مشاركات خارج موضوع طلبات النوتة

[منذر44]

هايل يا استاذ لقد تم حل المشكلة
بالمناسبة لقد وصل عدد مرات تحميل البرنامج الى 251 حتى الآن وخلال اقل من يومين
مع اجمل تحياتي

اخى العزيز
ربنا يزيد ربنا يبارك
انا نفسى كل الناس يستعملوا انكور انا متعصب لو اوى مع انى شفت برامج كتير يمكن احسن منو او فيهم مميزات لكن من وجهة نظرى لو انت تثق فى كلامى انكور احسن برنامج على الاطلاق يعنى سوف كل نوتاتى حرف حرف استحالة تتدون كده على اى برنامج تانى لأن انكور من السهل انى اضيف عليه اضافات
مع اطيب تحياتى على فكرة انا لما كتبت الشرج هنا لقيتك اون لاين ماقدرتش اخرج انتظرتك لحد ماتكتب تقول انك حليت المشكلة انا بحرص جدا ان اى خدمة توصل ليكم

[منذر44]

استاذ عادل ومن فضلك لدي بعض الاستفسارات المهمة وذلك لفائدة الجميع
1-كيف يكتب الادليب
2-كيف يكتب الربع تون النصف بيمول والنصف دييز
3- كيف يتم تحويل النوتة الى ملفpdf
4-اذا اردت سماع نوتة من تدوينك عن طريق البرنامج فما هي الطريقة
وشكرا
اخى العزيز
انا موضوعى يعنى احب ان كل حاجة ستوى على مهلها قبل ان ننفذ الطلبات اللى انت طالبها هنا وانا تحت امرك اولا لازم تكون اتعودت على استعمال البرنامج كما هو بنسبة 100% يعنى تذاكر كويس جدا الملفين اللى انا منزل فيهم الشرح وتطبقهم وتسألنى وانا تحت امرك لأن فيه حاجة انا ممكن اقولها لك لو انت دايس البرنامج كويس حاتفهمها بسرعة جدا ولو انت لسه مش متعود عليه حاتتلخبط انا طبعا مش متأخر واحب اصدقائى وتلاميذى يبقوا احسن منى .. بس طبعا لازم التوضيح ان برنامج انكور برنامج غربى يعنى لما بكتب النصف بيمول والنصف دييز هى بتبقى مكتوبة فقط البرنامج مش بيغنيها يعنى دى لما تطبع النوتة وحد يقراها بتبقى عادى لأن البرنامج بيقراها كما النغمة فى الدليل واحنا بنتحايل عليه يعنى حتى الادليب نفسه احنا بنتحايل على البرنامج واول سؤال اسأله لك هل تعرف كيف تضيف فونت ( خط ) على جهازك بطريقة صحيحة ؟ عشان دى مهمة جدا جدا
مع اطيب تحياتى عادل صموئيل

[عادل صموئيل]

الاخ العزيز منذر 44

اولا اقدم لك كيفية تحويل النوتة الى pdf
اقدم اليك هذا الرابط يحوى ملفين سطبهم واحد بعدين الثانى حايفتح لك صفحة على الانترنت مالكش دعوة بحاجة يعنى اقفلها وسطب التانى ونفس الحكاية
هنا بيكون نزل لط طابعة وهمية ضمن الطابعات الل على جهازك
افتح ملف الانكور وكانك حاتطبع الملف من file ادخل عى print اضغط عليها حاتفتح لك نافذة فيها الطابعات يعنى لو عندك طابعة اصلا حتلاقى اسمها مكتوب اختر من الطابعات دى pdf 995 اضغط عليها تفتح لك نافذة اكتب فيها اسم الاغنية يعنى الاسم اللى حايبقى ده اسم ملف البى دى اف بعدين اعمل ok وانتظر لحد ما يحمل تطلع لك صفحة البى دى اف سهلة ؟

اليك الرابط

http://www.a7ssass.net/download95614.html

مع اطيب تحياتى

[عادل صموئيل]

