تحليلات سيادة الرئيس ـ أبو على

[سيادة الرئيس]

المشاركة الأصلية كتبت بواسطة جابر الحسيني

أما المفاجأة في هذا العمل فهو شيء جديد (بالنسبة لي) و قد يكون " تجديدا " في فن الطقطوقة و هو التمهيد (تغيير اللحن أو المقام) للغصن الموالي انطلاقا من المذهب الذي يتكرر و ليس انطلاقا من اللازمة الموسيقية كما تعودنا على ذلك ..

إسمح لي ... يخرب بيت عقلك يا حساس جدا

شوفت أنا بحبك ليه

[محمد علي الزوالي]

عمل اكثر من رائع
احساس جبار فيه الجمال والحب والوطنية وكل شيئ
بارك الله لكم هدا العمل الجيد جدا واحر التهاني لمصر العظيمة

[سيادة الرئيس]

المشاركة الأصلية كتبت بواسطة محمد علي الزوالي

عمل اكثر من رائع

احساس جبار فيه الجمال والحب والوطنية وكل شيئ

بارك الله لكم هدا العمل الجيد جدا واحر التهاني لمصر العظيمة

تسلم يا أستاذ علي

و شكرا على التهاني

[kabh01]

ودي تحللها إزاي ومنين يا بو علي؟

صياغة اللحن أو التصوير أو التسلسل المقامي أو العفقات أوالقفلات المعصورة. ربنا يهد عدوينك يا مصطفى يا سعيد.......ذاكر النكتة اللي حكالنا ياها؟

حــــــــــــــــــــــــول

[بشير عياد]

و النيه يدّيها لابنه النابغه بعديه
و يقول قضا و قدر بين البشر محتوم
قُلنا له طيِّب و مين قال القدر معلوم ؟؟
و ايش عرَّفك يا فخامتك بالذي كاين ؟؟؟
يا مصر هانت وبانت كلها كام يوم
نهارنا نادي ونهار الندل مش باين
*****
لا لا
دي ثورة في كلّ شيء
هذا عمل أدارَ عقلي وأطارَ صوابي !!!!
الله يجازيكم خير
تميم البرغوثي ، مصطفى سعيد
ويجازيك يا سيادة الرئيس الذي لا نريد خلعه ولا غيابه أبدًا

[محمود العيادى]

سياده الرئيس..... ولا كلمه ...و نفس ..و لاتنهيده ... دي مش اغنيه ... دي حكايه ...يارب ما نتحرم من هداياك اللي زي دي .

[سعدالشرقاوى]

المشاركة الأصلية كتبت بواسطة سيادة الرئيس . . . غار داهية لا ترجعه

عمي بشير الأنس .. الأحلى من ردك إنك شرفت موضوع ليا .. واحشنا يا رجل

الله على جمالك يابو على
ياللى وحشنى وبتوحشنى وانا حتى معاك
كلمات ولحن اخر جمال
سلمتم
وعاشت مصرنا حرة

[حمدي السمر]

ياااا للجمال

[الألآتى]

بسم الله نبدأ فى تحليل ( يامصر هانت )

يالهوى ..

لم أجد أقرب من هذا اللفظ لأبدأ به تحليل هذه النصيبة ( المصيبة ) التى جاءنا بها صلاح علام

وبصراحة كده وعلى بلاطة ... لقد خشيت من الخوض فى تحليلها .. بعدما رأيت أساتذتنا الموسيقيين تواجدوا فى الموضوع تباعاً

وبعد كلام الدكتور هلال .. الذى حملنى مسئولية وجعلنى أتحسس وأتلمس كل نغمة فى العمل .. لئلا أكون ( فُرجة فى المنتدى )

المهم ... توكلنا على الله

البداية من مقام الراست .. ومن درجة الراست أيضاً ..

وللأخوة الغير موسيقيين .. نقول أن مقام الراست يختلف عن درجة الراست ..

فمقام الراست .. هو المقام الشرقى الجميل الأصيل .. أما درجة الراست .. فهى نغمة ( الدو )

لازمة موسيقية قصيرة من الراست .. ليغنى المطرب الجميل ( مصطفى سعيد ) من الراست طبعاً

يامصر هانت وبانت .. كلها كام يوم ) .. ومن أولها نسمع الحِرفية فى الجملة اللحنية ..

