طلبات نوتة أ / عادل صموئيل الجزء الثانى

**omarhalim** · #1 27/07/2019, 00h38

مرحبا أستاذ عادل
من مدة طلبت تدوين أغنية الأستاذ محمد عبدالوهاب همسة حائرة من درجة لا بدل ري ..
لك كل اشكر لما تقوم به تجاه المنتدى .. مع أطيب الأمنيات بالصحة والعمر الطويل ..

ماشى اخى العزيز انا شفت الطلب ان شاء الله انزلها لك الاسبوع ده
مع اطيب تحياتى عادل صموئيل

**عادل صموئيل** · #2 28/07/2019, 02h05

احبائى

اخى العزيز مينا رضا طلب ترنيمة

مختصر الكلام

انا دونتها له لكن ليا ملاحظات هى طبعا تهم الجميع مش شرط انها ترنيمة ولكن انها لحن ..
الترنيمة دى متلحنة بكل مشكال الاغانى او طريقة التلحين الحديثة ... يعنى بيبتدى الموضوع بلحن مالوش اى قيمة يعنى الملحن ممكن بيعمله فى خمس دقائق .. مش بيتعب نفسه فيه لأن الجمهورما بقاش بيسمع موسيقى الجمهور بيسمع الايقاع والبيز والبيت والخبط يعنى تمشى تلاقى كل املحلات حتى التوكتوك معلى مفتاح البيز او البيت ع الآخر هنا مش تسمع لحن بتسمع الخبط بتاع البيز فقط وطبعا تحته ممكن تحط اى لحن حتى لو اتكرر مليون مرة الجمهور ولا فاهم حاجة ولا سامع حاجة اصلا ... انا بقالى اسبوع فى مرسى مطروح .. هناك كل المحلات نفس الموضوع صوت عالى ع الآخر ومعلى البيز او البيت ع الآخر النتيجة عمال تسمع خبط طأنك فى ورشة سمكرة .. مشكلة البيز ده انه بيبقى واصل ل يمكن 500 متر بعيد عن مصدر الصوت يعنى تسمع دق ... ماكنتش بعرف انام مرة نزلت الساعة 4 صباحا لقهوة تحت العمارة اللى كنات ساكن فيها قلت له انت معلى الصوت ليه قال عشان نجذب الزباين قلت له ده مفيش ولا زبون قاعد يعنى اكيد الدوشة طفشت الزباين ( هو طبعا عشان حمار مافهمش قصدى ) المهم تانى يوم قلت له انت ماعترفش مفتاح البيز فين توطيه شوية .. قال لى الزباين بتحب الخبط ده تخيلوا ؟
المهم نرجع لمشكلتين فى الترنيمة وهم المشكال الشائعة ... اللحن بيدوه لشغلة اخترعوها جديد اسمها الموزع وانا بسميه المدمر .. هنا فيه مقدمة موسيقية .. متفزلك فيها وعامل لغوصة بحيث ان المقدمة شوية حروف ملخبطة انا ما فهمتش منها حاجة ومرفق التسجيل .. طيب .. دى ترنيمة يعنى المفروض انها معمولة ان الجمهور يسمعها ويحفظها ويرددها .. يعنى الاول يستوعب المقدمة الموسيقية ... طيب انا الموسيقار الكبير الخبير او زى ما بتسمونى اى القاب المفروض او الطبيعى انى لما بسمع اى جملة موسيقية انى استوعبها اد ما اى حد من عامة الشعب اسرع بنسبة 100 مرة ع الاقل طيب لما انا مش مستوعبها خالص ازاى الشعب العادى اللى مش بيفهم موسيقى يستوعبها يعنى لو فى اغنية من اغانى المهرجانات او الاغانى الجمهور زى ماقلت مابقاش يسمع لاموسيقى ولا غنا بيسمع الطبل والبيز والهبد فقط بدليل شوفوا كم اصوات السباكين اللى طالعة من بلاليع المجارى بتغنى والمهور بيشترى شرايطها ..انا اضطريت ما اكتبش المقدمة .. وبديت من اول الغنا .. المشكلة التانية فيه اتنين بيغنوا شاب وقسيس كل واحد بيغنى كوبليه .. الشاب بيغنى الجملة وتانى مرة يعمل يها تجويدة يضيع معالمها وكأنه بيغنى فى فرح مش فى ترنيمة لازم يكون ملتزم باللحن اوى .. لأن الناس زى ماقلت بتحفظه وتقول زيه ومش معقول حيقولوا اللى بيقوله ده .. مع اطيب تحياتى

**مينا رضا** · #3 28/07/2019, 08h25

أولا ً حمدالله على سلامة حضرتك ودا الاهم بالنسبالي
ثانياً شكراً لاهتمام حضرتك بطلبي بتدوين الترنيمة ودا واضح من ملاحظاتك الدائمة واللي هي بمثابة دروس تعليمية بالنسبالي واهتمام حضرتك وتعبك دا فوق راسي

