رد: طلبات نوتة
اخى العزيز ارمندو اشكرك على كلماتك الجميلة يعنى انا عملت مدرسة فى التدويناسمها التبسيط وهدفى الهواة والمبتدئين اما المحترفين ف النوت اللى بكتبهايعزفوها وهم مغمضين وانا وفيت بوعدى ونفسى الحكومة (اللى كل يوم تتكلم بس من غير عمل عن محدودى الدخل )توفى بوعدها زيى وتشوفهم شوية اما السؤال عن امكلثوم وفريد الأطرش اقول على السر اللى ماحدش يعرفه لأن الإتنين كانوااصحابى وحافظهم يعنى حافظ اللى قالوه وحافظ اللى بيفكروا فيه من غير مايقولوه , الفكرة كانت موجودة عن ام كلثوم بس فريد خاف منها والسر لأن امكلثوم كان فى دماغها حاجة معينة يعنى عارف لما الواحد بيتربى على حاجةكانت دماغ ام كلثوم زكريا سنباطية واى ملحن عشان هى تتعامل معاه اما تاكلهاو هو ياكلها بالبلدى يعنى وهنا محتاجة واحد جامد جدا يقدر يمشى كلامهعليها بس باللطف ودى الوحيد اللى عملها عبد الوهاب يعنى كانت لما تعرض ( وعلى طول كانت بتعترض ) لأن عبد الوهاب كان معاها مجدد جدا يعنى عمل لهانقلة كبيرة اعترضت على الجيتار الكهربائى فى انت عمرى وهو سابها لحد ماالأغنية اكتملت وسمعت المقدمة 500 مرة بعدها اقتنعت ومن ضمن الجاجات اللىانا شفتها المقطع بتاع عينى عينى ع العاشقين فى أغنية ودارت الأيام كان طبعا زى ما انتم عارفين لون غريب عليها ومارضيتش تغنيها وفى الببروفات كان هو بيغنى المقطع ده وهى تكمل بعدين قال لها انا حاجى معاكى الحفلة وانتى تغنى الاغنية وانا اغنى المقطع ده طبعا ضحكنا وبعد اسبوعين ابتدت تغنيها ولو تلاحظوا انها قفلتها 3 قفلات مختلفة لما عجبتها , ومحمد الموجى كانت فى اغنية الصبر حدود ( هو قالى فى ساعة تجلى ) تدخلت كتير تغير هى فى اللحن ساعتها كان هو صغير ودى الست يعنى ماقدرش يتكلم وده اللى خلى الفرق بين للصبر حدود واسأل روحك فترة طويلة طبعا هنا ممكن واحد يقول الراجل الرغاى الاستاذ عادل ده السؤال كان محدد ليه فريد ما لحنش للست ولكن كعادتى احب ادى للموضوع حقه للذكرى والتاريخ , فريد كان طيب جدا وكانت هى حاتاكله يعنى هى كانت بتاكل الملحن الصغير لكن فريد كان ساعتها حاجة كبيرة اوى ومش حايسمح لها تعدل فى اللحن تغير اللون اللى هو حايعمله وبرضه كان فريد مش بعقلية عبد الوهاب كان من ضمن مميزاته عنده خبث فنى يعنى لما كانت الست تعترض يقول لها اسمعى خمسين مرة بعدين اغيرها بعكس مع فايزة لو اعترضت كان بيسكها يقفلها ماتقدرش ترد وده بسبب ان دماغ عبد الوهاب كان بيعمل الحن بتركيبة زى ماتبنى عمارة يعنى مش الهيكل بسولا الطوب ولكن عمارة فاخرة بتستلمها على المفتاح من باب العمارة لحد السطوح ما يجيش حد يقول له غير السيراميك ده ولا دهان الحائط ده لأنه لما اختار السيراميك او الدهان فكر فيه مليون مرة معلش انا آسف للإطالة بس اتمنى تكون رسالتى وصلت
وجدير بالذكر ملحنين النهارده ( أو ما يسمون نفسهم ملحنين ) اللى بيغنى بيقول له شيل دى وحط دى وخلى دى هيصة وخلى دى تكون كذا وممكن يغير اللحن كله وهنا لو قارنت لحن عبد الوهاب بدول مقارنة زى واحد تعب بيعمل حاجة 3 سنين اكيد تبقى عزيزة عليه وواحد لقى حاجة فى الشارع يعنى لاتساوى عنده شىء
