طلبات نوتة أ / عادل صموئيل الجزء الثانى - الصفحة 469

**salhi_haithem** · #**4681** 15/01/2016, 19h43

أخي الكريم الاغنية موجودة في فهرس الأستاذ عادل بالرابط التالي

http://www.sama3y.net/forum/showpost...94&postcount=1

**عادل صموئيل** · #**4682** 17/01/2016, 18h04

احبائى
اقدم للأخ العزيز بكر دحدولى اغنية من العيار التقيل جدا جدا
رائعة اسمهان

حديث عينيك

طبع اخى العزيز زى ما انت قلت الاغنية دى صعب جدا حد يدونها , انا اول ماسمعتها وكان اول مرة اسمعها .. اول حاجة بشوف الدرجة اللى هى عليها .. لقبتها عجم من درجة لا .. وده معناه الدليل 3 دييز .. وبالطبع يمكن انا عمرى مادونت اغنية 3 دييز .. حتى الملحنين يتفادوا يعملوا لحن فى المكان ده لأن الفرق كانت زمان كلها كمنجات والمكان ده مش حلو فى الكمنجات .. ده طبعا غير ان رياض السنباطى العبقرى مالى اللحن علامات تحويل .. انا اول مرة اسمع عن ليلى حجيج وللعلم هى رائعة جدا .. لكن لما دخلت على الموقع اللى انت حطيته لقيت نفي الاغنية بصوت اسمهان بس معقدة جدا جدا اكتر 100 مرة .. يعنى استحالة تتكتب كده .. لما شفت الفيديو اكتشفت بخيرتى ان الاستاذ عازف العود اللى قاعد فى الوسط هو عامل تعديل فى اللحن بحيث ممكن يتعزف .. مظبطه يعنى .. حتى تلاقيه طول الوقت بيعمل ارشادات للفرقة والمطربة .. وطبعا هم حافظينه مفيش قدامهم نوتة .. فيه حاجة تانى لفتت نظرى جدا .. ان فيه عازف كمان شاطر اوى مسيطر يعنى صوته عالى .. بس طول الوقت حسيت ان فيه حاجة مش طبيعية .. يعنى انا كعازف كمان عارف ان ال 3 دييز فيها حروف صعبة او ضعيفة فى الكمان يعنى بيبان جدا ان دو دييز مثلا اضعف من نغمة رى او مى .. ودى طبيعة الكمان اصلا .. لقيت النغمات كله وبالذات النغمة دى حلوة زى باقى النغمات وابتديت اكتب .. طبعا تعبنى جدا لحد ماوصلت فى مكان ما فى الكوبليه التانى لاحظت حركة .. ان عازف الكمان نزل سلم من مى قرار عمل مى رى دو سى لا صول فا مى ... هنا توقفت فيه حاجة مش مظبوطة .. احنا آخرنا فى الكمان صول اليكاه .. طيعا بالخرة اكتشفت انهم منزلين الكمان تون ونصف .. بحيث يبقى آخره مى .. ( ودى بتحصل فى الطوارىء القصوى عشان اللحن يريح صوت المطرب وعملناها فى دارات الايام )
لما ركزت اوى اكتر حسيت انهم بعد مانزلوا الكمنجات كده بيعزفوا المقام عجم الدو مش عجم ال لا .. بس طبعا كنت وصلا لقرب نهاية اللحن وكملته كده .. لكن حرصى ان اللحن يوصل لأكبر عدد من الناس عملت منه نسخة على درجة دو ...
اذكر فى منتصف السبعينات كنت مع رياض السنباطى بعدين طبطب على كتفى وقال لى باللفظ : انت الخير والبرطة .. طبعا ساعتها معرفتش معناها .. دلوقتى حسيت ان كان عمرى ساعتها 25 سنة وهو بعبقريته استشف انهم حايرحلوا والواد الصغير ده ممكن يعمل حاجة تخلد ذكراهم .. وتدوين الاغانى اللى ماتدونش دى اوالتدوين عموما بيخلى ناس كتير تعزف الالحان دى وده يخليها ماتندثرش ... مع اطيب تحياتى

**amrnabmans** · #**4683** 17/01/2016, 19h07

مسترعادل أنت بأهمية السنباطي وعبد الوهاب وكل موسيقيي الزمن الجميل بدون مبالغة
لان بدون النوت كانت كل اعمالهم في طريقها انها تختفي وتصبح مقصورة على طبقات قليلة من السميعة
لكن مساهمتك بالنوت في قمة الاهمية من اجل توثيق الاعمال الفنية والحفاظ عليها

لو ميزعجكش حضرتك تدون لينا موسيقى عمر الخيام الحان محمد عبد الوهاب
الفيديو كاتب انها موسيقى حياتي ودا خطأ شائع
https://youtu.be/btXeXCJxvkk

