المسحراتي

**حازم فودة** · #20 04/04/2025, 23h24

المسحراتي
(الحلقات الإذاعية آداء سيد مكاوي وأشعار فؤاد حداد)
(19)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي منأراتي دي ليلة نادية متشوقة زي الحمامة مطوقة يللي سامعني إسمع بأة ... الليل ده أكبر من الحيطان المحلقة ومن النجوم المبحلقة الليل ده قلب مشتاق لُقى ... دقدوقة مركز إتياي بتصحى ع الدقدقة أبو عزيزة النسمة طعمة محيأة يا خالتي جازية شتوية لكن مورقة ... اسقيني يا ابني عاش اللي ساعد واللي سقى يا سعد أولى صيام في جمعة عزق وشقى ... انت اللي تسند الازيار وتزرع انت النئا ...
والمشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال .... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... أدق بشويش أبطط عيش أسمعكم ... والا أنطر الإيد لفوق لبعيد أسمعكم ... يا اهل البلد قلبي ما يبعدش بعيوني ... يا اهل البلد نوروني انتم الأمة ما طابت اللقمة غير اللي اسمعكم اصحى يا نايم اصحي يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق

الملف الصوتي هنا