طلبات نوتة أ / عادل صموئيل الجزء الثانى

**عادل صموئيل** · #1 13/01/2016, 00h40

اخى العزيز عاصم المنشاوى
انت سألت فى موضوع صعب جدا ومتشابك لكن من حسن الحظ انك سألت الانسان الوحيد فى الدنيا اللى عاصر الموضوع ده .. وهو متشابك وملخبط عامل زى المكرونة الاسباجيتى لكن احساسى انه ممكن يثير اهتمام الكثير منكم .. ممكن اقول اللى يفتح بيه عليا ربنا
اول حاجة انتاج الاغانى اول حاجة محتاجين فلوس ... ومين اللى بيدفع الفلوس ... فيه حاجة اسمها صاحب الاغنية او صاحب المشروع .. وكمان فيه فرق بين التعامل من المطرب الكبير اوى والكبير والمتوسط والصغير ... ارخص حاجة لما الاذاعة المصرية بتطلب من مطرب اغنية يعنى مثلا من ام كلثوم اغنية ما ... يعنى مثلا مثلا زى اغنية عن الحج مثلا .. اولا بتكلم ام كلثوم وهى بتحدد المؤلف والملحن واجرها ... لو التلاتة وافقوا على الاجر اللى حددته الاذاعة وطبعا بيبقى مبحبح شوية .. بيبتدى الشغل على الفور بس طبعا بتبقى اغنية محدودة البروفات يعنى 4 او 5 ودى العازف مش بيقبض حاجة ع البروفات يعنى بيقبض حق التسجيل فقط .. وبيبقى اللحن ده ملك الاذاعة يعنى هى بعد كده ممكن تبيعه لشركة صوت القاهرة او لأى اذاعة دولة عربية ... اما الانتاج التانى بتاع الاذاعة .. بيبقى متحدد لها كل سنة ميزانية مبلغ ما لشراء اغانى ... طبعا هنا لو المبلغ ممكن يعمل 100 اغنية مع مطربين زى فايزة او وردة ممكن هم يعملوا شوية منهم كده وشوية مع المطربين الاصغر يعنى زى محمد قنديل وعبد اللطيف التلبانى .. الخ , لأن دول تكاليفهم اقل يعنى ممكن المبلغ الميزانية يعملوا بيهم 200 اغنية .. طبعا معظمهم بيبقوا يعنى حاجات اى كلام كده وبيتذاعوا فى الصبح ... اما الشغل التقيل يعنى مثلا اغنية زى انت عمرى ... المنتج الاصلى صوت القاهرة اللى هو بيتعامل مع ام كلثوم منفرداً . كل سنة هى بتعمل اغنية .. بيتكلموا معاها هى بتختار المؤلف والملحن واجرها فى الموضوع كله لحد ما يسجلوا الاغنية .. واجر الفرقة ككل .. طبعا بتراعى ان تاخد م الشركة مبلغ ما للعازفين فى البروفات الكتير وممكن تكمل ممن اجرها هى ( على اسا انها عملتهم من قبل كده ولو عملت بروفات اكتر طبعا الشغل حايبقى احلى والناس دى مايهمهاش الفلوس يعنى يهمها الذكرى والتاريخ ) وبالذات من اول انت عمرى نوعية الشغل اختلفت يعنى اللحن قبل كده كان يتعمل فى عشر بروفات بقى محتاج اكتر من 40 بروفة .. وييجى يوم التسجيل .. بعد تسجيل الاسطوانة العازف بيقبض اجره عن التسجيل واجره المتواضع عن البروفات ... وبيكون المؤلف والملحن والمطربة قبضوا اجرهم عن التسجيل ... بعدين بتيجى الحفلة ... المتعهد بيبع التذاكر بعدين قبل الحفلة بيكون دفع لأم كلثوم اجرها اللى بتاخده ف الوقت ده واجر الفرقة الموسيقية عن الحفلة .. ولو الحفلة مذاعة الاذاعة بتدفع مبلغ نظير الاذاعة على الهواء ونظير تسجيل الاغنية وشركة الاطوانات بتدفع حاجة للإذاعة نظير انها بتاخد نسخة من تسجيل الحفلة تعمله شرائط .. لكن فيه طبعا شروط ان شركة صوت القاهرة هى صاحبة الاغنية .. يعنى هى اللى بتبيعها للإذاعات العربية وهى صاحبة تسويق الشرائط فى العالم ... طبعا فيه حاجة اسمها جمعية الملحنين والمؤلفين كل حاجة فى الموضوع بتتسجل فيها عشان الحقوق ... بعدين ام كلثوم بيبقى ليها نسبة فى مبيعات الشرائط .. كمان فيه حاجة اسمها حق الاداء العلنى .. يعنى كل اذاعة فيها موظفين شغلتهم بيكتبوا كل يوم من الصبح لليل الاغانى اللى اتذاعت وبيطلع مبلغ للمطرب والملحن والمؤلف .. زمان طبعا لو كان ربع جنيه شوف كام محطة كان بيطلع لهم مبلغ حلو .. ومازال الورثة بياخدوه لحد دلوقتى ... لو الحفلة كانت مذاعة على التليفزيون ام كلثوم بتاخد اجر تانى غير اجر الاذاعة ...