ثالثاً شكراً لتدوينك الترنيمة وكلام حضرتك في محله اكيد

**elarabi** · #4 28/07/2019, 11h04

استادي الفاضل

انني بصدد مراجعة اخر الصفحات التي فاتتني و اكتشفت فيك الاستاد الكبير و القنان الصادق و يسعدني ان اترك كلمة في حقك
ادا كانت الحاجة ام الاختراع فالاستاد عادل اب العطاء و الابداع

**عمرو الهنداوي** · #5 28/07/2019, 16h11

أستاذ عادل حمد الله بالسلامة .. عندي سؤال سريع لحضرتك .. وهو ليه آلة الكمان دون كل الآلآت الموسيقية اللي كل ما يمر عليها الزمن صوتها يحلو وتغلي في الثمن؟ طيب ده علشان أيه؟ الخشب ولا الاوتار ولا أيه؟

مع جزيل الشكر

اخى العزيز انت سألت سؤال انا بعتبره عبقرى ( للى بيفهم فى الحاجات القيمة اوى ) آلأة الكمان اللى انت بتشوفها دى الغرب اخدها عن الربابة المصرية من ييجى 100 سنة .. وابتدوا يطوروا فيها لحد عصر الباروك وصلت لآخر تطوير وهو الشكل اللى احنا بنشوفه دلوقتى ... وفى عصر الباروك ( من حوالى اكتر من 350 سنة ) ظهر عائلات متخصصة شهيرة فى صناعة الكمان ... الكمان بتبتدى اول حاجة نوع معين من الخشب ... وعشان تعمل كمنجة ممتازة الخشب ده سر .. يعنى ماحدش يعرفه غير العائلات دى فقط .. يعنى فى اوروبا تسمع ان فيه غابات آلاف الافدنة من الاشجار المختلفة الانواع بس انهو نوع اللى بيتعمل من المان ده سر زى اسرار القنابل النووية ... بعد ما بيقطعوا الخشب بيجهزوه للشغل ... يعنى الوش والظهر بتاع الكمنجة ده بيتقطع بمقاسات محددة بيبقى سمكها 4 سم تقريبا وبتبقى زلا الاورمة الخشب ... ومن هنا بتبدأ اول الاسرار ... الاشجار بيبقى جواها سوائل ... يعنى يتهيأ لك انه ناشفة لكن جواها رطوبة .. وقبل ان يشرع فى العمل لازم يطلع منها الرطوبة دى وده السر الاول اللى ماحدش يعرفه يعنى هل بيتركها فى الشمس .. معندهمش شمس زى عندنا تكفى .. هل بيدخلها فرن او ما شابه يعنى دى اول سر ... وده بيتحكم فى جودة الصندوق الرنان اللى حايتعمل بعد كده ... بعد كده بيمسك القطعة اللى حايعملها ظهر الكمنجة ممكن تكون من قطعة او من قطعتين ... الاول بيرسم عليها شكل الظهر الخارجى بعدين بيقطعها وهى تخينة كده بمنشار الاركت .. بعدين تبدأ العملية الشاقة انه بيمسك انواع من وسائل الكحت او الصنفرة بحيث انه بيفحر الظهر بحيث يبقى زى شكل البومبيه اللى انت بتشوفه يعنى سمكها من كل مكان حوالى 3 مللى مثلا ... واخطر حاجة ان السمك ده لازم يكون متساوى فى كل مللى من الظهر وده بيبقى عندهم اجهزة كانت زمان بدائية بتقيس العلمق بعدين دلوقتى بقت اليكترونية زى البوكاليز بتاع الخراط بحيث ان كل ما بيفحر لازم سمك القطعة كلها تبقى مقاس واحد مافيهاش عالى وواطى ... المهلية دى بتاخد ع الاقل من شهر الى شهر ونصف .. بعدين بيعمل وش الكمنجة بنفس الطريقة وبيرسم عليه حرفين ال s اللى هم الشبابيك اللى فى الوش بعدين من انواع تانية من خشب ارق بيشكل جوانب الكمنجة وبيمعل قطع خشبية بيلزقها على الظهر عشان تمسك فى الوش وفى الجوانب بعدين مرحة عمل الرقبة والمفاتيح وتفنيش الكمنجة بعدين لازم يسختبرها ولازم يكون عازف ماهر جدا يعنى بيجيب القرار والجواب ولو لقاها مش الصوت اللى فى مخه يعنى بيغير قطع من الجوانب بيستبدلها بقطع نوع تانى م الخشب .. لحد ماتوصل لدرجة الكمال بيبتدى يدهنها .. وبرضه الدهان ده سر وماحدش يعرف يعمله ( بدليل ان اى كمنجة قديسمة اوىممكن تمنها ملايين لكنها مخربشة والدهان مش حلو بس ممنوع حد يلعب فيها يعنى يسنفرها او يدهنا اى حاجة والا نص صوتها يضيع .. وفى اليابن وبعض المتبقسن فى اوروبا بيعرفوا يدهنوها بس طبعا بياخدوا مبلغ مفزع ... المهم بعد ما الكمنجة تخلص بتكون اخدت سنة بيحطها فى شنطتها ويحطها فى مكان مافيهوش رطوبة وبيخونها مش اقل من عشرين سنة عشان اى رطوبة مازالت باقية تكون نشفت ... عائلات صنع الكمان .. الراجل بيمعل مثلا خمسين كمنجة بيشيلهم للورثة بتوعه يعنى اولاده هم اللى بيبعوهم وبيعملوا غيرهم .. يعنى كل صانع زى استراديفاريوس مثلا مش هو اللى باع الكمنجات ولكن اولاده باعوهم وعملوا غيرهم وكل واحد بيورث اولاده الكمنجات .. لأن كل ما الكمنجة تقدم كل ما الرطوبة بتروح اكتر والخشب صوته بيظهر احلا ... ده سر الكمنجة .. فيه كمان سر الكمنجة صوتها بيقاس بحاجة ... فاكر الشوكة الرنانة بتاعة الفيزيا ؟ بنطرقها ونحط قاعدتها على جسم الكمنجة ... الكمنجة المحترمة بتفضل ترن فترة طويلة اوى اما لو حطيتها على كمنجة صينى مثلا من بتوع دلوقتى صوتها مش بيرن كأنك حاطط الشوطة على كومودينو او دولاب .. ده السر الخدير فى الكمنجة ان كل ما تقدم قيمتها بتغلا ... كمان المشكلة الاخطر انالناس اللى بيمعلوها 99% منهم ماتوا ودلوقتى لو اتعملت ( وفيه ناس بيعملوها برضه .. بس تخيل لما يكون اى واحد بيبع سندوتشات كبدة ف الشارع فى اوروبا بيقبض ف الساعة 15 دولار يبقى الفنان اللى مفيش منه اللى بيعمل الكمنجة فى سنة يقبض كام .. وبرضه الكمنجة بتبقى جديدة محتاجة عشرين سنة عشان تبقى كمنجة يعنى .. اما ف لاصين مصنع بيعمل فى اليوم 500 كمنجة بس طبعا خشب عادى مالهاش قيمة وعلى فكرة ممكن تكتب بالانجليزى فى جوجل عن فيديوهات لصناعة الكمان حتلاقى حاجات تعجبك لو مهتم بالموضوع ... تخيل العود عادى يتعمل وتستعمله جديد .. كل الآلات عادى إلا الكمنجة يعنى عندك الاورج كل سنة بينزل موديل يخلى اللى قبله مالوش قيمة مع اطيب تحياتى

