طلبات نوتة - الصفحة 34

**عادل صموئيل** · #1 03/03/2011, 18h30

احبائى
اولا اقدم اطيب التهنئة لأخى العزيز عزت على عيد ميلاده انا رديت على سؤالك عن انكور ممكن تروح هناك تشوف الرد
ثانيا ارحب بعودة الاخت العزيزة الغالية جوليانا بعد غيبة طويلة ارجو ان تكونى معنا دائما
ثالثا اقدم نوتة
عاشت بلادنا
للأخت الجديدة نور واتمنى ان تستفيد منها ( على فكرة انا قدمت لكى نوتة رفع العلم فى مشاركتك السابقة لكن الظاهر انك ماشفتيهاش ) يعنى المفروض ان الاعضاء الجدد يواظبوا على دخول المنتدى عشان انا احس بجدية طلباتهم يعنى بيحصل كتير واحد طلب طلب من 15 سنة وانا دونته وهو مادخلش المنتدى من ساعتها
واخاطب الأخت نور ( وطبعاً كل مدرسى الموسيقى المجتهدين فى المنتدى )
طبعاً الكل هنا يعرف انى بحاول ان اقدم كل خبرتى ومعلوماتى لكل ابنائى واحبائى
انتى طلبتى مارشات لطابور المدرسة وانا افضل انك تبحثى هنا فى موضوع طلبات النوتة يعنى انا دونت اكتر من 100 نشيد ممكن تاخدى منهم موسيقى مارشات تكفيكى طول عمرك يعنى تختارى جمل من الاناشيد وتكررى الجملة مرتين وتلصقى وراها جملة من نشيد تانى يعنى ممكن تعملى لنفسك كذا كوكتيل من الاناشيد العظيمة دى
وانا شخصيا يعنى كموجة اول تربية موسيقية وفى الوزارة صانع اعمال يعنى بعمل المسابقات وحاجات كتير من منهج او كتب الموسيقى بتاعتكم , المنهج والمسابقات ده حاجات احنا بنفرضها عليكم يعنى لازم تنفذيها لكن الطابور ده بتاعك انتى كمدرسة موسيقى يعنى شخصيتك انتى , وانت مديرة الطابور تنفذيه زى ماتشوفى احسن حاجة , والطريقة االلى انا قلت عليها هنا ( وطبعا الكلام موجه للجميع ) انك تعملى طابور متميز يعنى انا كانت بتصادفنى مشكلة ( كفنان ) كنت بقرف منها يعنى ادخل 20 مدرسة الاقى الطابور نفس هو هو كل حاجة يعنى مدرسة حافظة جملتين تعزفهم ف الطابور وكل المدرسات بيعملوا نفس الجملتين , بالنسبة للموجهين بتبقى حاجة مملة ولما تكبرى وتبقى موجهة حاتحسى بده , طيب فين انتى ؟ يعنى فين ذوق مدرس الموسيقى والفنان المفروض ان يكون جواه , بالطريقة اللى انا بقول عليها لو عملتى ( من مدوناتى الكتير هنا ) كذا كوكتيل ممكن لو انا الموجه بتاعك وزرتك 20 مرة ممكن اسمع منك عشرين طابور مختلف مش كده ولا إيه ؟
آخر سؤال انتى طلبتى عظيمة يامصر هل انتى عندك اورج شرقى ؟ طبعا انا يسأل لأن احب اعرف كل امكانيات المدرسين اللى بتعامل معاهم هنا فى المنتدى
مع اطيب تحياتى واكتبى لى انك خلصتى النوتة دى

**عزت شحاته** · #2 04/03/2011, 22h53

استازى الجميل / عادل صموئيل

اغنية ( انا مهما خدتنى المدن) للمطرب عماد عبد الحليم
اغنيه جامده قوى ومناسبه جدا لعيد الام ووطنيه فى نفس الوقت
( وبيها نفس مواصفات التى طلبتها الاخت انيتا والتى ارشحها لحضرتك )..
(حاولت رفعها لم استطع لان رفعتها لحضرتك قبل كده فى صفحة 337)
.................................................. ..................
الاخت nourshd
نوتة اغنية ( عظيمه يا مصر)
.................................................. .................

