يا بخت حبيبى قدر ينسى

[الألآتى]

عودة حميدة ياعم حسن .. تغيب تغيب وترجع لنا بدرر ولألئ ومجوهرات

تصور .. فعلاً .. أنا ماسمعتش الأغنية دى منذ سنوات طويلة .. وها أنا أسترجع معك الزمن الجميل

وبالرغم من أن موقفى معروف بخصوص المبدعون ودعوة على أغنية .. بعد مذبحة المماليك

لكن طلباتك على عينى وأمر واجب تنفيذه .. لعل وعسى تعود الأيام الحلوة ..

[غواص النغم]

اختيار جميل يا أسد وذكريات صيفية قاهيرية حارة
أما انا لما اسمعها بتفكرني بعمي مختار حيدر الله يرحمه كانت من أغانيه المفضلة..
من حوالي أسبوعين اذاعت إذاعة الاغاني حفلة غنت فيها صباح هذه الاغنية فكانت أيضا مفاجأة أنها غنتها في حفلاتها.
وهي فعلا من أجمل الحان رؤوف ذهني الذي قال عنه الموسيقار حلمي بكر انه كان موهبة كبيرة ضيعها للأسف الشديد رحمه الله وقال أيضا معلومة انه كان حساس جدا فكان المفروض أن يلحن لعبد الحليم حافظ اغنية ايه ذنبي ايه كلمات مأمون الشناوي وبعد أن قام بتلحين الأغنية قام عبد الحليم وأعطاه بعض الملاحظات على اللحن فغضب وسحب اللحن فقام عبدالحليم بإعطاء اللحن لعبدالوهاب.. وهنا تدخل مأمون الشناوي وقام بترضية رؤوف ذهني بأن كتب كلمات اغنية على لحنه وقامت بالغناء نجاة
وهذه الأغنية هي : وسلم لي عليه

[حسن كشك]

استاذنا المايسترو
محمد باشا الالاتى
بداية شكرا على تصنيفى جواهرجى اغانى فهذا فخر لى والله

والحمد لله الاختيار عجبك ... وده شرف تانى ليا
أما بالنسبه لموقفك .... شكراً للأستثناء وده شرف تالث

والامر المهم اننا اصحاب واخوه واصدقاء .... يعنى ملناش دعوه بأى تصرفات خارجيه .... من اى حد ان كان
احنا بنمارس هوايتنا السمعية اللى بنحبها .... واللى عاجبه اهلا وسهلا بيه .... والمعترض ايضاً اهلا وسهلا بيه وياريت يقول سبب اعتراضه
توكل على الله يامايسترو .... ورجع لسماعى ايامه الجميله ... انا لسه عندى اغانى كتير اوى .... بس شد حيلك انت
توكل على الله

[حسن كشك]

اخى الاستاذ عبد المنعم (الغواص )
شكرا على ذوقك وكلامك الرقيق
الاغنيه فعلا.... جميله .... ومتكامله اوى .... من ناحيه جمال الكلمات .... للرائع فتحى قوره ... كلام فعلا طبيعى جدا .... وبليغ اوى .... بيقول الكلام اللى الواحد عاوز يقول لكنه مش عارف
وايضاً بساطة وجمال اللحن اللى قدمه رؤوف ذهنى .... حاجه كده زى مايكون واخد المطربه على راحتها خالص ...ولو ان الغنا كله كان تقريبا من الجواب ... يعنى سقف غناء المطرب .... ولكن ما تحسش بإجهاد فى صوت صباح وقتها لغنائها فى تلك الطبقة العالية .... لكن رؤوف كان ينزل بالسقف ليريح صوت صباح .... فى اواخر الكوبليهات .... حاجه روعه
ورائعه المعلومه عن اللحن وحكايه انها كانت لحن آيه زنبى ايه لعبد الحليم ..... انا باتخيل لو كانت اتغنت على اللحن ده كان هايبقى سمعها ازاى ....
وحضرتك قلت انك سمعتها حفلة فهل هى موجودة بالمنتدى ام لا .... لو موجوده حط لنا الرابط .... لانى مسمعتهاش حفل ابدا قبل كده .... ويبقالك الثواب

[الألآتى]

بسم الله نبدأ فى تحليل أغنية ( يابخت حبيبى يابخته )

كلمات : فتحى قورة

ألحان : رؤوف ذهنى

غناء : صباح

جلست لأستمع إلى هذه الأغنية .. ومن أول مازورة لحنية .. أحسست أنى سمعت هذا اللحن من قبل

التيمة المستخدمة فى المقدمة الموسيقية .. والتى تتكرر بين الكوبليهات .. سمعتها من قبل ياناس ..