شكرا لحضرتك

اخى العزيز ماشى
بس خلى بالك من حاجتين اولا هى موزعة يعنى احنا بنكتب اللحن الاساسى فقط لأنك انت لو عزفتها بآلة واحدة مش معقول طبعا حاتعزف التوزيع واللحن الاساسى مع بعض لأن ليس لك عشر ايدين
تانى حاجة المهم ان اللى موزعها موزع انجليزى يعنى افترى شوية فى التوزيع وانا ححاول ابسطها شوية لأن اللحن الاساسى سهل جدا لو اتكتب ممكن اى حد مبتدىء يعزفه اللى معرقبه التوزيع يعنى
وفى اقرب فرصة ان شاء الله انا نزلتها عندى يعنى جاهزة ان شاء الله للتدوين
وعلى فكرة على نفس صفحة اليدوتيوب الموسيقى نازلة كذا مرة بإسم عمر الخيام .. اما اللى منزلها بإسم حياتى مش واخد باله ان حياتى دى مقطوعة تانى وشهيرة وكانت التتر بتاع مسلسل اذاعى زمان عن قصة حياة عبد الوهاب
مع اطيب تحياتى عادل صموئيل

**بكر محمد دحدولي** · #**4684** 17/01/2016, 19h44

اشكرك يا استاذ عادل الصموئيل الكريم ,و انا عاجز عن الفرحة جدا جدا لتدوين هذه الاغنية الجميلة و الصعبة جدا فأنت عبقري و انا اعرف ان لن يستطيع احد بكتابته احد غيرك و اشكرك على تفاصيل التي انت قدمتها عن الاغنية وصدق لاستاذ رياض السنباطي بما قاله عنك و نتمنى بأن تفيدنا بنوتات الموسيقة على طول و اشكرا مرة اخرة شكرا جزيلا بكر دحدولي

اخى العزيز
انا سعيد جدا انك دخلت المنتدى وشفتها لن كنت منتظر ردك من امس , واشكرك لأنك عرفتنى بالاغنية الجميلة دى لأنى ما سمعتهاش من قبل .. ومبسوط لنك تفهمت التفاصيل الفنية اللى انا شرحتها لأن اللحن ده مش عادى ... بمعنى ان مقام العجم بيختلف فى الصعوبة من درجة الى اخرى حسب اختلاف طبيعة الآلات .. يعنى لو على الدو مثلا بيتعزف والواحد مغمض اما على درجات اخرى مثل لا بيبقى 3 دييز وده انا زى ماقلت مستحيل ملحن يعمله من الدرجة دى لأن الكمنجات زمان كانت اهم حاجة فى اى فرقة لأن عليها كل الشغل والدرجة دى تطلع العزف ضعيف .. وانا لما سمعت جزء من لأسمهان مانت حتدخلنى فى متاهة تانية لأنها بتقول اللحن فوق كده ب 4 درجات كمان .. بس مش فاضى احقق فيها دلوقتى لأنها محتاجة اكون فاضى اوى مش ورايا شغل .. المهم انت مبسوط من النوتة وانا عملتها من درجتين اختار اللى تمشى معاك مع اطيب تحياتى عادل صموئيل

**عادل صموئيل** · #**4685** 18/01/2016, 15h11

عندى سؤال لخبراء الكمبيوتر
انا بسمع ان فيه برنامج بيشيل صوت المطرب من الاغنية يعنى تبقى موسيقى فقط هل صحيح الكلام ده ؟ وهل بينطبق الكلام ده على الاغانى القديمة ؟
يعنى انا على حد علمى دلوقتى فى الاستوديوهات بطريقة التسجيل بالتراكات .. بيبقى صوت المطرب على تراك مستقل من عدة تراكات .. وممكن تحط بداله صوت مطرب تانى ده فى الاستوديو فقطيعنى من الشريط الاصلى بتاع التراكات الكتير قبل دمجهم عشان يبقى تراكين استيريو
احنا كان على ايامنا كان المطرب بيسجل مع الفرقة مفيش الكلام ده طبعا بيبقى تراك واحد كله
اصل دلوقتى اخترعوا برامج كتير ممكن اى حد عادى ينبهر من برنامج بس الخبير يقول لك ده عنوان ع الفاضى مالوش اى فايدة يعنى زى مثلا برنامج كتابة النوتة عن طريق تشغل الملف الصوتى طبعا ده هبل ... يعنى الحالة الوحيدة اللى برنامج زى زى ده يشتغل صح انك تشغل لو ملف يكون مكتوب على انكور او برنامج تدوين ويكون صوت واحد ( لأن لو صوتين للبيانو مثلا حايدخلهم فى بعض ) ويكون النوتة غربية مفيهاش علامات شرقية
وبرنامج تانى يعزف النوتة من ملف PDF برضو كلام فارغ لأن نتيجته من اكتر من 10 % والباقى لخبطة لأنه برضو مش بيفهم كل حاجة مكتوبة فى الورقة يعنى حتى علامة السينيو ممكن تلخبطه
المهم لو حد منكم يعرف حاجة زى كده يقول لنا بس يكون حاجة متجربة .. والموضوع طبعا مشوق
مع اطيب تحياتى

