مشاركات خارج موضوع طلبات النوتة

[سليم العباس]

أنا من محبي الفنان هاني شاكر على الصعيدين الفني و الإنساني ، لكن الألبوم الخليجي (أغلى بشر ) الذي طرحه منذ فترة وجيزة ، أثار العديد من التساؤلات و الانتقادات .

- هل أضاف هذا الألبوم شيئاً إلى رصيده الفني ؟!! لا أعلم .. لكنه بالتأكيد زاد من رصيده البنكي .

- لابأس أن يغني هاني شاكر بلهجة غير لهجته المصرية ولكن كان عليه أن يقوم بطرح أغنية خليجية ناجحة قبل أن يخرج علينا بألبوم كامل .

- لا أستطيع إدراج هذا الألبوم تحت أي مسمى ، فهو ليس خليجي و أيضاً ليس رومانسي أو طربي أو معاصر .. هو فقط ألبوم !

الخرف الفني هو ما أصاب الفنان هاني شاكر كما أصاب العديدين من قبله .
قد يكون الاعتزال هو الحل الأمثل في حال عدم قدرته على التعافي .

تحية لجميع الأعضاء .

اخى العزيز انت قلت الكلمة الصح وسط كلامك : رصيده البنكى
يعنى زمان كان العمالقة من اهم مميزاتهم الذكاء عبد الحليم مثلا وسط كم هائل من اغانيه عمل اغنية او اغنيتين خليجيتين بحيث ان الاغنية لو عجبت الخليجيين كان بها ولو ماعجبت باقى المستمعين فى باقى الدول خلاص مايسمعوهاش لكن لما يعمل كذا اغنية مرة واحدة ( وانا ماسمعتهمش اصلا ) يبقى زى ما انت قلت
مع اطيب تحياتى عادل صموئيل

[منذر44]

الاستاذ القدير عادل صموئيل
انا بحثت كثيرا على النت عن برنامج كول اديت ولم استطع تحميله
ارجو ان كان لديك نسخة منه ان ترفعها للمنتدى ولو كان اي
شرح عن طريقة العمل عليه وفوائده
مع اجمل تحياتي

[المنير]

السلام عليكم
تفضل يا سيدي

[منذر44]

اخي العزيز اشكرك جزيل الشكر
لك مني اجمل تحية

انا بشكر الاخ العزيز جدا المنير على البرامج اللى بيقدمها واللى انا شخصيا استفدت منو كتير جدا يعنى لو جزء من الفضل فى البرامج اللى بتساعدنى على التدوين لكم
بس فيه حاجة هل كول ايديت 2 بيشتغل على ويندوز 7 ؟
لن النسخة اللى عندى جربتها على ويندوز 7 ما اشتغلتش

بس فيه معلومة مهمة شركة ادوب اشترت كول ايديت وغيرت اسمه لكن لما تفتحه شكله زى ماهو بالظبط يعنى ما اتغيرش منو حاجة وواحد صاحبى قال بيشتغل على ويندوز 7 بس كان الكلام على السريع يعنى ماتحققتش منو لأن لما ادوب اشترته خلت رقم الاصدار 1 ارجو انكم تتحققوا من المسألة دى
مع اطيب تحياتى عادل صموئيل

[khalil mourad]

المشاركة الأصلية كتبت بواسطة khalil mourad

أستاذي الفاضل
قمت بتجربة ثانية ، أي أني فتحت أنكور 4,5 الذي أستعمله و رسمت الكودات و الدوائر ، على الشاشة تظهر دائرية لكن عند الطبع فإنها تصبح بيضاوية
لذا أظن المشكل في برنامج أنكور نفسه
خالص تحياتي

اخى العزيز
طيب معلش اتعبك فى تجربة تانية افتح صفحة وورد اوفيس وكرر نفس التجربة يعنى ارسم دوائر بس تاكد انها منتظمة الاستدارة وجرب اطبعها ونشوف
لن العيب عندى مش فى اكور فقط لكن فى كل حاجة يعنى حتى لما بطلع صورة بيبقى الوجه بيضاوى مش مستدير
والسؤال الاهم ملفات البى دى اف النوت اللى انا بنزلها بتشوف الكودات مستديرة ولا بيضاوية شوية من فوق لتحت
مع اطيب تحياتى عادل صموئيل

يا سيدي تعبك راحة
قمت بالتجربة التي طلبتها حيث طبعت الدوائر ،و كانت النتيجة : ليس هناك أدنى مشكل الدواير دائرية و ليست بيضاوية
تحياتي

[المنير]