نفس الكلام بالنسبة لحليم مثلا بس حليم عشان كان طول الوقت بيشتغل ع الفرقة الماسية وطبعا كل شغلها نوتة كانت البروفات قليلة اوى .. لكن من اول السبعينات .. لما الاغانى ابتدت تتطور بقت محتاجة بروفات اكتر طبعا اجره محدد ( يعنى زى ما قلنا من قبل ) هنا كان بيدفع اجر البروفات من جيبه الخاص .. بس فيه حاجة خطيرة اكتشفها بذكاءه اللى مش عادى .. ايه السلطنة الخطيرة بتاعة الفرقة بتاعة ام كلثوم .. مع انهم نفس العازفين بتوع الماسية .. اكتشف ان ام كلثوم بتشتغل من غير نوتة يعنى المحلن بيحفظ الفرقة بالعود .. بحيث ان العازف خلال ال 20 بروفة الاولى بيكون حفظ اللحن صم كأنه حافظة من عشر سنين .. وبعدين كل يوم فى البروفات الباقية بيعيد تانى ويحس اكتر ويجود اكتر وهى تتسلطن ... لما توفت ام كلثوم ومابقاش ع القمة غيره ابتدى يطبق النظرية دى يعمل 40 بروفة . منها العازف يحفظ للحن ع الآخر والاخطر ان الملحن الكبير كان كل ماتطول البروفات عمال بيكتف حاجات ويحذف حاجات ويزود حاجات لحد ما اللحن ممكن يتغير نصه
اما المطربين اللى زى فايزة ووردة نفس الكلام بس اجرهم اقل من حليم .. اما المطربين الاصغر ... كان بينتظر لحد ما الاذاعة تطلب منه اغنية او شركة تحب تعمل شريط .. وبيبقى عنده حصيلة يشتغل بيهم الحفلات ... بس طبعا شركة الاسطوانات بتجرى دايما ورا اللى بيجيب لها فلوس اكتر ... من اخطر المشاكل فى الفرق الموسيقية وبالذات الصغيرة السرقة .. يعنى مثلا رئيس فرقة كذا اجره من المتعهد كذا .. ممكن مشبيقسمالمبلغ ع العازفين بالعدل يعنى ممكن يحط فى جيبه نص المبلغ ويوزع الباقى .. ودى كانت خطورتها ان العازف لما يحس انه بيتسرق بيروح فرقة تانية تديه اجر اكتر ... الفرق الصغيرة كانوا بيقبضوا بعد الحفلة .. اما الفرقة الماسية .. كان ليها نظام تانى .. يعنى احنا كان لينا التسجيلات للمصريين والتسجيلات للعرب .. والحفلات والبروفات لما تكون طويلة يعنى لو لحن لفايزة بنعمل 7 بروفات كنا مش بنتحاسب عليهم يعنى بنتحاسب ع التسجيل والحفلة فقط على اساس ان الاغنية دى حانشتغلها حفلات كتير بعد كده .. كنا مش بنقبض كل يوم .. يعنى فيه موظف بيجمع مجموع شغلك طول الشهر ... واول الشهر بيديك 70% منه بيحوش لك الباقى .. بحيث ان فيه اشهر بيبقى الشغل قليل زى يناير وفبراير ( كان الموسيقيين بيسموهم ينايم وفقراير ) بيبقى الدنيا برد ومفيش حفلات هنا بيقبضك من اللى متوحوش لك من قبل على اسا انك بتاخد مبلغ قريب من الثابت كل شهر .. بس كان احلى حاجة طبعا حفلات الخارج يعنى اسبوع فى افخم فنادق وبنقبض بالدولار طبعا اجر الحفلة اكتر من مصر كتير
بس الشعور اللى مش حلو يعنى الاجور زمان بالنسبة للكل كانت ملاليم لما تقارنها بواحد معفن بياخد مليون جنيه فى الحفلة عشان يطلع يتنطط زى القرد .. يعنى ام كلثوم فى مصر عمر ماوصل اجرها 5000 جنيه .. وحليم كان بياخد بعدها اعلى اجر 7000 جنيه ووردة 5000 ... وانا تحت امركم فى اى سؤال بس رجاء تكتب سؤالك اوردك على طول ماحدش يعمل اقتباس لأن زى ما انتم شايفين الموضوع طويل اوى مع اطيب تحياتى