الاخ العزيز منذر 44 وطبعا الكلام موجه الى كل من يهمه الامر فى المهارات المتقدمة فى انكور
انا التميز بينى وبين زملائى زى ماقلت من قبل انى كنت بالليل اعمل مع العمالقة والصبح مدرس موسيقى بتعامل من ناس ممكن بتبدأ من الصفر .. يعنى كان ليا زملاء كبار لكن شغلهم كان بيبقى للمحترفين اوى ما يعرفوش يتعاملوا مع المبتدئين لذلك تلاقى نوتاتهم وشروحاتهم محتاجة حتى مش طالب فى الكلية ولكن طالب فى دراسات عليا على الاقل
وفى التعمال معى تلاقينى بشرح بطريقة ممكن يستفيد منها الجميع
بالنسبة لتميز انك تمتلك انكور بيعطى كذا ميزة بس اهم شرط انك تتعلم عليه صح وتقدر تنقل عليه اى نوتة بدون مشاكل واقصد النقل يعنى عندك مثلا نوتة قديمة مكتوبة بالقلم زمان كنا بنشتغل عليها وخلاص النهارده بعد ماشفنا نوت الكمبيوتر اختلفت الرؤية يعنى جمال الخط ووضوح الصورة بيخليك لاتطيق تنظر فى النوتة المكتوبة بالقلم او يمكن ماتعرفش تقراها ... من مزايا انكور ايضا انا بعتبره مدرس موسيقى مجانى موجود معاك فى بيتك 24 ساعة
يعنى مثلا انا كاتب نوتة لحن كذا صفحة .. وطبعا الجمل الموسيقية لما تلقى نظرة على اللحن كلو .. بتلاقى اجزاء سهلة واجزاء صعبة او اشكال او تركيبات ايقاعية ممكن انت ما شفتهاش من قبل .. طبعا معروف عن عادل صموئيل انه بيدون النوت بطريقة اسهل كتير من غيرة لكن التبسيط والتسهيل بيبقى فى حدود يعنى احيانا بيبقى جزء من الجملة مش ممكن يتبسط وإلا اتغيرت معالم الجملة وهنا بضطر انى اكتبها بالظبط زى ما انت بتسمعها وهنا قد تكون تفعيلة صعبة او ماوردتش عليك قبل كده ... انا كمدرس موسيقى انصحك لازم الاول تشتغل على السهل لحد ما سرعة القراءة عندك تبقى عالية اوى بعدين نشتغل على الصعب بحيث ان تبقى زى القطار ما يقفش امامك شىء .. وللعلم اهم شىء فى القراءة انك تقدر تقرا جزء كبير يعنى صفحة مثلا بدون توقف ودى بتيجى بالتدريب ... طيبانت الحين معاك نوتة من النوت بتاعتى ( او اى نوتة ) ولقيت مازورتين ورا بعض فيهم شىء صعب عليك فى العلامات الايقاعية بمعنى حاجة غير معتادة اللحن كده .. هنا تميز وجود انكور انك تنقل الجملة بحالها مش الجزء الصعب .. بعدين تقف بالماوس على اول مازورة وتضغط على المسطرة هنا انكور بيعزف لك الجملة بيحصل حاجة نفسية خطيرة جدا ليك .. ان المازورة اللى انت مش عارف تقراها تلاقى طلاسمها اتفكت
بعدين ممكن تقف على المازورة الصعبة نفسها وفيه امكانية فى انكور انك تبطىء السرعة يعنى تسمع المازورة كذا مرة .. بعدين ترجع السرعة زى ماكانت وتسمع المازورة كلها ؟؟ كأنك رحت لمدرس موسيقى وشرح لك ازاى تعزف الجملة ... طبعا التفعيلة الغريبة عليك دى بعد كده خلاص بتبقى سهلة ولو وردت فى اى جملة تانية حاتلاقيها خلاص بقت مفهومة
بالنسبة لكتابة الادليب على انكور .. برضو فيه شقين هل عندك ادليب مكتوب من قبل على ورقة او من نوتة من بتوعى انت طابعها وعايز تنقلو على انكور ولا انت عايز تدون ادليب والتانية تفرق يعنى لازم تكون من قبل بتعرف تكتب ادليب بالقلم على ورقة يعنى تكون متمرس شوية على تدوين الادليب بالذات لن اختلاف الادليب عن الموزون ايه ؟ الموزون ممكن تعمل بإيدك اشارة الميزان وتحس بالعلامات الايقاعية داخل الميزان ده يعنى جوا المازورة ايه
لكن الادليب بيبقى احساس بطول او قصر العلامات لأنو مش بيبقى منتظم يعنى كلمة بيبقى طويلة وكلمة قصيرة او حرف اطول او حرف اقصر وعيب الادليب انو عادة حسب شطارة المطرب والملحن معا بيبقى العلامات الايقاعية 90% مش واخدة حجمها الطبيعى يعنى النوار بتبقى نوار وحتة او نوار انقص حتة .. وهنا المدون لازم يحتال عليها لأن لو حاتشتغلها اكاديمى يعنى بمزان الذهب حاتطلع كل حرف وراه نقطتين او اكثر وتبقى مشكلة ماحدش حايعرف يقراها
وعشان تكتب ادليب فيه حاجتين بنعملهم اول حاجة انى بخلى المدرج كلو مازورة واحدة
من قائمة score تطلع لك قائمة من اسفلها تختار mesuer per system دى معناها عدد الموازير فى السطر حتلاقى باللون الازرق رقم ده العدد الفعلى الموجود دلوقتى مثلا 4 خليها 1 ( واحد ) واعمل ضغطعلى السهم عشان لو عايز تعمل اكتر من سطر ادليب يعنى افرض لو عندك 7 اسطر ادليب ماتقعدش تعملها كل سطر
السهم بيديك لحد آخر المقطوعة بعدين لما تخلص الادليب ادخل النافذة تانى وخلى الرقم 4 بعدين ok طبعا

