طلبات نوتة أ / عادل صموئيل الجزء الثانى

**عمرو الهنداوي** · #1 10/02/2018, 19h16

أستاذ عادل صموئيل مساء الخير
أنا عندي اقتراح وشكر لحضرتك ..

الاقتراح:

هو كتابة أسم المطرب في النوتة، لأنه في نوتات كتير لما حضرتك بتنزلها إحنا مش بنعزفها في ساعاتها، لكن بعد كدة لما بنعزفها في أغاني كتير بنبقي مش عارفين مين اللي بيغنها .. مثلا أغنية زي عيني بترف .. في أكثر من أغنية بنفس الاسم .. فاقتراحي هو كتابة أسم المطرب في المكان اللي حضرتك تشوفه مناسب في النوتة .. أنا عارف انه حضرتك بتكتب اسم المطرب في البوست .. بس إحنا أول ما بنشوف حضرتك نزلت نوتة بنزلها ونعزفها بعد كدة وبنسي مين اللي قولت أنه بيغنها .. حضرتك بتدون أغاني كتير مشهورة ومعروفة بالنسبة لنا وأغاني مش مشهورة لينا وأتمني برضو باقية الأخوة يقولوا رايهم في الاقتراح ..

الشكر:

أشكرك وأحييك بشدة على تجربة إعادة تدوين "لسه فاكر" وارجوا إصلاح اسمها في البوست اللي باللون الأحمر .. و اشكر حضرتك على تدوينها في حدود سرعة 100 إلى 130 نوار على الأكثر ولو حضرتك فكرت تعيد التجربة مع أغنية تانية أرجو بشدة تفادي السرعات العالية زي 160 و 150 و140 نوار لأنها بتلغبط ..

أنا عارف حضرتك بتعمل كدة علشان التسهيل بس جزء من حلاوة أغاني أم كلثوم صعوبتها وتفعيلاتها، وكمان إحنا لازم نتعب شوية في النوتة، ومش كل حاجة تقدم لينا لازم تكون سهلة أوي علشان مستوينا يرتفع كمان .. ساعات التسهيل بيأخذ من روح الأغنية زي مثلا المقدمة في أغنية بعيد عنك .. حضرتك عملها سهلة أوي أوي أوي مثلا صولو القانون بسبب السهولة فاقد كتير من روحه .. أنا عارف أنه صولو صعب وحضرتك عامله كدة علشان نقدر نعزفه .. بس حلاوته في صعوبته .. معلشي أحنا لازم نتعب شوية في عزفها .. دي أغاني أم كلثوم برضو، واحنا بنحبها ولازم نجتهد فيها اكثر علشان مستوينا يتحسن .. ويا ريد الأخوة في المنتدى يقولوا رأيهم و مايزعلوا مني في موضوع التسهيل في أغاني أم كلثوم

كل التحية والتقدير للجميع

اخى العزيز
كلامك فى محله بس فى الفهرس الاخ العزيز هيثم قايم بالواجب يعنى عشان تبقى كل الاغانى مكتوبة بنفس الشكل انا لو كبت اسم المطرب حاييجى واحد يقول طيب و اسم المؤلف وحاييجى واحد يقول طيب والمقامات وحاييجى واحد يقول طيب والمقامات بتاعة كل كوبليه مش حاخلص يعنى .. انت اول ما بتفتح صفحة النوت الموسيقية فيه اعلان ملون عن الفهرس .. الاغنية اللى انت عايز تتأكد بتاعة مين انزل فى الفهرس حتلاقيها وقدامها كل بياناتها
اما عن التسهيل والسرعات العالية ... اقول لك مثلا اغنية حيرت قلبى انا عايز اعيدها تانى بس المشكلة الوقت .. بس الطريقة اللى ابتديت ادخل لكم بيها كان 8% من الاعضاء لسه بيستهجوا وكان لازم اديهم نوتات تمشى معاهم ... يعنى ارجع من اول الموضوع شوف كام واحد بيشكرنى انه لولا تدويناتى ماكان يحلم انه يعزف اغانى صعبة ... بس للعلم تسهيل النوتة مش بيغير اى شعرة فى اللحن وانا حريص على كده ولو تلاحظ دلوقتى انا بقيت اكتب معظم النوت بسرعاتها الطبيعية هى اصعب بس اكيد فيه ناس بقت مستواها حلو تقراها ..
اساس المشكلة الوقت والصحة محدودين دلوقتى.. غير لاول .. يعنى هل ادون جديد ولا اتوقف واصلح القديم اللى فيها ملحوظات مش كل النتو فيها ملحوظات طبعا ولا ايه ؟
مع اطيب تحياتى

