مشاركات خارج موضوع طلبات النوتة

[armendo]

استاذنا الأستاذ عادل صباح الخير
ارجوك رجاء حارا عندما تقرر تدوين اى اغنية الا تتنتظر ما اذا كانت موجودة بالمنتدى ام لا فما تدونة مختلف تماما عما يدونة الأخرون من حيث الطريقة والأسلوب وايضا من حيث القيمة وانظر الى كم الأستحسان والأمتنان الذى يرد من خلال التعليقات والمشاركات وانا اضم صوتى الى اخوتى الأعزاء الأستاذ نور الصباح والأستاذ وائل وألأستاذ وليد فى طلب اغنية حكاية غرامى للفنان قريد الأطرش وهى من الأغانى القليلة التىاحبها لة وايضا اغنية اول همسة .ولى سؤال يتعلق بفريد الأطرش وهو هل لك تعليق على عدم اختيار ام كلثوم لفريد فى ان يلحن لها وخاصة انة يكاد يكون الوحيد من الكبار الذى لم يلحن لها.
مع شكرى الجزيل
ارمندو

[وائل]

سلام عليكم جميعا
اخي ارمندو انا ايضا بضم صوتي لحضرتك ان ياريت استاذ عادل ميستناش اذا كانت النوتة موجودة في المنتدى او لا وهذا لسببين مهمين وهما ان الي بيقدمو الاستاذ مختلف تماما عن الاخرين يعني الاستاذ بيقدم السهل الممتنع والاخرين الصعب والتعقيد الممتنع والسبب الثاني هو ان انتظار استاذ عادل ده في حد ذاته بيضيع وقت طويل لدرجة اننا بنخاف يكون نسي الطلب واحنا طبعا نفسنا استاذ عادل ينوت لنا كل الاعمال الجميلة من زمن الفن الجميل لكي يضاف هذا المجهود لصفحة اعماله ويظل اسمه خالدا كاول موسيقي يحمل على عاتقه توصيل الفن الجميل للعمالقة الى جميع طبقة الهواة العازفين وهذا عمل ليس سهلا ابدا ويشكر استاذ عادل على اية حال حتى لو كان قدم نوتة وحدة بس يعتبر مساهمة منه لان في زمننا هذا مستحيل تجد احد ينوت لك بدون مقابل لا تجد هذا العطاء الا في مملكة سماعي وبالاخص عند الرجل الطيب عادل صموئيل
وانا ايضا بحب اول همسة وقد طلبتها ايضا منه وللتذكير فقط هذه قائمة طلباتي من استاذ الكل
(الحب اللي كان- حكاية غرامي- ذكريات للسنباطي -كيلو بترا- الكرنك- ياطيور لاسمهان –اول همسة لفريد -مش عوايدك لبليغ- ( وانا عارف انهم كلهم طوال ومن العيار الثقيل بس انا عارف حضرتك دايما بتحب التحدي زي ماعملتمع دارت الايام وهي الاطول على الاطلاق كما قلت حضرتك

[armendo]

