رد: طلبات نوتة أ / عادل صموئيل الجزء الثانى
أستاذ عادل إزاي حضرتك عامل إيه؟ أتمنى تكون في أفضل صحة وحال ونتمنى نشوفك قريب ونستمتع مع حضرتك بحواراتك وذكرياتك الجميلة.
أنا كان عندي سؤال بس بسيط لحضرتك أنا مش عارف هل حضرتك متابع الحفلات إللي بتحصل في السعودية لأعمال الموجي ورياض السنباطي وبليغ ومحمد عبد الوهاب؟ هو حضرتك رأيك الفني إيه في إللي بيتقدم ده؟ هل حضرتك راضي عن أداء وجودة المطربين إللي بيأدوا الأغاني بتاعت العظماء دول؟
أنا بشوف إن منهم كتير جدا، بيبقى الأغنية كبيرة عليه قوي ومستواه ضعيف جدا في أداء الألحان والحليات.
أنا شايف إن الموضوع هو موضوع إبهار أكثر منه كواليتي يعني. لأني بشوف على المسرح يعني عشرات العازفين. آه معروفين ومشهورين، ومع ذلك بسمع موسيقى مهياش بالدرجة إللي المفروض تناسب مع مستويات إللي قاعدين دول بالذات في الصولوهات..
المفروض إنهم أكاديميين ودارسين، وفي منهم من عاصر أم كلثوم، وعزف معاها زي الأستاذ رضا رجب. ومع ذلك، بحس إن أداء العازفين في الصولوهات لا يتناسب مع تعليمهم ولا مكانتهم ولا أي حاجة، مش فاهم المشكلة فين. مثلا في أغنية القلب يعشق كل جميل عزف الصولو بتاع الكمان، الصولو الشهير. أستاذ رضا رجب عزفه وحش اوي .. ده مش عزف حد عاصر أم كلثوم خالص ولا عزف معاها.. أنا مش عارف هل أستاذ رضا رجب عزف القلب يعشق كل جميل مع أم كلثوم ولا لأ؟ بس مش ممكن يكون العزف متواضع اوي كده..
برضو في أغاني لعبد الحليم عزف الصولوهات كان متواضع اوي رغم انهم المفروض عازفين ونخبة منتقاة وأكاديميين وعظماء ومشهورين وكل حاجة بس الصولوهات مش بتعزف بدقة وحلاوة زي الأصليين.
هو المشكلة في النوت يعني مش مكتوبة بدقة اللحن الأصلي ولا هما مش عارفين يعزفوا الحليات بتاعت الصولوهات؟ يعني المفروض هما متمرسين في الموضوع يعني معقول مافيش نوت للصولوهات كما عزفت بحلياتها وتعقيدتها وهما حافظنها.. عزفهم للصولوهات بعيد عن الأصلي بفارق كبير. هو المشكلة فين من وجهة نظر حضرتك؟
|
العرض الشجري