[QUOTE=عمرو الهندواى;592429]
استاذ عادل ازى حضرتك ومن فضلك عندى سؤال
حضرتك كنت عايش مع العظماء لفترة طويلة وكنت عارف نهج حياتهم
طيب هما كانوا بيسمعوا انواع من الموسيقا الغربية او اليونانية او الهندية او اى موسيقا غير شرقية
ولا كانوا لايسمعوا غير الموسيقا الشرقية فقط 
لانه الناس كانت عظماء واكيد كانوا منفتحين على العالم الخارجى رغم ضعف وسائل الاتصال فى وقتهم
مثلاا انا سمعت انه عبد الحليم كان بيحب يسمع الموسيقا البريطانية اكتر او الفرنسية ومحمد عبد الوهاب كان بتابع دائما الجديد فى الموسيقا العالمية لكن المشكلة انه فى مؤرخين يقولوا لا ماكانوا بيسمعوا غير الشرقية فقط وناس تانية تقول هما كانوا بيعرفوا ايه الجديد بس واكيد الحقيقة عند حضرتك انت اكتر
تحياتى
عزيزى عمرو
انت سألت سؤال مهم بس هو خطورة السؤال ان المؤرخين دول بيبقى معظمهم ناس بتحشر نفسها فى حاجات عمرهم ماشوافوها وبيتكلموا عن ناس ماتوا ومش حايقدروا يردوا ,, والخبيبة التقيلة دى بتبان فى المسلسلات اللى بيعملوها عن العمالقة وبتكون كلها كذب اوهبل اوحاجات ماحصلتش او اساءة من دون سبب لناس لهم عشاق ومعجبين يعنى آخرها المسلسل الفاش بتاع صباح مثلا .. اى عازف كمان عربى بيعشق انور منسى مكانش فيه داعى انو يتشوه بهذه الطريقة لأن الناس بتسمع عزفه فقط ومكانش فيه داعى انهم يطلعوا رشدى اباظة اللى كان اسد بالهيافة دى .. وف وسط المسلسل قال ايه : عبد الحليم قاعد مع صباح عند الهرم وبيقول لها فاكرة المايسترو اللى كان معاكى فى الحفلة بتاعة اخر مرة ايه رأيك تيجى نتبناهم وناخدهم ونعمل فرقة ونسميها الفرقة المسية ونشتغل عليهم علما بأن الفرقة الماسية كانت معمولة ككيان رهيب قبل كده بسنوات كتير ..
وورد فى وسط الوار ان صباح واحمد فؤاد حسن كانوا فى بلد اجنبى وخلصوا الحفلات بعدين قالت لو ان عندها 3 حفلات طلعوا فجأة فى باريس وكلام هبل .. يعنى ايه الفرق بين الفنانين الكبار والعوالم ؟ ان العالمة لو متفقة على فرح وجه لها فرح اجره احسن او فيه نقطة اكتر انها بتروح الفرح الاحسن وتتفق مع عاملة تانية تروح الفرح الواقع الاولانى ده .. ده شغل العاولم لكن العمالقة يعنى لو فيه حفلة فى دولة تانية لازم الاتفاق عليها يكون بالطريقة الآتية :
متعهد الحفلات هناك اولا بيكلم مدير الفرقة الماسية ( حسن انور ) وبعد ما يتكلم مع حسن انور مش بيتفقوا وخلاص .. فيه طقوس خطيرة .. لازم حسن انور يكلم مدير فرقة ام كلثوم ( حسين معوض او المهندس الدسوقى ابن اخت ام كلثوم ومدير اعمالها ) يشوف فى الموعد بتاع السفر ده فيه حفلات متفق عليها مقدما لأم كلثوم لن فرقة ام كلثوم والفرقة الماسية نفس العازفين تقريبا وام كلثوم لها الاولوية وبعد ما مدير فرقة ام كلثوم يرد على مدير الفرقة المسية يرد على متعهد الحفلات الاجنبى ويتم التنظيم واللى عادة بيتأجل او بيتحدد ميعاد تانى غير اللى كان عايزه المتعهد فى الاول .. بعدين لازم ييجى المتعهد القاهرة ويعمل عقد ويدفع مبلغ وشرط جزائى وشغلانة يعنى العقد يتضمن السفر والإقامة والتأشيرات وكل حاجة مش سايبة العملية كده .. المهم من كلامى تحس ان العملية او الحياة مع العمالقة ليها طقوس .. ده بالعكس الملحنين العظام زى عبد الوهاب كانوا بيسعموا الاجنبى اكتر من العربى .. يعنى عبد الوهاب حافظ معظم سيفمونيات كل ملوك الموسيقى الكلاسيكية وكمان الروس زى تشايكوفسكى وكورساكوف والموسيقى الحديثة الاسبانية والإيقاعات الغريبة والجديدة يعنى لازم يكون مطلع على كل اللى بيحصل فى العالم عشان يبقى هو كمان فى الصورة
طيب ماكانش بيسمع الموسيقى العربية ازاى ؟؟؟؟؟؟
كان بيسمع التراث يعنى الموشحات والحاجات دى لكن العربية الحديثة كان ليها طقوس محددة يعنى كان عبدالوهاب لما حا يعمل لحن قادم لأم كلثوم كان بيسمع بسرعة كده هى غنت ايه آخر حاجة للسنباطى وبليغ مثلا عشان يبقى عارف هى وصلت لإيه وامكانيات الفرقة وصلت لإيه بعد آخر لحن سابق هو عمله .. يعنى تلاقى ملحن دخل الجيتار يروح بليغ مدخل الاكورديون ييجى السنباطى يدخل البيانو وهكذا .. بس هو المشكلة الخطيرة فى التأريخ الناس اللى بتستغل ان معظم الناس بتنسى التاريخ ( فى كل حاجة ) ويشتغلوهم .. يعنى العملية بقت سبوبة ممكن اى واحد يألف كتاب على حاجات ماحصلتش او معلومات مغلوطة
مع اطيب تحياتى عادل صموئيل
ــــــــــــــــــــــــــــــــــــــــــــــــــ ـــــــــــــــــــــــــــ
أستاذي المُحترم أ/ عادل صموئيل
ليه حضرتك متعملش كتاب عن العمالقة ، أو سيرتك الذاتية معهم ؟!
رد: طلبات نوتة أ / عادل صموئيل الجزء الثانى
العرض المتطور