بنروح للقائمة mesures زى ما بنتختار الميزان بتاعنا فى الدروس الاولى لما تفتح نافذة الميزان حتلاقى على الجنب الميزان اللى انت عليه مكتوب 4 على 4 مثلا وجنبو كلمة other الكلمة دى انا بحسها من نعم ربنا علينا فى انكور لأن الايقاعات الرقية فيها حاجات مش موجودة فى البرنامج اصلا يعنى لو تلاحظ انو فيه الموازين الغربية المعتادة لكن مع الخاصية الرهيبة دى ممكن تخلى الرقم اللى فوق وتحت زى ما انت عايز انا بخلى الرقم اللى فوق 11 والرقم اللى تحت 2 لما تنظر اوى فى النافذة دى فى يسارها اسفلها اوى فيه مربع لو علمت عليه بيخفى الميزان وبرضو اضغط ع السهم واعمل او كى
طبعا لازم نجرب كل الكلام ده كتير بحيث لما نيجى نشتغل بيبقى عادى
مع اطيب تحياتى وتحت امركم فى الاستفسارات

[عادل صموئيل]

فيه اضافة صغيرة

انت سألت كيف تكتب نصف بيمول ونصف دييز انا فى الملفات اللى ارسلتها لك فيهفونت اسمو انستاسيا المعدل
وسألأت هل بتعرفتنزل فونت على جهازك بطريقة صحيحة ؟ منتظر الرد
لن الفونت بيبقى عبارة عن خط بيضاف لجهازك لو نزل بطريقة خاطئة الجهاز مش حايقراه يعنى انت مش حتشوفو اصلا بين الفونتات

