طلبات نوتة أ / عادل صموئيل الجزء الثانى

**elarabi** · #1 31/07/2022, 12h20

استادنا القديرو الغالي بل غلاوتك ليس لها حدود مع الكل وهدا من فضل الله .و ليكون في علمك انك تسعد الكل في هدا المنتدى.اما بالنسبة لي انني لا يمكن لي عزف النوطة بسبب مرضي و اكتفي برؤيتها في اليوتوب ملازمة مع الاغنية والحمد للله.متمنيا ان يحفضكم الله من هدا المرض المدمر-جلطة دماغية-الزمتني الجلوس في كرسي متحرك و مع دلك احاول داءما ان اكون اجابي.

الف سلامة عليك وربنا يشفيك ان شاء الله واطيب تحيات

**عادل صموئيل** · #2 01/08/2022, 07h29

احبائى
اقدم لكم من اروع اعمال السيدة فيروز ...
سنرجع يوما

... اللحن ده من اصعب الالحان الى انا دونتها لفيروز .. يعنى بيحتاج فهم فى الاول ,, يعنى فيه الحان زى حنا السكران وفيه الحان زى ده .. اللى بيدون لو حس انه مايسترو كبير مطلوب فى حنا السكران يعنى انا ادونه وانا بشرب كوب شاى متوسط الحجم وطبعا الالحان الى زى كده .. لكن لحن زى سنرجع يوما لازم احس انى مبتدىء .. يعنى بتحسس كل حرف وإلا تطلع غلطات كتير .. ليه ... طبعا الكلام ده مهم اوى .. لأن دايما بيديك الحرف ال مش متوقع .. حتى فى الموسيقى مافيش التتابع الطبيعى يعنى اللزمات يتهيأ لك انها شبه بعض .. واحنا فى مصرالموسيقى مألوفة لأنها كانت تتر برنامج اذاعى اسمه لغتنا الجميلة كنا بنسمعه كل يوم .. لكن لو دققت فيها تلاقى الموسيقى 3 مرات مش زى بعض فيهم فخاخ .. يعنى لازم تدقق اوى وتراجع كل مازورة وبعدين تراجع كل جملة تتأكد انك كاتب صح .. والنتيجة الحمد لله نسبة الاخطاء صفر .. فيه ملحوظة هى بتغنيه وفيه دليل 3 دييز يعنى كرد من الدو دييز وطبعا ده سكة مش مألوفة للعازفين الشرقيين انا نزلتها تون عشان يبقى الدليل واحد دييز وبقا كرد من سى ناتوريل ... معقول شوية طبعا واسهل من دو دييز .. تبقى شىء واحد .. اللحن ده من النوع اللى مايتقراش حروف .. لازم تكون حافظة وتشغل ودنك وانت بتعزف لأنه محتاج احساس فى الاداء ... مع اطيب تحياتى

**عادل صموئيل** · #3 02/08/2022, 03h59

احبائى
اقدم لكم من اروع اعمال الفنانة ليلى مراد ..

حكايتنا احنا الاتنين

..او انا احبك وافضل احبك وانت عذابى ونور العين .. والمدون بيحس باللحن اكتر مليون مرة من المستمع او العازف .. لأن بقف على كل مازورة ولازم اسمعها واحسها كذا مرة قبل ما اكتبها وبعد ما اكتبها براجعها .. هنا بحس بالعبقريات بتاعة الزمن الجميل يعنى انت لما بتدقق فى جزء بتحس اد ايه اذا كان عبقرى او تافه .. وهنا ابهرتنى العظيمة ليلى مراد .. يعنى صوت مش ممكن يتكرر .. وامكانيات اكتر من اللى بتقوله بكتير .. واللحن ده يعتبرمن اوخر اغانيها .. يعنى هى لما ابتدت تكبر ف السن .. مايقتش تليق على ادوارها القديمة دور البنت اللىبيحبها البطل .. وهى ماتنفعش تطلع ام مثلا ماتركبش عليها.. يعنى ليلى مراد دى ماجاش حد زيها تحسها اميرة احلام .. تحسها ملاك نازل من السما .. يعنى ماحدش يتجرأ ويقول فلانة المطربة دى امتداد ليلى مراد .. واكتر شىء خلاها تعتزل انها ماكانتش بتعمل حفلات .. يعنى انا خبيرفى كل اغانيها بس عزفت معاها مرة واحدة فقط .. ما قدرتش اكتشف هى مكانتش ليه بتغنى ف حفلات .. يعنى لو كانت بتغنى ف حفلات كان ممكن تستمر 15 سنة زيادة عن الوقت الى اعتزلت فيه وكان ممكن تعمل مركز ثقل بين النجمات الكبار .. رحم اله ليلىمراد واترككم مع اللحن الرائع مع اطيب تحياتى

