رأيى الغلبان فى مسلسل اسمهان

[صوت الموسيقى]

مع انى راجل مسكين يعنى لا ناقد ولا حاجة.... بس حسيت ان المسلسل ده بالذات لازم يطرح للمناقشة و التقييم على سماعى باعتبارنا منتدى مهتم بالطرب الأصيل...


م الأخر....بصراحة معجبنيش........!!!!!!!!!!!!!!!! ما يسواش يعنى الهيصة اللى اتعملت عليه ولا يليق باسم المطربة الكبيرة اللى مجاش حد زيها لحد النهارده


اولا واحد من اللى كتبوا السيناريو ممدوح الاطرش,يعنى رأيه فى كل شخصيات العيلة مش ممكن يكون محايد واولهم طبعا فؤاد اللى انا حاسس انه مهما كان خلقه ضيق و طبعه حامى لا يمكن يكون بالهيافة و المخ الصغير ده... وكذلك علياء المرأة القوية اللى هربت بولادها و ضحت بحياة الامارة عشان تربيهم فى سلام مش معقول تكون بالسلبية دى قدام بنتها ولا فريد الاطرش اللى النقاد بيقولولك المسلسل اظهر شخصيته الحقيقية و السذاجة اللى اتصف بها فى الواقع مع ان الوصف المناسب للشخصية اللى فى المسلسل دى هو : راجل على قلبه مراوح

ده طبعا غير انه مداش خط درامى مقنع للشخصية...يعنى الملك فاروق فى المسلسل كان السيناريو مورينا من الاول العوامل اللى شكلته و اللى وصلته للنهاية دى فكنا حتى فى عز اخطاءه على الاقل متفهمين مش هقول متعاطفين وده مش موجود فى مسلسل اسمهان...لا هى اللى عندها مبرر مقنع للتصرفات الطايشة دى ولا حتى شفنا فى ظروف نشأتها ما يؤدى لتكوين شخصية متقلبة و منفلتة بالشكل ده

ثانيا بقى: اختيار سلاف للدور من الاساس خطأ بيكبر فى عينى اكتر مع كل حلقة اشوفها من المسلسل.... بصرف النظر عن الفرق الكبير فى الشكل فحتى تعبيرات و شها و ابتسامتها مش بتختلف فى الانفعالات المختلفة...هو هو نفس (الماسك) البلاستيك على وشها لا بيرتخى ولا بيتشد بحيث انه مفيش فرق بين الفرح والحزن و الغضب و الحب والكره...لما باتخيل نفس الحوار بتقوله جومانا مراد او نور اللبنانية او حتى سيمون (ممثلة رائعة لسه حتى الأن لم تكتشف) ...كل ما بفتكر اداء صابرين الرائع فى مسلسل ام كلثوم ...باحس انى باقاوم رغبة عنيفة فى انى اقوم اطفى التلفزيون ....

حاجة اخيرة: النهايات بتاعة الحلقات حاجة تشل.... لكن الموسيقى التصويرية لرعد خلف موفقة جدا جدا وان كانت برضه موسيقى طارق الناصر فى المسلسل الرائع:الملك فاروق تكسب بالثلث... الحقيقة المسلسل كله كان ممكن يختلف 180 درجة لو كان المخرج حاتم على او نجدت انزور...

دى وجهة نظرى الخاصة ....فى انتظار مشاركة السماعيين الكرام بأرائهم و مناقاشاتهم...