**عمرو الهنداوي** · #2 10/02/2018, 21h31

أستاذ عادل صموئيل

أغنية السيدة فيروز "يا ريت منن" لما بعزفها بحس أنه في شيء مش مضبوط، وفي الغالب البرنامج غير العوارض الشرقية اللي حضرتك كنت مظبطها أو في تعارض فيما بينها وبين دليل المقام وبالذات في المقدمة .. في شيء مش ماشي .. أرجو يكون حد من الأخوة عزفها أو حافظ الأغنية يقولنا .. جايز المشكلة عندي أنا بس ..

كل التحية والتقدير

اخى للعزيز

كلامك صح جدا بس انا بعتب على الاخوة من سوريا ولبنان اللى حافظين الاغنية دى صم وما اخدوش بالهممنها فى وقتها
المشكلة دى حصلت ازاى ... المقام طبعا بياتى نواه او بياتى على صول يعنى سى مى بيمول ولا نصف بيمول .. انا لما بكتب بيبقى المقام 3 بيمول بعدين بضيف الشرطة على الحرف المطلوب بس ما اقدرش اضيف الشرطة وانا بكتب لازم بعد ما اللحن يخلص فى التشطيب ... ليه .. لو انا ضفت الشرطة اثناء الكتابة انا فيه ساعات بحرك الموازير يعنى ساعات المدرج انا عامله 4 موازيلا بيبقى فيها حروف كبيرة بحس انه واسه اوى بضيف لو مازورة من السطر الى بعده .. او العكس احيانا بتبقى مازورة زحمة جدا بضطر اطرد مازورة من السطر انزلها السطر اللى بعده عشان املدرج يبقى 3 موازير والرؤية تبقى اوضح ز. هنا لو انا حاطط الشرطة من الاول بتحصل كارثة يعنى كل الشرط اللى حاططها بتقفز من مكانها وتدخل على وسط موازير تانية ومش ممكن انك تزيلها او تمسحها بأى طريقة ... لذلك انا بكتب بس بعمل مع نفسى علامات وبالذات لو المقام الرقة بيتغير فى وسط السكة .. بس هو اللحن ده انا كتبته بسرعة ( وانت عارفمشكلة طابور الطلبات وفى التشطيب ما اخدت بالى بدل ما احط الشرطة على لا بيمول وضعتها على سى بيمول بس طبعا انت شاطر يعنى نك حسيتها . لن للعلمفيه سر فى اموسيقى الشرقية فيه بياتى نواه وفيه راست نواه ممكن ناس تتلخبط بينهم بالذات لما ييجوا ورا بعض ماياخدوش بالهم ان ال لا بقت نصف بيمول بدل السى نصف بيمول
والف شكر مع اطيب تحياتى عادل صموئيل

**عمرو الهنداوي** · #3 11/02/2018, 08h58

أستاذ عادل صموئيل

أشكر حضرتك على الرد على الأسئلة بشتي أنواعها، وفتح باب النقاش مع حضرتك في أي موضوع ونحن نقدر هذا.. ربنا يكرمك .. اتفق مع حضرتك انه كل شوية حد ح يطلب إضافة شيء في النوتة خاص بحقوق الملكية زي المؤلف وكاتب الكلمات .. خلاص زي ما تحب حضرتك، لكن فقط أريد التنويه انه نوتات حضرتك هي اللي باقية بدون الفهرس وبدون المنتدى في المستقبل البعيد مع كامل احترامي لهذا المنتدى العظيم ولمجهود صديقنا هيثم وأشكره جداً على الفهرس الرائع والمجهود البحثي لتحري بيانات كل أغنية ..