**عادل صموئيل** · #4 03/08/2022, 06h40

احبائى
اغنية ملحم بركات

جيت بوقتك

مع اطيب تحياتى

**salhi_haithem** · #5 03/08/2022, 15h31

الشكر الجزيل على هذه الباقة من عطائك اللامحدود أستاذنا الكريم عادل صموئيل

**سامريونس** · #6 05/08/2022, 11h33

اقتباس:

المشاركة الأصلية كتبت بواسطة عادل صموئيل

احبائى
اغنية ملحم بركات

جيت بوقتك

مع اطيب تحياتى

السلام عليكم ورحمة الله وبركاته الأستاذ الكبير عادل صموئيل
يعطيك الف عافية على نوتة/ جيت بوقتك/بارك الله فيك

**عاصم المنشاوى** · #7 05/08/2022, 16h18

استاذنا الغالي...عادل صمويل

نجدد الدعوة بإن حضرتك تطلع لنا لايف...

بناء على رغبة الجماهير...

ويمكن للاستاذ الجميل/هيثم الصالحي....شرح برنامج جوجل ميييت ويضع لنا لينك المقابلة...حيث ستسعدنا جميعا باطلالتك والرد على تساؤلاتنا جميعا..

عالعموم العمر المديد...للقلب السعيد....وكل سنة وحضرتك طيب...