فبينما يبدأ من نغمة الصول وينتهى عند الدو .. نجده فى الشطرة التالية ( لو مش مصدق تعالا ع الميدان عاين )

ينتهى عند الصول وليس الدو .. ولا نشعر أن القفلة معلقة .. ليييييه

لأنه قفل على درجة ركوز جنس الفرع للراست .. وهو راست برضه .. ولكن من الصول ( النوا )

وفيه حاجة كمان .. هو عايز يعيد نفس الجملة .. من الصول .. فهو أرسل نفسه للصول .. لتكون الإعادة طبيعية

وحينما أراد أن ينتقل للشطرة التالية ( ياناس مافيش حاكم إلا من خيال محكوم ) من جواب الدو

أعطانا ( تن ) من العود .. وهذه الـ ( تن ) من الدو الجواب .. خلصت الحكاية

ويمهد للحجاز عند ( إللى حايقعد فى بيته كأنه سلم التانيين ) ويمعن فى الحجاز بعدها فى ( وصلت لضرب الرصاص ع الخلق فى الميادين )

ويعود للراست مرة أخرى عند ( فاللى حايقعد فى بيته يبقى مش مفهوم ) إلى نهاية هذا الجزء

ولا يمكننا بالطبع أن نترك هذا الجزء بدون أن نشير للجماليات ( العُرب )

فنلاحظ أنه عند غناء ( يامصر أصبحنا أحيا وميتين مساجين ) لمس نغمة السى بيمول ليعود للحجاز من تانى

طيب ليه .. ماهو كان فى الحجاز أصلاً .. هذه هى العُربة التى تضيف جمالاً للجملة اللحنية ..

ولأنه يريد العودة للراست بطريقة مختلفة وليست تقليدية .. هل نقول أنه وضع خطة للحن ؟

أم نقول أنها موهبة فطرية وإحساس بالكلمات .. بالمختصر المفيد .. الراجل ده .. بيلحن كلام هو مقتنع به

ييييييه ... نسيت .. أهم حاجة فى قفلة هذا الجزء ..

هو طبعاً عاد للراست لينهى المقطع .. عارفين رجع منين ؟

رجع عن طريق النكريز ... يادى النيلة .. طيب ليه ؟ .. حانعرف فى الجزء إللى جاى ..

نسمع لازمة موسيقية من النكريز .. ويغنى ( نهارنا نادى وبإيدينا على فكرة .. الصبح عنده فضول راح نعمل إيه بكره )

عرفنا ليه هو قفل على النكريز .. لأنه أراد أن يغنى الجزء التالى من نفس المقام ..

وده بيفكرنى بلحن عمنا الموجى ( حانة الأقدار ) .. كان بيقفل على المقام إللى حايبدأ به الكوبليه التالى )

وده يحسم الجدال .. الراجل ده بيشتغل حسب خطة .. وليس جهجهونى ( أى كلام )

ويظل مع النكريز حتى ( أدخل ياأستاذ براحتك والبلد حرة ) .. فنجد أنه تحول لجنس الراست الفرعى

أى من درجة النوا .. ونريح نفسنا ونقول إنه عمل راست من النوا .. وخلاص .

وفجأتن .. أى والله فجأتن .. نلاقيه عمل صبا من الحسينى .. يالهوى .. فين الكلام ده

عند ( ياصبح طلعت روحنا لجل تيجى ياخى ) .. إيه إللى جاب الشامى للمغربى !!

هو مش كان فى راست النوا ؟؟!! .. وإحنا مالنا .. هو عايز كده ..

