طلبات نوتة - الصفحة 28

**عادل صموئيل** · #1 08/10/2010, 15h39

اقدم لكم نوتة فى البحر سمكة
اهديها للإبنة العزيزة النابغة انيتا
وانا حبيت اشجعها مثال للطالبة الشاطرة الموهوبة ويارب كل مدرسة يكون فيها طلبة زى انيتا كان وضع الموسيقى فى مصر كلها يختلف ( مش فى المدارس بس )
انا آسف يا انيتا اتأخرت عليكى يعنى انا مادخلتش المنتدى من يومين وصدفة دخلت دلوقتى يوم الجمعة الساعة 4 بعد الظهر لقيتك طلبتى النوتة دى وقلتى انك محتاجاها النهاردة الجمعة ضرورى لأن عندك بروفة بكرة وانا طبعا ما اقدرش اخذل اى انسان يطلب منى اى مساعدة وفعلا دونتها لك ( وطبعا حايستفديد منها ناس كتير حا يدعولك ويدعوا لى ) ومن حسن حظك يعنى ربنا ساعدك ان الاغنية سهلة جدا وفيها الكوبليه الثالث والرابع زى الاول والتانى يعنى تعتبر 2 كوبليه بس , يعنى حظك حلو ما اخدتش وقت , اتمنى تطلعيها حلو وتبقى حفلة جميلة وانا بقدمها طبعا كمان لكل مدرسين الموسيقى اللى عندنا ف المنتدى , وكل عام دراسى جديد وانتم بخير وتعملوا حفلات جميلة
مع اطيب تحياتى عادل صموئيل

**عادل صموئيل** · #2 26/10/2010, 02h01

احبائى
بعد الحاح شديد من عدد من الاحباء
اقدم لكم نوتة
امى ثم أمى
ومع ان الاغنية دى من الاغانى الحديثة من النوع اللى مش بحب اكتبه ولكن احتياج احبائى لها قررت اكتبها
ولولا ان لحنها كل الكوبلليهات زى بعض ما كنتش حاكتبها لأنها تعبتنى جدا عشان افهمها ( وانا مش فاهم انتم بتفهموا الاغنى دى ازاى ) يعنى اول ملحوظة ان طول ما انت بتسمع الوحدة بتتكسر وعادى لأن المطربين بتوع اليومين دول مش بيفرقوا انهم يبقوا برة الوحدة ولا جوة وبيغنى ولا هو هنا
ولى عليها ملاحظات مهمة
اول حاجة فيه بريك عامل زى بلاعة مفتوحة فى وسط الشارع بين المقدمة ( اللى حاولت ابسطها عشان تعرفوا تعزفوها ) وبين غناء اول كوبليه يستحسن انكم تتجاهلوه زى ما انا تجاهلته لأنه بيقلب ويكسر الرتم
تانى حاجة ودى مهمة جدا : حاولوا تتبعوا اللحن الاساسى فى الغناء زى ما انا مبسطه فى الكتابة لأن المطربين فى التسجيل بيتفزلكوا بشكل بيخرجهم برة الوحدة ودى صعبة جدا على التلاميذ اللى حيغنوها يعنى حاولوا تخلوهم يغنوا اللحن الاساسى زى ما انا كاتبه لأن المطرب لو خرج بره وطين الدنيا ممكن يتصرف لكن التلميذ ممكن يلخبط اوى طبعا
مع اطيب تحياتى

انتظروا بكره مفاجئة نوتة من العيار التقيل التقيل جداً

**عادل صموئيل** · #3 26/10/2010, 23h09

احبائى
حان وقت المفاجاة
اقدم لكم اغنية من روائع الروائع ومن الوزن التقيل جدا جدا
النهر الخالد
والأغنية دلا انا بعزفها طول عمرى لكن ما جيت اكتبها اكتشفت انها اصعب اكتر كتير من ما كنت متخيل شكلها مكتوبة واهم مشكلة انى كيف اكتبها مع التبسيط لأن ممكن نفس هذا اللحن شخصيا يكتب بطريقة ما يعرفش يقراها غير المحترفين جدا
وبدات الفكرة برسالة من اخت فاضلة من سوريا الشقيقة اسمها ارجوانة بتقول لى انها بحثت عن نوتة النهر الخالد ما لقتها واذا كان من الممكن ان ادلها على اى نوتة للحن ده يعنى هى ما طلبتش صراحة انى ادونها , لكن اهتممت بالطلب وبسرعة ذهبت الى قسم البحث فى المنتدى لم اجد لهذا اللحن نوتة قديمة من تدوين اى شخص كان , وتعجبت ازاى منتدى سماعى ما يكون فيه نوتة النهر الخالد ومن هنا جاءت البداية ودونت لكم النهر الخالد
اتمنى ان تحوز رضاكم
مع اطيب تحياتى