**عادل صموئيل** · #8 05/08/2022, 23h45

احبائى .. مع بداية سنة جديدة من عمرى اشكر كل من هنانى بعيد ميلادى سواء على النت او تليفونيا .. واهديكم من اروع ما لحن السنباطى للسيدة ام كلثوم .. واحلى ما عزفت .. برغم صعوبتها الشديدة لكن جمالها لا يوصف .. قصيدة اغار من نسمة الجنوب .. مع النوتة الموسيقية .. القصيدة دى بتمثل بالنسبة لى شىء مهم ان حد من الى بيحبوا يسمعوا عزفى زمان قال لى حرام تضيع ال بتعزفه سجلهم وسمعهم للناس .. وكان اول ما طلبها منى شخص عزيز جدا عليا هو مش موجود معانا الهل يرحمه ,, اغار من نسمة الجنوب .. وماحدش عزفها كان من قبل .. وكانت السبب انى بعد كده سجلت اكتر من 120 معزوفة .. يعتبروا مرجع لأحلى اغنى الزمن الجميل وماحدش عزفهم كلهم .. لكن اغار من نسمة الجنوب كانت لها ميزة لما عملتهم على اسطوانة كان كل واحد اهديه الاسطوانة يقول لى كلام حلو بس اغار من نسمة الجنوب يعنى شىء مالوش حل .. انا بعد 72 سنة .. ( انا مواليد 5 اغسطس 1950 ) اشكر الله .. يعنى خلانى اعزف مع كل كبار نجوم الزمن الجميل .. مطربين وملحنين وكل الممثلين ومافيش حد معروف وقتها فى اى مجال ما شفتوش او ما سملتش عليه .. ورحت جميع دول العالم الى ممكن تتراح .. وشفت حاجات كتير من الصعب اى حد يشوفها واحمد الله ..ربنا ادانى شويةخبرة .. ولما ابخل على حد ما اعرفه يعنى قدمت للموسيقيين فىكل دول العالم اكتر من 3000 نوت موسيقية .. هم خلاصة الفن فى الزمن الجميل .. واخترعت او ابتكرت طريقة مبسطة خلت المبتدئين والمتوسطين يقدروا يعزفوا اى اغنية صعبة بأنى سهلت الكتابة ... وكانت الموسيقى زمان بتتدون بطريقة صعبة جدا للمحترفين جدا فقط ودى كانت بتخلى المبتدىء لما يشوفها يخاف منها .. يعنى اى حد منكم دراس موسيقى فاكرين كتب التمارين زمان لما كنتم مبتدئين كان فيه تمرين تلاقى شكله حلو وسهل وتمرين تخاف منه تلاقى شكله صعب .. ومن احلى الاوسمة اللى شفتها مئات من المتوسطين قالوا لى احنا عمرنا ماكنا حانقدر نعزف الحان لأم كلثوم ولا ل عبد الوهاب ولا للسنباطى بدون تدوينك السهل .. كمان اهم حاجة ف معزوفاتى .. انى ملتزم باللحن الاصلى .. لم ادخل فى اللى بيحصل دلوقتى من تجويد وهدم للألحان بتاعة العمالقة .. يعنى احنا ك خبراء بنعانى من حاجتين .. متطفلين على الموسيقى زى المشاهير بتوع دلوقتى .. وبين ناس شاطرين بس مشكلتهم انهم مش فاهمين ان الشطارة انك تقدم اللحن حلو .. مش انك تضيف عليه وتتفزلك .. يعنى احنا زمان كان الملحنين بيفرضوا علينا قيود صارمة لأن اللحن متلحن فى سنة .. وشهرين بروفات .. يعنى الملحن عمل تعديلات ومش ممكن اللحن يتعدل اكتر من كده .. وكان من المحظور ان حد يضيف عليه شىء .. وياما حصل قدامنا من مطربين كبار كان الملحن بيتخانق معاهم لما يخرجوا عن الى اتعمل فى البروفات .. لأن ده تراث .. ومعمول بحرفيةعالية جدا جدا .. تخيل لو انت رحت مجتمع او ندوة شعرية وحاتقرا قصيدة لشوقى مثلا هل حد يجرؤ او ينفع انه يضيف لها كلام من عنده او يحذف كلام او يغيرمعنى ؟ مش حاتحصل اللحن بتاع العملاق له نفس القدسية والحصانة لأن فيه حد بيعحبه بياخد منك ويعزف .. وتتسبب انت فى ضياع نصف اللحن الاصلى .. يعنى النوت اللى انا دونتها مع ان معظمها انا عزفته مع اصحابه الاصليين .. او عزفته مئات المرات يعنى انا ممكن ادونه من الذاكرة .. ولكن جل من لايسهو .. يعنى لازم اشغل الشريط بتاع التسجيل الاصلى وادون منه حرف حرف عشان الامانة .. لأنى خلال السنوات الماضية عملت لنفسى اسم فى التدوين .. واى موسيسقى فى اى دولة من دول العالم بياخد النوتة المكتوب تدوين عادل صموئيل على انها مرجع وبيسيب اى تدوين قبلها ..ف الخطورة هنا والامانة اللى لو ان فيه حرف صول كتبته فا مثلا العالم كله حايعزفه بعد كده فا .. وكلمة الامانة دى مهمة جدا جدا .. يعنى كل الملحنين دول انا اكلت معاهم عيش وملح .. وشغل وصداقة سينين طويلة وحاقابلهم تانى ان شاء الله قريبا .. عايز اقول لهم انا عملت الواجب وزيادة ..رياض السنباطى مرة فى السيعينات طبطب على كتفى وقال لى انت الخير والبركة فهل كان يتنبأ بأنهم كلهم سيرحلوا وابقى انا اسجل فنهم وحضارتهم .. رياض السنباطى مثلا انا دونت كل الحانه الحمد لله.. والروائع اللى عملوها واخليها تعيش للأبد لأن اللحن بيعيش باللى يعزفوه بيبعثوه للحياة .. واحساسى بالمسؤولية لما كل الناس بتطلب منى تدوين الاغانى .. يعنى انت لو بتحب تعزف لبيتهوفن مثلا .. فى جميع دول العالم الكبرى مكتبات موسيقية .. فيه جميع اعمال هؤلاء العظماء موجودة تطلبها بالرقم .. لكن مع الاسف اغانينا مالهاش نوت إلا اجتهادات البعض يعنى تكتب اسم النوتة على جوجل وانت وحظك .. وده الشىء الل انا كرست له معظم وقتى وقدمت النوتات مجانا يعنى اى حد بيطلب اى نوتة بدونها له ( و 99% منهم معرفهمش شخصيا ) ومكن الصعب تجد حد كده .. الحمد لله .. الحمد لله .. واشكرك واترككم مع اغار من نسمة الجنوب