سكوت ل يسرى عطيه سليمان من ديوان مقاطع على وتر ممزق
سكوت
شيلت الحِرام من فوق جبينك ياهرم
بان الكلام منحوت في صخرك بالألم
بكت العيون نزلت دموع شايلة الندم
مسحت حروف كانت علينا في يوم حكم
********
فتحت السكوت شباك مبروز من دهب
عدي الزمان شايل ستارة من لهب
نطق الجبل وف بطنة بركان من غضب
وبأعلي صوت فجر عيون طرحت شهب
*******
ضحك الصنم قال مستحيل هيا البلد
أكيد ميلادها اليوم صحيح زي الولد
كان إيه جري لك من زمان ياأسد
سيبت الغلابة جوة غابة بتتجلد
********
كان في زمان حتة ولد قال مستحيل
يكون وقيد* المفتري سقف الفقير
ويكون فراشك ياعويل لحم الأصيل
وتنام وتنفخ في السرير
والكل نايم ع الحصير
******
في شرع مين قلت الكلام ده ياهوي
ونفخت فيه خليتة كاس زي الدوي
دا كل شئ أصبح عليل مهما ارتوي
لعاد ينفع فيه حكيم ولا عاد يفيد زرع
يسرى عطيه سليمان
من ديوان مقاطع على وتر ممزق
* وقيد : الحطب الذي يشغل به النار
التعديل الأخير تم بواسطة : د أنس البن بتاريخ 15/07/2009 الساعة 23h41
السبب: تعديل الفونط
|
العرض الشجري