عزيزى واستاذنا الأستاذ عادل صباح الخير والسعادة
اشكرك كثيرا على النوتة الجميلة لأغنية البيض الأمارة لعبد الغنى السيد وأشكر الأستاذ نور الصباح على حسن اختيارة لها.ارجوك يا اخى عادل الا تعتذر عن الأطالة فحديثك ممتع وكونك كنت احد العاملين فى المطبخ الفنى يعطى لحديثك مصداقية وقيمة لدى المتلقى ولذلك فانا شخصيا استمتعت والتى لا تخلو من خفة الدم التى تتمتع بها وفيما يخص فريد وام كلثوم فأود ان اعرض عليك ما سمعتة بأذنى فى احدى البرامج فى الأذاعة اللبنانية والتى كانت تستضيف الفنان فريد الأطرش فى السبعينات وقبيل وفاتة واستعرضت معة مقدمة البرنامج حياتة الفنية منذ ان بدأ الى ان غادر مصر فى اواخر الستينات الى ان سألتة السؤال الذى جعلة ينفجر كالبركان وهو لماذا لم تغنى ام كلثوم من الحانك بالرغم من انها غنت لكل الملحنين الكبار الموجودين على الساحة فى ذلك الوقت وهنا انفجر كما قلت وقال بغضب شديد لااعرف السبب الذى يجعل ام كلثوم لا تغنى من الحانى بالرغم من اننى الملحن الوحيد الذى لم يسقط لة لحن بالرغم من انها تغنى لغيرى الحانا لا تليق بها اقرب الى الطقاطيق ولا تغنى من الحانى انا فريد الأطرش واعتقد واللة اعلم انة كان يقصد الشيخ سيد مكاوى الذى لحن لها فى تلك الفترة يمسهرنى وهذا للتاريخ اى ان ام كلثوم هى التى كانت ترفض الغناء من الحان فريد الأطرش وليس العكس.اما عن عبد الوهاب مع ام كلثوم فقد خدم نفسة اكثر مما خدم ام كلثوم واستطاع ان يحول اتجاهها 180 درجة بمكر شديد وفى راأيى ان احلى ما قدم عبد الوهاب مع ام كلثوم هى المقدمات الموسيقية الجميلة مثل مقدمات اغنيتى انت عمرى ودارت الأيام والتى لا اعلم كيف اقنع الست بها وهى التى تعودت على مقدمات اغانى قصيرة منذ ان بدأت الغناء مع العمالقة زكريا احمد والسنباطى ولكنى مع الأسف افتقدت ام كلثوم عندما غنت مع عبد الوهاب.اما الوحيد الذى استطاع ان يعيد الى ام كلثوم كما اعرفها فهو الرائع بليغ حمدى فى الأحدى عشر لحنا الذ لحنهم لها واعتقد ان السبب هو انة ومعظم الجيل الجديد فى ذلك الوقت كانوا جميعهم خارجين من عباءة العبقرى رياض السنباطى وارجو قبول اعتذارى عن الأطالة مع شكرى وتقديرى واحترامى. ارمندو

[جوليانا]

السلام عليكم ورحمه الله وبركاته

الاستاذ الفاضل /عادل
الساده اعضاء المنتدى الكرام
تحيه لكم جميعا
انا بشكر حضرتك اوى اوى على هذه الاسرار والذكريات الثمينه
ويا ريت حضرتك كل اسبوع تخلى يوم وتحكى لنا عن هذه الايام والبروفات او المحاضرات الدراسيه فى الاخلاق الفنيه والغيره الشريفه اللى خلت هذه الفتره من احلى فترات الطرب والغناء
بس يا ريت ما بكنش بتقل على حضرتك بهذا الطلب
على العموم انا ممكن اعمل خطه مع الاعضاء الكرام وكل شويه حد يسال حضرتك سؤال فطبعا حضرتك هترد علينا لانك دايما وابدا كبير وعظيم فى كل حاجه
انا قولت على الطلب
ويا ريت الاعضاء يشاركونى فى الخطه عشان نستفيد من استاذنالانه بحر العلم
وليه انا فهو موجهى الاول والاخير
وبشكرك على النوته الجديده ويا رب تظل مناره للفن الاصيل
وكالعاده بطول انا اسفه
وشكرااااااااااااااااا
اشكرك عزيتى جوليانا اقتراحك جميل يعنى انا احب اكتر الأسئلة لأن لها ردود سريعة غير لما افكر وافتكر

عادل صموئيل

[وليد100]