السلام عليكم
بالنسبة للبرنامج الذي دكره الأستاذ عادل صموئيل "adobe audition" به إضافات كثيرة. سأحاول رفعه بعد تقسيمه إلى أجزاء صغيرة الحجم. يمكن أيضا رفع الكراك فقط للذين يتوفرون على نسخة تجريبية.
بالنسبة للكول إيديت: هناك مشكلة بسيطة مع بعض نسخ الويندوز7 بحيث يجب نسخ البرنامج التالي و لصقه حسب المسار التالي: c-windows-system32. و ذلك لتسجيل الصوت من الجهاز.
تحياتي.
اخى العزيز المنير
الموضوع انا عندى على جهازى نسختين ويندوز الاولى على سى وهى اكس بى والثانية على دى وحبيت اجرب ويندوز 7 وطبعا لن معظم البرامج اللى بشتغل عليها وما اقدرش استغنى عنها واحتمال انها لاتعمل على ويندوز 7 حبيت الاول اروح محل سايبر واجرب على جهاز هناك الحمد لله كل البرامج اشتغلت ماعدا كول ايديت والبرنامج ده بالذات بيمثل لى منتهى الامهية اولا لأنى لما بدون بنزل الملف الصوتى عليهلأنو زى ما انت عارف ممكن تسمع نو مازورتين مازورتين وهو مثالى للمدونين واخطر حاجة كمان موضوع المونتاج الدقيق اوى اللى بستعملو فى كل معزوفاتى يعنى بسجل براحتى واكرر بعدين باخد احلى حاجة ولما سألأت اصدقائى قالوا لى على ادوب وعندى نسخة شغالة الحمد لله وانا اشكرك على البرنامج وان شاء الله نجربه بس هو الجديد النسخ فى system 32 ودى ماحدش للعلم يعرفها وانا بستفيد منك كتير جدا جدا مع اطيب تحياتى عادل صموئيل
مع اطيب تحياتى

[وليد100]

