نوت متنوعة

[عادل صموئيل]

المشاركة الأصلية كتبت بواسطة armendo

عزيزى الأستاذ عادل صموئيل
صباح الخير والسعادة واشكرك كثيرا على اهتمامك واللة يكون فى عونك قبل الأمتحان شغل ومذاكرة وبعد الأمتحان شغل وتلبية طلبات حبايبك فى المنتدى انت بتنام كام ساعة فى اليوم؟
مع حبى وتقديرى
اخوك ارمندو

عزيزى ارمندو
اولا انا اكتر مشكلة عندى هى قلة النوم او بالمعنى الأصح القلق يعنى لو نمت 3 ساعات فى اليوم يبقى نعمة
اقدم لك جزء من لحن سحب رمشه
وللعلم اللحن ده مكنتش اتخيله صعب كده بس فكرت لقيت ان ماحصلش واحد فكر يغنيه او يعزفه تانى بعد محمد قنديل لأن كل الجمل فيه معمولة بطريقة صعبة جدا مش طبيعية وجايز هم عاملينه صعب كده عشان يبقى ممتنع على اى حد غير محمد قنديل ومن اكبر المشاكل ان محمد قنديل مغنيه بمنتهى الاحتراف يعنى من المستحيل كتابته كما هو بيقول يعنى انا حاولت استوعب خلال 24 ساعة الجزء ده وحاولت ابسطه بقدر الإمكان لن محمد قنديل عامل عُرب خفية مش ظاهرة بتخليك كل ما تسمع اللحن تكتشف انك مش هاضم اللى سمعته او ماعرفتش سره
المهم انت لو حاتعزفه او تغنيه مطلوب انك تحفظه من التسجيل حفظ صم عشان تمشى مع النوتة مع خالص تحياتى وبعدين ممكن احاول اكمله بس محتاج وقت يكون مخى فاضى من المشاغل

[عادل صموئيل]

[QUOTE=altaifi;327628]

أستاذ / عادل لازلت في الإنتظار وخذ وقتك ولا يمهك ، أنا منتظر .. وشكراً

[/QUOTE
اخى العزيز
اليك النوتة مع خالص تحياتى

[عادل صموئيل]

المشاركة الأصلية كتبت بواسطة نور الصباح

الأستاذالكبير والحبر الجليل والفنان العظيم وشلال الفن المتدفق دائما /
عـــــــــــادل بــــــــــــــاشــــــــــــــــــا صموئيــــــــــــــــــــــــــــــــــــــــــــل
سلام الله عليكم ورحمته وبركاته وبعـــــــــــــــــــــــد :
لقد طال غيابك عنا يا أستاذنا الجليل من يوم الاثنين الموافق 8 / 6 / 2009 لم نلتق بك
ولم نستمع إلى توجيهاتك ومناقشاتك المفيدة وأرائك التى نستنيـــــــر بها دائما
نرجو من اللــــــه - العلى القديـــــــر - أن يكون المانع خيرا (إن شــــــــــــــــــاء اللــــه )
صديقنــــــــــــــا الحبيب الأستاذ /عادل أستحلفك باللــــه ألا تغيب عنا وصدقنى إن الأنتر نت
كله مالوش لازمة من غيرك
ومـــــا زال الانتظــــــــــــــــــــــــــــــــــــــــار مســــــــــــــــــــــــــنمرا
وشكررررررررررررررررررررررررررررررررررررررررررررررر ررررررررررررررا
أخوكم نــــــــــور الصبــــــــــــــــــــــــاح الجمعة 12 / 6 / 2009

عزيزى نور الصباح
اعتذر كثيرا لتأخرى عليكم لمشاكلى الجمة وضيق الوقت
واقدم لك جزء من طلباتك للنوت وخلى بالك انت طالب حاجات كتير عايزة خطة خمسية يعنى الصبر جميل
مع اطيب تحياتى

[عادل صموئيل]

