طلبات نوتة أ / عادل صموئيل الجزء الثانى

**سعد جسوس** · #1 09/04/2014, 02h21

الف شكر للمنتدى اولا و لكرم الاستاذ الفلضل عادل غلى كل هذا الجهد ساعود لهذه الصفحات مرة اخرى الف شكر

**عادل صموئيل** · #2 09/04/2014, 11h58

احبائى

يسعدنى وافتخر انى اقدم لكم تحفة من العيار التقيل جدا

محمد عبد الوهاب وفيروز

سكن الليل

الاغنية دى فيها كلام كتير جدا .. مش اغنية عادية وححاول اختصر .. فيروز مثلا بعكس صباح .. بمعنى ان فيروز مش مطربة مستلقة ولكن مؤسسة كبرى اسمها فيروز والرحبانية .. يعن عبد الوهاب لما يعمل لها لحن لازم هو يروح لبنان ويسجل على فرقة الرحبانية وهم طبعا اللى بيكتبوا اللحن وبيعملوا التوزيع .. والخطورة هنا فى التقاء العمالقة ان ممكن الرحبانيية يؤثروا على لحن عبدالوهاب .. لكن هم مايقدروش على عبد الوهاب بمعنى اشرحها لكم ابسط .. انا مثلا كواحد متواضع ممكن اعمل لحن حلو واقنع فيروز تغنيه لكن عشان انا موسيقارصغير هم حيادوا اللحن ويعلوه بطريقتهم بحيث كل ماتتذاع الاغنية المذيع يركز من تلحين فلان اللى حايسمعها يحس انها تلحين الاخواين رحبانى لنهم حايصبغوها بصبغتهم .. لكن مع عبد الوهاب تحس بلحن عبد الوهاب بصبغة الرحبانية .. وتحس بالجمال ده فى اجزاء كتير من اللحن يعنى فيه لازمة بيردوا عليها ىخر حرف فا لكن بيعملوها خافتة اوى تجنن انا عادة مش بكتب القوة والضعف فى العزف عشان مش مؤثرة اوى فى معظم الاغانى المصرية لكن لو تلاحظ انى كتبت تحت الفا p عشان اؤكد للى يعزفها يلتزم بخفوت النغمة دى , وموجودة اول صفة السطر الاخير ثانى مازورة .. كمان عشان التنويعات على نفس الجملة والإعادات اضطريت اكتبها تانى يعنى ما ينفعش اعمل سينيوهات لأن مفيش فى الموسيقى اكتر من تريبل سينيو ...لما ذكرت سيرة صباح .. يعنى فيروز بالذات ما ينفعش عبد الوهاب يجيبها مصر وتسجل اللحن على الفرقة الماسية وايضا لازم اللحن يكون قصيدة عشان مشكلة اللهجة بعكسصباح .. يعنى عاشت فى مصر وعملت اغانى كتير مصرية 100% كمان من مميزات اللحن ده انى بحس انو بتاعنا .. بعكس اغانى فيروز بنحس انها من بلد تانية يعنى لهم لون متميز فى كل حاجة اولا اللهجة الشامية ثانيا استخدام الاكورديون كتير اكتر مننا وبالذات فى الاوكتافات العالية .. والتوزيع الخفيفالجميل اللى بيجمل اللحن مش بيشوهه .. طبعا اللحن فيه اجزاء صعبة ومعقدة ولكن انا طبعا حاولت التبسيط على قد ما اقدر واترككم مع النوتة