**omarhalim** · #6 29/07/2019, 00h44

اقتباس:

المشاركة الأصلية كتبت بواسطة omarhalim

مرحبا أستاذ عادل
من مدة طلبت تدوين أغنية الأستاذ محمد عبدالوهاب همسة حائرة من درجة لا بدل ري ..
لك كل اشكر لما تقوم به تجاه المنتدى .. مع أطيب الأمنيات بالصحة والعمر الطويل ..

ماشى اخى العزيز انا شفت الطلب ان شاء الله انزلها لك الاسبوع ده
مع اطيب تحياتى عادل صموئيل

ولك كل الشكر والتقدير استاذنا الكريم عادل .. تسلم اناملك الماسية

**عادل صموئيل** · #7 29/07/2019, 19h13

احبائى
اقدم لكم من العيار التقيل قصيدة فيروز

سوقى القطيع الى المراعى ( الى الراعية )

مع اطيب تحياتى وآسف للتأخير كان عندى ظروف

مع اطيب تحياتى

**عادل صموئيل** · #8 29/07/2019, 20h30

احبائى

اقدم للأخ العزيز عمر حليم

همسة حائرة من درجة لا

مع اطيب تحياتى

**عمرو الهنداوي** · #9 29/07/2019, 23h51

شكراً أستاذنا الغالي على الإجابة .. ربنا ما يحرمنا من حضرتك

**omarhalim** · #10 30/07/2019, 00h21

اقتباس:

المشاركة الأصلية كتبت بواسطة عادل صموئيل

احبائى

اقدم للأخ العزيز عمر حليم

همسة حائرة من درجة لا

مع اطيب تحياتى

اخي الكريم الأستاذ عادل المحترم

سلمت اناملك الماسية ..

اسال الله ان يعطيك الصحة والعافية ويبارك لك بعمرك..

شكرًا على كل مجهوداتك القيمة تجاه عشاق الفن الزمن الذي انت احد رواده..