بالنسبة لحكاية غرامى انا ابتديت كتبت فيها صفحة طبعا طلعت روحى بس مش خسارة فيكم بس حتاخد وقت طبعا
بس فيه شىء مهم احب تحضروا نفسكم ليه وبالذات اللى يعزف الاغنية بجد وحلو الأغنية دى 75% منها ادليب يعنى ان ما كنتش حافظ اللحن 100% النوتة معاك لن تساوى شىء لأن الأدليب كما قلت مش بيتقرى زى اللى على ميزان مش حايطلع حاجة ولكن انا اسميه نغمات استرشادية لما تكون حافظ اللحن 100%
وبالنسبة لإنتظاركم الطويل مش ذنبى يعنى انتم عارفين الفنان دايما لازم يبقى عنده شعرة ساعة تروح وساعة تيجى يعنى عشان اكتب بالطريقة بتاعتى لازم اكون فى جو معين وفاضى ومفيش حاجة مضايقانى ودى بتبقى اوقات قليلة جدا بس طلباتكم كتير اوى واغانى كتير منها مش بكون سمعتها اصلا حد يقول لى ما انت كتبت لكل الملحنين الحان تسمعها اول مرة ببس هناك بتختلف يعنى بيغنى اللحن قدامى ع العود مازورة مازورة ومن غير حليات وعرب لكن هنا اصعب 100 مرة وهنا انتم عارفين المصريين دايما عندهم ميزة فى اى ظرف بيطلعوا نكت مهم كان الظرف انا رجعت بذاكرتى 40 سنة لورا واحد قال لى ف المانيا فيه مصنع بيدخل فيه الثور من ناحية يطلع من الناحية التانية علب بولوبيف ( لحوم محفوظة ) وتمنيت يارب يخترعوا ماكينة ندخل فيها اللحن
يطلع من الناحية التانية نوتة ماحدش يضحك ! انا متخصص فى الخيال العلمى يعنى اقول لك كل اللى ممكن يخترعوه بعد 100 سنة ومش بعيد على ربنا بس حكون توفيت ومش حشوفها , انا كل ما اافتح البرنامج اللى بكتب بيه النوتة افتكر وردة مرة ف بروفة قالت : مفيش ماكينة تكتب النوتة الفرقة الماسية ضحكوا لأن كان ساعتها مفيش كمبيوتر ولا الكلام ده كان فيه كمبيوتر فى البنك الاهلى حجمه اد العمارة بتاع شهادات الإستثمار
واقول لكم بالمرة على حاجة غاظتنى واحد طلب اغنية من الأغانى اللى مش بحب اكتبها فى اى وقت طلبها كذا مرة وهرانى ع الخاص اكتر من 30 مرة مع الكلام اللى بيوجع يعنى انى بهمل بعض الناس وكده انا حسيت انه معمول له عمل والشيخ بتاعهم طلب منه النوتة عشان يفك له بيها العمل قمت اتغصبت على نفسى وكتبتها
المهم الشخص ده بعد ده كله اختفى وماشافش النوتة انا ما اظلموش قلت يمكن اتنقل كوالا لمبور وهناك مفيش كمبيوتر المهم نسيتونى
اقدم لكم نوتة البيض الأمارة
بس انا هى فيها فى الكوبليه التانى موال انا مكتبتوش لأن الموال ماحدش يقدر يكتبه لأنه استعراض مهارة المطرب انا بكتب الأدليب وطبعا ممكن حد يسأل ايه الفرق بين الموال والأدليب : الأدليب شىء محدد بيعمله الملحن ولازم المطرب يلتزم بيه وعوما بيبقى مقصود لحن بعيد عن الفزلة والعرب المعقدة واقول لكم مثل زى فى مذهب انت عمرى بتاع رجعونى عينيك لأيامى اللى راحو
اما الموال فهو زى فى البيض الأمارة بتاع لك يوم ياظالم اتفهم كده ؟
ودلوقتى اسيبكم اروح انام الساعة 4 صباحا وعندى شغل الصبح بدرى
مع اطيب تحياتى
|
العرض العادي