**عادل صموئيل** · #3 06/03/2011, 00h29

احبائى
وسط التطورات المتلاحقة كل يوم ومش عارفين ايه حايحصل بعد ساعة
اقدم لكم بناء على طلب الأخت العزيزة جوليانا
نوتة اغنية الشهيد يابلادى

اول ماسمعتها هى على سلم رى الكبير او عجم على رى لكن وجدت انها بتوصل لنغمة صول فوق المدرج طبعا مفيش تلاميذ يوصلوا للنغمة دى , وطبعاً اولا عشان معزة الاخت جوليانا عندى وعشان ما اكونش تغبت على تدوين اغنية مش حاتقدر تنفذها لأن الاولاد حاييجو عند النغمة دى وحاتطلع نشاز طبعا , وطبعا الكلام ده للجميع زى ما انتم عارفين
انا قلت اخليها من دو يعنى ننزل كلمة لقيت نفس النغمة لسه عالية يعنى بقت فا مالهاش حل قلت انزلها من لا حاتبقى النغمة العالية مى يعنى مالهاش حل لأن لو اللحن ما ينفعش ينزل اكتر من كده , وطبعا دى من مشاكل الفقداء اللى بيلحنوا دلوقتى يعنى يكون اللى بيغنى صوته مسرسع اوى يعمل لع مصيبة زى دى , يعنى جدير بالذكر زمان مثلا المطرب الرئع كارم محمود كانت نغمة صول دى بيعملها وهو مغمض وعنده اعلى لكن كان الملحن الفنان بيعمل له اللحن فى المنطقة دى يعنى جمل موسيقية جميلة جداً لكن اللاحن مش مفتوح اوى بحيث ان لو حاول حد يغنيها من طبقة اقل ممكن ينزل باحته لأن الغليظ حيكون فى حدود المعقول , لكن الخايبين بتوع دلوقتى يعمل النغمة العالية والنغمة الواطية فى اللحن مسافة بينهم زى من هنا لأخر فيصل , وبعدين زى تنويه الاخت جوليانا خلوا بالكم ان المذهب تلحين الاستاذ بليغ حمدى يعنى طبعا شوفوا الفرق بين جمال الجملة القديمة والجديدة ولاحظوا ان فيها اوكتتاف برضه لكن بين العالى والواطى اوكتاف يعنى اى مطرب ممكن يغنيها من اى مكان لكن مانجيش نعمل المسافة الكبيرة دى فهمتوا حاجة
انا طبعا دونت الالحن ومش عايز اخليكم تحسوا اننى تعبت دونته تانى 3 مرات ولكن انا تعبت ودونته مرة واحدة لكن عندى فى البرنامج ممكن اغير البيتش او التون بتاع النوتة لأى درجة انا عايزها
عملت مرة من رى ومرة من دو ومرة من لا وكل واحد يختار اللى تعجبه , يعنى كأنك فى محل بيتسا وتختار
طبعا اول مرة تحصل دى ولكن ابتسموا لأنكم بتعيشوا فى عصر عادل صموئيل يعنى طبعا اكيد ببقى عارف المشاكل والامكانيات اللى عندطلبة المدارس وربنا يسترها ونكمل السنة دى على خير , لأن اللخبطة دى ماحصلتش عمرها
يعنى مالهاش سابقة عشان نتخيل ايه الوضع فى التعليم يعنى حتى ثورة يوليو حصلت فى يوليو كان اجازة الصيف بعدين استقر العام الدراسى , اما ثورة عرابى ماكانش فيه مدارس اصلا
معلش استحملونى تخاريف عواجيز مع اطيب تحياتى وفاصل ونعود

**عادل صموئيل** · #4 15/04/2011, 20h00

احبائى

اقدم لكم نوتة
آه لو تعرف يا حبيب قلبى
اهديها للأخ العزيز عاصم المنشاوى
اللحن ده متميز انه معمول باستايل اوروبى يعنى كانك بتسمع موسيقى اسبانى او ايطالى وذلك واضح من نوعية الآلات لكن عبد الوهاب الخبيث جدا العبقرى جدا لازم يعمل فى كل حاجة لها طابع انت او اى شخص يتخيله لازم يعمل حاجة عكسية , يعنى اى حد لما يسمع طابع اوروبى يبقى خلاص طابع اوروبى , لكن عبد الوهاب عشان يقول احنا المصريين أهم , عمل صولوهات قانون وناى وتواجد عبقرى للرق , يعنى شىء مذهل بالنسبة للأوربيين قبل العرب
مع اطيب تحياتى , طبعا انا قمت بتبسيط النوتة كا العادة جدا لن مجدى الحسينى كان احياناا بيتشاقى شوية

