- 19 -
رئيس وزارتنا
( 20 - 2 - 2012 )
-------------------------------
رئيس وزارتنا يا إخوانى .. بتصريحاته غاوى جنانى
رئيس وزارتنا يا إخوانى
أدينا عشنا لحد ما شفنا .. رئيس وزارة بيتحفنا
وتصريحاته بتقرفنا .. والله منها آه يانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
أول ما جه هل علينا .. قطع الكهربا من حوالينا
وقال أوضة كفاية علينا .. بدل م الوحدة مبنعانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
علشان نوفر للأوطان .. الكهربا قدر الإمكان
ونصيحة ليكو البسوا أقطان .. بلاش داكرون أو كتانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
شفت الرغيف دا تحفة ياهوه .. يابخت الفقرا اللى بياكلوه
علشان كدا فقيرنا حسدوه .. فى النعمة غرقان ياخوانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
هنعمل بقا توزيع للعيش .. بكروت ذكية وغيرها مفيش
خلى الشعب ياكل ويهيص .. فى العيش يبلبط من تانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
وكل فرد يا مستمعين .. له تلات ترغفة كاملين
فى اليوم الواحد كونوا شاهدين .. على الدلع ويقولوا جانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
يعنى ياأخى لو ضيف جالنا .. على الغدا هيسوء حالنا
بدون عشا يبقا مآلنا ..ونستنى لليوم التانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
بعد كدا لو جالك ضيف .. قول له فين عيشك يا ظريف
لأن عيشنا خلص يا خفيف .. وبدون زعل متجيش تانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
واسمع آخر تفانينه .. صحيح من فين دا جايبينه
فى التليفزيون ليه سايبينه .. آدى التصريح الأخرانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
تعرفوا ان الإسهال .. اللى بييجى للأطفال
سببه الأم مفيشى فصال .. واشرح لكو ازاى ياخوانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
نسوان بعيد عنكو عكرة .. عن النضافة مفيش فكرة .
تقعد ترضع ولبكره .. من غير غسيل صدرها يانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
اسمح لى أستأذن معاليك .. عندى الحل الله يخليك
والحل مجانى لاجل عنيك .. اسمع للحل العقلانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
يدعو الائمة فى مساجد .. وكل عابد أو ساجد
يدعو بقا الله الواحد .. يخلق جديد فى النسوانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
تكون صدورها ( ديسبوزابول ) .. بدل ماتشطف أو تغسل
بعد الرضاعة دى ماتحصل .. ترميه وتلقا جديد تانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
أو نبيع فى الأجزاخانات .. مباسم أطفال لزوم الرضعات
معقمة بكل المقاسات .. مش فكرة حلوة يا إخوانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
أو شاليمو معمول مخصوص .. لاجل الرضاعة مصنوع م البوص
يبقا طبيعى بأقل فلوس .. تلقاه كتير فى الغيطانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
وفيه أبحاث هنا علمية .. عن ( سونتيان ) بالحنفية
توماتيكى يغسل يا عنيه .. ( تاتش ) وفيه برضو أغانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
والله دا كلامك يخجل .. بدل كدا شوف ايه بيحصل
وبلاش كلام خالص أفضل .. ويارب مانشوفك تانى
إسمع تفانينه ( الله )
من فين دا جايبينه ( الله )
رئيس وزارتنا يا إخوانى
-----------------------------
هانئ الجمل
رد: قراءة فى أوراق قديمة
العرض الشجري