من أعمال الشاعر مظفر النواب

[لؤي الصايم]

يا ريحان

أشكد نده ...
نكط على الضلع
ونسيت أكلك .. يمته
أشكد رازقي ونيمته
وأشكثر هجرك عاشر
ليالي الهوى وما لمته
لمن سحنت الليل
بكليبي
وكلت موش أنت
**********
يامه التراجي مرجحن
حسك الصافي وغفه
ويامه الدمع ضوه سواد العيون
جانب ترفه
وتدري تنيت الدفو
بلهفه ورده
وما جيت ونيمني الثلج ...
والشته كله أتعده
لا بالمحطة رف ضوه و لاخط جانه من البعد
لا ريل مر على السده
والشته كله تعده كله تعده
وأعلكنه للصيف اليجي
روازينه السمره ...
شمع
من ينزل أول الدفو بنيسان
يهتز نبع
يمكن يخضر دمع ...
يمكن بعد بالروح يا ريحان وصلة تنزرع
والكيظ أجانه وأنكضه ورد أنكضه
ورد كيظ أجه
والزلف هجرك فضفضه
ورد فضفضه
وما مش رجه
*********
ولساع من همسه جي من بعيد
يخضر دمع
كل نسمة ترفه من تفك الباب
يخنكني الدمع
لساع .. ولذتنه أنكضت
أهجس على الكصايب شمع
وردود أكلك .. يمته ؟؟
أشكد رازقي
ونيمته
أملني يسمر بيك
كل عمري أنكضه وأملته
حته خيالك بالحلم
خايف يجي وأمنته
***********
كل لحظة من هذا العمر
وعت حسافه بكلبي
يا أول الريحان يلعطيت
نوبه بدروبي
يا آخر سواجي حنيني وحبي
من يوم طيفك هجر نومي ما نمت
حنية يا جذاب منك
ما شفت
من ظني كضك بالحلم
عنبر فحت
من ردت أجيسك جست روحي
وفرفحت
أترف من أجفاف المهر
قندون ... ما ضايك شكر
يا حلو يا بوسة سهر ...
يا ترف يا ييزي قهر
شيضرك .. بكل شته الولهان
لو صحوة مطر ؟
والشته كله تعده
والكيظ هم أتعده
شجاب العشك ؟ وأشوده ؟
لا بالمحطة رف ضوه ...
لا خط أجانه من البعد
لا ريل مر على السده
**********
ولساع ... مشدوده شبكتك
عل الخصر
والركبه من تلتاف للبوسه
جسر
بس أنت تدري شلون رصعة بالنحر
والشته شايل شليله
من يمنه وعبر
واسألته يا شته العشاك
ما عندك خبر
لك يا شته العشاك ما عندك خبر ؟
والليل أجانه وأنكضه ورد أنكضه
ورد كيظ أجه
والزلف هجرك فضفضه
ورد فضفضه
وما مش رجه

[لؤي الصايم]

للريل وحمد

"على ماء الصبح أحبته..
على ماء الليل، كان للهجر قمر،
ومر قطار"
مرّينه بيكم حمد، واحنه ابغطار الليل
واسمعنه، دگ اگهوه...
وشمينه ريحة هيل
يا ريل ..
صيح ابقهر ..
صيحة عشگ، يا ريل
هودر هواهم،
ولك،
حدر السنابل گطه
** **
يا بو محابس شذر، يلشاد خزامات
يا ريل باللّه.. ابغنج
من تجزي بام شامات
ولا تمشي.. مشية هجر ..
گلبي..
بعد ما مات
وهودر هواهم،
ولك،
حدر السنابل گطه
** **
جيزي المحطة..
بحزن ..
وونين ..
يَفراگين
ما ونسونه، ابعشگهم..
عيب تتونسين
يا ريل..
چيّم حزن..
اهل الهوى، امچيمين
وهودر هواهم،
ولك،
حدر السنابل گطه
** **
يا ريل،
طلعوا دغش..
والعشگ چذابي
دگ بيّه كل العمر..
ما يطفه عطابي
نتوالف ويه الدرب،
وترابك ..
ترابي
وهودر هواهم،
ولك..
حدر السنابل گطه
** **
أنه ارد الوگ الحمد.. ما لوگن لغيره
يجفّلني برد الصبح ..
وتلجلج الليره
يا ريل باول زغرنه..
لعبنه طفيره
وهودر هواهم،
ولك.. حدر السنابل گطه
** **
چن حمد..
فضة عرس..
چن حمد نرگيله
مدگگ بمي الشذر،
ومشلّه اشليله
يا ريل..
ثكل يبويه..
وخل أناغيله،
يمكن أناغي بحزن منغه..
ويحن الگطه
** **
أرد اشري جنجل
والبس الليل خزامه
وارسم بدمع الضحچ
نجمه
وهوه
وشامه
ويا حلوه بين النجم
طباگة لحزامه
وهودر هواهم
ولك..
حدر السنابل گطه.
** **
گضبة دفو يا نهد
لملمك.. برد الصبح
ويرجفنّك، فراگين الهوه.. يا سرح
يا ريل..
لا.. لا تفزّزهن..
تهيج الجرح
خليهن يهودرن..
حدر الحراير گطه
** **
جن گذلتك..
والشمس..
والهوه..
هلهوله
شلايل بريسم..
والبريسم إلك سوله
واذري ذهب يا مشط
يلخلگ.. اشطوله!
بطول الشعر..
والهوى البارد..
ينيم الگطه
** **
تَو العيون امتلن..
ضحچات.. وسواليف
ونهودي زمّن..
والطيور الزغيره..
تزيف
يا ريل ..
سيّس هوانه،
وما إله مجاذيف
وهودر هواهم،
ولك..
حدر السنابل گطه

مع مراعاة الكتابة باللهجة العراقية حتى لا تفقد القصيدة جمالها فلم أغير الحروف

[لؤي الصايم]

صديقي اعترف

صحِيحٌ سأُغلِظُ وَجهيَّ
حينَ أراكَ غداً في طَريقي ...
ولٰكن سأبكي من القلبِ
إنَّكَ لم تَتعلمْ برُغمِ ذكائِكَ
بَعضَ وفاءِ الكِلابْ
سَيبقىٰ غِيابُكَ بينَ جُروحيَّ
التي لا تُداوىٰ
يَوماً ... فيَوماً
تُعاقِبُكَ الذِّكرياتْ
فإنَّ الزَّمانَ أميرُ العِقابْ