احبائى
.. اقدم لكم اليوم تحفة فنية لعبد الوهاب من الصعب انك تلاقى لها نوتة حلوة او سهلة ..
دور : احب اشوفك كل يوم ...
ليه قلت دور ما قلتش اغنية كالعادة .. الكلام يرجع لأوائل التلاتينات ... كان وقتها الغناء فى قوالب يعنى طبعا انتم عارفين السماعى والموشح والبشرف وخلافه .. والقوالب دى كانت اصولها تركية .. وكان الغنا المصرى الاصيل نوعبن الاغنية القصيرة وتسمى طقطوقة .. والاغنية الطويلة الدسمة اسمها دور ... وعشان الملحن والمطرب يبقى فى الدرجة الاولى الممتازة لازم يلحن ويغنى الدور .. لأن اللى بيتخصص فى الطقطوقة بيبقى ملحن بتاع شغل خفيف ( كان عمار الشريعى بيسمها سندويتش ) على اساس ان الاغنية الكبيرة وجبة دسمة .. وعبد الوهاب لما دخل الوسط الفنى كان قبله فيه فطاحل عظام زى سلامة حجازى وسيد درويش ومن قبلهم محمد عثمان وكامل الخلعى .. وعشان يثبت جدارته فى وسط هؤلاء ما ينفعش شغله يبقى مقبول كان لازم يبقى اعجاز بالبلدى يعنى يعقد الملحنين والجمهور .. لأن الوسط الفنى لو انت موهوب ادخل كبير اوى . بعدها تنطلق الى عنان السماء.. والدور ده انا دونته الحمد لله مع انه خد منى وقت طويل عشان اوصل لأحسن نتيجة لأن عبد الوهاب القديم كان لما بيبدع بيخرج خارج نطاق التدوين بس النوتة هنا ممكن اى مبتدىء يمشى فيها بسهولة الحمد لله .. بعد كده عبقرية عبد الوهاب والغزارة اللحنية المتدقفة عنده خلته ابتدا يتمرد على القوالب .. مع ان الى قبله مشيوا عليها سنين طويلة ولكنه حس انها بتقيده ... يعنى انت لما تذاكر عبد الوهاب كان له مميزات خطيرة يعنى لما يعيد الجملة لازم يعمل فيها حاجة مختلفة ... ما يقدرش يكرر جملة كتير لأن عنده عشرات الجمل عايزة تطلع .. وبعدين الدور انت لو شفت الكلمات بتاعته حتلاقيها 3 ابيات مثلا وبتتكرر .. واللعب فى اللحن .. لكن عبد الوهاب حب انه يلحن قصائد طويلة واغانى طويلة وهنا لما ابتدا يخرج عن القوالب اتهاجم الاول فترة .. لكن لما افحمهم بجمال وعبقرية الالحان .. بقا مدرسة الى بعده كلهم قلدوه حتى مبادىء التحرر والتمرد ابتدت فى الدور ده من المقدمة .. يعنى كانت طويلة مع ان الدور اصلا كان المقدمات بتاعته دولاب يعنى جملة واحدة عادة ومتشايهة فى معظم الادوار يعنى حاجة بتخليك توصل للمقام اللى حاتغنى منه لكن عبد الوهاب هنا عملها جملة مخصوصة للدور ده .. اتمنى التدوين يعجبكم واطيب تحياتى
رد: طلبات نوتة أ / عادل صموئيل الجزء الثانى
العرض الشجري