السلام عليكم ورحمه الله
بعد التحيه
احب ان اطرح موضوع هام واتمني ان اسمع اراء الاخوه الاعضاء وعلي راسهم الموسيقار الفنان عادل صموئيل
ماسبب تميز الموسيقار محمد عبد الوهاب في تاليف موسيقي الاغاني وخصوصا الاغاني الطويله بطريقه تبرز صنعه قويه جدا وبطريقه مختلفه عن باقي الفنانين الملحنين ؟؟؟
مع تحياتي
وشكرا
وليد
اخى العزيز
سؤال جميل جدا وقصته طويلة ايضا جدا ولكن يسعدنى احكى لكل من يحب يسمع ... عبد الوهاب اولا عنده غزارة لحنية رهيبة ودى بيكتشفها كل اللى تعابشوا معاه على الطبيعة بمعنى انك لو اخترت احلى مقدمة موسيقية لأم كلثوم مثلا هل تعلم انه كان ممكن يعمل لنفس الاغنية دى عشر مقدمات وانت تختار احلى واحدة ؟ وكانت بتحصل معانا كتير يعنى اى اغنية انت بتسمعها من اغانيه الطويلة لأم كلثوم وبعدها لعبد الحليم ثم وردة ثم فايزة احمد كان المقدمة اللى بنبتدى بيها فى البروفة الاولى تختلف عن المقدمة اللى بنعزفها فى البروفة رقم 40 وهى بتكون اللى انتم بعد كده بتسمعوها فى الراديو لأنه بيفضل يغير ويبدل ويشيل ويحط ويبتكر الاعيب وايقاعات وصولوهات
ولما نحلل الموضوع الاول نبتدى بالجذور .. يعنى عبد الوهاب الثائر اول ما ابتدا يغنى كان الجو العام ساعتها ان المطرب هو الاساس والموسيقى شىء ثانوى مصاحب يعنى مكانش فيه حاجة اسمها مقدمة موسيقية او موسيقى كوبليه كان الفرقة لو اللحن بياتى مثلا بتقول جملة اسمها دولاب بياتى وتفضل تكرر فيها لحد ما المطرب يتنحنح ويغنى وكانت الدواليب دى جمل محفوظة زى السلام الجمهورى كده والموسيقيين حافظين شوية دواليب فى كذا مقام وبيستعملوهم هم هم فى كل الاغانى ..يعنى دولاب هزام فى كل اغانى الهزام وهكذا ودوره هو سلطنة المطرب عشان ماينفعش ييجى من بيتهم ويغنى على طول .. لما ابتدا عبد الوهاب كان الاول لازم يمشى على هذا النهج بعدين غزارته اللحنية خلته ثار على الوضع ده .. وكلمة ثار يعنى لما جدد عمل ثورة وانقلب عليه كثير من المتزمتين اللى قالوا المتمرد ده حايبوظ لنا الموسيقى بتاعتنا ولولا عبد الوهاب لكنا فضلنا فى الدواليب دى لحد الآن وما صار موسيقى ولا يحزنون المهم انه الاول عمل جملة ثم جملتين ثم اكتر لحد ما المقدمة بقت عمارة بعدين فى موسيقى الكوبليهات عمل نفس الشىء وفيه حاجتين يعنى انت لو راجعت بدقة شديدة التاريخ الموسيقى تلاقى عبد الوهاب عمل اكبر كمية من المقطوعات الموسيقية البحتة اكتر من اى ملحن تانى وده يدل على غزارته اللحنية المتدفقة وذكاء عبد الوهاب الخطير انه اكتشف ان عندنا موسيقيين خطيرين يعنى عندك انور منسى ومحمد عبده صالح والعقاد وعشرات يعنى حرام دول اخليهم يبقوا سنيدة للمطرب يعنى ليه طالما ممكن انه يعمل لهم جمل عبقرية تظهر عبقرياتهم والامثلة تثبت ذلك .. الجميل ان العملاق عادة مش بيعمل لنفسه ولكن بيعمل للعصور التالية .. ان الناس لما ابتدت تتذوق الموسيقى دى ابتدا كل الملحنين يعملوا مثله .. لكن اقول لك سر ان انا وكل الموسيقيين امثالى كنا فى اى اغنية جديدة نعملها بنكون مترقبين وحانتجنن نشوف عبد الوهاب عمل ايه المرة دى .. وانا باخد من كلامك واقول انت قلت الاغنية الطويلة ودى نقطة تانى خطيرة جدا ... ممكن ملحن زى منير مراد مثلا مع شادية يعمل لك 60 اغنية تجنن قصيرة لكن مش اى ملحن له نفس وتقل يعمل اغنية طويلة وكلها حلوة يعنى شوف اى اغنية من اغانى ام كلثوم فيها كام جملة تلاقى من اولها لآخرها كل جملة احلى من التانية لأن فيه نظرية اى جملة دون المستوى بتوقع الكوبليه كله يعنى ام كلثوم كانت على الاقل بتغنى كل جملة 4 مرات عشان المستمع يتذوقها ويتلذذ بسماعها وتقول اللى بعدها تخيل حضرتك لو جملة سخيفة او متكلفتة يبقى الكوبليه كله فى الباى باى .. وحتى لما بيعمل شىء متطور اوى وام كلثوم كانت مش بتقبله بياخدها ع الهادى لحد ماتقبله وتموت فيه زى ادخال الجيتار الكهربائى مثلا او زى جملة عينى عينى ع العاشقين فى دارت الايام كانت معترضة على الجملة ومارضتش تغنيها كان فى البروفات هى تغنى وتسيبه يغنيها ومرة قال لها طيب انا حاجى معاكى الحفلة وانتى غنى وانا حقول عينى ع العاشقين ومرة ف مرة هى حبتها وتلاحظ فى الحفلة انها عادتها كتير والجمهور اتهبل على اللون الجديد ده بإختصار ياعزيزى عبد الوهاب ده كان : دماغ
مع اطيب تحياتى عادل صموئيل

[وليد100]

السلام عليكم
استاذ عادل صموئيل
تحيه طيبه لحضرتك وبعد
من الاراء التي قيلت عن الفنان عبد الوهاب وموسيقاه ان الابداع والجمال في موسيقاه يكمن في انه ينتقل من جمله جميله الي جمله اروع واجمل من سابقتها وهكذا ....والسؤال المهم ماهي قضايا عبد الوهاب الموسيقيه التي كان يريد ان يرسخها ويبثها في اسماع الجمهور وهل هناك قضيه رئيسيه كان يعمل عليها دائما ام انها قضايا متعدده
(وانا اضرب لك مثلا لكي نكون اكثر تواصلا فانا افهم ان الغناء عند عبد الوهاب واعني هنا التلحين علي وجه الخصوص كان يعني ان اللحن لابد وان يتماشي مع الكلمات وكان عبد الوهاب رحمه الله يؤكد علي ذلك في كل لحن يقدمه بل في كل شطر يلحنه باستثناء بعض الهفوات التي يختلف عليها البعض )
وشكرا
وليد

[المعمري]

من هو مؤلف هذا السماعي يا أساتذة يا كرام .
السماعي في المرفقات .




http://www.sama3y.net/forum/attachme...0&d=1395620404

[المعمري]