تحليلات سيادة الرئيس ـ أبو على

[فؤاد]

بالنسبه لموضوع تغير طبقة الصوت
حسب (((اعتقادي)))
منهم من يزداد حلاوه
ومنهم من يزداد قوه
ومنهم من يتغير بحيث يصبح أنسان عادي وليس مطرب
وأذكر أمثال عن هذا الأعتقاد طبعاً
فايزه أحمد : عندما أعادت أغانيها ( يامه القمر ومتحبنيش بالشكل ده وبيت العز وانا قلبي ) كان هناك فرق كبيييييييييييييييييير بين صوتها آن ذاك وأعادة التوزيع وانا بأعتقد أن صوتها أزداد قوه وجمالاً عند أعادة التوزيع وغنائها
ورده الجزائريه : عكس فايزه تماماً كان صوتها في البدايات جميل ومع مرور الزمن تغير تغير كبير وعندما أعادت غناء أغانيها غنتها كأي مغنيه في الزمن الحالي زي لولا الملامه وأوراق الورد ووووووو
هاني شاكر : صوته أزداد قوه

تح ياتي

[جابر الحسيني]

المشاركة الأصلية كتبت بواسطة سيادة الرئيس

يا عمنا منتا جبت م الآخر

إللي يزيد بس رخامة الصوت و سبحان الدايم

إيه يا سيادة الرئيس إنت عاوز تقفل الموضوع كده بدري إحنا مش حنسيبكو غير لما تخرجو ما في الجراب
اتفضلوا اشرحوا لينا بعض ما ورد في تعليق المايسترو الألاتي من مصطلحات كالمطرب المأسس و نظيره الكلشنكان ،
و قبل كل هذا عايزين توضيح بخصوص طبقة الصوت و هي صلب الموضوع ما المقصود بها ؟!
و ألف شكر يا أساتذة ...

[سيادة الرئيس]

كنت مرة بتكلم مع أخويا الكبير في المزيكا و جت سيرة ال ( BIG BND ) و طبعا أخويا بحكم سنه ( 68 ) راح واخدني إلى سحر ستينات القاهرة و جمالها و أكمل هو الحديث ع ال ( BIG BAND ) قال :

يا ابني ماكنش نادي محترم إلا و فيه ال ( BIG BAND ) بتاعه و كان أشهرهم في ( نادي شل ) مصر للبترول حاليا و نادي السيارات و غيرهم و كان أشهر
( BIG BAND ) هوه ( Cairo Jazz Band ) كانت فرقة تسد عين الشمس و كلهم مصريين من أمهر العازفين أغلب مقطوعاتهم قايمه على تيمات مصرية و أنا حضرت في فندق ( النيل هيلتون ) حفلة لهم كانوا مستضيفين عليهم Louis Armstrong ( عازف ترومبيت و مغني شهير ) و قال يوميها ما معناه :

( كانت مفاجئة لي أنا أرى في مصر عازفين على هذا القدر من المهارة )

كما أنهم شاركو واحد من أكبر الفرق في العالم في عدة أعمال و هى فرقة المؤلف و العازف العالمي

SUN RA

و طبعا قبل ما حد يقول و إيه هوه ال ( BIG BAND ) أقول أنا

هو مسمى كما هو ( بعيدا عن ترجمته الحرفية ) يطلق على فرقة موسيقية يكون قوامها الأساسي من آلات النفخ بنوعيها ( نحاسية و خشبية ) بالإضافة إلى آلات الإيقاع و الجيتار و الباص و البيانو يضاف لهم بعض الآلات المحلية ( بإختلاف البلدان )

و من ستينات القاهرة أسمع حضراتكم

CAIRO JAZZ BAND

في أعمال مستوحاة من تيمات شرقية مصرية

طبعا كما قلت لحضراتكم جميعهم مصريين من أمهر العازفين و قتها

و في التسجيلات المرفقة هم

ساكسفون ( ألطو ) : السيد العايدي
ساكسفون ( ألطو ) : فاروق السيد
ساكسفون ( باريتون ) : عبد الحكيم الزامل
ساكسفون ( باريتون - تينور ) : سيد سلامة
ساكسفون ( تينور ) : فتحي عبد السلام
ترومبون : السيد دحروج
ترومبون : محمد أيوب
ترومبون : صادق بيومي
ترومبون ( باص ) : عبد العاطي فراج
ترومبيت : إبراهيم وجدي
ترومبيت : خليفة السمان
ترومبيت : محمد عبده
ترومبيت - فلوت : زكي عثمان
باص توبا : محمد عبد الرحمن
ناى مصري : عبد الحميد عبد الغفار ( توتو )
بيانو : خميس الخولي
كونتراباص : محي الدين عثمان
بونجو درامز : سيد رمضان
درامز : سيد شرقاوي

مؤلفات و درامز و قيادة : صلاح رجب

( رحم الله الموتى و أمد في عمر الأحياء منهم )

و أكيد أصدقاء المهنة يفتكروا الأسماء دي و إللي كان لي الشرف إني إشتغلت مع واحد منهم هو ( عم : سيد سلامة ) والد عازف الساكس الماهر ( هشام سلامة ) و عازفة الكلارنيت ( منال سلامة )

CAIRO JAZZ BAND

EGYPT STRUT

DAWN

RAMADAN IN SPACE TIME

[Islam Eidrisha]

بصراحة .. حاجة آخر انشكاح
وعلى رأي سيدنا سمعجي .. بتعمل دماغ
روح يا شيخ إلهي ربنا يفتح
في وشك أبواب الرزق كلها

[جابر الحسيني]

اختيار رائع يا سيادة الرئيس و موضوع يلقي الضوء على جانب آخر من الموسيقى المصرية في فترة sixties

في العديد من الأفلام المصرية آنذاك كان يعتمد على موسيقي تصويرية من نفس هذا اللون الموسيقي ، في نظري غالبا ما كان يتم اللجوء إلى مثل هذه المجموعات للعزف بدل الإتيان بنماذج جاهزة من أمريكا أو بريطانيا ...