اخى العزيز نور الصباح
اشكرك على كلماتك الجميلة واقدم لك من طلباتك نوتة بطلوا ده واسمعوا ده
وهذا اللحن يحتاج وقفة كبيرة اولها انه لحن صعب جدا وايامه فى اوائل الأربعينيات لم يكونوا يستخدمون النوتة الموسيقية يعنى كانوا بيحفظوا اللحن مع الملحن وعدم استخدام النوتة يعنى بيركبوا الاجزاء على بعضها وهنا تحدث مشاكل عند تدوين النوتة لأن ظبط الكتابة قد يغير جزء او اجزاء من اللحن وهذا شىء ارفضه تماماً لأن اللحن محفوظ وتغيير اى جزء فيه يفسده وهنا تأتى المهرة فى التحايل فى النوتة بحبث تكون مضبوطة من الناحية العلمية وصحيحة جدا عندما تسمع ماتعزف وبدون ضياع او زيادة اى حرف وهنا انا اختلف مع بعض الكاديميين الذين يصروا على القواعد الأكاديمية وقد يختلفون معى فى تدوين المقام او الموازين ولكن تجدون فى تدوينى ما افتخر ان اقول عليه مدرسة عادل صموئيل للتدوبن الموسيى وللعلم انا كتبت هذا اللحن مرتين وفى المرة الثانية راعيت ان يكون اسهل وابسط مايمكن وبإستثناء النغمات الشرقية كتابتى هذه يستطيع قرائتها اى طالب مبتدىء يقرأ النوتة من شهر واحد ولو كتبت اللحن كما يتهيأ لهم لما استطاع احد قراءته سوى المحترفين
هنا اقف وقفة اخرى امام هذا اللحن انتم طبعا تعلمون ان هذا اللحن من فيلم لعبة الست وعندما يطلب المخرج من الملحن لحنا لفيلم لابد ان يجلس معه ويروى له قصة الفيلم بسرعة ويحدد له المطلوب فى ملامح اللحن وهنا كان المنخ فى الأربعينيات يعنى مستوى الألحان كهمسة حائرة ورباعيات الخيام يعنى الألحان مستواها عالى جدا , ولكن هنا طلب المخرج من الملحن ان يكون اللحن هابطاً او لحن ( بيئة بلغة العصر الحالى ) وانظروا اللى هذا اللحن الهابط بلغة الأربعينات وانا اؤكد ان خلال العشرين عاما الماضية لم يظهر لحن فى قوة واحد على مائة من قوة هذا اللحن ولا كمية الطرب التى فيه

[عادل صموئيل]

المشاركة الأصلية كتبت بواسطة احمد سنايم

رائع كالعادة يا استاذى الحبيب عادل صموائيل تواضع وبساطة العلماء شخصية جميلة معطائة عجبنى جدا كلامك الى الاخ الفلسطينى وكان لازم ارد على هذا الكلام الجميل والمشاعر الرقيقة المرهفة وكالعادة ايضا اطلب نوتة توتة لفريد الاطرش ومش ضرورى الديليفرى يكون سريع هذة المرة على اقل قل من مهلك ربنا يخليك لنا وما نتحرمش ابدا منك شكرا الف الف شكر

عزيزى احمد
اقدم لك نوتة توتة الديليفرى سريع المرة دى لأن فيه الحان انا بكون حافظها وبكتبها من الذاكرة من حسن حظك
فيه ملحوظة مهمة انا هنا كتبت السرعات ودى مش عادتى او على الأصح مش عادتنا فى الموسيقى الشرقية لكن اللحن ده بالذات من اهم ملامحه اختلاف السرعات بين الجمل

[عادل صموئيل]

المشاركة الأصلية كتبت بواسطة نور الصباح

الأخ العزيز والصديق الوفى والأستاذالكبير والمصباح المنير الأستـــــــــــــــاذ /
عـــــــــــــــــــادل بـــــــــاشــــــــــــــــــــــــــا صموئيـــــــــــــــــــــــــــــل
تحية إعزاز وتقدير وبعـــــــــــــــــــــد :
سلام الله عليكم ورحمته وبركاته وندعو الله العلى القدير أن يمن عليكم بنعمة الأمن
والأمان والطمأنينة والسلام والصحة والسعادة وطول العمر على الدوام
اسمح لى بسؤال بسيط :
- فى الموسيقى الغربية - ما هى درجة الحساس لأى سلم موسيقى وعلى أى أساس تحسب ؟
- أنا فى انتظار النوتات الموسيقية فى شوق ولهفة
- هل إذا ذهبت إلى إدارة عين شمس التعليمية أستطيع مقابلتكم ؟
وإلى أن نلتقى لكم خالص حبى وتقديرى
وشكررررررررررررررررررررررررررررررررررررررررررررررر ررررررررررررا
أخوكــــــم نــــــور الصبــــــــــــــــــــــاح
16 / 6 / 2009 ظهرا

الأخ العزيز نور الصباح
الحساس هو الدرجة السابعة فى اى سلم موسيقى
يعنى لو اخدنا مثلا سلم دو الكبير بيتكون من 7 نغمات والثامنة جواب الاولى
يعنى عد معايا من اليمين ( دو رى مى فا صول لا سى ) اول درجة هى القرار تجدهم 7 درجات درجة سى هى الدرجة السابعة وتسمى حساس لأنها بتحب تركز على درجة الركوز وهى دو الجواب وبينها وبين الاساس نص تون واضح ؟
بالنسبة لإدارة عين شمس التعليمية انا لا اتواجد فيها لأنى امر على المدارس او المراكز الصيفية مرفق نوتة احد طلباتك والباقى انشاء الله قريبا

