من سباعيات الجمل

**hany57** · #1 19/12/2019, 11h02

( 7 )
ناديت أنا ع الحظ يمشى معايا مرضيش
وروحت أقول للمال يزورنى يوم مرضيش
ودورت أنا ع الصاحب دقيت بابه مرضيش
وأنا اللى ياما أخلصت وشيلت معاه فى الهم
ولما شافنى كدا فاتنى وغيرى أهم
إحنا سمعنا مثل عن حالنا ويا الهم
( قال أيه رضينا بالهم والهم بنا مرضيش )

**hany57** · #2 25/12/2019, 11h21

( 8 )
ياللى مشيت بالأصول ما حد يغلط فيك
علشان ماشى بالأدب والأدب دا طبع فيك
وبعيد عن الشر دايما وناسه كلهم تجافيك
الراجل الحر تلاقيه يمشى فى المعدول
ولا يفكر فى يوم يمشى فى البطال
وصاحب العقل دايما فى الكلام معدول
واللى بلا عقل ملهوش إلا فى البطال
واذا خطبت لإبنك اخطب وفى المعقول
وسيبك من اللى كلامهم فاضى وكمان بطال
وطول ماعينك على ابنك دايما هيمشى عدل
والفرع يطلع سليم لأن أصله عدل
زمان سمعنا مثل وكان كلامه عدل
إمشى فى طريقك عدل يحتار عدوك فيك

**hany57** · #3 06/03/2020, 11h17

( 9 )
الشبعة من بعد جوعة إوعاك فى يوم تماشيه
دا مهما يشبع تلاقى الجوع مأثر فيه
مهو كل إنسان كدا أصله يرد عليه
أما الجوعة بعد شبعة ماينسى شبعه فى يوم
دايما بيكرم ضيفه لو حتى كان معدوم
والشبعة من بعد جوعة مايبر نفسه فى يوم
واللى فى يوم يقصده مايرد حتى عليه

**hany57** · #4 06/03/2020, 11h22

( 10 )
قبل ان تحب الجمال شوف قبله جمال الروح
مش كل حلاوة تشوفها وراها حلاوة روح
ماهو أصل طول البكا علمنى طول النوح
مع الجمال الحقيقى قلبك يعيش فى فرح
وتلقا شجر المحبة زهر بسرعة وطرح
وافرز مشاعرك كويس مش كل رقصة فرح
دا الطير بيرقص فرح وبيرقص م الألم مدبوح

**hany57** · #5 06/03/2020, 11h31

( 11 )
حبيبك اللى يحبك حافظ عليه وداديه
لو شوفته مخلص معاك إوعاك تفرط فيه
وازرع له شجر الوداد ومن المحبة ارويه
ودارى على شمعتك تلقاها دايما تقيد
وعشان ماتقضى الحوايج اقضيها بالكتمان
الصبر عند الشدايد ينفع أكيد ويفيد
ولما تطلع سرك منين ييجى الكتمان
وعشرة ع الشجرة خير منهم واحد فى الإيد
واللى يبيعك بيعه واعلنها بدون كتمان
وخلى عملك يوافق نيتك والقصد
واقبل الإعتذار عن فعل من غير قصد
زمان سمعنا مثل منه الحبيب القصد
( الورد مهما دبل يفضل عبيره فيه )

**hany57** · #6 11/04/2020, 21h30

( 12 )
ومين يا عمر من بعدك راح يسمع الموال
ويعشق كلامه المزهر اللى سبق ما اتقال
وكنت عمدة سماع وتبان خلى البال
دى نهاية البشر ونهاية المخاليق
وحكم رب العباد على العباد الموت
لو هو فوق السرير أو ماشى وسط طريق
لا يعرف ساعته امتى ولا أرض فيها يموت
يارب لجل النبى ماتنشف لنا فى يوم ريق
وارحمنا م السكرات اللى تصاحب الموت
ماعدش ليا رفيق فى الموال من بعدك
وازاى يطيب لى السماع فى الدنيا من بعدك
رب السما أعلم بى أشكى إليه بعدك
واتيتموا من بعدك الغنوة والموال

**hany57** · #7 07/07/2020, 14h03

( 13 )
بيع قليل الأصل ولو غرمت عليه
علشان طبعه خسيس مافى حاجة تملا عنيه
يحقد على النعمة وينكر يوم صرفت عليه
ولما تعشق إعشق قمر وجميل
تسعدك منه ابتسامة وقلب لك بيميل
ودور على الأصل ماتصاحبشى إلا أصيل
إبن الأصول لو يميل أصله يرد عليه