موضوع السرعات العالية: أنا بقول كدة علشان إحنا مستوينا أتقدم بشدة ونوتات حضرتك الأولي ساعدتنا بشكل لا محدود في الوصول لهذا المستوي..

بخصوص أغنية "يا ريت" للسيدة فيروز هي المشكلة في الأساس مشكلتنا إحنا .. لأننا لما بنشوف نوتة جديدة نجري نأخذها ونبقي نعزفها بعدين وانا من الناس دي ولا استني نفسي والمفروض أننا نعزفها علشان لو في خطأ نقول لحضرتك على طول ..

أنا اعلم صعوبة التدوين الشرقي وضبط العوارض الشرقية في برنامج تدوين غربي بالذات مع أغاني أم كلثوم وفيروز وأغاني العمالقة اللي كل جملة تقريبا بمقام وعوارض .. الله يكون في العون وربنا معاك واحنا مقدرين إنسانيتك ومجهودك الف شكر ..

طيب حضرتك في برنامج جديد تدوين شرقي وغربي وسهل ومجاني ورائع أسمه MuseScore أنا عارف انه حضرتك بتحب تجرب كل جديد رغم مقدرتك الكبيرة في أنكور .. ولو الأخوة يعرفوا البرنامج برضو نحب نسمع آرائهم حوله.

