المقامات الموسيقية - الصفحة 8

**غازي الضبع** · #71 05/08/2009, 10h13

معلشي يا جماعة
الموضوع توقف شوية الكام ساعة اللي فاتوا
هاه ..
كنا بنقول إيه ؟

**abuzahda** · #72 05/08/2009, 10h46

اقتباس:

المشاركة الأصلية كتبت بواسطة غازي الضبع

ساعات باحس إن الموضوع بسيط قوي ..
الأغنية دي من مقام كذا ..
وشكراً
..
لأ ..
شكرا مين .. ؟
ده في الحتة الفلانية قلب على مقام كذا .. وبعدين استعمل السلم الفلاني عشان ينقل على المقام العلاني
واستعمل الغماز ، والحساس
ودخل على جنس المقام ، وبعدين الفرع
وابصر إيه ، ومادريك إيه ؟؟؟
وبعدين دخلنا في سكة المقامات الشرقية ، والغربية
والربع تون ، والثلاث اربع تون ...
وإدِّيني يا بني كرد الـ فا
طب اشمعنى كرد الـ فا ، يعني ماينفعش كرد الـ دو
ومعنى كده إن كل مقام هاينبثق منه سبعة مقامات
يعني هل هايبقى فيه منه
كرد دو ، وكرد الـ ري ، كرد الـ مي ،،،،، إلى كرد الـ سي
ويا ريت على كده وبس ..
شوية وتلاقي الحجاز مع البياتي بيعملوا مقام جديد اسمه الترالاملم
والـ نهاوند مع الراست هايجيبوا مقام صغير ويسموه فوزي
إيه يا عم ده ؟؟
مش لاعب

ده الموضوع طلع كبير قوي ومعقد قوي قوي قوي
..
ده غير بقى شوية المقامات اللي تسيح النافوخ ..
إيشي سوزناك ، وإيشي زنجران ، وإيشي سيكا ، وهزام ، وراست ، والـ حسيني والـ صبا والجمال ..
شوية ومانكتـفيش بإسم واحد ..
تخش بقى على راحة الأرواح ، وملبس الأفراح

لا .. لا .. لا

فيها لاخفيها

م الآخر .. أنا عايز أتعلم اللعبة دي
إن شالله نعملها على حلقات ، ودروس ، وواجب ، وتذنيب ، وضرب كمان ( ع الهوا )
...
ويا سلام لو الموضوع مايقتصرش على الأغاني فقط ..
يا ريت كمان نتعلم من قراءات القرآن الكريم

...
ونشوف في النهاية .. هانتعلم أنا وأمثالي ولا لأ ؟
يا ريت أساتذتنا الموسيقيين يتبرعوا لنا بهذه الدروس المجانية ( تحتيها خط أهوه .. عشان ماحدش يتعشم في حاجة )

جايلك يا عمّي ياسين ، و جايبلك برشامة (للمراجعة مش للغش)
بس اوعى الأستاذ يشوفها ، أنا سمعت عن الموضوع من ابو مندور ، جيت جري . خاصة و انا غاوي اتعلم .
سيدنا الشيخ سمعجي قفل كتّاب الأوزان ، قلت اتعلم مزيكا ، و اهو الاتنين اخوات .

الموضوع ،فكرته عظيمة ، تناسب جمالك و عِلم و أستاذيّة المايسترو الغالي

هسيبك تراجع البرشامة لغاية ما اخدلي جولة

**unicorn** · #73 05/08/2009, 10h54

اقتباس:

المشاركة الأصلية كتبت بواسطة abuzahda

جايلك يا عمّي ياسين ، و جايبلك برشامة (للمراجعة مش للغش)

فى الجون دى يا استاذ سيد ,
برشامة صح الصح , شكلها كدة من مخلقات سيادة الرئيس

انا اللى كنت محتاجها و الله

**unicorn** · #74 06/08/2009, 01h08

استاذ محمد الالاتى ,
انت نسيتنا و لا إيه ؟؟
يا ريت يا باشا تتفضل تكمل ,
أنا بإذن الله هابعت أجيب الأورج من الواد ابن اختى عشان الشغل يبقى على ميه بيضة.

