طلبات نوتة أ / عادل صموئيل الجزء الثانى

**عادل صموئيل** · #1 18/04/2015, 01h53

احبائى
اقدم لكم من اغانى الفنانة سلوى القطريب

يمكن بكرا

مع اطيب تحياتى

**عادل صموئيل** · #2 18/04/2015, 01h54

احبائى
اقدم لكم من اناشيد الاطفال الدينية

صلوا صلوا صلاتين

مع اطيب تحياتى

**احمد نور احمد** · #3 18/04/2015, 03h51

الاخ الفنان عادل صموئيل
ياراجل انا داخل بقولك ازيك وايه الجمال ده ماتردش علي
عموما لما لفيت شويه في المنتدي اكتشفت انك مابتدونش الا مع وجود الملف الصوتي
لو حاسس ان الحدود مغامره مش مضمونه مع اني متاكد انك قدها وقدود بلاش ياعم
وشكرا يابو الكرم
اخيك
احمد نور احمد

اخى العزيز
اولا اطيب تحياتى واهلا بك فى المنتدى
هو اول حاجة لما حد بيطلب اغنية لازم ينزل الملف الصوتى .. لأن انا راجل سنة داخل على 65 سنة وصحتى على ادى ومش بقعد ع الكمبيوتر وقت طويل يعنى نص ساعة واقوم وبعد شوية اقعد تانى كذا مرة ف اليوم .. ولما حد بيطلب اغنية اكون انا مش سامعها وحافظها كويس زى حيرت قلبى معاك مثلا .. قدامى حل من اتنين اما انى ادور عليها اجيب الملف وده ممكن ياخد والوقت اللى بقعده على الكمبيوتر وممكن اسمع الاقيها مش من اللون اللى بكتبه او مش دخت مزاجى .. لذلك اى حد بيرفق الملف الصوتى ( وممكن افتح اى وقت الاقى كذا اغنية مطلوبين .. انا بعمل ايه ؟ بشغل الملف الصوتى من اول دقيقتين فيها ( ده لو معرفهاش من قبل ) لو عجبتنى بنزلها عندى وبديها دور فى الطابور الطويل من الطلبات .. بس لو اغنية صغيرة وتخلص بسرعة مافيهاش مشاكل زى مثلا فوق فيه اخ طالب نشيد دينى للأطفال اسمه صلوا صلوا مرتين .. يعنى كام سطر سهلين وبيتكرروا بكتبها بسرعة واخلص منها .. اما فيه اغانى بتحتاج تفكير وتمخيخ واخراج دى بركنها شوية لما يكون المزاج عندى عالى واكتب فيها شوية شوية .. اما السؤال اللى انت سألأته فى المشاركة السابقة ان ممكن تكون الاغنية مش من طبيعة زمن الفن الجميل .. احنا هنا فى المنتدى مش بنشتغل الا فى اغانى الزمن الجميل .. وده مش تعصب ولاعنصرية .. ولكن اغانى الزمن الجميل كانت بتتميز بالسلاسة يعنى انا مدون اكتر من 1000 نوتة اى نوتة منهم اى مبتدىء ممكن يعزفهم ..وحتى لو فيه زمان جملة صعبة او فيها كلكعة او فزلكة كان بيبقى لها مضمون وبالطبع بدونها بحاول افكها شوية بحيث ان ماتقفش فى ايدك وانت بتعزف .. زمان كان شوف مثلا اغانى عبد الحليم اللى فيها توزيع زى مثلا خايف مرة احب .. بس كان فيها ميزة ان اللحن او الخط اللحنى انت سامعه كامل 100% والتوزيع عليه وممكن انت تعزفها كاملة بالعود بدون التوزيع واللى يسمعك يقول لك الله عليك ..لكن الاغانى الحديثة اول حاجة ان كلها موزعة والتوزيع متداخل مع الاحن الاساسى بحيث انى حتى لو فصلت اللحن الاساسى بيبقى مالوش قيمة بدون التوزيع يعنى اللى يسمعها من الشريط بيسمع عشرين حاجة على بعض وانت ع العود طبعا حاتعزف منهم حاجة واحدة حاتبقى فاضى ... انا سمعت جزء من اغنية الحدود اول حاجة لفت نظرى فيه كلكعة فى الميزان او غموض فى المقدمة ( يعنى انا اول حاجة اول ما اسمع احس الميزان هل هو 4 او 3 مثلا وافهم المقام ) هنا الميزان لخبطنى عايز استوعبه .. بعدين الباقى ممكن ماشى بس فيه حتة سريعة جدا جدا مش ممكن تتعزف على العود هى بتاعة اورج اصلا .. ولما دخلنا فى موسيقى الكوبليه لقيت عود مع اورج ده بيقول حاجة وده بيقول عليه حاجة ومش باين مين منهم اللحن الاساسى ومين المصاحب لأنهم مخلوطين على بعض اوى والمشكلة حتى لو انا طلعت منهم خط اللى حايسمعك لو حافظ الاغنية حايحس انك بتقول حاجة غلط لنو ف الشريط سامع حاجة تانية .. ومشكلة التوزيع حاجتين اول حاجة انك لو عايز تعيد عزف او تقديم فى حفلة لحن موزع بالطريقة دى لازم اللى ينفذه الموزع الاصلى لنو عارف هو عامل ايه فين .. وحاجة تانية انت لما بتسمع جملة عليها توزيع من النوع ده بيبقى كل حرف انا سماعه مش حرف بيبقى جزء من كورد .. يعنى اقصد انا مثلا سامع صول .. لا .. سى ... جايز اللحن مش كده لكن تداخل الخطوط اللحنية بيديك ايحاء انها صول لا سى وهى مش كده هى حاجة تانية بتزن من تداخل الاصوات وهنا انا لو كتبتها صول لا سى منفردة اللى يسمعها حايحس انك بتعزف حاجة غلط ... فهمت ليه احنا متعصبين للزمن الجميل ؟ مع اطيب تحياتى وآسف انى مارديتش عليك امبارح لأن كان عندى مشكلة فى احدى الطابعات عندى كان فيها عفريت مبرجلنى بس الحمد لله صلحتها عادل صموئيل

