طلبات نوتة - الصفحة 43

**عادل صموئيل** · #1 27/09/2011, 13h06

احبائى

اقدم لكم من روائع فن العيار التقيل
رائعة سيد مكاوى

عندك شك ف ايه

اتننى ان تسعدكم

انا دونت المقدمة والمذهب والكوبليه الاول والتانى سهل جدا زى ما عودتكم على سرعة 160
اما الكوبليه الثالث دونته ممكن شكله اصعب شوية بس ما ينفعش يتبسط اكتر من كده على سرعة 120
طبعا فيه اجزاء بترجع بخلاف المرجعات الطبيعية المكتوبة ودى ترجع لإختيار العازف , يعنى ممكن تعيد كل المقدمة تانى او تعيد الكوبليه من اوله تانى يعنى حسب ما انت تحب
بس طبعا المفروض نتعود على السهل جدا والاصعب بالتدريج عشان حتى نبقى استفدنا شىء
مع اطيب تحياتى

**عادل صموئيل** · #2 11/10/2011, 20h12

احبائى
اقدم لكم نوتة

احبك
لعبد الحليم حافظ

مع اطيب تحياتى

**عادل صموئيل** · #3 13/10/2011, 01h58

احبائى

اقدم لكم من اغانى الأطفال

كان فيه فراشة

غناء نيللى والحان عمار الشريعى

اهديها للأخت العزيزة انيتا ولكل مدرسى الموسيقى

المقدمة الموسيقية فيها مشكلة عمار الشريعى الازلية وهى انه لما بيعمل الاغنية على الاورج فقط بيسجل كذا تراك يعنى انت بتسمع زحمة وانا تعبت على ماخرجت منها لحن اساى حلو عشان تعزفة آلة واحدة اتمنى يعجبكم
مع اطيب تحياتى

**عادل صموئيل** · #4 16/10/2011, 01h01

احبائى

اقدم لكم نوتة صعبة جدا وطلعت روحى فى الكتابة
واهديها لأخى العزيز وائل علوى بمناسبة عيد ميلاده
وهو قال انه سمع ان فيه ناس بتتحدى ان اى حد يقدر يدون النوتة دى
بس انا تحديتهم واليكم النوتة ومش ناقصة فتفوتة على رأى وائل

اقدم لكم

مش عوايدك

مع اطيب تحياتى

**عمرو الهنداوي** · #5 16/10/2011, 23h33

ياجماعة نوتة فكرونى كان فيها مشكلة فى ترتيب
الكوبليهات وانا حلت المشكلة على قد ماقدرت
انا رتبت الكوبليهات بترتيب الاغنية الطبيعى
كل الكوبليهات على ملف نوتة واحد وعندى شغالة كويس
ناقص ترقيم الصفحات الداخلى اللى استاذ عادل
كتبه ودة ما ينفع يتغير لانه محتاج
فونت اسمه adelmusic
ودة الفونت اللى استاذ عادل بيستخدمه بعد ما قام
بالتعديل عليه علشان يكتب موسيقا عربية شرقية زى ماهو عايز
على العموم الملف المرفق فيه النوتة كاملة
وكما كتبها استاذ عادل وبالتريب الطبيعى بتاع الاغنية
والتى كان يقصدها استاذ عادل انا عندى
كل حاجة شغالة تمام طباعة وكل حاجة