كل التحية والتقدير

اخى العزيز
اهم حاجة انك فاهم المشاكل اللى بتعاكسنى اثناء التدوين ... اول حاجة طبعا انى بشغل المفلف الصوتى وسامع بياتى مثلا والبرنامج بيسمعنى كرد وعشان اكتب صح بيعتمد على خبرتى وشطارتى .. وللعلم انا اثناء التدوين عمرى ما بستخدم آلة احسس بيها على المقام زى مانس بتعمل لن دى تقتل ودنى الموسيقية .. احنا زمان لما كنا بندون كنت اروح للمحلن وهو بيمسك العود اول حاجة بيقول لى المقم كذا عشان احد الدليل بعدين بيسمعنى اول جملة كذا مرة اولا عشان اتاكد من الدليل واستوعب الميزان واحس لو فيه حاجة فى السكة من اى علامات تحويل بعدين بيملينى طبعا مازورة مازورة ... هو بعزف ع العود وانا بسمع طبعا مش بيقولحروف انا اللى بحس بالحروف ... طبعا بيملينى سادة بدون اى زخاف او حليات اول لعب عشان ادون حص ... الزخارف دى بتتعمل فى البروفات .. هو بس بيحدد لى الغنا فين واللزمات فين عشان اعمل العلامات ان نا غنا ونا لازمة .. بس لما بتيجى احيانا تفعيلة سريعة مكلكعة ... لازم هو بيقولها لى بطىء عشان استوعبها وانا اكتبها بالسرعة المطلوبة .. كل الكلام ده مع الشريط دلوقتى مش موجود وانا بعتمد على نفسى ف كل الكلام ده ... انا تأقلمت مع انكور من عشر سنوات واديكم شايفين النتيجة يعنى بكتب لكم النوتة زى اللى كنا بنعزف منها فى الفرقة الماسية الغربى غربى والشرقى شرقى يعنى الورقة ما فيهاش مشكلة فى القراءة ... اهم شىء وانا بدون لازم كاون مستريح نفسيا ومفيش حاجة بتعمل لى قلق من اى نوع زى مثلا ما ينفعش ادون وحد قاعد بيتكلم جنبى او جوه فى اوضة تانية حد مشغل راديو او تليفزيون فيه موسيقى وتخيل لما اكون بكتب مقام ومن جوا سامع مقام تانى .. او ممكنمحل من تحت مشغل اغانى يانهار اسود زمان ياما عملت حوادث يعنى .. انا بدون على برنامج انكور 4.55 وكل اصدارات الانكور السابقة هى نفس الشكل بالضبط ووضبته ومتأقلم عليه بالعكس كمان ده انا مخترع فونت خاص بيا مفيش زيه ف العالم بحط فيه الاضافات اللى انت بتشوفها فى نوتاتى ومش موجودة فى تدوين اى حد تانى ... زى مثلا المرجع اللى فى وسط المازورة فى الادليب وزى الزوايا اللى على يمين وشمال خط اللزمة وحاجات تانية كتير ... اضطرتنى ظروفى ( وآسف للأطالة بس كلامى خطير ومفيد جدا للى بيدنوا او بيتعلموا منى ) انى استعمل احدث اصدار من انكور .. وده بكل معنى الكلمة زبالة ومقرف وملخفن وقول زى ما تقول فيه ... وغصب عنى بستعمل لما يكون ايه ... لما حد بيطلب منى انى ارفع نوتة تون او اخفضها او اغير مكانها يعنى .. ويكون ملف قديم يعنى مدونها من خمس سنوات مثلا .. انت عارف كام مرة الويندوز ضرب وكام مرة بنقل فى المفات وكام 1000 نوتة .. فيه نوت بتضيع من عندى مع كل الحرص ... اقصد ملفات الانكور ... بعتمد على ايه ... باخد ملف ال pdf اللى هنا فى سماعى ودقتحه على برنامج فوتو سكور يبقى نوتة وبعدين بحفظه بصيغة اسمها MXL وبعدين افتحه على انكور عشان اشتغل فيه ... هنا فيه حاجتين وركز ... لو انا حفظته عادى ممكن يتفتح على انكور 4.55 اللى بشتغل بيه بس بتحصل مشكلة مش بيقرا المرجعات يعنى بيكرر الجملة وقعد انا يوم بحاله احذف الزيادات ولازم اطبع النوتة الاصلية عشان اخلى اللى بشتغل فيها زيها بالضبط .. طبعا بيعصبنة يعنى لن الاغنية لما تكون 14 صفحة بتقى 28 صفحة .. اما لو حفظتها بطريقة mxl الميزة انه بيفتح الملف بالمرجعات بس طبعا كل اللى غير حروف نوتة بيبقى مش موجود ولازم اكتبه كله تانى ... بس المشكلة ان برنامج انكور 4.55 مش بيقرا الصيغى دى متطورة عنه ولاز افتح الملف فى اانكور الحديث اللى قلت لك فيه مشاكل وبالطبع ما اقدرش ادون عليه تدوين لن حايطير الموسيقى من مخى ... بقول كده ليه لأنى جربت بسرعة البرنامج التركى اللى انت قلت عليه لقيته ازبل من الزبالة ... يعنى انا بدون البياتى بيبقى سى ومى بيمول بعدين بحط الشرطة ع المى انت تقرا النوتة بياتى ... لكن التانى متاهة يعنى ... امتى يبقى برنامج شرقى حلو ... ده فيلم تانى خالص .. فاكر الاورج اول مرة لما قرروا يسيكوه والقرف اللى كان فيه وبيركبوا لو مفاتيح شكلها مقرف ؟ الذكاء بتاع اليابانيين عملوا ايه لما لقوا الاورج ابتدا يكتسح المنطقة العربية .. بعتوا جابوا عمار الشريعى وعزموه عندهم فترة قالوا له قول كل احتياجاتك فى الاورج واحنا ننزلها وهو بيتصنع نعملها فيه ... وكان اللى انتم بتتمتعوا بيه دلوقتى حتى البيتش بتاع السيكاه الى انك تزود السيكاه او تخسسها ودى كانت مشكلة خطيرة زمان لأن البياتى مثلا فيه المى نص خاسة شعرة والراست المى نص بيمول زايدة شعرة .. وعبد الواهب والسنباطى كان بيقرفوا من الارحج عشان الحاجات دى ... كمان انك بتبرمج لو عندك 3 صولو فى الموسيقى مثلا كل صولو فى مقام بتبرمج بحيث انك بدل من تقعد تدور بتخلى اول صولو رقم واحد وهكذا ... طيب ازاى نعمل برنامج موسيقى عبقرى شرقى ... اول حاجة لازم يستضيفوا حد زيى فى مكان تصميم البرنامج ... ولازم فى لما بنختار قائمة السلالم تتزود كل المقامات الشرقية ... يعنى اشد الزرار الاقى بياتى وراست وهزام و ...بس برضه مش حاتنفع ... لن المقامات دى بتيجى متصورة من اماكن تانية ... يعنى انت لو بصيت على انكور حتلاقى السلالم حتلاقى من اول واحد بيمول الى 7 بيمول والدييز نفس الحكاية وخلصت ... لكن عندنا شغلانة ولك ان تتخيلها .... يعنى احنا المفروض يعملوا لنا تماثيل عشان بنشتغل ع البرنامج الغربى وبنطلع النوتة شكلها كده .. وانا بقول لو عازفى الفرقة الماسية رجعوا وشافوا النوتة اللى انا بكتبها كانوا اتجننوا وذهلوا يعنى مع اطيب تحياتى