مع اطيب تحياتى

**عادل صموئيل** · #3 09/04/2014, 12h45

احبائى
واقدم لكم من العيار التقيل رائعة نجاة

ع اليادى

اول حاجة انا منزل النهاردة سكن الليل ووراها ع اليادى يعنى ارجو ماحدش يفتكر انهم كانوا عندى فى الدرج وانا بتقل عليكم وبنزل النوت على مزاجى .. او ان الاغانى الصعبة جدا دى بتتكتب بالساهل كده .. يعنى فيه ايام بيبقى عندى طاقة عالية للتدوين والحظات دى مشكلتها انى باجى على نفسى ومش بحس بالتعب .. الاغنيتين دول انا كتبت كل واحدة فى 24 ساعة يعنى كذا مرة اقع اكتب شوية بالنهار بعدين ببتدى من الساعة الواحدة صباحا لحد الساعة 7 صباحا متواصل يعنى كل ساعتين بشرب كوب شاى وحجر شيشة ... بعدين لما بتخلص الاغنية فيه مرحلة خطيرة وهى المراجعة النهائية ثم التشطيب فى الوقت اللى بيبقى عندى طافة عالية للكتابة بركن الاغنية اللى خلصت وابتدى فورا فى التالية وبالذات لما تكون اغنية انا حاببها ولعلمكم انا خلصت عاليادى الاول ثم ابتديت فى سكن الليل ... اليوم صباحا انا خرجت مشوار ورجعت ع الساعة 10 صباحا .. وتعبان ومزاجى مش حلو وده احسن وقت انى اعمل المراجعة النهائية ثم التشطيب للأغنيتين لأن العمليتين دول محتاجين الخبرة العالية فقط مش المزاج والمخ بتاع التدوين والحمد لله خلصوا بالنسبة لى الجبل خس شوية
طبعا ان عارفين ان عبد الوهاب لازم كل لحن فيه شىء مختلف .. يعنى لازم حكاية .. الحكاية هنا انو استغل الكورال بدرجة عالية يعنى عمل عكس اللى بيعموله الكل ... الكل بيخلى المطرب هو الاساس وتقريبا بيقول الاجزاء الصعبة والكورال بيردد اللى المطرب بيقوله هنا عمل العكس ان لما يكون جكلة بتتقال وتانى مرة فيها تنويع وصعب بيخلى المطربة تقول الاول ثم الكورال يقول التونيع الصعب ... طبعا الاغنية دى كانت قبلى يعنى انا ماعزفتش فيها لكن من الخبرة ودراسة الشخصيات بقدر احلل كل اللى بيحصل واتخيلو من غير ما اشوفه يعنى اقدر اقول لكم ان اكيد ان نجاة وعبد الوهاب اتخانقوا على انها هى ازاى تقول الاجزاء الاسهل والكورال يقول الاجزاء الاصعب ( شفنا حاجات كتير من كيد النسا والنجومية دى ) بس مع عبد الوهاب اللى بتكلم كان بياخد على دماغه .. وفى الآخر كلامه كان هو اللى بيمشى اولا لان كلامه صح جدا وعن تفكير عميق وثانيا لو كان عمل العادى كانت الاغنية تبقى عادية زى ما بليغ بيعمل مثلا بس طبعا انا اشهد للكورال هنا انهم روعة بمعنى طبعا نجاة حلوة مافيش كلام بس هنا فيه نجومية شوية للكورال
مع اطيب تحياتى

**عمرو الهنداوي** · #4 09/04/2014, 12h51

الله ... الله عليك يا أستاذ عادل

**muhamadibra** · #5 09/04/2014, 13h26

ع اليادي - سكن الليل - روعة والتحليل الفني اروع - بس علشان خاطري بلاش تدخين
د محمد ابراهيم

**صادق ربيع** · #6 09/04/2014, 13h58

ألف شكر أستاذ عادل. كل التدوينات التي تكتبها رائعة وأنا اعتمد عليها كثيرا في اداء الالحان لما تتمتاز به من الوضوح والدقة.

**ahmad_alahlawy** · #7 09/04/2014, 14h08

شكرا استاذنا على هاتين الرائعتين

**سليم العباس** · #8 09/04/2014, 14h29

شكراً جزيلاً لتدوين قصيدة سكن الليل ، و أود أن أطرح سؤالاً :

هل تعتقد أستاذ عادل أن الفنان محمد عبد الوهاب قد ترك بصمته اللحنية على أغاني فيروز ، أم أنه لم يضف أي جديد إلى ألحان الرحابنة ؟