**عاصم المنشاوى** · #4 29/10/2010, 08h48

الأصقاء....صباح الخير عليكم

قصيدة "النهر الخالد"...لحن وغناء الموسيقار /محمد عبد الوهاب...فى عام 1954 جنبا الى جنب قصيدة اخرى وهى "الروابى الخضر"للممثل أحمد خميس...وقصيدة النهر الخالد من تأليف :محمود حسن أسماعيل الذى ولد فى فى بلدة النخيلة بأسيوط ...نفس قرية الخارج عن القانون "عزت حنفى "والتى حول الفنان /أحمد السقا قصته لفيلم تحت اسم "الجزيرة" سبحان الله على مصر !!!!ماذا كانت تنجب زمان ...وماذا تنجب الآن ...المهم ولد الأستاذ الشاعر محمود حسن اسماعيل عام 1910 وتوفى فى 1977 فى الكويت ...وله ابنة هى المذيعة "سلوان محمود"...صاحبة قطرات الندى....وقد غنى له عبد الوهاب قصائد أخرى منها "دعاء الشرق" و"مصر نادتنا فلبينا نداها"...وأم كلثوم"بغداد ياقلعة الأسود" والتى ظلت لفترة النشيد القومى للعراق...من تلحين السنباطى...برضو كان زمان....وغيرها...
-اما النهر او النيل فهو ال "اترو عا" اى البحر الأعظم عند قدماء المصريين ...وهناك فى محافظة الجيزة شارع الكورنيش اسمه حتى الآن "البحر الأعظم" ومع مرور الزمن تحولت "التروعا"الى "الترعة" ولايزال الناس يطلقون على النيل اسم "البحر" نظرا لأتساعه وعرضه....والمتعلمون فقط يطلقون عليه "النيل "وهى كلمة لآتينية"نيلوس"...اما النيل بالنسبة للمصريين القدماء فقد كان شيئا مقدسا ...ولكى تدخل الجنة بعد الممات...لابد ان تحلف امام أوزيريس "انك لم تلوث النهر".....وهو مصدر حياتهم نظرا لأن 95% من مصر صحرا ء لاتعرف المطر....ولذا تجد حب المصريين للنيل يظهر جليا بعد ان استردت مصر عافيتها وشخصيتها بعد الأستقلال سنة 1922 وظهور المد القومى المصرى والأعتزاز بمصر ...ولد جيل عبد الحليم وبليغ والموجى وقنديل والطويل ونجيب محفوظ ونشأ فى هذا الجو أم كلثوم وعبد الوهاب ورامى وشوقى وطه حسين وحافظ ابراهيم ونجيب محفوظ وكل عمالقة ورموز مصر..لذا تجد النيل موجود وبقوة...مثلا " ياتبر سايل بين شطين ياحلو ياأسمر" "انا النيل مقبرة الغزاة" قصيدة النيل""عطشان ياأسمرانى محبة""شمس الأصيل""الصبح بدرى والنيل بيجرى والزرع باسم جميل"
- لكن بعد موت النيل بعد بناء "السد العالى" وهو كارثة بيئية وصحية.على مصر..مخالفة للطبيعة الربانية...نسى المصريون شكل النيل ولم يعودوا يشعرون به ....ولذلك اتحداك لو لقيت أغنية تتحدث عن النيل...بعد سنة 1970
_طيب السؤال دلوقتى ...ايه اللى خللى عمنا /عادل صمويل
ينوتها لنا ...؟؟؟الأجابة بسيطة ...انت ناسى انه احد احفاد المصريين القدماء وعنده حنين وشوق لمصر الجميلة بتاعة زمان ....