**المنير** · #**4686** 18/01/2016, 15h21

السلام عليكم

تسلم إيديك يا أستاذ عادل. و الشكر الجزيل للأخ الذي ساهم بطلبه في تدوين رائعة السنباطي "حيث عينين". و للإشارة فقط لمحبي العود و التقاسيم هناك صديق لي من مدينة تطوان بالمغرب إسمه عبد العزيز البقالي يعزف جميع التقاسيم المعروفة للعباقرة بدقة متناهية حتى أنك في بعض الأحيان لا تفرق بينه و بين التقسيم الأصلي. وهذا رابط لتقسيم "العجم على الراست" لهذه الأغنية:
https://www.youtube.com/watch?v=wr09l1CWlMI

اشكرك اخى العزيز المنير
لكن احب اؤكد على حاجة ان اللى بيعزف التقاسيم دى بيعزفها سماعى يعنى التقاسيم ما ينفعش تتكتب
مع اطيب تحياتى عادل صموئيل

**عمرو الهنداوي** · #**4687** 18/01/2016, 17h08

أستاذي مساء الخير..
اسمح لي أن أحاول اجاوب على أسئلة حضرتك بعد اذن السادة الزملاء وقدر معلوماتي في هذا الشأن.
هل في برامج لفصل صوت المطرب عن موسيقا الأغنية؟

نعم يوجد الالاف البرامج لكده ومنها ما هو كذب ومنها ما هو جيد ومنها ما هو رائع. الكل متوفر وعلى حسب سعر البرنامج ولكن كلهم لهم شروط لفصل صوت المطرب.

- مثلا فئة لازم يكون التسجيل بالطريقة الحديثة يعني (طريقة التراكات) ... ودي معظم البرامج الشاطرة الحديثة..
- فئة أخري بتخفظ صوت الملف بشكل عام فحضرتك ولا تسمع صوت مطرب ولا موسيقا صحيحيه ودي برامج الكذب والمنتشرة على الساحة..
- فئة اخري من اللي بتعمد على الذكاء الاصطناعي .. ودي بتحاول تتعرف على صوت المطرب من خلال اهتزازات الفولكليز ومجموعة حسابات هندسية صوتية ودي برامج غالية جداً لأنها عندها مستوي تكنولوجيا حديث نسبياً..

ولكل فئة متطلبات وشروط للتعامل مع الملف الصوتي وطريقة عملها كلهم واحدة .. بعد مرحلة التعرف على صوت المطرب أو الفوكال أي كان وهنا اللي يفرق برنامج عن برنامج وهنا الفلوس والتكنولوجي بيلعب دور أنه ازي البرنامج يقدر من وسط زحمة التراكات المتداخلة يخرج صوت الفوكال بس دون المساس بباقي التراكات.
و زي ماقولت في برامج توطئ الصوت كله وخلاص وبرامج تتعرف على الفوكال بشكل حسابي وهندسي وبرنامج تستخدم طريقة فصل التراكات.

طيب البرامج دي بعد ما بتتعرف على الفوكال بتعمل ايه؟ بكل بساطة تعمل ميوت mute لتراك صوت المطرب وبالتالي حضرتك تسمع الموسيقا بس أو من الأخر اللازمات الموسيقية فقط في الأغاني الحديثة...

طيب السؤال ما مدي كفاءة البرامج دي مع الأغاني الحالية والقديمة:
الأغاني القديمة النتائج لا تتعدي 40% كفصل صحيح و دون تأثير على باقي التراكات...
الأغاني الحديثة لو بطريقة التراكات نسبة النجاح تفوق 70%
طيب مستقبل تقنية فصل الصوت ايه؟ الموضوع ماشي بشكل إيجابي في السنوات الحالية وبقي في اروجات بقيت بتعمل كده ومش برامج وبس...

استفسار حضرتك حول برامج كتابة النوتة من ملف صوتي...
الحقيقة الموضوع مش هبل... هههههه هما فعلا شغالين في كدة حالياً وفي نتائج بقيت معقولة بس نوعية البرامج دي غالية اوي اوي ومعقدة بدرجة شديدة وهي ماز الت في مرحلة البداية أصلا ومحتاجة لمستوي تكنولوجي غير متاح حاليا بقدر كافئ لكن في شركات بتصرف ملايين على تطوير الموضوع دة.