السلام عليكم ورحمه الله
بعد التحيه
احب ان اطرح موضوع هام واتمني ان اسمع اراء الاخوه الاعضاء وعلي راسهم الموسيقار الفنان عادل صموئيل
ماسبب تميز الموسيقار محمد عبد الوهاب في تاليف موسيقي الاغاني وخصوصا الاغاني الطويله بطريقه تبرز صنعه قويه جدا وبطريقه مختلفه عن باقي الفنانين الملحنين ؟؟؟
مع تحياتي
وشكرا
وليد
اخى العزيز
سؤال جميل جدا وقصته طويلة ايضا جدا ولكن يسعدنى احكى لكل من يحب يسمع ... عبد الوهاب اولا عنده غزارة لحنية رهيبة ودى بيكتشفها كل اللى تعابشوا معاه على الطبيعة بمعنى انك لو اخترت احلى مقدمة موسيقية لأم كلثوم مثلا هل تعلم انه كان ممكن يعمل لنفس الاغنية دى عشر مقدمات وانت تختار احلى واحدة ؟ وكانت بتحصل معانا كتير يعنى اى اغنية انت بتسمعها من اغانيه الطويلة لأم كلثوم وبعدها لعبد الحليم ثم وردة ثم فايزة احمد كان المقدمة اللى بنبتدى بيها فى البروفة الاولى تختلف عن المقدمة اللى بنعزفها فى البروفة رقم 40 وهى بتكون اللى انتم بعد كده بتسمعوها فى الراديو لأنه بيفضل يغير ويبدل ويشيل ويحط ويبتكر الاعيب وايقاعات وصولوهات
ولما نحلل الموضوع الاول نبتدى بالجذور .. يعنى عبد الوهاب الثائر اول ما ابتدا يغنى كان الجو العام ساعتها ان المطرب هو الاساس والموسيقى شىء ثانوى مصاحب يعنى مكانش فيه حاجة اسمها مقدمة موسيقية او موسيقى كوبليه كان الفرقة لو اللحن بياتى مثلا بتقول جملة اسمها دولاب بياتى وتفضل تكرر فيها لحد ما المطرب يتنحنح ويغنى وكانت الدواليب دى جمل محفوظة زى السلام الجمهورى كده والموسيقيين حافظين شوية دواليب فى كذا مقام وبيستعملوهم هم هم فى كل الاغانى ..يعنى دولاب هزام فى كل اغانى الهزام وهكذا ودوره هو سلطنة المطرب عشان ماينفعش ييجى من بيتهم ويغنى على طول .. لما ابتدا عبد الوهاب كان الاول لازم يمشى على هذا النهج بعدين غزارته اللحنية خلته ثار على الوضع ده .. وكلمة ثار يعنى لما جدد عمل ثورة وانقلب عليه كثير من المتزمتين اللى قالوا المتمرد ده حايبوظ لنا الموسيقى بتاعتنا ولولا عبد الوهاب لكنا فضلنا فى الدواليب دى لحد الآن وما صار موسيقى ولا يحزنون المهم انه الاول عمل جملة ثم جملتين ثم اكتر لحد ما المقدمة بقت عمارة بعدين فى موسيقى الكوبليهات عمل نفس الشىء وفيه حاجتين يعنى انت لو راجعت بدقة شديدة التاريخ الموسيقى تلاقى عبد الوهاب عمل اكبر كمية من المقطوعات الموسيقية البحتة اكتر من اى ملحن تانى وده يدل على غزارته اللحنية المتدفقة وذكاء عبد الوهاب الخطير انه اكتشف ان عندنا موسيقيين خطيرين يعنى عندك انور منسى ومحمد عبده صالح والعقاد وعشرات يعنى حرام دول اخليهم يبقوا سنيدة للمطرب يعنى ليه طالما ممكن انه يعمل لهم جمل عبقرية تظهر عبقرياتهم والامثلة تثبت ذلك .. الجميل ان العملاق عادة مش بيعمل لنفسه ولكن بيعمل للعصور التالية .. ان الناس لما ابتدت تتذوق الموسيقى دى ابتدا كل الملحنين يعملوا مثله .. لكن اقول لك سر ان انا وكل الموسيقيين امثالى كنا فى اى اغنية جديدة نعملها بنكون مترقبين وحانتجنن نشوف عبد الوهاب عمل ايه المرة دى .. وانا باخد من كلامك واقول انت قلت الاغنية الطويلة ودى نقطة تانى خطيرة جدا ... ممكن ملحن زى منير مراد مثلا مع شادية يعمل لك 60 اغنية تجنن قصيرة لكن مش اى ملحن له نفس وتقل يعمل اغنية طويلة وكلها حلوة يعنى شوف اى اغنية من اغانى ام كلثوم فيها كام جملة تلاقى من اولها لآخرها كل جملة احلى من التانية لأن فيه نظرية اى جملة دون المستوى بتوقع الكوبليه كله يعنى ام كلثوم كانت على الاقل بتغنى كل جملة 4 مرات عشان المستمع يتذوقها ويتلذذ بسماعها وتقول اللى بعدها تخيل حضرتك لو جملة سخيفة او متكلفتة يبقى الكوبليه كله فى الباى باى .. وحتى لما بيعمل شىء متطور اوى وام كلثوم كانت مش بتقبله بياخدها ع الهادى لحد ماتقبله وتموت فيه زى ادخال الجيتار الكهربائى مثلا او زى جملة عينى عينى ع العاشقين فى دارت الايام كانت معترضة على الجملة ومارضتش تغنيها كان فى البروفات هى تغنى وتسيبه يغنيها ومرة قال لها طيب انا حاجى معاكى الحفلة وانتى غنى وانا حقول عينى ع العاشقين ومرة ف مرة هى حبتها وتلاحظ فى الحفلة انها عادتها كتير والجمهور اتهبل على اللون الجديد ده بإختصار ياعزيزى عبد الوهاب ده كان : دماغ
مع اطيب تحياتى عادل صموئيل

