راس الوابور
-----------------------
علشان راس الوابور
اللى ضاعت ماجات
دمعى نازل بحور
بس غالبنى السكات
يا فادية حرام عليكى
ضيعتيها بإديكى
قلبى غضبان عليكى
فى حياتى وفـ الممات
بس غالبنى السكات
كان ليا معاه ليالى
جميلة عشتها
والفنية لما كتمت
وانا سلكتها
وبقت الشعلة زرقه
نستنى آلآم وحرقة
عـ الشاى يبان لهيبها
على إيدى سلام ورقة
ومعايا ليل نهار
ما فى مرة قال لى لأه
يا فادية حرام عليكى
ضيعتيها بإديكى
قلبى غضبان عليكى
فى حياتى وفـ الممات
بس غالبنى السكات
والراس كان لها علاقة
منها كنت اشيل
وأمشى واحدة واحدة
جميل فى إيد جميل
أملاه بالغاز فى العودة
من عبد الله حمودة
والع طول الشتواية
ما أحس معاه ببرودة
دلوقتى غابت الفرحة
وسعادة كانت معهودة
يا فادية حرام عليكى
ضيعتيها بإديكى
قلبى غضبان عليكى
فى حياتى وفـ الممات
بس غالبنى السكات
من بعده ازاى اعيش
وبينا ذكريات
حاجات ساخنة أكيد
وشاهدة الكوبايات
والوقفة جنب منه
ومزعلنيشى يوم
لا عمره هب فيا
ولا يوم سمعنى زوم
وداع وداع يا دنيا
وداع ما عليكى لوم
يا فادية حرام عليكى
ضيعتيها بإديكى
قلبى غضبان عليكى
فى حياتى وفـ الممات
بس غالبنى السكات
--------------------
هانئ الجمل
راس الوابور
العرض الشجري