استفسار اخر وهو برامج قراءة النوتة من البي دي اف:
نعم هناك برامج وناجحة بنسبة 100% مادام النوتة مكتوبة عن طريق برنامج تدوين وواضحة ومكتوبة غربي تماماً وهناك برامج تحول النوتة من خط اليد إلى نوتة مكتوبة وبالطبع القراءة لكن برضو غالية ولها متطلبات في نوعية الملف وتعتمد على تكنولوجيا بدائية نوعا ما....

**عادل صموئيل** · #**4688** 18/01/2016, 18h10

اخى العزيز عمرو

اولا اشكرك على الشرح الوافى
ملحوظاتى : فهمت من كلامك ان كل انسان لو بصمة صوت .. ودى لما حد بيسجل لحد مكالمة وتدخل فى قضية مثلا ان فيه خبراء صوت على اجهزة معينة بيقولوا دى بصمة صوته ولا لأ .. ومن هنا البرنامج اللى انت بتقول عليه بيتعرف على بصمة الصوت دى وبيحذفها لوحدها لأنها بتكون متيمزة عن بصمة اى صوت آخر فى الملف الموسيقى
اما لما بقول برنامج كتابة النوتة من ملف صوتى هبل ... هو بالنسبة لى هبل ليه ؟
لأن هى ممكن تنجح لو انا جبت ملف ميدى صوتى صوت واحد فقط مكتوب على برنامج تدوين موسيقى وغربى مافيهوش ولا حاجة شرقى من اى نوع هنا ممكن البرنامج التدوين يكتبه بدقة ليه ؟ اولا انو سامع صوت واحد والكمبيوتر مش بيفكر هو بيعمل اللى سامعه .. الحاجة الاخطر انا لو كتبت اربع نوارات فى ماوزرة ... البرنامج انكور بيبقوا اربع نوارات بالمللى ولا همسة طول فى نغمة منهم لا اقل ولا اطول .. لكن انت لو عزفت الاربع نورات دول على الاورج .. مهما كن زمنك مظبوط عمرك ما حاتبقى زى الكمبيوتر .. يعنى حايبقى فيه نوار اطول واحد على 1000 من الشعرة او اقصر .. هنا البرنامج حايكتب اللى سامعه حايكتبها بالدقة المتناهية دى يعنى حايكتبها كروش ونقطة وخمسين تريبل وكواتريبل كروش فاهم قصدةى ؟ حاتبقى عك يعنى ... ده لو انت عازف صوت واحد اما لو اغنية البرنامج حايبقى سامع غير الموسيقى حاجات تانية ... واى شىء فى الدنيا مسموع بيبقى لو تردد صوتى يعنى كلاكس العربية مثلا ممكن عربيتى نغمة لا بيمول عربية تانى تختلف .. لو فرملت فجأة والعجر صفر فى الارض الكمبيوتر حايحسبها نغمة .. ومن هنا لو دخلت اى اغنية على برنامج التدوين حاتطلع حاجة زى الكشرى يعنى لعبكة ليس لها اى لون انا كان نفسى ف برنامج ممكن افصل صوت المطرب واعزف بدله بالكمنجة آدى القصد من الموضوع
مع اطيب تحياتى

**عمرو الهنداوي** · #**4689** 18/01/2016, 20h22

أستاذ عادل مساء الخير
فعلا العلم اثبت أنه لكل إنسان بصمة صوت فريدة تميزه عن شخص أخر حتى لو فيه تقارب في الجينات أو نوعية وطبقة الصوت... وحديثاً في مشاريع أصبحت شبه جاهزة للتسويق فيها بيوت تعمل أجهزتاها بصمة صوت صاحب البيت فقط وهكذا.

موضوع كتابة النوتات من ملف صوتي.. كل ما تقوله حقيقي 100% وعلشان كدة بقول الموضوع معقد جدا لكن للأمانة بقول انهم بيشغلوا على كده فعلا وبدوا يحققوا نتائج وانا كنت جربت برنامج من النوعية دي بس طبعاً النتائج كنوتة كانت سيئة للغاية لكن هناك ملايين تصرف على تحسين هذه العملية وهو الموضوع موضوع وقت فقط من وجهه نظري.

موضوع انه حضرتك تعزف بالكمنجة بدل صوت المطرب ممكن لو الأغنية حديثة وفي برنامج قوي من نوعية فصل التراكات وفي حل تأني بس من خلال الأستديوهات وبعض برامج الهندسة الصوتية وبرامج المعالجة الصوتية الغالية.

**عادل صموئيل** · #**4690** 19/01/2016, 22h27

احبائى
اقدم لكم من مؤلفات عبد الوهاب الموسيقية

موسيقى عمر الخيام

مع اطيب تحياتى