من قبل ستين سنة ... كان الحمام عَ الدوح
عايش فى فرح و هنا ... يهْدِل بصوت مبحوح
يِتْغَنى بيه الغُنَى ... و يناجى بيه البَوح
و العِشْ كان عِشِّنا ... لكل طير مفتوح
-------
شجر الزَتون كان سَكَنْ ... لما احنا كُنا حمام
كان الجيران فى الوطن ... أولاد خِيلان و اعْمَام
جُدُورنا جُّوة الزمن ... صُحبة وْ نَسَبْ و كلام
و اللى يِغَنِّى بْشَجَنْ ... نسمع نقول يا سلام
-------
فجأة الغراب انبرى ... مسنود من الخفافيش
هجم الجبان و افترى ... طار الكَرى و الريش
خطف عُشُوشْنا و جرى ... لا بوليس يِغِيِتْ ولا جيش
يا ألمى مِ الِّلى جَرَى ... الدمع ما يْكَفِّيِشْ
-------
زرع الغراب وسطنا ... عشه الكئيب بالزور
البُوم وقف ضِدِّنا ... قال الألم بالدور
من يومها ضاع حلمنا ... مع عشنا المأسور
على ايد عميل مِنِّنَا ... و ف رَكْبُه كَامْ مَأْجور
-------
ما عرفنا مين العِدا ... و لا ضد مين هانْثُور
ضد الِّلى جار و اعتدى ... ولَّلا الِّلى جُوَّه الدُوُر
نِفْسِى أَلَبِّى النِدَا ... يا صَرْخِةْ المغْدُوُر
الروح تُهُون فِ الْفِدا ... بَسْ الجناح مكسور
================
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس
يا عشِّنا المأسور
العرض المتطور