فين .. فين .. مش فاكر .. وفجأتن .. تذكرت

أيوه .. سمعتها فى أغنية لنجاة الصغيرة .. إسمها ( بكانى لما خلصت دموعى ) من ألحان محمد الموجى

هى مش نفس اللحن بالظبط يعنى .. لكن التيمة قريبة الشبه جداً

المقام واحد فى الأغنيتان ( الكرد ) .. لكن عمنا الموجى لجأ لصبا الزمزمة .. وهو من مشتقات الكرد .. بينما لم يخرج أستاذنا رؤوف ذهنى عن الكرد

المهم .. خلينا فى أغنيتنا اليوم .. ( يابخت حبيبى يابخته ) لصباح

الأغنية من قالب ( الفورم ) وهى الكوبليهات المتكررة لحنياً .. يعنى كل الكوبليهات زى بعضها لحنياً .. مع إختلاف الكلمات

تبدأ الأغنية بأدليب قصير من الوتريات بالإشتراك مع آلة القانون

ثم يدخل الإيقاع المقسوم .. لنسمع اللازمة الموسيقية الرئيسية .. والتى سنسمعها داخل العمل ( قبل كل كوبليه )

عمنا رؤوف ذهنى لم يخرج عن الكرد طيلة اللحن .. ( المقدمة الموسيقية ، اللازمات الموسيقية ، الكوبليهات ، الكورال ) كله كرد فى كرد

أين الجمال إذن ؟

الجمال فى تنوع الجملة اللحنية .. وإستخدام كافة العُرب والحليات داخل المقام ..

لدرجة أنك تشعر بتنوع المقامات .. مع أنه كرد فقط .. ولا شئ غيره

وهذا هو الفارق بين أغانى زمان .. وأغانى اليوم التى تستعمل نفس الكرد .. ولكن هيهات .. الفارق رهيب

زمان .. الخيال واسع ورحيب .. اليوم .. الخيال محدود .. جداً .. ولا يعرفون عن الكرد .. إلا طلوع السلم ونزول السلم .. يافرحتى

الإيقاع تنوع بين المقسوم ( الراقص ) وبين إيقاع الواحدة الكبيرة ( عندما تبدأ صباح فى غناء الكوبليهات )

الأغنية تنتمى بالتأكيد للزمن الجميل .. الجملة العاطفية الشجية .. والتى تشد الأذن شداً للسماع والإستمتاع

أرجو أن أكون وُفقت فى هذا التحليل المتواضع

[حسن كشك]

السلام عليكم ورحمة الله وبركاته
بداية عذرا على التاخر فى الرد لظروف مشاكل فى الاتصالات عندى
طبعاً... وانا استمع للاغنية حيرتنى المقدمة الصغيرة للوتريات والقانون .... كأنها مقدمة تشبه المقدمات السينمائية فى الافلام القديمة .... عندما تعمل الكاميرا كلوز على وجه بطل الفيلم .... وكأنه يكتشف اشياء كان لا يعرفها .... هذا كان شعورى .....
لكن بعد دخول الايقاع .... الذى كنت اظنه واحده ونصف .... كما نسميه شعبياً .... لكن المايسترو .... سماه المقسوم .... فهل المقسوم هو الواحده ونصف الذى يسهل عزفه لكل المصريين وخاصة فى الافراح عندما ترقص عليه الفتيات اصدقاء العروسه ؟؟؟؟ لست ادرى

نعم كنت اشعر بأن كل اللازمات شبه بعضها .... وأكد شعورى هذا استاذنا المايسترو
لن ادخل فى تحليل اللحن .... ومادخلت فيه هو ما شعرت به فقط .... لأنى لن اصل الى علم استاذنا الالاتى
وجاء ليسألنا هل وفقت فى التحليل ؟؟؟؟
وهل انا او غيرى نملك الحكم عليك وعلى توفيقك فى التحليل ..... حاشا لله يا استاذنا .... نحن نتعلم منك ما نجهله تماما ... ( انا اتكلم عن نفسى )
شكرا يا استاذنا .... على الاهتمام باغنيتنا وتحليلها ..... واحنا طمعانين فيك اوى .... لسه فيه اغانى كتير ها تحللها لنا يا استاذ ..... فكن صبور معنا
الله ينور عليك يا مايسترو

[الألآتى]

بداية .. لك كل الحق فى أن تطمع وتأمر ياأبو ميدو ..

ثانياً : المقسوم بالفعل هو الواحدة ونصف .. وهناك إيقاع أخر يسمى الواحدة ونصف .. وهو المصمودى الصغير

وكلها إيقاعات راقصة ..

المقسوم تسمعه ياعم حسن فى أغنية ( على رمش عيونها )

أما المصمودى الصغير فتسمعه فى بداية أغنية ( حسادك علموك ) أو أغنية ( ياحلاوتك ياجمالك )

هذه مجرد أمثلة

فاكر ياعم حسن .. لما كنا بنضع تحليل أو أغنية جديدة فى قسم المبدعون .. فاكر كان بيحصل إيه ؟

كان السميعة يتسابقون للمشاركة والرد .. وكان الموضوع يتحمل عدة صفحات

إنى أتحسر على حال هذه الأقسام المظلومة .. بعد أن تحول سماعى لمجرد موقع أو مخزن للأغانى

ليس فيه مجال للإبداع .. الحمد لله على كل حال

[خليـل زيـدان]

ياعم محمد يا أبو حسام
بما انك كبير المشرفين .. ماتنساش ترد على كل المشاركات
وتنشط قسمك .. المبدعون ودعوة موسيقية تحت رعايتك