[عادل صموئيل]

المشاركة الأصلية كتبت بواسطة جوليانا

ا االسلام عليكم ورحمه الله وبركاته استاذى الفاضل عادل اشكرك اولا على ردك الجميل لى ثانيا اوفقك الراى فى كليات التربيه الموسيقيه فى عدم اهتمامهابتنميه مواهب الدارسين لديها فكل المهم فقط حفظ الناهج العمليه او النجاح فى النظرى فقط لايوجد تنميه مها رات الا ان كان هو بالفعل موهوب ننجد الكل حوله وخصوصا لو كان قريب لحد ثانيا لااتفق مع حضرتك فى رفع القبعه لى لايجوز يااستاذى الفاضل هذا القول لى من حضرتك اساسا فكلنا لاسوف اتكلم عن نفسى ارفع لحضرتك القبعه واحب ان اشكرك على وصفك لى وكل يوم اتمنى ان اكون ممن ترعاهم فى ادارتك التعليميه وتشملهم برعايتك لهم وا شكرك كثيرا

الإخت الفاضلة جوليانا
اشكرك على كلامك الجميل وانا هنا لما بتكلم معاكم بفضفض فى امور تحزننى كثيراً , يعنى لما بتعامل مع الكليات الموسيقية اى موهوب ( وانا واحد منهم ) بيبقى يساوى شىء باجتهاده الشخصى والكلية مش بتقدم له حاجة سوى قشور موسيقية وده ان لم يجد من بعض اساتذتها من يحاول تحطيمة ( وانا واحد منهم برضه وانا طالب ) يعنى تحسرت لما اشوف المعاهد الموسيقية فى اوروبا كل معهد فيه قسم على جنب اسمه قسم تخريج العباقرة والقسم ده بيدخلوا اللى عندهم نبوغ او موهبة فذة فى الموسيقى بيتبنوهم لأن كل واحد منهم يساوى مليون شخص عادى وتلاقى الاساتذة بتوعهم صنف تانى مخصوص يعنى مثلا تلاقى قسم لبيتهوفن بيكون فيه استاذ عجوز خبير فى بيتهوفن يعنى بيتهوفن بيمشى فى دمه حتى النخاع وده بيعلم الطلبة بتوعه بمنتهى المحبة كل اللى بيعرفه بحيث ان كل سنة بيخرج من تحت ايده خمس طلبه متخصصين عباقرة فى بيتهوفن ونفس الحكاية بالنسبة لموتسارت او هايدن او تشايكوفسكى
لدرجة انك تلاقى مثلاً طالب موهوب كده وبيعشق هايدن مثلا والمدرس الخبير فى هايدن مش موجود فى بلده وموجود فى بلد تانية على طول المعهد يعمل له بعثة خاصة على نفقة الدولة ويعطوه مصروف مجزى عشان يتفرغ للدراسة مش يدوه ملاليم ويضطر يروح المعهد الصبح ويغسل اطباق بعد الظهر عشان يلاقى يسكن وياكل والمهم ان النتيجة ان كل اساتذ عبقرى بيبقى له امتدادات لم تنتهى تلاقى الفن الجميل بتاعهم سيمتد غلى الأبد , واللى بيحزننى فى مصر عندنا فن وعمالقة هم خلاصة الفن العربى لكن الفن بيندثر لأن مفيش حد يهمه انه يستمر يعنى انا مثلا لو عرضت على اى كلية انى ادرس اطلبة اللى ممكن يكونوا موهوبين وممكن يطلع منهم عباقرة حايحاربونى
ولا املك سوى ان اقول كلمة واحدة : ياخسارة يامصر
مرفق نوتة امى احد طلباتك والباقى فى القريب ان شاء الله مع اطيب تحياتى

[عادل صموئيل]

احبائى
اقدم لكم بعض طلبات من النوت
1 ـ سحب رمشه وقد قدمت جزء منها وهنا قد اكلمتها
2 ـ يافايتنى فى حيرة
اتمنى ان يستفيد منه اكبر قدر من الأعضاء الأعزاء وطبعا الطلبات لايستفيد منها طالبها فقط ولكن فائدة للجميع
مع اطيب تحياتى والباقى قادم ان شاء الله

[عادل صموئيل]