[وليد100]

السلام عليكم
استاذ عادل صموئيل
تحيه طيبه لحضرتك وبعد
من الاراء التي قيلت عن الفنان عبد الوهاب وموسيقاه ان الابداع والجمال في موسيقاه يكمن في انه ينتقل من جمله جميله الي جمله اروع واجمل من سابقتها وهكذا ....والسؤال المهم ماهي قضايا عبد الوهاب الموسيقيه التي كان يريد ان يرسخها ويبثها في اسماع الجمهور وهل هناك قضيه رئيسيه كان يعمل عليها دائما ام انها قضايا متعدده
(وانا اضرب لك مثلا لكي نكون اكثر تواصلا فانا افهم ان الغناء عند عبد الوهاب واعني هنا التلحين علي وجه الخصوص كان يعني ان اللحن لابد وان يتماشي مع الكلمات وكان عبد الوهاب رحمه الله يؤكد علي ذلك في كل لحن يقدمه بل في كل شطر يلحنه باستثناء بعض الهفوات التي يختلف عليها البعض )
وشكرا
وليد

[منذر44]

استاذ عادل
لو تتكرم وتشرح لنا سبب انفراط عقد الفرقة الماسية وسبب توقفها
اظن لو انها استمرت لكانت اسهمت في منع انحدار مستوى الاغاني الحديثة

[عادل صموئيل]