عمل إيه بعد كده ؟

ساب الرى بيمول ( بتاعة صبا الحسينى ) ومسك فى الرى ناتوريل ( بيكار ) .. ليه ؟

علشان يرجع لراست الدو من تانى .. ياخرابى

طيب .. إحنا قلنا .. إنه أنهى الكوبليه السابق على مقام النكريز .. علشان يبدأ الكوبليه الجديد بنفس المقام

تعالوا نشوف هو أنهى الكوبليه ده من أى مقام .. من مقام البياتى .. ودى تلاحظوها عند ( نهارنا نادى ونهار الندل مش باين )

أنا شخصياً .. ماعرفش أرجع الرجعة دى .. الكدب خيبة . دى عايزة مطرب قرارى أو على رأى صلاح علام ( آرارى )

المهم .. غنى الأستاذ مصطفى من البياتى ( ياصف عسكر بدال الدرع شيلوا إتنين )

وبعدين راح للصبا عند ( كان عنده برضه عساكر زيكم جامدين ) .. ونقدر نتجرأ .. ونقول إنه لمس البستنكار

لأنه رجع لغاية المى سيكا .. ( أحياناً ) ..

وإللى يأكد كلامنا .. إنه عمل ( هزام ) عند ( ياعسكرى البهوات إللى بتحميهم )

يعنى هو تعمد يعمل بستنكار .. علشان يروح للمى يبدأ منها الهزام .. مش محتاجة فكاكة يعنى ( ذكاء )

وبعدين يعنى .. إحنا لسه ماخلصناش نص الأغنية ..

عموماً .. نكمل فى المشاركة التالية .. لأنى تعبت من الجرى ورا التحويلات

[الألآتى]

وقفنا فين المرة إللى فاتت ؟

أه .. وقفنا عند الهزام و ( ياعسكرى البهوات إللى بتحميهم ) .. وبعدين ؟

بعدين .. عمل حجاز عند ( إضرب عشان الوزير من ضربتك يطرب )

ومنها لراست النوا عند ( لكن حاتشتغل إيه لما الوزير يهرب ) ثم نقلة جديدة تماماً لمقام العجم

فين الكلام ده .. عند ( أما الشديد القوى القادر أبو القادر ) ..

وعودة لراست الدو عند ( ثابت يقول للهرم .. ياكابتن إتاخر )

إللهى يوجع قلبك ياللى فى بالى .. مافيش جملة زى التانية ..

ونسأل أنفسنا .. هل عاد للراست حتى نهاية الكوبليه .. كده وخلاص ؟

إزاااى .. وده يصح برضه .. لازم يلف دماغنا .. يرجع عن طريق السوزناك ..

يعنى أخد الحجاز معاه وهو راجع .. حانلاقيه عند ( ولم يزل معتقد إن الهرم حايقوم )

ويتجه بعدها للراست حتى ( يامصر هانت وبانت كلها كام يوم )

فنجده تحول للكرد .. ويعود للرست لينهى الكوبليه ..

إقفش .. وسع .. الخماسى وصل ..

تحويلة لسلم الخماسى .. ولغير الموسيقيين نقول أن السلم الموسيقى الطبيعى سبعة درجات نغمية

لكن الخماسى خمسة درجات نغمية فقط .. وهو مقام مستعمل فى دول إفريقيا .. والسودان خاصة

نسمع الخماسى عند ( ده حكم أسرة ولا خوفو ولا خفرع )

ويتحول للعجم عند ( عمل مسوجر بعيد عنك ولا يطلع )

ويظل مع العجم .. مع زيارة قصيرة للحجاز .. ( ماطلعش بالأدوية .. جربنا ألف طبيب )

ثم تحويلة للنهاوند عند ( عمل مسوجر وسفلى شغل تل أبيب ) ..

وعودة للخماسى عند ( وشغل ألأمريكا متغلف وختمه عليه )

ومنه للنهاوند المرصع عند ( ضيف زارنا ياعم من غير دعوة لابس بيه )

ثم تحويلة للنوا أثر عند ( قعد تلاتين سنة مابيقولش قاعد ليه )

وعودة للراست عند ( قلنا له طيب ومين قال القدر معلوم ) وقفله حراقة ..

أو صاعدة حتى الدو ( جواب ) وتسمى كردان

وخلصت الحكاية .. وتوتة توتة .. ماخلصتش الحدوتة

أنا قعدت أجرى ورا الراجل ده لما إنقطع نفسى ..

مين حايعوضنى عن الخمستاشر كباية شاى والعشرتاشر علبة سجاير إللى شربتهم أثناء هذا التحليل المتعب

أرجو أن تلتمسوا لى العذر .. إذا كان هناك أخطاء أو هفوات فى التحليل ..