**ahmad_alahlawy** · #4 11/02/2018, 09h11

أستاذنا الفاضل عادل
أرجو التفضل بتدوين بلاش عتاب لعبد الحليم
و شكرا

**عمرو الهنداوي** · #5 11/02/2018, 09h19

إليك النوتة من تدوين أستاذ عادل صموئيل

كل التحية والتقدير

**عمرو الهنداوي** · #6 11/02/2018, 10h42

أستاذ عادل صموئيل

البرنامج اللي بتكلم عنه ليس البرنامج التركي اللي أسمه mus2، ده فعلا برنامج سيء للغاية، وانا جربته وهو من تطوير شباب أتراك .. البرنامج اللي بتكلم عنه اسمه Muscore وهو مشروع لمتطورين برامج موسيقية من أمريكا وكندا .. وأي حد يقدر يطور فيه وده ميزته .. أنا بكلم حضرتك عنه من باب انه حضرتك بتحب تعرف وتجرب الجديد .. أنا لا اقصد فرضه على حضرتك أو على الأخوة في المنتدى .. فقط من باب متابعة الجديد يمكن حد منا يستفيد منه، وطبعا البرنامج رائع ويتعامل مع صيغ XML.

كل التحية والتقدير

مين قال تفرضه ؟ كل واحد بيقترح وممكن ناس تسفيد من الاقتراحات طيب هل البرنامج ميوسكور ده موجود كامل ؟

**عادل صموئيل** · #7 11/02/2018, 14h05

احبائى

اقدم لكم وللأخت رباب زين اغنية نجاة الصغيرة

حلوة يابلدنا

مع اطيب تحياتى

**ahmad_alahlawy** · #8 12/02/2018, 19h45

شكرا على اهتمامك اخى عمرو...هذه النوتة كنت قد طلبتها من الاستاذ عادل منذ فترة طويلة و بحثت عنها فى فهرس الاخ الفاضل هيثم و لم اجدها فاعتقد انها لم يقم بتدوينها بعد

**عادل صموئيل** · #9 13/02/2018, 04h50

احبائى

اقدم لكم اغنية مها صبرى

وحشنى كلامك

مع اطيب تحياتى