رد: طلبات نوتة أ / عادل صموئيل الجزء الثانى
أستاذ عادل شكرا على رد حضرتك
بس عندي سؤال تأني: وهو بخصوص السرية عن بروفات وكلمات وموسيقي أغاني أم كلثوم وبالذات في الفترة التي صاحبت الحان عبد الوهاب: أنا كنت قريت أنه أم كلثوم مع فترة الحان عبد الوهاب كانت بتمنع الصحافة تحضر البروفات أو تكتب أي شيء عن كلمات الأغنية أو طريقة تلحينها غير لما الأغنية يعلن عنها رسمياً قبل الحفل الشهري.. هل الكلام ده حقيقي فعلاً؟
طيب هل كان ممنوع انه مثلا بليغ حمدي يطلع ويتكلم عن الأغنية الجديدة معها أو يغنيها أمام أو مع أحد في سهرة مع أصدقائه مثلا؟ طيب العازفين كان ممنوع عليهم انهم يعزفوا مثلاً جزء من الأغنية اللي لسه بروفاتها شغالة لحد من أصدقائهم أو أهل بيتهم؟ يعني مثلا حضرتك في موعود مش ممكن ماحدش يكون قالك من أصحابك أو أهل بيتك والنبي اعزف جزء من أغنية عبد الحليم الجديدة اللي انتو شغالين فيها أو كلماتها عاملة أزي؟؟ هل الموضوع ده كان بيحصل ولا كان في اتفاق مسبق على السرية والكتمان على الكلمات واللحن بين العظماء والفرقة وهل مثل المواقف دي كانت بتحصل؟؟
اثقلنا على حضرتك معليشي
كل التحية والتقدير
بالنسبة للصحفيين كان عادى بيحضروا البروفات بس الاخيرة شوية لما اللحن يكتمل .. بس فيه حاجات كنا بنتعمد انهم مايعرفوهاش زى مثلا اغنية فاتت جنبنا .. كان بيحضروا بروفات وكانوا بكتبوا فى الجرايد بس تعمد عبد الحليم انهم ما ياخدوش بالهم من موضوع قفلة الاغنية يعنى مايعرفوش نهاية القصة ان ابنت كانت بتضحك لمينحتى تلاقى الجمهور صعق وقتها تفاجأ يعنى .. ام اغانى ام كلثوم كان بالذات فى العشر ايام الاخيرة الصحفيين مجودين كل يوم وبيطلعوا صور وبيكتبوا كل حاجة حصلت فى البوفة وكلمات الاغنية كل يوم بحيث ان الناس على الحفلة يكونوا حفظوا الكلمات .. وبيكتبوا التفاصيل الدقيقة يعنى كل صحفى يكتب شايف ايه يعنى فيه ساعات كلام بيتغير والصحفيين بيكتبوا الكلمة واتفيرت بقت ايه مرة فى اغنية امل حياتى كانت وكفاية اصحى على شفايفك بتقول لى عيش ام كلثوم ماعجبتهاش الكلمة وخلتها على ابتسامتك وجت فى حفلة قالتها شفايفك الجهمهور هاص لنه عارف القصة ... كانت اغنية ام كلثوم الجديدة اهم حدث بيحصل فى مصر وقتها فى السنة كان كل العالم العربى بينتظرها بشغف شديد .. اما موضوع ممنوع حد يعزف منها حاجاة قدام انلاس لن الالحان دى لها حقوق ملكية فكرية .. يعنى بتتسجل بأسم صاحبها .. وممكن تتسرق ... يعنى افرض انا الناهردة عملت بروفة معام كلثوم وحفظت حتة وسمعتها لناس فى اى قعدة وجه ملحن تانى سمعنى ولقطها ( ولاح الحفلة لسه بعد شه ر مثلا ) وراح الملحن ده سرقها ودخلها فى لحن من الحانه وسجله وعملها فى حفلة قبل ام كلثوم ما تغنيها .. هنا حا يبقى الملحن الاصلى هو اللى سارقها يعنى بيتقال سمعناها من مين الاول ... فيه كمان حركات صغيرة بنخليها مفاجئة ... يعنى فاكر اغنية نبتدى منين الحكاية مجدى الحسينى جاب اورج صغير وحطه مع الاورج العادى الفارفيزا بتاعه .. كان اسمه مينى موج وهو اللى عمل صولو المقدمة اللى بيدى نكهة هندية ... قبلمكان الصولو بجملة مجدى الحسينى كان عامل الغيار .. عبد الوهاب وقف البروفة وقال له ماتتنش ع الصوت .. يعنى اعمل الغيار الغريب ساعة لصولو بالتحديد عشان ماتفتنش عليه او ان الجمهور يعرفه لازم الجمهور يتفاجأ بيه ... فيه كمان من ضمن الحاجات الغريبة اللى ممكن انت ماتعجبكش لكن احنا اقتنعنا بيها ... كان بالطبع عبد الواهب بيعمل 45 بروفة ولازم يغير فى الجمل يعنى يشيل حاجة ويزود حاجة ممكن يشيل حتة كبيرة كذا جملى ورا بعض ويحط بدالهم حاجة .. المهم كان بيبقى ماسك العود ويسمعنا جملة جديدة ... حلوة .. وبعدين يسمعنا جملة تانية ... ويقول انهو احلا احنا نختار واحدة ... هو طبعا لئيم مش مرتجلهم وقتها ولكن عاملهم فى البيت ومجربهم 100 مرة ... بيروح يختار الجملة اللى معجبتناش ويرمى الجملة اللى عجبتنا ... اى حد عادى يقول ايه الجنان ده .. بس لما تفهم عبقرية عبد الواهب ... هو قال الجملة اللى انا سمعتها لك وعجبتك على طول ... دى انت اكيد سمعتها قبل كده او سمعت حاجة شبهها مألوفة بالنسبة لك يعنى ... اما الجملة اللى ماعجبتكش على طول دى جديدة جدا انت عمرك ما سمعتها او حاجة شبهها ... وده هو اللى عايزه ,,, يعنى ايه التميز فى كل اغانى الزمن الجميل ؟ انك عمرك ما تقول الجملة الفلانية شبه الجملة التانية ... لازم كل جملة تكون مالهاش اخت وده سر العبقرية ... يعنى زى التحف اللى ف المتحف كل تحفة مالهاش اخت ... لذلك فيه حاجة خطيرة .. بعد ما الحفلة تخلص .. الجمهور بيكون تعرف ع الاغنية الجديدة فقط بس للعلم ممكن ماتكونش عجبته اوى اوى يعنى لنها لسه مش مألوفة والقهاوى اللى عندها جهاز تسجيل بكرات من بتاع زمان تفضل تعيد فى التسجيل 24 ساعة لحد ما الناس تحفظها متعة المتع الحفلة التانية بتكون الناس حفظت الاغنية وتتمتع بيها مع اطيب تحياتى
فيه حاجة كمان انت لو قاعد معايا وقلت لى سمعنى حاجة اكيد لازم اسمعك اغنية تكون انت حافظها عشان تحس باللى بقوله .. لو قلت لك حاجة انت ماتعرفهاش مش حاتحسها يعنى مالهاش قيمة
التعديل الأخير تم بواسطة : عادل صموئيل بتاريخ 09/07/2017 الساعة 20h12
|
العرض المتطور