اشكرك يا عمرو الف شكر
بس للتوضيح الفونت adelmusic ده كله من اختراعى
يعنى مش فونت وانا عدلته , يعنى انا انشأته بعد ما الفونتات اللى من نفس النوعية تعبتنى وناقصة حاجات كتير بحتاجها , انا اشتغلت عليه يعنى الاول كان رقم واحد بعدين عملت رقم 2 , والفونت ده انا بعتبره احسن فونت فى العالم ممكن تستعمله فى البرامج الموسيقية , واخد منى سنة تجارب , يعنى فيه على الاقل عشر مميزات واضافات مش موجودة فى الفونتات الموجودة , وبعدين انا ربنا اكرمنى ببرنامج متطور اسمه font creator بس اصدار حديث اوى تقدر تحدد عليه كل علامة انت عايز تبقى ايه على الكيبورد يعنى العلامات الايقاعية مثلا , كانت مشكلها موجودة فى الفونتات والموجود منها مفركش مكانه على الكى بورد
انا عملت كل العلامات المطلوبة والمتشبك والمربوط
بعدين بادى مثلا a s d f g h وهكذا كل العلامات بدء من النوار ع الشمال والديول فوق وكل علامة الشيفت بتاعها هو والديل تحت
يعنى تشتغل عليه وانت مغمض , بجد هو تحفة , يعنى يرجع له الفضل فى كل اللى انا بدونه , ولو اللى احترع برنامج انكور شاف اللى انا بكتبه حايتجنن , لأنه مش ممكن يتخيل التعديلات دى , لأنانا اهم حاجة عندى ان كل اللى انت شايفه بيبقى كمبيوتر مش حاجة ناقصة ونكملها بالقلم
مع اطيب تحياتى عادل صموئيل

**عادل صموئيل** · #6 18/10/2011, 03h23

احبائى
اقدم لكم نوتة

احسن ناس
لداليدا
اتمنى تحوز رضاكم
مع اطيب تحياتى

**وسام اكرم** · #7 19/10/2011, 09h41

الاخ العزيز (سويفي؟) المحترم
مرفق مع المشاركة برنامج DO PDF و هوا متوافق كليا مع كافة برامج التدوين الموسيقي, و استعماله سهل جدا؛
1- نصب البرنامج
2- افتح برنامج انكور و اكتب النوتة التي تريدها
3- بعد اكتمال النوتة اذهب الى قائمة File , و منها الى الطباعة Print و اطبع البرنامج
سوف تظهر لك نافذة توضح ان الملف بصيغة PDF سوف يخزن بالمحفظة MY Document
بعد الطباعة سوف تجد النوتة مخزنة على شكل (بي دي اف)
و انا تحت امرك في اي سؤال
مع تحياتي
وسام

اشكرك يا وسام على روحك الجميلة
ومن هنا تلاقى ان اى عضو بيطلب اى طلب بيتسابق خمسين عضو عشان يقدم اى خدمة
وربنا يخليكم
مع اطيب تحياتى عادل صمويل

**عمرو الهنداوي** · #8 19/10/2011, 20h52

البرنامج دة سهل وخفيف جدا اسمه نوفا
بى دى اف Nova pdf
عبارة عن بى دى اف درايفر و يستطيع تحويل اى شىء
الى ملف بى دى اف من خلال الامر اطبع
طبعا طابعة وهمية ويحفظ الناتج فى اقل من ثانية
فى مجلد المستندات او اى مكان اخر تم تحديده مسبقا
كما يمكن من خلاله دمج اكتر من ملف بى دى فى ملف واحد
الملف المرفق فية ملف البرنامج وملف بيانات التسجيل
كل التوفيق

**وسام اكرم** · #9 20/10/2011, 16h43

الاستاذ الغالي و العزيز عادل صموئيل
أشكرك جدا على كلامك الطيب, دائما انت في القلب.....
-----------------
الاخ العزيز السنباطي المحترم
برنامج سبليس 6 بكافة اصداراته لايقراء ملفات PDF و لكن هنلك مجموعة من البرامج تحول النوتة من (بي دي اف) الى ملف صوتي و منها Photoscore و PDF to Music
----------------------------
الاخ العزيز عمروا الهنداوي المحترم
تعرف كم غلاوتك عندي, و البارحة ( الاربعاء) فتشت لك قسم طلبات النوتة من صفحة 1 الى 449 , مع الاسف نوتة رق الحبيب غير موجودة, و على الارجح قد سحبت, في صفحة 124 وجدت المقدمة و المذهب فقط.
-------------------------------
الاخ العزيز جدا و الغالي جدا وائل
ارجوك اذا كانت النوتة ( رق الحبيب ) موجودة عند, ارجوك ان ترفعها بغض النظر عن اي خطاء يها مع خالص امتناني و تقدييري
-----------------------------
الاخ العزيز سويفي المحترم
مرفق مع المشاركة نسخة من خط ( انستازيا), بعد تنزيليه, اذهب الى ( لوحة التحكم) او Control Panel في الموكمبيوتر و منها الى الخطوط(fonts) استبدل الاصلي بهذا الجديد, و سوف يمكنك استعمل (كار بيمول و كار ديز) على برنامج انكور, و اذا احتجت مساعدة, فلا تتردد ارجوك
المخلص
وسام