احبائى

اسمحوا لى ان ارد على كلامكم كلو فى موضوع واحد لأنه كله مرتبط ببعضه
ايه الفرق بين طباخ مثلا بيعمل اكلة تتاكل فى يوم وخلصت على كده وبين واحد فنان عمل تمثال زى تمثال نهضة مصر مثلا من اول يوم تم افتتاحه يبقى على مدى الدهر شاهد على حضارة .. وثانيا نفس الفنان لو عمل عشر تماثيل عمره ما بيكرر اللى عمله يعنى العشر تماثيل كل تمثال منهم عمل فنى رائع معروف عالميا بإسم ما ؟؟
حاجة تانية ايه الفرق بين لما تنزل السوق تتفرج على المحلات وتشوف مثلا محل ادوات كهربائية حاطط 300 نجفة هم حلوين لكن المصنع اللى عملهم عامل من كل واحدة آلاف وبين لما تدخل متحف وتلاقى كل قطعة فيه مالهاش اخت لأن الفرق بين السلعة والتحفة ان دى بتتكرر ولها عمر افتراضى يعنى بيطلع احلى منها وبييجى يوم تبقى موضة قديمة او تستهلك وتترمى وبين التحفة اللى كل كل ما يمر عليها الزمن قيمتها بتزيد لن اللى عملها مش موجود يعمل منه تانى .. كمان حاجة فى التحف اذا لقيت تحفة من الذهب الخالص وزنها كيلو جرام مش بيقاس ثمنها بوزن الذهب زى المشغولات الذهبية المتداولة يعنى تقول كيلو الذهب مثلا بمليون جنيه تبقى القطعة دى بمليون جنيه ولكن بتقاس بقيمتها الفنية والاثرية وساعتها لاتقدر بثمن او ثمنها عشرات اضعاف قيمة الذهب فيها
ولما نيجى لعبد الوهاب ( وعمالقة عصره ) انو مش بيعمل لحن عشان يقبض ثمنهم وخلاص ولكن اولا لازم يعمل شىء رائع مالوش شبيه ولازم خبراء الموسيسقى لما يحللوه يلاقوا فى كل لحن كلام كتير يتقال ومش موجود فى لحن تانى وثانيا ان اللحن يعيش الى الابد .... دلوقتى اللى بيلحن بيلحن عشان الفلوس يعنى مثلا لوبياخد 1000 جنيه فى اللحن يتمنى لو يعمل كل يوم عشر الحان لكن اللى زى عبد الوهاب كان بيعمل اللحن فى سنة بحيث مايطلعش احلى من كده وفيه موضوع خطير تلاقى الملحنيناللى كانوا بيعملوا افلام كتير كانت الحانهم متباينة فى الجودة يعنى بيمعل 4 افلام فى السنة فى 7 اغانى كل فيلم يعنى 28 اغنية فى السنة بتلاقى منهم اغانى كتير متكلفتة او معمولة بطريقة حرفية بس اللى بيغطى على كده مهارتهم فى الغناء .. اما مشكلة الفرقة الماسية انها كانت بتشتغل اساسا على عمالقة الغناء والتلحين
ولما ابتدوا يرحلوا واحد ورا التانى كان كبار الفرقة الماسية بيرحلوا هم كمان لأنهم فى نفس السن تقريبا يعنى انا كنت استثناء لأنى عزفت معاهم وانا سنى عشرين سنة فى حين كام معظمهم فى حدود الخمسين .. وكانم مكن تستمر يعنى بتجديد اعضاء لكن المشكلة فى المناخ .. يعنى ماطلعش خلفاء للفنانين العظام زى ما العمالقة كانوا خلفاء لعمالقة قبلهم
وبعدين ظهرت فرق جديدة زى حمادة النادى وهانى مهنى وخالد فؤاد غيروا مفهوم التلحين والتقديم غيروا نكهة الاغنية المصرية .. بمعنى بقت كل الاغانى موزعة وتقريبا لغوا شغل الكمنجات بعد ماكانت زى ام كلثوم هى اللى بتعمل اللحن كله وبتصاحب المطرب .. النهاردة انحسر شغلها فى انها بترد على المطرب بلزمات سريعة جدا تكنيكية اوى مافيهاش طرب وبالطبع مش ممكن عامة الشعب تفهمها والمطرب بيغنى فى الهوا على الايقاع فقط مع ان اخطر شىء ان المطرب لازم تصاحبه الكمنجات ... يعنى انا واحد من الناس الشغل ده لا بحب اشتغل فيه ولا احب حتى اسمعه لأن غيرطبيعة الموسيقى الى احنا نعرفها كمان خطورة التوزيع من اول اللحن لآخره ضيع مفهوم ان الموسيقى المصرية او العربية بتعتمد اصلا على حلاوة الجملة .. يعنى زمان كانت انت عمرى مثلا 350 جملة لازم تكون كل جملة احلى من التانية لن الجملة بتسمعها بمفردها يعنى مكشوفة لكن الجملة لما تحط عليها خطوط كتير حلاوتها مش بتظهر وهنا ممكن تبقى الجملة اى كلام وايقاعت بتهبد واورجات بتصرخ مافيش حاجة باينة يعنى انا لما بينطلب منى اكتب اغانى من دى بقول اكتب ايه انا مش سامع حاجة وتلاقى 120 عازف ع المسرح امامهم 60 ميكروفون ومش سامع حاجة ام كلثوم كان عليها 3 ميكروفونات فقط وشوف .... انا واحد زميلى ساكن قريب من بيتى عازف شيللو اسمو عبد الفضيل محمد يعنى بنتقابل ونسهر ساعات مع اصدقاء نعزف .. هو اكبر منى بعشر سنين بس الحمد لله صحته كويسة لنو مشبيشرب اى حاجة ( كان اسمو الشيخ عبد الفضيل ) وهو اقدم منى يعنى كان بيعزف مع ام كلثوم من اول اقل الليل .. مرة كنت قاعد مع جماعة موسيقيية ومنهم طبال فاشل جت سيرة عبد الفضيل قلت لهم هو بطل يشتغل من زمان قال لى الطبال الفاشل اكيد عجز قلت لو لأ .... هو قرف ... وطبعا المفهوم واضح
مع اطيب تحياتى

[armendo]