اخى العزيز
عمليا لا دى ولا دى .. بالذات مع فيروز وانا فى الكلام اللى كتبته على سكن الليل قلت ان فيروز والرحبانية عبارة عن قلعة مش اى حد يقدر يخترقها .. لكن الحان عبد الوهاب لفيروز ممكن اقول ببساطة عاملة زى عندنا محلات عصير فواكه ممكن تشرب عصير فكهة واحدة معينة زى المانجو او التفاح مثلا .. وبيوجد عندو كوكتيل من عصير الفواكه .. ولحن عبد الوهاب مع فيروز هو كوكتيل من عبد والوهاب والرحبانية وفيروز ... يعنى اختلاف فيوز عن صباح مثلا ان فيروز مع الرحبانية جزء لا يتجزا ... والرحبانية انا عشت معاهم فترة عشرة ايام فى مهرجان دمشق الدولى سنة 77 كنا نازلين معاهم فى نفس الاوتيل احنا طبعا نفسنا نتصاحب عليهم نتفرج على الرحبانية دول ايه وفى نفس الوقت هم عايزين يتعرفوا على الفرقة الماسية واللى 90% منها عزف مع ام كلثوم لفترات طويلة ... انا شفتاحد الرحبانية مش بيألف الكلمات بعدين يمسك العود ويلحنها .. لكن بييجى على بالو كلام بيمسك ورقة وبيكتبه وبيطلع منو متلحن جاهز .. ثانيا فيروز عايشة معاهم رابعا عندهم فرقة رائعة او قول فرقتين فى بعض يعنى فرقة شرقية واوركسترا غربى كلاسيكى يعنى ممكن واحد يألف جزء من اغنية متلحنة واخوه يكملها او يوزعها وفيروز عايشة معاهم تحفظها النهاردة والفرقة تحت امرهم يعملوا بروفة بكرا ويسجلوها بعد بكرا ... بعكس عبد الوهاب يعنى اولا مؤلف بيألف الاغنية وممكن ماتعجبوش ويحصل شد وجذب وممكن ما ياخدهاش اصلا .. ولما ياخدها مين حيغنيها بعدين بتاخدوقت طويل فى التلحين بعدين يدى تسجيل للمطرب بعدين تتكتب نوتة بعدين يتفقوا مع الفرقة الماسية فاضيين امتى للبروفات عملية معقدة شوية ... ان عن موضوع التأثير ما ينفعش عند العمالقة بمعنى ... انا موسيقار صغير لو اتأثرت اوى اوى بالسنباطى مثلا حاتطلع الحانى شبه الحان السنباطى يبقى ماليش قيمة ومعاملتش شىء ومش حعيش فى السوق كتير .. زى مطربين اتأثروا بعدب الوهاب وبقوا يقلدوا طريقته الجمهورلم يقبلهم لن الاصل موجود .. لكن اللى بيحصلان الموسيقار بيسمع ده وده بياخد فكرة او ممكن يكتشف مقام مش مستعمل او ايقاع جديد وممكن فى لحن ما يعمل جملة فى المقام ده او على الايقاع ده من باب التلوين ... عبد الوهاب مثلا اول ماطلع اتعلم بسيد درويش وسلامه حجازى وكل اللى سبقوه لكن لم يتأثر بهم لذلك طلع لون جديد ... نفس الحكاية الرحبانية بالطبع سمعوا كل الحان عبد الوهاب اتعلموا منو حاجات لأنو قبلهم بكتير لكن لم يتأثروا بيه ولكن عملوا خط جديد .... فيه حاجة تانية فيه ناس جاهلى ممكن تعمل مقارنة بين عملاقين يعنى مين احسن ودى غلط لن عملاق يعنى بيعمل شىء كبير وكل عملاق لون ... انتم فى سوريا عندكم بتسموا فيروز خبز اليوم يعنى مثلا حافظين كل اعمالها وبالذات مسرحياتها الغنائية لكن ما ينفعش نقول انهو احلى ام كلثوم ولا فيروز ... دى حاجة ودى حاجة لون ولون تانى يعنى ام كلثوم بتغنى ممكن وصلة ساعتين فى اغنية واحدة لكن فيروز فى الساعتين بتعمل مسرحية من 3 فصول .... اما عن التأثر ده بيظهر دلوقتى مع اللى بيغنوا دلوقتى .. تلاقى واحد فال بيغنى يطلع 27 واحد افشل منو بيتأثروا بيه .. تسمع نفس اللون نفس المقام نفس نبرة الصوت نفس كل حاجة تسمع عشرة بيغنوا ماتعرفش حتى تفرق ده مين ولا ده مين
مع اطيب تحياتى عادل صموئيل

**نور الصباح** · #9 09/04/2014, 15h55

احبائى
يسعدنى وافتخر انى اقدم لكم تحفة من العيار التقيل جدا
محمد عبد الوهاب وفيروز
سكن الليل
مع اطيب تحياتى
SSSSSSSSSSSSSSSSSSSSSSSSSSSSSSSSSSSSSSS

شكرررررررررررررررررررررررررررا
عقبال ما نتقابل قريبا - إن شاء الله -
أخوكم
نور الصباح

**نور الصباح** · #10 09/04/2014, 15h57

احبائى
واقدم لكم من العيار التقيل رائعة نجاة
ع اليادى
مع اطيب تحياتى

شكرررررررررررررررررررررررررررا
عقبال ما نتقابل قريبا - إن شاء الله -
أخوكم
نور الصباح