قراءة فى أوراق قديمة

[hany57]

- 20 -
منيش راجع
------------------
سهران فى ليل الوجع
فارد شراع الصير
ما معايا غير مهجتى
وكام نفس فى العمر
وريح الحزن بتعاكس
ويعلا الموج
أعلى من جبال اليأس
فى قلب وليد ما شاف أمه
ولا حضن فى يوم ضمه
ومجدافى بيتكسر
على صخرة زرعها الخوف
وضاعت دفتى منى
وعينى ليه خاصمها الشوف
وفين الفجر مش باين
حلفت ماسيب أنا مكانى
ولا أفكر فى يوم أرجع
واشوف لى شط
قبل ماشوف محبوبتى
وعنيها السود
واشوف الحنة فى كفوفها
أمن .. وجود
ويرجع تانى عشاقها
بشوق فى القلب
ماله حدود
واشوفها زى ما كانت
زى ماشفتها فى حلمى
زى ماعشتها بنبضى
زى ماحبها قلبى
زى ماعينى شافتها
فى ليالى الطهر
عروسة الكل منها يغير
وكل ولادها عرسانها
منيش راجع
إلا معايا محبوبتى
ولو هافضل كدا سهران
لطول العمر
وحتى ان داب شراع الصبر

---------------------------------
هانئ الجمل