**عادل صموئيل** · #5 29/10/2010, 12h38

اخى العزيز عاصم
اشكرك على المحاضرة الجميلة دى واشكرك انك كتبت اسمى المتواضع فى نفس الورقة اللى كتبت فيها اسماء الناس العظام دول كلهم واللى انا بحاول اعمله انى بحاول اخلى المد بتاع الناس العظام دول يبقى ويفضل زى ما هم مش طلعوا من فراغ ولكن هم امتداد لناس عظام قبلهم من 5000 سنة وهم استلموا الميراث بتاع اجدادهم وكبروه ونموه وزودا الثروة وكان من حسن حظهم او من حسن حظ البشرية ان على ايامهم كان فيه تسجيل وتدوين يعنى حفظ كامل للتراث وده مع الاسف ماتوفرش طول القرون الماضية غير فى القرن العشرين , يعن مثلا الموسيقى المصرية كانت ايه من 2000 سنة ماحدش يعرف بالتحديد لأن ماكانش لا فيه لا تسجيل صوتى ولا تدوين , كانت بتتناقل ووتوارث عن طريق الحفظ والتلقين والطريقة دى خطيرة جدا لأن مع التناقل ممكن تنقص حتة او تزيد حتة , ولكن المسيقيين العظام اللى قبل حتى ولادة عبد الوهاب حاولوا يجمعوا كل اللى قدروا عليه وبعدين جه واحد عظيم جدا ( وكان صديقى جدا ) اسمه عبد الحليم نويرة كانت خطة حياته هى محاولة جمع التراث وتقنينه يعنى ضبطه علمياً بدون ان يفسد وكان من فضل ربنا على الفن ان الراجل ده كان واصل يعنى الحكومة ساعدته وانشأ فرقى الموسيقى العربية اللى كان لها افضل الأثر على استمرار اااالقوالب الموسيقية اللى كان ممكن تنقرض واهم شىء عمله الراجل العظيم ده انه قرب القوالب الموسيقية التى من الممكن ان تكون صعبة او غير مستساغة لجيل الخمسينيات والستينيات بعد ما سمعوا عبد الحليم وام كلثوم يعنى بعد ما الموسيقى تطورت شوية وبقت اسرع يعنى الدور كان ايام محمد عثمان فى العشرينيات بيتغنى فى ساعة مع انه بالضبط كان لا يزيد عن خمس ابيات شعر , ووصلت ام كلثوم انها فى الساعة بتغنى قصيدة 30 بيت فيها 500 جملة موسيقية مثلا , هنا جاء العظيم نويرة وضغط الدور فى عشر دقائق مع الإحتفاظ بكل رونقه وجمالة ولكن بطريقة تشبع العصر , وجه عبد الوهاب وطور كل شىء حتى طور غناء ام كلثوم , يعنى سنة 1960 كان جمهور حفلات ام كلثوم كلهم فوق الاربعين يعنى اللى متعودين على قصائد رياض السنباطى
جاء المبدع عبد الوهاب واعطى ام كلثوم دم جديد وشباب جديد , خلى جمهور حفلات ام كلثوم كل الاعمار ولما الشباب اللى متعود يسمع عبد الحليم وشادية حس ان ام كلثوم بقت بتغنى اغانى شبابية واقبلوا عليها ابتدوا كمان يحبوا قصائد رياض السنباطى مرة فى احدى حفلات ام كلثوم كان زميلى واستتاذى فى الكلية الاستاذ محمد نصر الدين وهو رابع كمنجة فى فرقة ام كلثوم شفنا عدد كبير جدا من الآنسات الحلوين قال لى فى ودنى الحاجات الحلوة دى ما شفناهاش فى حقلات ام كلثوم إلا بعد الحان عبد الوهاب قبل كده كان كل الستات عواجيز , النهاردة مع الأسف كل واحد بيبحاول يطور الموسيقى بيفسدها ويخربها اكتر ما هى خربانة وانا حسيت انهم مش عايزين يطوروا لكن لما أفلسوا وما لقوش الحان ابتدوا يخربوا فى التراث , يعنى انا بمجهودى المتواضح بحاول انقذ ما يمكن إنقاذه وهو انى جمعت كل خبراتى والمدارس الكتير اللى اتعلمت منها واخترعت مدرسة جديدة وهى تبسيط النوتة الموسيقية بالذات للهواة والمبتدئين بحيث ان النوتة الصعبة اللى مش ممكن يعزفها غير المحترفين ممكن يعزفها ملايين الهواة واقول لكم على سر الاغانى اللى بكتبها ما تفرقش مع المحترفين لأن كل همهم الفلوس يعنى بيبحثوا عن الشغل فى الاغانى الجديدة لكن المستفيد الاول من النوت بتاعتى الهواة وهم امتداد بقاء زمن الفن الجميل , وعجبنى كلماتك عن النيل يعنى بحكم ان اختى الدكتورة امال صموئيل من كبار علماء الآثار وانا بكتب لها كل شغلها على الكمبيوتر اتعلمت كتير عن الحضارة الفرعونية وكان اهم شىء عند جدودنا القدماء النيل وكان تلويث النيل ده من اكبر الكبار اللى تخلى الواحد يخش النار ومع الأسف النهاردة كل واحد عايز يتخلص من اى حاجة بيرميها فى النيل مرة فى التليفزيون شفت مصنهع بيخلرج مخلفات سامة وعامل ماسورة بتصرف المخلفات فى النيل طول النهار تخيل ماسورة بيتنزل مادة سائلة سامة لونها زى اللبن وبتنزل كل يوم مواد سامة فى النيل يعنى انا بستغرب الناس الملايين اللى بتمر عليهم المياه دى عايشين لسه ازاى لأن الكلور اللى بتحطه شركة المياه لتطهير المياه من بعض الميكروبات البيسطة مش السموم الكتير حتى الكلور لو زاد عن حده بيبقى ضار بالصحة , فيه كمان حاجة انا بحس انها مخجلة بس مضطر اقولها خلال السنوات من 1930 لحد 1980 كان المشاهير اللى بتتكلم عنهم الناس مين ؟
يعنى ناس عظام واوسمة على صفحات التاريخ , النهاردة المشاهير هم الحرامية واصحاب الفضائح يعنى الصور المشرقة اللى زى زويل حاجة نادرة جدا وحتى بتتوه اخباره وسط القصص المقرفة زى واحد ملياردير بعد مايصرف عشرات الملايين على مطربة درجة تالتة بعدين يتهم فى قتلها وتحس ان الجميع عايز يطلعه براءة , او ملياردير عنده مش اقل من خمسين مليار ولسه بيقاتل عشان يمتص قوت الجياع حاجات غريبة وكفاية كده
مع اطيب تحياتى