السؤال الاخير : هل انت ممكن تنزل نوتة من عندى مباشرة على انكور عندك
مش حاينفع لكذا سبب اول شىء لو تدقق اوى اوى فى النوت اللى انا بكتبها تلاقى حاجات خاصة انا مخترعها عن طريق فونتات خاصة بيا انا مخترعها ولو ملف الانكور ده نزل على اى جهاز تانى مش عليه الفونتات دى حاتطلع حاجات غريبة
وثانيا فيه حاجة مهمة انا كنت منزل طول الوقت يعنى خلال ال خمس او 6 سنوات الماضية انكور اصدار 4,5 وهو اللى انا منزل لكم .. بس انا من كذا شهر اشتريت طابعة حديثة جدا ( حتة طابعة تجنن يعنى ليزر الوان ) عيبها انها احدث من الاصدار ده اضطريت انزل اصدار 4,55 هو شكلا نفس الاصدار اللى عندكم بس لو ملف اصدار وانت تفتحو على الاصدار اللى قبلو مش حايفتح ومع الاسف ما اقدرش انزل الاصدار الجديد ده لأنو حجمو كبير صعب ينزل لأن موقع الرفع اقصى ملف بيقبلو عشرة ميجا
فيه حاجة كمان العلامات الشرقية انا عندى بكتبها بطريقة ما بتطلع حلوة اوى لما تبقى pdf لكن لما بتتعزف على الانكور بتبقى وحشة اوى يعنى انا كمحترف ( شوية ) ليا طريقتين بكتب بيهم العلامات الشرقية فيه طريقة لما البرنامج بيعزفها بتبقى السى نص بيمول انت شايفها نصف بيمول لكن البرنامج بيعزفها نصف بيمول
وطريقة تانية بضطر استعملها فى بعض الجمل الموسيقية لما تسمعها تطلع دوبل بيمول طبعا بتبقى الجملة مقرفة
ةمن هنا استحالة انى ادى الملف لحد لأن اللحن بيبقى متشلفط
مع اطيب تحياتى

[منذر44]

استاذ عادل تعجز الكلمات عن شكرك
انا فعلا حاولت تنصيب الفونت ولكن خرجت رسالة تقول ان هذا الملف موجود مسبقا
وانا اريد برنامج انكور كي اكتب عليه نوت قديمة موجودة عندي
وبالنسبة لقراءة النوتة فأنا أقرأها بشكل جيد وبسرعة فمثلا اغنية اجمل طريق في دنيتي
وما ان حضرتك انزلت نوتتها في المنتدى حفظتها في يومين واصبحت اعزفها على العود
كاملة ...اما بالنسبة لنوتة نقطة الضعف فلقد اذهلتني لدقتها وسهولة قراءة النوتة
حتى لتكاد تنطق قبل عزفها
وفي النهاية انا متشوق جدا لنوتة علمتني الدنيا التي وعدتنا بها
مع اجمل تحياتي
منذر علي

[عزت شحاته]

احبائى اعضاء المنتدى
عيد سعيد علينا جميعا
وربنا يديم المعروف والمحبة
ويحمى مصرنا
امين

[عادل صموئيل]