عزيزى الأستاذ عادل صباح الخير والسعادة
خلصتها والحمد للة وقد كانت مشكلتى فقط فى الجزء الذى يقول بينى فى الحب وبينك ما لايقدر واش يفسدة الى اخرة فقد غناها عبد الوهاب باحساس عبقرى وقد اردت ان اترجم هذا الأحساس بالعود ولكنى مازلت غير راضى وسأحاول معها حتى اتقنها تماما ان شاء اللة. ارمندو
احبائى
كل ما واحد منكم بيتكلم انه انجز شىء كنت انا السبب فيه بحس انى فى منتهى السعادة انا عملت شىء عظيم واكرر ان مضناك دى من الأغانى اللى انا بسميها سد عالى ماحد يقدر يتجاوزه سواء غنا او عزف لأنه من الأغانى اللى عبد الوهاب عاملها لنفسه وانا اخترقت السد ده انى كتبتها وقمت بتبسيطها عنى اخدت منها اللحن الأساسى وللعلم اى لحن بيبقى لحن اساسى بعدين المطرب القدير بيعمل فيه زى ما بيعمل واقول لكم على سر ولا حظوا انى كل ما ارد على واحد منكم انا بخاطب الكل السر هو انى لما كنت اروح عند عبد الوهاب او السنباطى او اى حد من العمالقة عشان ادون له نوتة هو نفسه لو عايز النوتة تبقى مدونة 100% لازم بيغنى لى سادة واكرر سادة يعنى اللحن الأساسى بدون اى زخرفة او حليات او عُرب بعدين فى البروفة بالنسبة للفرقة هو بيمسك العود وبيعزف يعنى بيقول انا عايز النوتة اللى قدامكم دى احساسها كده وبالنسبة للغنا انا لما اكون كاتب اللحن الأساسى هو لما بيعمل كل اللى نفسه يعمله الفرقة بتقرا من النوتة اللحن الاساسى وودنهم معاه بيترجموا معاه الإضافات اللى بيعملها يعنى زى تورتة انا بحط حجمها الأساسى وهو بيزوقها بمعرفته وكالما انا حطيت الخطوط الأساسية ممكن الكل يمشى , وهنا استعيد المناقشة المهمة اللى حصلت من شهر مع الأخ علاء كما اعتقد اسمه هو اصر على ان النوتة تبقى متكوبة حرفيا بالحليات والإحساس واكرر للمرة المائة لو اتكتبت كده اولا مش حاتطلع لأن اول عيب حتكون صعبة جدا وخانقة لكل من يعزفها وانسى الهواة والمبتدئين حاتبقى طلاسم وهنا لما انت جيت عند الجزء بتاع بينى فى الحب وبينك هنا دراسة مهمة جدا يعنى انت بتلاقى انا كاتب اللحن الأساسى فى المازورة 4 نوارات يعنى اربع حروف لو دققت بودنك تلاقى عبد الوهاب العبقرى المتمكن بيحط داخل الأربع حروف دول ييجى عشرين حرف منهم الظاهر ومنهم الباطن ومنهم الخبيث وهنا مدرسة مهمة انك اولا تعزف النوتة زى ماهى وثانيا تسمع عبد الوهاب مليون مرة لحد ما تكتشف الحروف اللى مش ظاهرة اللى بيحشى بيها الحروف الاصلية ممكن تكون ايه ومرة فى مرة حاتلاقى نفسك بتقولها ودى لازم تنبع من احساسك انت يعنى حتى لو انت ساكن فى الشقة اللى قصادى وقعدت مهاك كل يوم مش حاعرف اخليك تعزفهم لأنك انت اللى لازم تحسهم
وهنا نيجى لدرس تانى وهو عبقرية موسيقانا الشرقية واللى بتتفوق على الغربية وبالذات فى الجزئية دى بالذات يعنى الموسيقا الغربية بيتكتب كل حاجة الملحن عايزها فى النوتة والعازف لازم يكون صاروخ فى قراءة النوتة وبيمشى على النوتة المحددة زى القطار ما بيمشى على القضبان , هنا لو انت حفظت المقطع ده 100% وتدندنه طول الوقت حاتلاقى اصابعك راحت ناحية الحروف الخفية دى لوحدها ولا حظوا حاجة مهمة اشمعنى ( اشدعوة عشان وائل ) فى اللحن ده بالذات انا نزلت التسجيل ؟
عشان بخبرتى انا عارف انك لازم تكون حافظ اللحن 200% واقول لكم على سر وتشهد عليه اختى العزيزة جوليانا انا لما بعمل مسابقات الموسيقى بتاعة وزارة التربية والتعليم النوتة اللى انا كاتبها لمضناك تناسب مستوى أولى اعدادى يعنى سهلة جدا بس ماتتقراش نوتة بس لازم ودنك تكون مع عزفك وهنا اتمنى تشغلوا السماعى شوية عشان الإبداع يعنى انت مثلا سمعت من عزفى حكاية غرامى اولا ايه رأيك فى عزفى ؟ انا عازفها سماعى لأن لو قدامى نوتة مش حاتطلع كده ابدا وعلى فكرة انتم طلعتم فى دماغى اعزف مضناك وان شاء الله قريبا حانزلها فى المنتدى وهنا حاتسمع انا كابها ازاى وبعزفها ازاى , وعلى فكرة ازف اليكم بشرى انا اتممت تدوين حكاية غرامى بس براجعها وبراجع على الرتوش الأخيرة وحاتستغربوا ازاى الإعجاز انى كتبتها فى يومين اما اكون مبسوط اوى او اكون قرفان اوى وعايز احط همى فى حاجة تشغلنى 24 ساعة متصلين وهنا كانت التانية وهنا درس ان الفنان اللى بجد ممكن مشاكله وهمومه بيفرغها يعمل منها فن مع اطيب تحياتى . عادل صموئيل

