بنحن لزمان
----------
أى واحد فينا يكبر
يحن قوى لأيام زمان
لما كان طفل صغير
وبعدها بسنين كمان
يعيش مع الذكرى فى حنين
لو كات فرح وللا أنين
غيرت شكله السنين
ومغيرتشى قلب كان
---
يفتكر فترة صباه
قبل ما الكتاب يروح
والصحاب كانوا الحياة
سوا بنيجى أو نروح
ربيع وصيف ويا القمر
على باب حارتنا كان السهر
عشنا البراءة فى السمر
مع بعض بالأسرار نبوح
---
ولما روحنا المدرسة
والمنافسة هنا تبان
دايما فى حاجة كويسة
وحتى فى الألعاب كمان
منافسة بينا كلنا
بنحب فيها بعضنا
والحقد ميجيش عندنا
يرحم زمان وايام زمان
---
بس أيه فكرنى تانى
بأحلى أيامى الخوالى
خلانى أعيشها بشكل تانى
ليل نهار ساكنة فى بالى
يمكن مكالمة ابراهيم
فاكره أنا وفاكر ابراهيم
فاكر عطية فاكر غنيم
فاكر سهرنا والليالى
---
اللى كان لقطة فى عمرى
والعمر فيه لقطات كتير
شريط طويل صوره بتجرى
واللى باقى مش كتير
فيه كتير أنا مش ناسيهم
والحنين فكرنى بيهم
هيجى يوم راح الاقيهم
باتمنى ليهم كل خير
بنحن لزمان
العرض العادي