**منذر44** · #4 18/04/2015, 04h11

استاذ عادل
تعجز الكلمات عن شكرك
لك كل المحبة والتقدير

**مهدي01** · #5 18/04/2015, 22h14

اقتباس:

المشاركة الأصلية كتبت بواسطة عادل صموئيل

احبائى
اقدم لكم من اناشيد الاطفال الدينية

صلوا صلوا صلاتين

مع اطيب تحياتى

شكرا يا هرم يا على اللمسة والطبق الديني اللي حضرتو ليا و للاعضاء

**عادل صموئيل** · #6 19/04/2015, 00h18

احيائى
اقدم لكم دويتو قديم اوى للثنائى جمال وطروب

قول كمان

مع اطيب تحياتى

**مهدي01** · #7 19/04/2015, 22h36

انشودتين اكثر من رائعة الاولى عن الطبيعة و الثانية عن النبي المسيح عيسى عليه السلام
ممكن تدوينها يا استاذنا يا درة القلوب

اخى العزيز
الانشودة الثانية ناقص منها جزء ممكن تبحث عن تسجيل كامل لها عشان ما ينفعش ادون عمل ناقص ؟
مع اطيب تحياتى عادل صموئيل

**عادل صموئيل** · #8 21/04/2015, 05h31

احبائى
اقدم لكم بناء على طلب الاخ خالد موسى مقدمة ومذهب اغنية نجاة

ياحبايبى ياحلوين

هو كان طلب المقدمة وانا حبيت اعمل كمان المذهب بالمرة
ممكن حد يقول طيب ماكملتهاش ليه
هى الاغنية دى من فيلم ابنتى العزيزة وهى من الاغانى اللى بتتحشر فى الافلام او موقف درامى حبوا يعملوه غناء مش تمثيل وهى حوار بين نجاة واطفال
الجزء اللى كتبته هو الجزء المهم فى الاغنية يعنى الباقى الاطفال بيقولوا اجزاء تعتبر كلام مش لحن عشان كده مالهاش قيمة لحنية او مالهاش قيمة انك تعزفها يعنى , وانا لما بدون لحن بكامله بحرص ان اللحن اولا يكون لو قيمة فنية وثانيا انك تقدر تعزفه على آلة واحدة
مع اطيب تحياتى

**خالدموسى** · #9 21/04/2015, 13h39

اشكرك استاذنا الجميل عادل صموئيل على سرعة تدوين المقدمة والمذهب لاغنية نجاة الصغيرة يا حبايبى يا حلوين حيث اننى اتعلم على تدويناتك السهلة فى عزف الاغانى ومنها اصبحت اعزف بعض الاغانى بيسر وسهولة وانا عاشق لنجاة الصغيرة ولذلك اختار دائما من اغانيها
وياريت تحكى لنا عن ذكرياتك الخاصة بحفلات نجاة الصغبرة عندما كنت تعزف معها فى هذه الحفلات
اتمنى لك الصحة والعافية والسعادة كما تسعدنا بهذه الهدايا القيمة

**مهدي01** · #10 21/04/2015, 22h45

استاذنا الكبير اليك اشودة المسيح عيسى عليه السلام و انشودة الطبيعة كاملة ياريت تدونها

اخى العزيز
انت مش بتسمع المفات قبل مانتزلها ؟
يعنى اغنية الطبيعة ناقصة جزء من اولها ودلوقتى انا قعدت مخصوص ادونها لقيت ناقص جزء من المقجمة وانا لازم اسمع بادية ازاى وكمان ما اقدرش اترك الجملة المبتورة واكتب من بعد كده يبقى اللحن ناقص مالوش تسجيل تانى كامل من الاول ؟

مع اطيب تحياتى عادل صموئيل