[ابوكارم]

الاستاذ/عادل انا من طلبت مضناك لانى كنت حاسس ان فيها سر من اسرار العملاق عبد الوهاب ملك النغم فطلبتها من العملاق ملك النوته الاستاذ/عادل صموئيل وشوف كم الشغل والفرحه وكم الشرح والاستفاده(كميه)وكام فتحت من مناقشات وقلتلنا كام سر لكن الاغنيه فيها اسرار اخرى لو خطرت على بالك ارجو ان تخبرنا بها والاغنيه مقامها حجاز لكن التحويلات الانتقالات لمقام ايه الاغنيه موسيقاها لها وقع غريب على فى نفسى لها تاثير رهيب لست ادرى لماذا ولك منا كل الشكر والاحترام ونشكرك مرة اخرى لحكايه غرامى ونتعشم ان تكون كامله.
اشكرك عزيزى ابو كارم وانت يرجع اليك فضل فى الموضوع كله
اول سر كنت عايز اتكلم فيه ان الاخ العزيز اللى نزل ملف كلمات الأغنية والشرح لو قارنت الكلمات تجد درس مهم وهو ان الأغنية هم اختاروا من القصيدة ككل مجموعة متناثرة مش مسلسلة من الأبيات وخرجت اغنية رائعة يعنى اعتقد ان 90% من المستمعين فاكرين القصيدة الحمد شوقى كتبها زى ما بيغنيها عبد الوهاب ولكن الصح انهم اختاروا منها مجموعة من اجمل المعانى فيها والغريب ان بعد ان اخذت تلك الابيات ان القصيدة لم تنهار يعنى القصيدة جميلة والأغنية اجمل ودى عبقرية لأن اى قصيدة بتكون عمارة متكاملة لو اخذت منها ابيات تضيع الفكرة والمضمون .
ومن ضمن اعجازات القصيدة ان عبد الوهاب احتفظ اطول فترة ممكنة بمقام الحجاز ماعدا الجزء الصغير عند جحدت عيناه
وهذا ايضا انا اعتبره اعجاز من عبد الوهاب لأن من مميزاته انه لايحب التكرار

