسور وانا لوحدي
والناس بقت أرقام
أجساد بلا معنى
أطنان من الأوهام
أنا نفسي كنت الحلم
وفـ لحظة فاق الحلم
بيقوللي تدفع كام
آه يا زمن ملعون
بالألف والمليون
بعترت خطوتنا
وبرغم فرقتنا
علشان رغيف العيش
طلع الرغيف مسموم
عجنوه بدم شهيد
كان ضيّ لمتنا
مبسوط كده وراضي؟
يا كرسي يا فاضي
كان قاعد امبارح
عليك حصاد عمري
راجع تقول (إحنا)؟
يا حرف يا مدبوح
بين السكوت والبوح
قولك... خلاصة القول
الفاتحة على روحنا