**عاصم المنشاوى** · #2 13/01/2016, 18h07

الاستاذ الكبير / عادل بك صمويل

شكرا للأجابة على السؤال....وماكانش ينفع حد غيرك يجاوب ....فأنت كنز من المعلومات ...ربنا يخليك لنا

والفنان /هيثم الصالحى ...كلنا فخورين بك ياصديقى ...

ونحن فى انتظار عودة الدكتور محمد ابراهيم .... وتحياتى لباقى الأصدقاء

**muhamadibra** · #3 14/01/2016, 11h04

تحياتي للجميع وشكرا جزيلا لكل من سأل عني . واخص الاخ العزيز عاصم المنشاوي ونجم النجوم وطبعا المايسترو وكل عام وانتم بخير
د محمد إبراهيم

اهلا يادكتور واحشنا اوى لعل يكون المانع خير وكل سنة وانت طيب مع اطيب تحياتى عادل صموئيل

**عادل صموئيل** · #4 15/01/2016, 16h44

احبائى

اقدم لكم من روائع الفنانة وردة

على عينى ياحبة عينى

مع اطيب تحياتى

**بكر محمد دحدولي** · #5 15/01/2016, 17h38

استاذ عادل صموئيل الكريم هل تستطيع تدوين هذه الاغنية على مقام العجم (حديث عينين) لاسمهان و الحان الموسيقار رياض السنباطي ,فهي اغنية جميلة جدا و لم يدونها احد من قبل ,وانا اعرف ان لن يستطيع احد بكتابة الاغنية سواك وهذا طلبي الاول و ربما الاخير انا فقط اريد هذه الاغنية و هذا الفيديو يظهر المغنية ليلى حجيج تغنيها بعشر دقائق فقط , ارجوك استاذ عادل انا اريد الاغنية جدا لاني اريد عزفها في المعهد العالي للموسيقة في لبنان و ارجو ان ترد على ان تستطيع تدوينها قريبا او في المستقبل و هذا هو الرابط على اليوتيوب الفيديو عشر دقائق فقط و شكرا جزيلا بكر دحدولي

https://www.youtube.com/watch?v=xl8H9AVPoRo

اخى العزيز
انا ححاول ادونها لأنى ما سمعتهاش من قبل محتاج اتعرف عليها لأنها صعبة جدا زى ما انت شايف
لكن اهم حاجة فيه تقسيمة عود فى المقدمة .. وكما تعلم احنا مانقدرش ندون التقاسيم
مع اطيب تحياتى عادل صموئيل