**عادل صموئيل** · #10 21/10/2011, 22h44

احبائى
اقدم لكم اليوم عمل افتخر بأنى دونته
عمل من العيار التقيل جدا , او تقول من اعلى عيار على الاطلاق
اقدم

اقبل الليل
يعنى العمل ده استغرق منى وقت طويل فى التدوين , وبالذات لأن السنباطى لما عمله وضع فيه كل امكانياته تحفيظا للفرقة بالعود , وماكانش عامل ان حد ممكن يدونه فى يوم من الايام , ومن هنا تأتى الصعوبة ان فيه جمل من الصعب تتدون , بس خلاص انا اتعودت او متخصص فى الحاجات المستحيلة دى , بس اهم شىء انك قبل ماتحاول تعزفه انك تكون حافظه من التسجيل اوى , عشان فيه سرعات كتير مختلفة , وخدع مقامية كتير , وأدليب كتير جدا حاولت بقدر الامكان انى اكتب اللى ممكن يتكتب على ميزان تسهيلا للقراءة
لو انت عملت دراسة متعمقة فى اعمال كل ملحن من العمالقة حتلاقى شىء غريب جدا , ان السنباطى لو عمل 900 جملة فى مقام البياتى , مع ان المقام واحدوالفرقة واحدة حاتلاقى ال 900 جملة لهم 900 نكهة مختلفة , يعنى كان العملاق مش بس بيبدع فى التلحين ولكن كمان بيبدع فى الإخراج , يعنى كنا حتى فى الفرقة المسية وقدامنا نوتة كنا بعد مانقرا الجملة يمسك العود ويقول اسمعونى انا عايزها كده , كنت تلاقى البياتى مش بياتى اللى بنقوله كل يوم , فيه عفريت , ولما تكتشف العفريت ده تتجنن , تلاقيه لعب فى نغمة ال لا نقصها كوما , او اى نغمة تانية يعنى ينقصها شعرة او يزودها شعرة وبتختلف من لحن لآخر , ويمكن دى من اهم مميزات عزفى المتواضع على الكمان , مش حقول انا عازف شاطر اوى لكن تميزى انى حافظ العفاريت دى , يعنى من كتر ماعزفت مع كل العمالقة ودونت لهم شخصيا فى حياتهم , طبعا فيه الحان كتير سمعتها اصلا من الراديو طول عمرى قبل ما اشتغل معاهم , بالخبرة اكتشفت العفاريت دى , اما اقبل الليل فيه نكهة متميزة جدا على اللحن كله , ان كانت الآلات اللى اصلا مش شرقية اللى زى الاكورديون مثلا , كاطانتش بتعزف مع الفرقة طول اللحن يعنى ممنوع , بيعزف الصولو بتاعه ويسكت , يعنى كتير جدا كنا نروح اسكندرية فى حفلة مافيش فى الالحن صولو اكورديون
كان مختار السيد الله يرحمه بيدينا الدوزان , ويقعد على المسرح بدون ان يقول اى جملة , لأنه لو عزف حا يبوظ نكهة الكمنجات لكن حلاوته وتميزه فى الصولو , طبعا الاورج والجيتار نفس الموضوع , فى اقبل الليل السنباطى قلب الموضوع خلى مجدى الحسينى يعمل الاورج صوت اورغن كنيسة , وخلاه يعزف طول اللحن من اوله لآخره
لذلك تحس اللحن فيه حاجة كده جاية من فوق , تحس انك فوق السحاب مش على الآرض بالذات فى الكوبيليه بتاع يا بعيد الدار عن عينى ومن قلبى قريبا
اتمنى ان تسعدوا بالنوتة , واتمنى زى كل مرة ان كلمكم تحاولوا تعزفوا فيها , يعنى اكبر مكافأة على تعبى الكبير فى التدوين , ان اقل واحد عزفا او مبتدىء انه يعزف منها جملتين يعنى احس كانى اخدت مليون جنيه
مع اطيب تحياتى