سؤال عن الالكتريك فيولين

**دكتور دودو** · #1 04/04/2009, 14h49

هـــــــــاى
انا عارفه ان الكمان العادى بيختلف على حسب لو كان مثلا(المانى،ايطالى،فرنساوى...) المهم انا كنت عاوزة اعرف الكمان الالكتريك انواع برضه ولا عادى؟؟؟؟
وشكرااااااااااااااااااا

**عادل صموئيل** · #2 05/04/2009, 19h13

اقتباس:

المشاركة الأصلية كتبت بواسطة دكتور دودو

هـــــــــاى
انا عارفه ان الكمان العادى بيختلف على حسب لو كان مثلا(المانى،ايطالى،فرنساوى...) المهم انا كنت عاوزة اعرف الكمان الالكتريك انواع برضه ولا عادى؟؟؟؟
وشكرااااااااااااااااااا

الأخت العزيزة
اولا اهلا بكى فى المنتدى طبعا انا اهتميت بسؤال جدا اولا لأنك عضوة جديدة وثانياً لأنك شكلك مهتمة بالمكنجة
طبعا اى شىء فى الدنيا انواع يعنى على الأقل 3 درجات درجة منخفضة ومتوسطة وعالية وذلك حسب السعر
وفيه نقطة مهمة جدا لنى انا زرت معظم دول العالم , يعنى حسب القوة التجارية للسلعة فى كل دولة على حدة , يعنى مثلاً على سبيل المثال لو دولة بيحببوا المرواح الكهربائية يعنى بيفهموا فى الجودة وبيشتروا كتير اكيد الدولة دى تلاقى فيها مئات من موديلات المرواح وتنافس فى الجودة , ولو دولة متاخرة عايزين حاجة تجيب هوا وخلاص اكيد حتلاقى فيها اردأ وأسوا انواع المرواح , ولو انتى عندك خلفية عن الكمنجة العادية ( اللى انا كخبير فيها اقول ) الكمنجة العادية اهم شىء فيها الصندوق الرنان وده زمان كانت الكمنجة بتتعمل يدوية ودى تلاقيها غالية جدا لن صناعتها اسرار يعنى نوع الخشب سر ماحدش يعرفه غير أسر كانت متخصصة فى صناعتها فى اوروبا والأسر دى تقريبا انقرضت ولو لقيتيها دلوقتى بيبقى سعرها فادح لنها تخضع للعرض والطلب يعنى مفيش انتاج منها , اما فى السوق دلوقتى فيه الكمنجات اللى معمولة فى المصانع ودى حلوة للتعليم لكن صوتها عادة بيبقى ( اعوذ بالله ) وذلك نظراً للصندوق الرنان بيبقى خشب اشبه بخشب صناديق الرنجة . بالنسبة للكمنجة الأليكتريك تصميمها ان مافيهاش صندوق رنان يعنى ممكن يكون معمولة من الألومنيوم وده شكل بس مالوش علاقى بالصوت او تكون اوتار مشدودة على جسم عامل زى الشماعة مفيهوش صندوق رنان خالص اصلا , طيب تسألى بتطلع الصوت ازاى اقولك : هى تشبه الكمنجة فى ان فيها مراية تحطى صوابعك عليها وفرسة ومشط والاوتار راكبة وفى الفرسة او تحتها توجد 4 ميكروفونات دقيقة وفى مكان فى الكمنجة دى فتحة بتحطى فيها الجاك او اسوكت وف آخره سلك بيوصل للأمبليفاير زى الجيتار الكهربائى , يعنى لازم تحتاجى معاها امبليفاير بأى حجم ممكن , طبعا انا آسف على الإطالة ولكن انا احب اشرح الموضوع بدقة وزى ماقلت منها انواع وبتختلف الانواع دى من حيث جودة الميكروفونات الدقيقة دى يعنى اكيد الأغلى سعراً حتكون ميكروفوناتها صوتها احلى , بس اهم شىء انك لما تشتريها تتوصل على امبليفاير وتسمعى صوتها لأن ممكن كمنجة صوتها يعجبك وكمنجة تحسى ان صوتها مش حلو , وبرضه زى ما قلت خلال كلامى حسب الدولة اللى بتبيع السلعة يعنى لو دولة فيها إقبال على الشىء ده بتلاقى فى المحل كذا نوع او ماركة وانتى تختارى اللى تعجبك لكن لو دولة مش بيستعملوا الحاجة دى كتير ممكن تلاقى صنف واحد ويا تاخديه يا لأ
مع اطيب تحياتى واهلا بكى فى المنتدى وتحت امرك فى اى اسئلة

**دكتور دودو** · #3 06/04/2009, 07h07

الف شكر بجد على الرد وعلى الافادة

**عرفه عرفه** · #4 11/04/2009, 14h20

عندى سؤال مهم معلهش يا جماعه انا ديما بستشير واحد صاحبى اسمه هيثم ابوالسعود وساعات بيشارك فى المنتدى بردود بعضويتى بس وهوا موهوب فى التأليف الموسيقي بس للأسف مش موجود فاحب اتشرف انى اطرح سؤالى على حضراتكو..فى الاوركسترا السيمفونى الاصوات المنخفضه ما تعرف بالباص تدون على مفتاح فا السطر الرابع وكان الباص الاول الاعلى ما يعرف بالباريتون يدون على مفتاح فا السطر الثالث قديما ولكن الان اصبح صول مجالا للاثنين والسؤال هنا انا اعرف ان الالات التى تخص الباص وتدون على مفتاح الفا هيا الباص والكونترباص والترومبيت باص لكن ما معنى كلارينيت سيبيمول فوجدت بعض الكتب ذكرت انك مثلا اذا عزفت مجموعة نوت للباص على السلم الكبير الرئيسي دو ماجير فانها تعزف على الكلارينيت من سيبيمول ماجير ومن الكور فا اى سلم فا ماجير ..هل هذا يعنى ان تلك الالآت مخصصه للعزف من تلك السلالم فقط ام انها فى حالتها الطبيعيه تكون متونه على تلك السلالم كسلالم رئيسيه..اى الجميع يعلم ان السلم الرئيسي فى البيانو هوا دو ماجير فهل ذلك يعنى ان السلم الرئيسي فى الة الكلارينيت هوا سيبيمول ماجير وفى آلة الكور هوا فا ماجير أرجو الرد من فضلكم