اخى العزيز
كلامك اسعدنى جدا جدا وخلانى احب اساعدك اكتر واكتر وللعلم فيه حاجة فى مادة الموسيقى بتختلف عن المواد الدراسية التانية ان مدرس الموسيقى لما بيكون موهوب وشاطر بيحب جدا التلميذ الشاطر وبيبقوا اصدقاء يعنى بيعطيه كل ماعنده بعكس المدرس الفاشل بيبقى انانى مش بيقول حتى كل القليل اللى عنده وانا اتعملت من المعالقة اننا بنشتغل للذكرى والتاريخ والدليل ان اغانيهم بعد مرور عشرات السنين قيمتها بتزيد بعكس اللى بيشتغلوا للفلوس اغانيهم موضة وتبطل وتنطوى مع الزمن
انا طبعا ممكن بتكلم كتير بس زى ماقلت انا بخاطب مستويات مختلفة
بالنسبة للفونت ده بالذات انستاسيا هو موجود اصلا على الجهاز بس انستاسيا العادى يعنىالغربى فقط لكن احنا عملنا لو تعديل فيه نص البيمول ونصف الدييز
وطريقة النتطيب الصحيجة لأى فونت على الجهاز انت من الدرايف اللى عليه الويندوز وليكن C بتفتح الدرايف تلاقى كذا ملف حتلاقى ملف اسمو windows افتحو وانظر على ملف داخله اسمه fonts افتح الملف ده وانظر بدقة شديدة فى الفونتات الموجودة حتلاقى انستاسيا الموجود اصلا على فونتات الويندوز قم بحذفه
لتسطيب الفونت الجديد ضعه على اى درايف وليكن E مثلا
وانت فاتح صفحة الفونتات من كلمة file ادخل منها على install new font بيفتح لك نافذة حتلاقى كلمة drives
حتلاقيها على سى افتح الخيارات واضغط على الدريف اللى عليه الفونت وليكن E زى ماقلنا حتلاقى اسم الفونت ظهر فى النافذة الكبيرة اضغط عليه عشان يبقى نشط واعمل ok والف مبروك
لو انت عايز تكتب نصف بيمول ونصف دييز فيه احتياجين الاول لو العلامات فى الدليل عادة 99 % من المقامات بتاعتنا دليلها من عائلة البيولات وانتى لو بياتى مثلا بتخلى الدليل 2 بيمول ونحط شرطة على المى بيمول تصبح مى نصف بيمول وطبعا بنحطها على كل مدرج والشرطة دى بناخدها من باليتة Symbuls اول سطر فيها 2 كرونا وتانى سطر الشرطة على الشمال بتضغط عليها وتاخدها وتحطها على البيمول انت حتشوف علامة زائد او صليب صغير حط خط الصليب الافقى على التكور بتاع البيمول تطلع مضبوطة يعنى جربها كذا مرة طبعا بحيث تحطها على طول ماتطلعش طالعة او نازلة اكتر م الازم وحتى لو طلعت مش فى مكانها امسك الشرطة من طرفها اقصى اليسار مش من منتصفها واسحبها زى ما انت عايز بس يستحسن تتمرن عليها كتير الاول فى صفحة فاضية وامسحها يعنى
لو الدليل من عائلة الدييزات مش بيتعدى اما فا نصف دييز او فا نصف دييز ودو نصف دييز هنا انت بتخلى دليلك من غير علامات يعنى دليل سلم دو الكبير بعدين بنضيف العلامات بطريقة يدوية لأن مالهاش حل غير كده
لتدوين النصف بيمول او دييز علامات عارضة فى وسط الطريق بتخلى الفونت انستاسيا ( طبعا الاول لازم تكون عرفت ازاى تكتب تكست من القائمة Graphic تضغط على علامة T بيفتح لك نافذة الفونتات تختار فونت انستاسيا واعمل حجم الخط 24 وخلى اللغة عربى لما تضغط على شيفت مع P يعطيك مى نصف بيمول ولما تضغط شيفت مع
j يعطيك نصف دييز الصح انك فوق يعنى فى المكان الفاضى قبل المدرجات ماتبدأ حط لك كام واحدة تحتاجهم واسحبهم حط واحدة واحدة مطرح ما تحب بس طبعا انت لما بتحط لاحظ تحط واحدة واحدة ودايما احفظ كل حركة عشان لما تقفل يفضلوا موجودين بعدين لما تخلص امسح الباقى
طبعا كل ده بييجى بالتجربة وانصحك ذاكر الشرح اللى انا عامله كذا مرة لحد ماتحس انك خلاص حفظته
مع اطيب تحياتى

[جابر المراغي]

الاستاذ / عادل صمو ئيل والأستاذ/ شحاته كل عام أنتم بخير بمناسبة عيد الميلاد المجيد ولو انها متأخرهشويه أعذرونا وجل من لابسهو

[منذر44]

استاذي العزيز عادل صموئيل يشرفني ان اكون تلميذا في مدرستك الرائعة فكما قالوا في الامثال من علمني حرفا
صرت له عبدا كما تشرفني صداقتك فهي وسام على صدري
ونعود للدرس فلقد نفذت شرحك خطوة خطوة ونجحت في كتابة النصف بيبمول ونصف الدييز
ولست انا الوحيد المستفيد من هذا الشرح بل الكثير من عشاق الفن الاصيل
وتحيتي لك
الاخ العزيز يسعدنى جدا كلامك
المهم انك تذاكر البرنامج كويس جدا يعنى اعمل تجارب الاول جرب كل حاجة بحيث تتعود على البرانمج بحيث ما يبقاش فيه عقبات وانت بتكتب عليه نوتة فعلا
مع اطيب تحياتى واى سؤال انا موجود عادل صموئيل