**عادل صموئيل** · #6 17/01/2016, 18h04

احبائى
اقدم للأخ العزيز بكر دحدولى اغنية من العيار التقيل جدا جدا
رائعة اسمهان

حديث عينيك

طبع اخى العزيز زى ما انت قلت الاغنية دى صعب جدا حد يدونها , انا اول ماسمعتها وكان اول مرة اسمعها .. اول حاجة بشوف الدرجة اللى هى عليها .. لقبتها عجم من درجة لا .. وده معناه الدليل 3 دييز .. وبالطبع يمكن انا عمرى مادونت اغنية 3 دييز .. حتى الملحنين يتفادوا يعملوا لحن فى المكان ده لأن الفرق كانت زمان كلها كمنجات والمكان ده مش حلو فى الكمنجات .. ده طبعا غير ان رياض السنباطى العبقرى مالى اللحن علامات تحويل .. انا اول مرة اسمع عن ليلى حجيج وللعلم هى رائعة جدا .. لكن لما دخلت على الموقع اللى انت حطيته لقيت نفي الاغنية بصوت اسمهان بس معقدة جدا جدا اكتر 100 مرة .. يعنى استحالة تتكتب كده .. لما شفت الفيديو اكتشفت بخيرتى ان الاستاذ عازف العود اللى قاعد فى الوسط هو عامل تعديل فى اللحن بحيث ممكن يتعزف .. مظبطه يعنى .. حتى تلاقيه طول الوقت بيعمل ارشادات للفرقة والمطربة .. وطبعا هم حافظينه مفيش قدامهم نوتة .. فيه حاجة تانى لفتت نظرى جدا .. ان فيه عازف كمان شاطر اوى مسيطر يعنى صوته عالى .. بس طول الوقت حسيت ان فيه حاجة مش طبيعية .. يعنى انا كعازف كمان عارف ان ال 3 دييز فيها حروف صعبة او ضعيفة فى الكمان يعنى بيبان جدا ان دو دييز مثلا اضعف من نغمة رى او مى .. ودى طبيعة الكمان اصلا .. لقيت النغمات كله وبالذات النغمة دى حلوة زى باقى النغمات وابتديت اكتب .. طبعا تعبنى جدا لحد ماوصلت فى مكان ما فى الكوبليه التانى لاحظت حركة .. ان عازف الكمان نزل سلم من مى قرار عمل مى رى دو سى لا صول فا مى ... هنا توقفت فيه حاجة مش مظبوطة .. احنا آخرنا فى الكمان صول اليكاه .. طيعا بالخرة اكتشفت انهم منزلين الكمان تون ونصف .. بحيث يبقى آخره مى .. ( ودى بتحصل فى الطوارىء القصوى عشان اللحن يريح صوت المطرب وعملناها فى دارات الايام )
لما ركزت اوى اكتر حسيت انهم بعد مانزلوا الكمنجات كده بيعزفوا المقام عجم الدو مش عجم ال لا .. بس طبعا كنت وصلا لقرب نهاية اللحن وكملته كده .. لكن حرصى ان اللحن يوصل لأكبر عدد من الناس عملت منه نسخة على درجة دو ...
اذكر فى منتصف السبعينات كنت مع رياض السنباطى بعدين طبطب على كتفى وقال لى باللفظ : انت الخير والبرطة .. طبعا ساعتها معرفتش معناها .. دلوقتى حسيت ان كان عمرى ساعتها 25 سنة وهو بعبقريته استشف انهم حايرحلوا والواد الصغير ده ممكن يعمل حاجة تخلد ذكراهم .. وتدوين الاغانى اللى ماتدونش دى اوالتدوين عموما بيخلى ناس كتير تعزف الالحان دى وده يخليها ماتندثرش ... مع اطيب تحياتى