مضناك جفاه مرقده **** وبكاه ورحم عوده

حيران القلب معذبه **** مقروح الجَفنِ مُسهده

يستهوى الوُرق تأوهه **** ويذيب الصخر تنهده

ويناجى النجم ويتعبه **** ويقيم الليل ويُقعده

الحسن حلفتُ بيوسُفه **** والسورةِ انك مفرده

وتمنت كلُ مُقطعة **** يدها لو تُبعث تَشهده

جَحدت عَيناك ذَكىَ دمى **** اكذلك خدُك يجحده

قد عز شهودى إذ رمتا **** فأشرتُ لخدَك أُشهده

بينى فى الحب وبينك ما لا **** يقدر واش يفسده

مازالُ العازلِ يفتح لى **** باب السُلوانِ وأوصده

ويقول تكاد تُجن به **** فاقول واوشك أعبده

مولاى وروحى فى يدهِ **** قد ضيعها سلمت يدُه

ناقوسُ القلبِ يدق له **** وحنايا الأضلع معبده

قسماً بثنايا لؤلؤها **** قسم الياقوتَ مُنضده

ماخنت هواكَ وما خطرَت **** سلوى بالقلبِ تُبرِدُه

ومن اعجازات هذه القصيدة انه كرر لحن المذهب
مضناك جفاه مرقده
ثم الحسن حلفت بيوسفه
ثم مولاى وروحى فى يده
ثم قسماً بثنايا
وهنا وانا كخبير فى عبد الوهاب وعملت معه عشرين عاما يعنى حفظت خفاياه تجد اروع عبقرية لعبد الوهاب انه عندما استعمل الجملة اللحنية 4 مرات لم ينقلها نقل مسطرة ولكن حتى لو الحروف اللحنية واحدة جود فى الداء وغير اللزمات الصغيرة كل مرة يعنى فى المذهب غنى الجملة بدون لزمات صغيرة وثانى مرة بلزمات ثالث مرة اختلفت اللزمات
واقول لك على سر اهم واخطر انا فى هذه اللحظة لو سمعت هذا اللحن حتكون المرة رقم مليون لأنى اسمعه واسمع غيره منذ خمسين سنة وكل مرة اسمع او اكتشف فيه شىء جديد فى الخلفية هذه هى عبقرية عبد الوهاب يعنى انا كخبير موسيقى عندما اسمع اى لحن اعرف اصله وفصله من اول او تانى مرة لكن عبد الوهاب لو سمعته مليون مرة اكيد ستجد شيئا غير ظاهر فى الخلفية يعنى باختصار الناس دول ماكنوش عباقرة من فراغ كل واحد منهم كان مثل هرم الجيزة مش حاتحصل ان واحد حايعرف او يوصل انه يجيب آخره مع تحياتى عادل صموئيل
اقول لك على سر خطير كمان
لو سمعت فى المقدمة فيه ابوا بتعزف صولو وملحوظ ان نصف الجملة الأول الابوا وقع فى الايقاع يعنى اسرع ودى ظاهرة طبعا عمرها ما بتحصل طيب ازاى سابوها كده لو دلوقتى كانوا وقفوا الشريط او عزفها كذا مرة لحد مايعزف احلى واحدة بعدين فى المونتاج يقصوا الباقى اول شىء العازف كان اجنبى لأن ماكنش فى مصر فى اول الأربعينيات عازف ابوا بهذا المستوى كيب غلط ليه ؟ ( مع ان عازفى آلات النفخ كل شغلهم نوتة اصلا يعنى بيقروا نوتة احسن منى ) لأنه اجنبى ومش متعود على السماعى لأن وقتها مكانش لسه التدوين دخل مصر وكانت الفرقة بتحفظ اللحن من الملحن على العود وعادى اما الأجنبى متعود على النوته وهو شاطر طبعا وحفظ لكن الإيقاع الشرقى تقريبا خضه خلاه اتسربع او استعجل حاتسألأ طيب ليه ماعادش الصولو وشالوا الوحش وخلوا الحلو اقول لك على السر ( اصل انا بفهم فى كل حاجة ) زمان كانوا بيسجلوا مش على شرائط كانوا بيسجلوا على قرص شمع ( وفى الآخر عشان الأسطوانات الحجارى ال 78 لفة ) وقرص الشمع ده بيتسجل مرة واحدة يعنى لو فيه غلطة يترمى ويحطوا واحد تانى وكان مستورد من فرنسا وكان غالى جدا جدا حتى لما تحطه على الماكينة لو حصل شىء وعايز تخلعه وتحط واحد تانى يلزم ساعة وقت مثلا
فهنا لازم الفرقة تكون حافظة عشان العملية مش قابلة للخطأ
عايز تعرف كمان سر ؟ ولا كفاية كده ؟
اقول لك عبد الوهاب فى التسجيل ده شرب 6 اكواب من الينسون الساخن وكان الكوب بقرش تعريفة يعنى صرف 3 قروش وقبض فى اللحن ده عشرين جنيه ثمن الغناء والتلحين
مع تحياتى عادل صموئيل ايضاً