**وسام اكرم** · #5 16/04/2011, 17h10

[QUOTE=slimanaa;518675]يا ريت حد من الاساتذه يدون لنا تقسيمة الموسيقار الكبير فريد الاطرش (ادي الريع)او(عش انت) لانها صعبه ويلي عندو قدرات لتدوينها سيكون بالفعل موسيقار بكل معنى الكلمه وانا بعرف ان كل عضو حابب يعزف هذه التقسيمه الرائعه والمميزه والخالده لملك العود الراحل فريد الاطرش وستكون النوتة فريده من نوعها لان حتى الان ما في حدا دونها او قدر يدونها.
من اخوكم سليمان
-----------------------------------------
الاخ العزيز جدا سليمان المحترم
هذه نوتة ( عش انت) من تدوين الاستاذ القدير عادل صموئيل و قد رفعها قبل سنة تقريبا. أرجوا ان تنال رضاك مع خالص حبي و تقديري
المخلص
وسام

**عبدالرحمن مهند** · #6 18/04/2011, 11h41

نوتة البحر بيضحك ليه الشيخ إمام

**armendo** · #7 16/02/2011, 08h30

اقتباس:

المشاركة الأصلية كتبت بواسطة حنان الشافعى

الأستاذ الفاضل عادل صموئيل انا مدرسه بإداره سمنود محافظه الغربيه - انا دفعه 97 - انا عندى موهبه العزف سماعى وكتبت كذا نوته على برنامج انكور وحازت جميعها على اعجاب الموجهين وزملائى - يا ريت يكون لدينا دورات تدريبيه على برنامج انكور وغيره من البرامج المفيده لنا كمدرسين - وبطلب من جضرتك نوتات اغانى انا بعزفها سماعى ولكن تهمنى النوته للدقه مع الطلبه وهى :-
عظيمه يا مصر
يا اغلى اسم فى الوجود
ياللى عاش حبك يعلم
رجاله وطول عمر ولادك ( صوت بلادى )

الأخت العزيزة حنان الشافعى صباح الخير..اليك نوت اغنيتى يا اغلى اسم فى الوجود وصوت بلادى من تدوين الأستاذ عادل صموئيل وايضا ارشح اغنية تعيشى يا بلدى للمجموعة وهى ايضا من تدوين الأستاذ عادل .....ارمندو

**عادل صموئيل** · #8 17/02/2011, 21h59

احبائى
اقدم لكم نوتة نشيد من كلاسيكيات الاناشيد الوطنية
ومن اوائل الاناشيد المصاحبة لثورة 1952
ومن مميزاته اشتراك كل النجوم فيه
نشيد الجيل الصاعد
واهديه للأخ العزيز ابو كارم وانا والله مش بنسى حد منكم بس الضغوط عليا فظيعة
مع اطيب تحياتى والقادم ان شاء الله

**عزت شحاته** · #9 18/02/2011, 15h37

اى خدمه

**وسام اكرم** · #10 18/02/2011, 20h25

اقتباس:

المشاركة الأصلية كتبت بواسطة نور الصباح

الأخ الحبيب والصديـــــــــق الغالى الفنان الكبير والأســـــــــتاذ /

عـــــــــــــــــــــــــــــــــــــــادل بــــــاشـــــا صموئـــــــــــــــيل
سلام الله عليكم ورحمته وبركاته
وبعـــــــــــــــــــــــــــــــــــــد :
أرجو أن تكون فى أتم صحة وسعادة وراحة بال : -
أقــــدم لجنابكــم الملف الصـوتى لهــــــذا النشـــــــــــيد الجميل الذى
لا أعرف مؤلفه ولا ملحــــــنه ولكننى أذكره منذ المرحلة الإعدادية
وهـــو نشـــــيد (( نحــــــن الشــــــــباب ))
أرجـو من جنــــابكم التكرم بتدوينــه ونقدمــــــــه لهـــــذا الشـــــــباب
الجميل ( الورد البلدى ) الذى تفتح فى جناين وبساتين مصر والذى
حقق مالم نحققه على مدى عمرنا ومالم نكن نتوقع أن يتحقق
وتقول كلمات النشيد :
نحن الشباب لنا الغــــــد ........... ومجـــــــــده المخلــــد
شعارنا على الزمن عاش الوطن........عاش الوطـــــــــن
بعنا له يوم المحن أرواحــــــــنا ........بـــلا ثمـــــــــــن
إلى آخـــر كلمات النشيد
وشكرررررررررررررررررررررررررررررررررررررررا

أخوكـــــــم عاشـق تراب مصــــر - نور الصباح -

-----------------------------------------
الاخ العزيز احمد المحترم
تحية طيبة
قصيدة نحن الشباب من كلمات الشاعرالرقيق الاخطل الصغير و الحان الموسيقار اللبناني محمد فليفل.
مرفق مع المشاركة نوتة مبسطة و ملف صوتي لهذه الانشودة ارجوا ان تنال رضاك مع التقدير
وسام