[سيادة الرئيس]

ما هيا بنت الإيه بتتشاف و انت مغمض

يعني جرب كده و انت نازل من على كوبري الأزهر غمض عينك حا تشوفها من ريحتها

من غير رغي كتير حا اسيب مكنة الفتوغرافيا بتاعة الحداد و المكاوي تشممكم روايحها .. بنت الإيه

التصويره الأولى

( الازهر )

دخلت مرة لسقف من حي الازهر
في ليلة و احنا صغيرين يا زمان
صوته لقاني قبل ما اقعد قصاده
زان المنصة و ف يمينه عصاته
قصاص بيروي سيرة الفرسان
و السامعين حواليه لمّه قليله
من دنيا فيما سلف أصحاب ليالي قديمه
و ما ينعسوش بالسهم .. لبسين من الجلاليب ما يشبه القفطان
على الكراسي بيشربوا الكلمة و بيستذكروا الحكمة و بيلتفتوا باستحسان
قولنا : في يمينه عصاته يا اهل النظر و اتوسطنت بميزان
إلا و قامت على بركه و عجب و ما بين صوابعه توجهت للميدان
توجهت لرحيل .. لحرب .. لحيله .. تتبادل .. تمانع .. ترمي الخديعه .. تتقي الخوان
و تلف لفات الرماح الطويله أو تنكسر كما تدبل الأغصان
أو ترتفع أبصر من السلطان على ما تراها العين ترى الإمكان
قصاص .. و ريث ألف بين مشرق و من مغرب و مدونات العجم و سجية العربان

الله يبارك سقف من حي الازهر في ليلة و احنا صغيرين يا زمان

التصويره التانيه

( باب الخلق )

و اِلـّي بيعلا بيعلـّي
وقولة القلوب عند بعضها واصله السما بأرضها
وبني آدم سلاح نفسه وصاحب رأي
وقبل الناس ما تكتر السنين كانت كتيره
إفرش حصيره وخلـّي البساط أحمدي
الليل بساط
يا مصادفني من آخر السكه قرب من الناحيه دي
ماليش خيال إلا ان رمتني بنور هادي
ورمت عليّا السلام
في مره طالع من حسن الاكبر على باب الخلق
بين مغربيه وعشا
لقيت القمر في وشي كبير وقريب
تطلع عيونك سلم سطوح بيت
على حدفة دراع من هنا القلعه ومن هنا العتبه
والقمر لون الحنان الصيفي والماضي الصُغير
زي إلـّي خجلان شويه من بهجته وحسنه
وعلى مذهب شارع محمد علي
التورمَّايات قاطعه الخليج بجرس يجري
والقمر ميال لكل الدنيا مالي الدنيا
فوق العباسيه ولبعد الزيتون على نخل
لبلاد تقول نجع .. وبلاد تقول كوم .. في نفس اليوم
على مزلقان الجيزه ومقـبّل سارح غيطان
واقف على كل محطات السكه الحديد
واسكندريه
في باب الخلق
إتملى القرطاس بفول أخضر
رمـت عليّا السلام

نورت يا ولدي

[abuzahda]

ياصاحب الفخامة
رغم "الزكام" المتمسك بنخاشيشي من يومين
إلا إن "جبدْتِين النشوء" بتوعك دول
شمموني ريحة "صرّة" مصر
وفكروني (ورا مقام سيدنا) بالقهوة اللي ورا (عند الميضا) ، كان فيها حكواتي بيمسك خرزانة ويشاور بيها وهو بيقول

الله يرحم "أشعر شعراء العامية"
و ادي صورته بالبيجامة يا عم

و يطولنا في عمر فخامتك
يا غالي
يا ابو عالي

[abuzahda]

على الكراسي بيشربوا الكلمة و بيستذكروا الحكمة و بيلتفتوا باستحسان

يا اخوانا مين يقول كده؟

[سيادة الرئيس]

المشاركة الأصلية كتبت بواسطة abuzahda

"جبدْتِين النشوء"

ياااااااااااااه يا سيد

طلعتها منين دي

[abuzahda]

المشاركة الأصلية كتبت بواسطة سيادة الرئيس

ياااااااااااااه يا سيد[/center]

طلعتها منين دي

بتسألني انا ؟
يا عم النشاشجي
يا بتاع النشوء
(ده حتى النشوء - بني أو أبيض- بيتباع هناك ، مكان ما عمنا فؤاد اتسحر و سحرنا)
يعني "الليلة" كلها عايزة "شم" ، يحيي النظر