**غازي الضبع** · #75 06/08/2009, 19h29

اقتباس:

المشاركة الأصلية كتبت بواسطة abuzahda

جايلك يا عمّي ياسين ، و جايبلك برشامة (للمراجعة مش للغش)
بس اوعى الأستاذ يشوفها ، أنا سمعت عن الموضوع من ابو مندور ، جيت جري . خاصة و انا غاوي اتعلم .
سيدنا الشيخ سمعجي قفل كتّاب الأوزان ، قلت اتعلم مزيكا ، و اهو الاتنين اخوات .

الموضوع ،فكرته عظيمة ، تناسب جمالك و عِلم و أستاذيّة المايسترو الغالي

هسيبك تراجع البرشامة لغاية ما اخدلي جولة

الله

إيه الملف الجامد ده يا عم سيد

يا حبيب الكل

الله يرضى عليك يا شيخ

**abuzahda** · #76 06/08/2009, 21h15

اقتباس:

المشاركة الأصلية كتبت بواسطة غازي الضبع

الله

إيه الملف الجامد ده يا عم سيد

يا حبيب الكل

الله يرضى عليك يا شيخ

و الله يا ابو فاس ، أنا رفعته و انا بقدم ماوس و بأخر كيبورد (حلوة دي)
لكن لاقيته عجب حبيبي ماندو ، مع إنه مالهوش علاقة بسيادة الرئيس
و بعدين عجبك (الله يطمن قلبك) ، و الحقيقة إن عندي مجموعة مشابهة من الملفات ، مقسمها على حسب المقامات ، و ذلك لرغبتي المتجددة في معرفة سر السماع ، و يعلم الله أن معرفتي بالمقامات معرفة سطحيّة ، أتمنى تعميقها .
فلما لمحت موضوعك الرائع هذا ، إستبشرت خيراً ، فلما وجدت الأستاذ الألاتي قد أقبل مُعلماً ، زادت فرحتي .
و سوف ألتزم بالحضور النظامي ، تلميذاً يُحسِن التعلم . فإن وجدت مناسبة لرفع أي ٍ مما لدي من الملفات سأستأذن الأستاذ في رفعها .

**غازي الضبع** · #77 06/08/2009, 21h36

اقتباس:

المشاركة الأصلية كتبت بواسطة abuzahda

و الله يا ابو فاس ، أنا رفعته و انا بقدم ماوس و بأخر كيبورد (حلوة دي)
لكن لاقيته عجب حبيبي ماندو ، مع إنه مالهوش علاقة بسيادة الرئيس
و بعدين عجبك (الله يطمن قلبك) ، و الحقيقة إن عندي مجموعة مشابهة من الملفات ، مقسمها على حسب المقامات ، و ذلك لرغبتي المتجددة في معرفة سر السماع ، و يعلم الله أن معرفتي بالمقامات معرفة سطحيّة ، أتمنى تعميقها .
فلما لمحت موضوعك الرائع هذا ، إستبشرت خيراً ، فلما وجدت الأستاذ الألاتي قد أقبل مُعلماً ، زادت فرحتي .
و سوف ألتزم بالحضور النظامي ، تلميذاً يُحسِن التعلم . فإن وجدت مناسبة لرفع أي ٍ مما لدي من الملفات سأستأذن الأستاذ في رفعها .

أوكيــــــــه يا كبيـــــــــــــــر
طب ممكن ترسل لي بعضهم على الإيميـــــــــــل
إلهي ينجحلك المقاصد

**الألآتى** · #78 07/08/2009, 05h22

فى الدرس السابق .. إتكلمنا عن معنى لفظ مقام .. ومما يتكون المقام ..

