طلبات نوتة أ / عادل صموئيل الجزء الثانى

[مينا رضا]

شكراً للأستاذ القدير عادل صموئيل على تعبه من اجل نصيحته الخاصة لي بتدوين النوتة وكنت احب ان أقول لحضرتك انا مبتدئ في التعلم وليس لي خبرة كبيرة بنوعية الترانيم وبالتالي اجهل ماتطلبه مني لو امكن حضرتك تعطيني مثال عملي حتى لا اقع في مثل هذا الخطأ مرة أخرى وشكراً جزيلاً على اهتمامك بطلبي وكما قلت سابقاً ان مجرد قراءتك لطلبي هو شرف لي وأتمنى الا تنساني بمثل عملى على نوعية الترانيم وشكراً مرة أخرى

اخى العزيز
هو الموضوع سهل اوى .. انت طبعا حافظ ترانيم كتير .. اذهب الى الفهرس بتاع النوتات بتاعتى حتلاقينى مدون ترانيم كتير اوى اكيد انت عارف منها .. دى النوعية اللى مش ممن تتدون .. الموضوع مش ترانيم او اغانى .. الموضوع موضوع الموسيقى نفسها ... يعنى تخيل انك بترسم مثلا وقدامك شكل ترسمه لازم تكون فاعم ايه اللى انت شايفه .. بالنسبة لنا فى الموسيقى لازم اولا يكون ميزان ثابت محدد انا اول ما اسمع اقول ده ميزان 4/4 او 2/4 مثلا بحدد كل مازورة فيها ايه ولازم يكون الميزان واضح وضوح الشمس عشان اكون مستريح وانا بكتب.. لكن هنا الميزان عايم مش فاهم اللى لحنه عمله ازاى بحيث انى حاولت القط منه ميزان ماعرفتش طيب حاكتب ازاى .. وحاجة تانية المفروض انا لما اكتب لازم اكون فاهم اللحن يعنى النغمات ايه والتفعيلة بتاعة الجملة ازاى وهنا لازم الاداء يكون مبسط ومفهوم يعنى ام كلثوم وعبد الحليم وكل عمالقة الزمن الجميل ادائهم بسيط بحيث انك تفهم اللى بيقولوه بسرعة وتدونه اما الجيل الحالى زى اصالة والاخت المرنمة هايدى ... بيتفزلكوا فى الاداء بحيث انهم بيشوهوا اللى احنا بنسمعه ومانفهمش بالظبط الجملة اللى بيقولوها ايه يعنى بيعملوا حليات كتير ... انا زمان لما كنت بكتب للملحنين الكبار كان بيسمعنى اللحن سادة بدون اى حليات عشان اعرف اكتب ايه .. وبعد النوتة ماتتكتب واللحن يتحدد لو المطرب حب يحط حليات هو حر مع نفسه ... انا نفسى ده يوصل للجميع .. يعنى احنا فى المنتدى ليه مش بنتعامل مع الاغانى الحديثة ؟ لأن عشان معندهمش جملة لحنية جميلة زى زمان اول حاجة بيوزعوا كل الاغانى من اولها لآخرها ودى مش ممكن تتدون لأنى لازم اسمع لحن واحد زى الحان زمان وثانيا بيتفزلكوا فى الاداء عشان المستمع ما يفهمش هم بيقولوا ايه وصلت الرسالة ؟ مع اطيب تحياتى عادل صموئيل