**عادل صموئيل** · #6 29/10/2010, 23h58

اقدم لأخى العزيز نور الصباح نوتة
زى نور الشمس
مع اطيب تحياتى

**Anitta** · #7 10/10/2010, 12h03

احب انا اقدم نوتة وردي لصفاء ابو السعود وذلك لكل من يحتاجها من مدرسين بمناسبة عيد الطفولة واعتقد انها كويسة وممكن استاذ عادل يشوفا ويتاكد لاني مش عندي التسجيل وانا لايتها عندي على الجهاز فرفعتها

**عادل صموئيل** · #8 10/10/2010, 23h25

اخوتى الاحباء
اقدم لكم نوتة
احن قلب ف الدنيا ديا انتى يا امى
اتمنى ان تحوز اعجابكم

**عزت شحاته** · #9 11/10/2010, 08h24

الاستاذ الجميل / عادل صموئيل ..
الف شكر يا باشا ..على النوته .. وتسلم ايدك ..
الى جميع الاصدقاء ..نوتة ( اوعدك )

**عزت شحاته** · #10 14/10/2010, 06h33

اقتباس:

المشاركة الأصلية كتبت بواسطة جوليانا

السلام عليكم ورحمه الله وبركاته

الاستاذ طارق
ممكن اطلب نوته مصر يا ام الدنيا لسوزان عطيه
انا طلبت نوت من استاذى العزيزعادل وخفت اثقل عليه لانها دى جديده
ممكن
وشكررررررررررررا على تقديم المساعده لنا

الى الاستاذه / جوليانا وكل اعضاء المنتدى
نوتة (مصر يا ام الدنيا يا ) وقد عثرت عليها فى احد اعداد المجله الموسيقيه التى كانت تصدر فى سبعينات القرن وكانت رئيسة التحرير رتيبه الحفنى خلفا لوالدها..
ولكن ارجوا من
الاستاذ الكبير /عادل صموئيل نهر العطاء المتدفق مراجعتهاوخاصة الكوبليه الثانى الذى يغنيه توفيق فريد.. مرفق الملف الصوتى
الصديق العزيز /عاصم المنشاوى.. واحشنى يا باشا
بعد ازنك نزلت النوته .. حبيت اوفر عليك التعب.. لكن لو النسخه افضل او بصيغه اجمل يا ريت ما تحرمناش.. واحييك على مطالبتك بصفحه للملحن ابراهيم رجب وعلى اختيارك اغنية ( تعيشى يا بلدى) للتدوين .. ومرفق ملف صوتى لهاmp3

اخى العزيز
الملف سرعته مش مضبوطة مش عارف اسمعه ممكن لو اى حد عنده الاغنية تسجيل كويس انا ادونها وتحت امركم
عادل صموئيل