**amrnabmans** · #7 17/01/2016, 19h07

مسترعادل أنت بأهمية السنباطي وعبد الوهاب وكل موسيقيي الزمن الجميل بدون مبالغة
لان بدون النوت كانت كل اعمالهم في طريقها انها تختفي وتصبح مقصورة على طبقات قليلة من السميعة
لكن مساهمتك بالنوت في قمة الاهمية من اجل توثيق الاعمال الفنية والحفاظ عليها

لو ميزعجكش حضرتك تدون لينا موسيقى عمر الخيام الحان محمد عبد الوهاب
الفيديو كاتب انها موسيقى حياتي ودا خطأ شائع
https://youtu.be/btXeXCJxvkk

شكرا لحضرتك

اخى العزيز ماشى
بس خلى بالك من حاجتين اولا هى موزعة يعنى احنا بنكتب اللحن الاساسى فقط لأنك انت لو عزفتها بآلة واحدة مش معقول طبعا حاتعزف التوزيع واللحن الاساسى مع بعض لأن ليس لك عشر ايدين
تانى حاجة المهم ان اللى موزعها موزع انجليزى يعنى افترى شوية فى التوزيع وانا ححاول ابسطها شوية لأن اللحن الاساسى سهل جدا لو اتكتب ممكن اى حد مبتدىء يعزفه اللى معرقبه التوزيع يعنى
وفى اقرب فرصة ان شاء الله انا نزلتها عندى يعنى جاهزة ان شاء الله للتدوين
وعلى فكرة على نفس صفحة اليدوتيوب الموسيقى نازلة كذا مرة بإسم عمر الخيام .. اما اللى منزلها بإسم حياتى مش واخد باله ان حياتى دى مقطوعة تانى وشهيرة وكانت التتر بتاع مسلسل اذاعى زمان عن قصة حياة عبد الوهاب
مع اطيب تحياتى عادل صموئيل

**بكر محمد دحدولي** · #8 17/01/2016, 19h44

اشكرك يا استاذ عادل الصموئيل الكريم ,و انا عاجز عن الفرحة جدا جدا لتدوين هذه الاغنية الجميلة و الصعبة جدا فأنت عبقري و انا اعرف ان لن يستطيع احد بكتابته احد غيرك و اشكرك على تفاصيل التي انت قدمتها عن الاغنية وصدق لاستاذ رياض السنباطي بما قاله عنك و نتمنى بأن تفيدنا بنوتات الموسيقة على طول و اشكرا مرة اخرة شكرا جزيلا بكر دحدولي

اخى العزيز
انا سعيد جدا انك دخلت المنتدى وشفتها لن كنت منتظر ردك من امس , واشكرك لأنك عرفتنى بالاغنية الجميلة دى لأنى ما سمعتهاش من قبل .. ومبسوط لنك تفهمت التفاصيل الفنية اللى انا شرحتها لأن اللحن ده مش عادى ... بمعنى ان مقام العجم بيختلف فى الصعوبة من درجة الى اخرى حسب اختلاف طبيعة الآلات .. يعنى لو على الدو مثلا بيتعزف والواحد مغمض اما على درجات اخرى مثل لا بيبقى 3 دييز وده انا زى ماقلت مستحيل ملحن يعمله من الدرجة دى لأن الكمنجات زمان كانت اهم حاجة فى اى فرقة لأن عليها كل الشغل والدرجة دى تطلع العزف ضعيف .. وانا لما سمعت جزء من لأسمهان مانت حتدخلنى فى متاهة تانية لأنها بتقول اللحن فوق كده ب 4 درجات كمان .. بس مش فاضى احقق فيها دلوقتى لأنها محتاجة اكون فاضى اوى مش ورايا شغل .. المهم انت مبسوط من النوتة وانا عملتها من درجتين اختار اللى تمشى معاك مع اطيب تحياتى عادل صموئيل