اليوم حانتكلم عن المقامات بشئ من التفصيل ..

قسم الموسيقيين المقامات إلى عائلات وفصائل .. لسهولة حصرها ..

سأضع لكم اليوم .. رؤوس هذه العائلات .. يعنى عميد كل عائلة .. وبعدين حانتكلم عن كل عائلة بالتفصيل ..

العائلات

الراست ، النهاوند ، الحجاز ، البياتى ، العجم ، السيكا ، النوا أثر ، الكرد ، الصبا

هذه هى المقامات الأساسية .. التى يتكون ويتفرع منها جميع المقامات التى نعرفها ..

تخيلوا أن عدد المقامات تعدى الأربعمائة مقام .. وكلها منشقة ومنبثقة من هذه الفصائل ..

والمسألة سهلة جداً .. هى عملية تباديل وتوافيق بين هذه المقامات الرئيسية .. فينتج لنا عدد لا حصر له من المقامات الفرعية ..

وحتى لاندخل فى حيطة سد .. حانتكلم عن كل مقام بالتفصيل ..

**الألآتى** · #79 07/08/2009, 05h27

مقام الراست

مقام الراست ياجماعة هو أبو المقامات الشرقية .. وهو مرادف لسلم الميجور الغربى .. مع تغيير طفيف ..

وكلمة ( راست ) تعنى المستقيم .. يعنى لابيروح شمال ولا بيروح يمين .. ماشى زى القطر .. مابيحودش .. مالوش دركسيون .

والراست ياإخوانى يبدأ من درجة الدو .. يعنى درجة ركوزة ( نغمة الدو ) .. وإسمها بالفارسية ( راست ) ..

يعنى نفهم من كده .. إن مقام الراست .. غير نغمة الراست .. طيب

وإحنا قولنا قبل كده .. إن المقام يتكون من ثمانية درجات نغمية .. يبقى الراست يبدأ من الدو .. حتى يصل لنغمة الدو الجواب .. يعنى الدو إللى على اليمين .. ( دو ، سى ، لا ، صول ، فا ، مى ، رى ، دو ) ونقراها من الشمال لليمين .. إتعودوا على كده بقى ..

طيب .. إحنا قولنا إن الراست مرادف لسلم الميجور الغربى .. طيب إيه الفرق بينهم ؟

الفرق إن نغمة أو درجة المى فى الراست منخفضة ربع تون .. ونغمة السى كمان منخفضة ربع تون .. يعنى إيه الكلام ده ؟

من المعروف إن هناك مسافة صوتية بين كل نغمة وإللى بعدها .. يعنى لما بنقول دوووووو .. وبنقول رىىىىى

مابنقولهمش زى بعض .. لأ .. بنقول الرى بنغمة أعلى من الدو .. هى دى المسافة الصوتية .. وهناك نصف مسافة صوتية ..

وعند الشرقيين .. هناك ربع مسافة صوتية .. يعنى ربع تون .. هو ده الفرق بين الموسيقى الشرقية والغربية ..

والملف المرفق .. حايوضح كل إللى أنا قولته ..

**عفاف سليمان** · #80 07/08/2009, 06h10

والله يا استاذنا محمد الالاتى
الشرح جميل جدا بصوت حضرتك وواضح ووافى
وانا فهمت الحمد لله
بس بردوا هرسم شجره مفرعه منها المقامات
وان شاء الله بس استنى كل الشرح واكيد هلاقى حل لكل فرع من الشجرح ينبثق منه اى نغمه
واكيد هتبقى سهله جدا زى شرح حضرتك
جزاك الله كل خير وكل سنه وحضرتكم والجميع طيبين وبخير
اختكم والتلميذه التى تحاول ان تجتهد اختكم عفاف
ياربى مفيش تلميذه كمان معايا تساندى لازم احقق النجاح علشان ميبقاش شكلى وحش وسط اخوانى
تحياتى للجميع