المشاركة الأصلية كتبت بواسطة نور الصباح

الأخــــــــــــــــــوة حبـــــــــــــــــــايبى وحبـــايب قلبى وحبايب أستــــــــــــــــــاذنا الكبير
عـــــــــــــــــــــــــــــــــادل بــــــــــاشــــــــــا صموئيـــــــــــــــــــــــــــــــــــــــــــــ ــل
ارفعــــــــــــــــــــــوا أيديكـــــــــــــم بالدعــــــــــــــاء بقلـــوب خالصـــة مخلصـــــــــــة
للـــــه تعالى واطلبوا من اللــــــه أن يكون الأستاذ :
عـــــــــــادل بـــــــــــاشــــــــــــــا صموئيـــــــــــــــــــــــــــــــــــــــــــــ ـــــــــــــــــــل
من أوائل الناجحين أمين ... أمين .... أمين ... يارب العالمين
وشكررررررررررررررررررررررررررررررررررررررررررررررر ررررررررررررا
أخوكـــــــــــــــم نـــــــور الصبــــــــــــــــــــــاح
الأحـــــــــــــــــــــــد 21 / 6 / 2009

اخى العزيز نور الصباح
اشكرك على شعورك الطيب وواصل الدعاء لأن المشكلة انا حليت كويس بس خايف من نظام التصحيح والفضايح اللى حصلت المرة الاولى يعنى اللى حلوا سقطوا واللى ماحلوش نجحوا لدرجة ان ناس قالوا انهم ظللوا فى كل سؤال الاربع دوائر ونجحوا مع ان الورقة دى مفروض تعتبر باطلة لأن الكمبيوتر حايفضها المهم ما تعرفش النتيجة حاتظهر امتى لأن مش لاقى اجابة محددة من حد وحاسس اننا بنشتغل فى طابونة مش فى وزارة
اقدم لك من طلباتك نوتة غدارين واهديها لبتوع الكادر وربنا يجعل كلامنا خفيف عليهم

[عادل صموئيل]

الأخت العزيزة الفاضلة جوليانا
اقدم لكى ولكل الاحباء فى المنتدى نوتتين من طلباتك والباقى فى القريب ان شاء الله
1 ـ كم ناشد المختار ربه
2 ـ يامحمد
طبعا انا راعيت ان ابسط النوتة بقدر الإمكان لأن فى التسجيل فيه توزيع كتير مالوش لازمة اذا كان اللى حايعزف شخص واحد
كذلك راعيت ان سعاد محمد يعنى بتغنى براحتها وبتصدر فى اماكن كتير ( طبعا سعاد محمد لازم تغنى كده دى سعاد محمد ) انا عشان اعمل الصح بكتب اللحن الأساسى والمؤدى يضيف عليه حليات لو حب
واقول لكم معلومة للذكرى والتاريخ انا لما كنت بكتب للعمالقة كانوا بيملونى اللحن سادة بدون اى حليات بعدين فى البروفات هو بيغنى الجملة يعنى يعرفنا لونه واحنا نعمل الحليات والذى منه لأن لو الحليات والتصدير اتكتب ماحدش حايعرف يقرا النوتة
طبعا اعتقد فيه ناس حايسألونى يعنى ايه تصدير ؟ التصدير هو تصرف او خروج عن اللحن الاساسى عندما يكون المطرب قدير جدا وبيتسلطن يعنى مثلاً جملة اول حرف فيها على الدوم يعنى فى اول المازورة ممكن المطرب القدير يغنيها يتأخر كروش او يتقدم كروش بس طبعا ده المطرب القدير بس مش اى حد يعنى لو مطرب مش قدير ممكن يقع او يلخبط الجملة كلها
معلش انا آسف للإطالة ولكن انا برد على كل عضو عزيز بيشرفنى انه يسمينى استاذه او انه يكون تلميذى وانا طبعا بعتز جداً بالكلمة دى لأنها جاية من ناس بيحبوا الموسيقى ونفسهم يتعلموا يعنى الدرس مش مفروض عليهم ولكن هم مختارين يتعلموا , وانا اعتز بهم واحب اشرح لهم كل حاجة واتمنى يكونوا زيى بل واحسن منى فى يوم من الأيام
وماتنسوش الكلمة اللى قلتها قبل كده كل انسان وهبه الله موهبة او مال وفير او علم فى يوم حايتحاسب اعطى من ما اعطاه الله ايه للناس وانا كل نقطة علم منحها لى الله اتمنى ان اعطى منها لكل الناس واغلى كلمة عندى وتساوى كل كنوز الدنيا لما انسان يقول انا اتعلمت الشىء ده من الاستاذ عادل
تم تعديل نوتة كم ناشد المختار ربه بمعرفتى عادل صموئيل